໑໐. ຂນ຺ຘສຸຕ຺ຕໍ

໓໑໑. ສາວຕ຺ຖິນິທານໍ. ‘‘ຣູປໍ, ຠິກ຺ຂເວ, ອນິຈ຺ຈໍ ວິປຣິຓາມິ ອຎ຺ຎຖາຠາວິ; ເວທນາ ອນິຈ຺ຈາ ວິປຣິຓາມີ ອຎ຺ຎຖາຠາວີ; ສຎ຺ຎາ… ສງ຺ຂາຣາ ອນິຈ຺ຈາ ວິປຣິຓາມິໂນ ອຎ຺ຎຖາຠາວິໂນ; ວິຎ຺ຎາຓໍ ອນິຈ຺ຈໍ ວິປຣິຓາມິ ອຎ຺ຎຖາຠາວິ. ໂຍ, ຠິກ຺ຂເວ, ອິເມ ຘມ຺ເມ ເອວໍ ສທ຺ທຫຕິ ອຘິມຸຈ຺ຈຕິ, ອຍໍ ວຸຈ຺ຈຕິ ສທ຺ຘານຸສາຣີ, ໂອກ຺ກນ຺ໂຕ ສມ຺ມຕ຺ຕນິຍາມໍ, ສປ຺ປຸຣິສຠູມິໍ ໂອກ຺ກນ຺ໂຕ, ວີຕິວຕ຺ໂຕ ປຸຖຸຊ຺ຊນຠູມິໍ; ອຠພ຺ໂພ ຕໍ ກມ຺ມໍ ກາຕຸໍ, ຍໍ ກມ຺ມໍ ກຕ຺ວາ ນິຣຍໍ ວາ ຕິຣຈ຺ຉານໂຍນິໍ ວາ ເປຕ຺ຕິວິສຍໍ ວາ ອຸປປຊ຺ເຊຍ຺ຍ; ອຠພ຺ໂພ ຈ ຕາວ ກາລໍ ກາຕຸໍ ຍາວ ນ ໂສຕາປຕ຺ຕິຜລໍ ສຈ຺ຉິກໂຣຕິ’’.

‘‘ຍສ຺ສ ໂຂ, ຠິກ຺ຂເວ, ອິເມ ຘມ຺ມາ ເອວໍ ປຎ຺ຎາຍ ມຕ຺ຕໂສ ນິຊ຺ຌານໍ ຂມນ຺ຕິ, ອຍໍ ວຸຈ຺ຈຕິ – ‘ຘມ຺ມານຸສາຣີ, ໂອກ຺ກນ຺ໂຕ ສມ຺ມຕ຺ຕນິຍາມໍ, ສປ຺ປຸຣິສຠູມິໍ ໂອກ຺ກນ຺ໂຕ, ວີຕິວຕ຺ໂຕ ປຸຖຸຊ຺ຊນຠູມິໍ; ອຠພ຺ໂພ ຕໍ ກມ຺ມໍ ກາຕຸໍ, ຍໍ ກມ຺ມໍ ກຕ຺ວາ ນິຣຍໍ ວາ ຕິຣຈ຺ຉານໂຍນິໍ ວາ ເປຕ຺ຕິວິສຍໍ ວາ ອຸປປຊ຺ເຊຍ຺ຍ; ອຠພ຺ໂພ ຈ ຕາວ ກາລໍ ກາຕຸໍ ຍາວ ນ ໂສຕາປຕ຺ຕິຜລໍ ສຈ຺ຉິກໂຣຕິ’. ໂຍ, ຠິກ຺ຂເວ, ອິເມ ຘມ຺ເມ ເອວໍ ປຊານາຕິ ເອວໍ ປສ຺ສຕິ, ອຍໍ ວຸຈ຺ຈຕິ – ‘ໂສຕາປນ຺ໂນ ອວິນິປາຕຘມ຺ໂມ ນິຍໂຕ ສມ຺ໂພຘິປຣາຍໂນ’’’ຕິ. ທສມໍ.

ໂອກ຺ກນ຺ຕສໍຍຸຕ຺ຕໍ [ໂອກ຺ກນ຺ຕິກສໍຍຸຕ຺ຕໍ (ປີ. ກ.)] ສມຕ຺ຕໍ.