໖. ກິເລສສໍຍຸຕ຺ຕໍ

໑. ຈກ຺ຂຸສຸຕ຺ຕໍ

໓໒໒. ສາວຕ຺ຖິນິທານໍ. ‘‘ໂຍ, ຠິກ຺ຂເວ, ຈກ຺ຂຸສ຺ມິໍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ໂຍ ໂສຕສ຺ມິໍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ໂຍ ຆານສ຺ມິໍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ໂຍ ຊິວ຺ຫາຍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ໂຍ ກາຍສ຺ມິໍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ໂຍ ມນສ຺ມິໍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ຍໂຕ ໂຂ, ຠິກ຺ຂເວ, ຠິກ຺ຂຸໂນ ອິເມສຸ ຉສຸ ຐາເນສຸ ເຈຕໂສ ອຸປກ຺ກິເລໂສ ປຫີໂນ ໂຫຕິ, ເນກ຺ຂມ຺ມນິນ຺ນຎ຺ຈສ຺ສ ຈິຕ຺ຕໍ ໂຫຕິ. ເນກ຺ຂມ຺ມປຣິຠາວິຕໍ ຈິຕ຺ຕໍ ກມ຺ມນິຍໍ ຂາຍຕິ, ອຠິຎ຺ຎາ ສຈ຺ຉິກຣຓີເຍສຸ ຘມ຺ເມສູ’’ຕິ. ປຐມໍ.

໒. ຣູປສຸຕ຺ຕໍ

໓໒໓. ສາວຕ຺ຖິນິທານໍ. ‘‘ໂຍ, ຠິກ຺ຂເວ, ຣູເປສຸ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ໂຍ ສທ຺ເທສຸ… ໂຍ ຄນ຺ເຘສຸ… ໂຍ ຣເສສຸ… ໂຍ ໂຜຏ຺ຐພ຺ເພສຸ… ໂຍ ຘມ຺ເມສຸ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ຍໂຕ ໂຂ, ຠິກ຺ຂເວ, ຠິກ຺ຂຸໂນ ອິເມສຸ ຉສຸ ຐາເນສຸ ເຈຕໂສ ອຸປກ຺ກິເລໂສ ປຫີໂນ ໂຫຕິ, ເນກ຺ຂມ຺ມນິນ຺ນຎ຺ຈສ຺ສ ຈິຕ຺ຕໍ ໂຫຕິ. ເນກ຺ຂມ຺ມປຣິຠາວິຕໍ ຈິຕ຺ຕໍ ກມ຺ມນິຍໍ ຂາຍຕິ, ອຠິຎ຺ຎາ ສຈ຺ຉິກຣຓີເຍສຸ ຘມ຺ເມສູ’’ຕິ. ທຸຕິຍໍ.

໓. ວິຎ຺ຎາຓສຸຕ຺ຕໍ

໓໒໔. ສາວຕ຺ຖິນິທານໍ. ‘‘ໂຍ, ຠິກ຺ຂເວ, ຈກ຺ຂຸວິຎ຺ຎາຓສ຺ມິໍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ໂຍ ໂສຕວິຎ຺ຎາຓສ຺ມິໍ… ໂຍ ຆານວິຎ຺ຎາຓສ຺ມິໍ… ໂຍ ຊິວ຺ຫາວິຎ຺ຎາຓສ຺ມິໍ… ໂຍ ກາຍວິຎ຺ຎາຓສ຺ມິໍ… ໂຍ ມໂນວິຎ຺ຎາຓສ຺ມິໍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ຍໂຕ ໂຂ, ຠິກ຺ຂເວ, ຠິກ຺ຂຸໂນ ອິເມສຸ ຉສຸ ຐາເນສຸ ເຈຕໂສ ອຸປກ຺ກິເລໂສ ປຫີໂນ ໂຫຕິ, ເນກ຺ຂມ຺ມນິນ຺ນຎ຺ຈສ຺ສ ຈິຕ຺ຕໍ ໂຫຕິ. ເນກ຺ຂມ຺ມປຣິຠາວິຕໍ ຈິຕ຺ຕໍ ກມ຺ມນິຍໍ ຂາຍຕິ, ອຠິຎ຺ຎາ ສຈ຺ຉິກຣຓີເຍສຸ ຘມ຺ເມສູ’’ຕິ. ຕຕິຍໍ.

໔. ສມ຺ຜສ຺ສສຸຕ຺ຕໍ

໓໒໕. ສາວຕ຺ຖິນິທານໍ. ‘‘ໂຍ, ຠິກ຺ຂເວ, ຈກ຺ຂຸສມ຺ຜສ຺ສສ຺ມິໍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ໂຍ ໂສຕສມ຺ຜສ຺ສສ຺ມິໍ… ໂຍ ຆານສມ຺ຜສ຺ສສ຺ມິໍ… ໂຍ ຊິວ຺ຫາສມ຺ຜສ຺ສສ຺ມິໍ… ໂຍ ກາຍສມ຺ຜສ຺ສສ຺ມິໍ… ໂຍ ມໂນສມ຺ຜສ຺ສສ຺ມິໍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ຍໂຕ ໂຂ, ຠິກ຺ຂເວ, ຠິກ຺ຂຸໂນ…ເປ… ອຠິຎ຺ຎາ ສຈ຺ຉິກຣຓີເຍສຸ ຘມ຺ເມສູ’’ຕິ. ຈຕຸຕ຺ຖໍ.

໕. ສມ຺ຜສ຺ສຊສຸຕ຺ຕໍ

໓໒໖. ສາວຕ຺ຖິນິທານໍ. ‘‘ໂຍ, ຠິກ຺ຂເວ, ຈກ຺ຂຸສມ຺ຜສ຺ສຊາຍ ເວທນາຍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ໂຍ ໂສຕສມ຺ຜສ຺ສຊາຍ ເວທນາຍ… ໂຍ ຆານສມ຺ຜສ຺ສຊາຍ ເວທນາຍ… ໂຍ ຊິວ຺ຫາສມ຺ຜສ຺ສຊາຍ ເວທນາຍ… ໂຍ ກາຍສມ຺ຜສ຺ສຊາຍ ເວທນາຍ… ໂຍ ມໂນສມ຺ຜສ຺ສຊາຍ ເວທນາຍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ຍໂຕ ໂຂ, ຠິກ຺ຂເວ, ຠິກ຺ຂຸໂນ…ເປ… ອຠິຎ຺ຎາ ສຈ຺ຉິກຣຓີເຍສຸ ຘມ຺ເມສູ’’ຕິ. ປຎ຺ຈມໍ.

໖. ສຎ຺ຎາສຸຕ຺ຕໍ

໓໒໗. ສາວຕ຺ຖິນິທານໍ. ‘‘ໂຍ, ຠິກ຺ຂເວ, ຣູປສຎ຺ຎາຍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ໂຍ ສທ຺ທສຎ຺ຎາຍ… ໂຍ ຄນ຺ຘສຎ຺ຎາຍ… ໂຍ ຣສສຎ຺ຎາຍ… ໂຍ ໂຜຏ຺ຐພ຺ພສຎ຺ຎາຍ… ໂຍ ຘມ຺ມສຎ຺ຎາຍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ຍໂຕ ໂຂ, ຠິກ຺ຂເວ, ຠິກ຺ຂຸໂນ…ເປ… ອຠິຎ຺ຎາ ສຈ຺ຉິກຣຓີເຍສຸ ຘມ຺ເມສູ’’ຕິ. ຉຏ຺ຐໍ.

໗. ສຎ຺ເຈຕນາສຸຕ຺ຕໍ

໓໒໘. ສາວຕ຺ຖິນິທານໍ. ‘‘ໂຍ, ຠິກ຺ຂເວ, ຣູປສຎ຺ເຈຕນາຍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ໂຍ ສທ຺ທສຎ຺ເຈຕນາຍ… ໂຍ ຄນ຺ຘສຎ຺ເຈຕນາຍ… ໂຍ ຣສສຎ຺ເຈຕນາຍ… ໂຍ ໂຜຏ຺ຐພ຺ພສຎ຺ເຈຕນາຍ… ໂຍ ຘມ຺ມສຎ຺ເຈຕນາຍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ຍໂຕ ໂຂ, ຠິກ຺ຂເວ, ຠິກ຺ຂຸໂນ…ເປ… ອຠິຎ຺ຎາ ສຈ຺ຉິກຣຓີເຍສຸ ຘມ຺ເມສູ’’ຕິ. ສຕ຺ຕມໍ.

໘. ຕຓ຺ຫາສຸຕ຺ຕໍ

໓໒໙. ສາວຕ຺ຖິນິທານໍ. ‘‘ໂຍ, ຠິກ຺ຂເວ, ຣູປຕຓ຺ຫາຍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ໂຍ ສທ຺ທຕຓ຺ຫາຍ… ໂຍ ຄນ຺ຘຕຓ຺ຫາຍ… ໂຍ ຣສຕຓ຺ຫາຍ… ໂຍ ໂຜຏ຺ຐພ຺ພຕຓ຺ຫາຍ… ໂຍ ຘມ຺ມຕຓ຺ຫາຍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ຍໂຕ ໂຂ, ຠິກ຺ຂເວ, ຠິກ຺ຂຸໂນ…ເປ… ອຠິຎ຺ຎາ ສຈ຺ຉິກຣຓີເຍສຸ ຘມ຺ເມສູ’’ຕິ. ອຏ຺ຐມໍ.

໙. ຘາຕຸສຸຕ຺ຕໍ

໓໓໐. ສາວຕ຺ຖິນິທານໍ. ‘‘ໂຍ, ຠິກ຺ຂເວ, ປຖວີຘາຕຸຍາ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ໂຍ ອາໂປຘາຕຸຍາ… ໂຍ ເຕໂຊຘາຕຸຍາ… ໂຍ ວາໂຍຘາຕຸຍາ… ໂຍ ອາກາສຘາຕຸຍາ… ໂຍ ວິຎ຺ຎາຓຘາຕຸຍາ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ຍໂຕ ໂຂ, ຠິກ຺ຂເວ, ຠິກ຺ຂຸໂນ ອິເມສຸ ຉສຸ ຐາເນສຸ ເຈຕໂສ ອຸປກ຺ກິເລໂສ ປຫີໂນ ໂຫຕິ, ເນກ຺ຂມ຺ມນິນ຺ນຎ຺ຈສ຺ສ ຈິຕ຺ຕໍ ໂຫຕິ. ເນກ຺ຂມ຺ມປຣິຠາວິຕໍ ຈິຕ຺ຕໍ ກມ຺ມນິຍໍ ຂາຍຕິ, ອຠິຎ຺ຎາ ສຈ຺ຉິກຣຓີເຍສຸ ຘມ຺ເມສູ’’ຕິ. ນວມໍ.

໑໐. ຂນ຺ຘສຸຕ຺ຕໍ

໓໓໑. ສາວຕ຺ຖິນິທານໍ. ‘‘ໂຍ, ຠິກ຺ຂເວ, ຣູປສ຺ມິໍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ…ເປ… ໂຍ ວິຎ຺ຎາຓສ຺ມິໍ ຉນ຺ທຣາໂຄ, ຈິຕ຺ຕສ຺ເສໂສ ອຸປກ຺ກິເລໂສ. ຍໂຕ ໂຂ, ຠິກ຺ຂເວ, ຠິກ຺ຂຸໂນ ອິເມສຸ ປຎ຺ຈສຸ ຐາເນສຸ ເຈຕໂສ ອຸປກ຺ກິເລໂສ ປຫີໂນ ໂຫຕິ, ເນກ຺ຂມ຺ມນິນ຺ນຎ຺ຈສ຺ສ ຈິຕ຺ຕໍ ໂຫຕິ. ເນກ຺ຂມ຺ມປຣິຠາວິຕໍ ຈິຕ຺ຕໍ ກມ຺ມນິຍໍ ຂາຍຕິ, ອຠິຎ຺ຎາ ສຈ຺ຉິກຣຓີເຍສຸ ຘມ຺ເມສູ’’ຕິ. ທສມໍ.

ກິເລສສໍຍຸຕ຺ຕໍ ສມຕ຺ຕໍ.