໕໕. ສາຕຈ຺ຈມູລກສປ຺ປາຍກາຣີສຸຕ຺ຕໍ

໗໑໖. ສາວຕ຺ຖິນິທານໍ. ‘‘ຈຕາໂຣເມ, ຠິກ຺ຂເວ, ຌາຍີ. ກຕເມ ຈຕ຺ຕາໂຣ? ອິຘ, ຠິກ຺ຂເວ, ເອກຈ຺ໂຈ ຌາຍີ ສມາຘິສ຺ມິໍ ສາຕຈ຺ຈກາຣີ ໂຫຕິ, ນ ສມາຘິສ຺ມິໍ ສປ຺ປາຍກາຣີ. ອິຘ ປນ, ຠິກ຺ຂເວ, ເອກຈ຺ໂຈ ຌາຍີ ສມາຘິສ຺ມິໍ ສປ຺ປາຍກາຣີ ໂຫຕິ, ນ ສມາຘິສ຺ມິໍ ສາຕຈ຺ຈກາຣີ. ອິຘ ປນ, ຠິກ຺ຂເວ, ເອກຈ຺ໂຈ ຌາຍີ ເນວ ສມາຘິສ຺ມິໍ ສາຕຈ຺ຈກາຣີ ໂຫຕິ, ນ ຈ ສມາຘິສ຺ມິໍ ສປ຺ປາຍກາຣີ. ອິຘ ປນ, ຠິກ຺ຂເວ, ເອກຈ຺ໂຈ ຌາຍີ ສມາຘິສ຺ມິໍ ສາຕຈ຺ຈກາຣີ ຈ ໂຫຕິ, ສມາຘິສ຺ມິໍ ສປ຺ປາຍກາຣີ ຈ. ຕຕ຺ຣ, ຠິກ຺ຂເວ, ຍ຺ວາຍໍ ຌາຍີ ສມາຘິສ຺ມິໍ ສາຕຈ຺ຈກາຣີ ຈ ໂຫຕິ ສມາຘິສ຺ມິໍ ສປ຺ປາຍກາຣີ ຈ ອຍໍ ອິເມສໍ ຈຕຸນ຺ນໍ ຌາຍີນໍ ອຄ຺ໂຄ ຈ ເສຏ຺ໂຐ ຈ ໂມກ຺ໂຂ ຈ ອຸຕ຺ຕໂມ ຈ ປວໂຣ ຈ. ເສຍ຺ຍຖາປິ, ຠິກ຺ຂເວ, ຄວາ ຂີຣໍ, ຂີຣມ຺ຫາ ທຘິ, ທຘິມ຺ຫາ ນວນີຕໍ, ນວນີຕມ຺ຫາ ສປ຺ປິ, ສປ຺ປິມ຺ຫາ ສປ຺ປິມຓ຺ໂຑ ຕຕ຺ຣ ອຄ຺ຄມກ຺ຂາຍຕິ; ເອວເມວ ໂຂ, ຠິກ຺ຂເວ, ຍ຺ວາຍໍ ຌາຍີ ສມາຘິສ຺ມິໍ ສາຕຈ຺ຈກາຣີ ຈ ໂຫຕິ, ສມາຘິສ຺ມິໍ ສປ຺ປາຍກາຣີ ອຍໍ ອິເມສໍ ຈຕຸນ຺ນໍ ຌາຍີນໍ ອຄ຺ໂຄ ຈ ເສຏ຺ໂຐ ຈ ໂມກ຺ໂຂ ຈ ອຸຕ຺ຕໂມ ຈ ປວໂຣ ຈາ’’ຕິ. ອິທມໂວຈ ຠຄວາ. ອຕ຺ຕມນາ ເຕ ຠິກ຺ຂູ ຠຄວໂຕ ຠາສິຕໍ ອຠິນນ຺ທຸນ຺ຕິ. ປຎ຺ຈປຎ຺ຎາສມໍ. (ຍຖາ ປຎ຺ຈປຎ຺ຎາສໍ ເວຍ຺ຍາກຣຓານິ ໂຫນ຺ຕິ ຕຖາ ວິຕ຺ຖາເຣຕພ຺ພານິ.)

ຌານສໍຍຸຕ຺ຕໍ [ສມາຘິສໍຍຸຕ຺ຕໍ (ສ຺ຍາ. ກໍ.)] ສມຕ຺ຕໍ.