໑. ຣູປອຎ຺ຎາຓສຸຕ຺ຕໍ

໖໐໗. ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ອຖ ໂຂ ວຈ຺ຉໂຄຕ຺ໂຕ ປຣິພ຺ພາຊໂກ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວຕາ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ວຈ຺ຉໂຄຕ຺ໂຕ ປຣິພ຺ພາຊໂກ ຠຄວນ຺ຕໍ ເອຕທໂວຈ – ‘‘ໂກ ນຸ ໂຂ, ໂຠ ໂຄຕມ, ເຫຕຸ, ໂກ ປຈ຺ຈໂຍ, ຍານິມານິ [ເຍນິມານິ (?)] ອເນກວິຫິຕານິ ທິຏ຺ຐິຄຕານິ ໂລເກ ອຸປ຺ປຊ຺ຊນ຺ຕິ – ສສ຺ສໂຕ ໂລໂກຕິ ວາ, ອສສ຺ສໂຕ ໂລໂກຕິ ວາ, ອນ຺ຕວາ ໂລໂກຕິ ວາ, ອນນ຺ຕວາ ໂລໂກຕິ ວາ, ຕໍ ຊີວໍ ຕໍ ສຣີຣນ຺ຕິ ວາ, ອຎ຺ຎໍ ຊີວໍ ອຎ຺ຎໍ ສຣີຣນ຺ຕິ ວາ, ໂຫຕິ ຕຖາຄໂຕ ປຣໍ ມຣຓາຕິ ວາ, ນ ໂຫຕິ ຕຖາຄໂຕ ປຣໍ ມຣຓາຕິ ວາ, ໂຫຕິ ຈ ນ ຈ ໂຫຕິ ຕຖາຄໂຕ ປຣໍ ມຣຓາຕິ ວາ, ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາຕິ ວາ’’ຕິ? ‘‘ຣູເປ ໂຂ, ວຈ຺ຉ, ອຎ຺ຎາຓາ, ຣູປສມຸທເຍ ອຎ຺ຎາຓາ, ຣູປນິໂຣເຘ ອຎ຺ຎາຓາ, ຣູປນິໂຣຘຄາມິນິຍາ ປຏິປທາຍ ອຎ຺ຎາຓາ; ເອວມິມານິ ອເນກວິຫິຕານິ ທິຏ຺ຐິຄຕານິ ໂລເກ ອຸປ຺ປຊ຺ຊນ຺ຕິ – ສສ຺ສໂຕ ໂລໂກຕິ ວາ…ເປ… ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາຕິ ວາຕິ. ອຍໍ ໂຂ, ວຈ຺ຉ, ເຫຕຸ, ອຍໍ ປຈ຺ຈໂຍ, ຍານິມານິ [ເຍນ (ສີ.), ເຍນິມານິ (?)] ອເນກວິຫິຕານິ ທິຏ຺ຐິຄຕານິ ໂລເກ ອຸປ຺ປຊ຺ຊນ຺ຕິ – ສສ຺ສໂຕ ໂລໂກຕິ ວາ, ອສສ຺ສໂຕ ໂລໂກຕິ ວາ…ເປ… ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາຕິ ວາ’’ຕິ. ປຐມໍ.