໒. ມຎ຺ຎມານສຸຕ຺ຕໍ

໖໔. ສາວຕ຺ຖິນິທານໍ. ອຖ ໂຂ ອຎ຺ຎຕໂຣ ຠິກ຺ຂຸ…ເປ… ເອກມນ຺ຕໍ ນິສິນ຺ໂນ ໂຂ ໂສ ຠິກ຺ຂຸ ຠຄວນ຺ຕໍ ເອຕທໂວຈ – ‘‘ສາຘຸ ເມ, ຠນ຺ເຕ, ຠຄວາ ສໍຂິຕ຺ເຕນ ຘມ຺ມໍ ເທເສຕຸ…ເປ… ອາຕາປີ ປຫິຕຕ຺ໂຕ ວິຫເຣຍ຺ຍ’’ນ຺ຕິ. ‘‘ມຎ຺ຎມາໂນ ໂຂ, ຠິກ຺ຂຸ, ພທ຺ໂຘ ມາຣສ຺ສ; ອມຎ຺ຎມາໂນ ມຸຕ຺ໂຕ ປາປິມໂຕ’’ຕິ. ‘‘ອຎ຺ຎາຕໍ ຠຄວາ, ອຎ຺ຎາຕໍ ສຸຄຕາ’’ຕິ.

‘‘ຍຖາ ກຖໍ ປນ ຕ຺ວໍ, ຠິກ຺ຂຸ, ມຍາ ສໍຂິຕ຺ເຕນ ຠາສິຕສ຺ສ ວິຕ຺ຖາເຣນ ອຕ຺ຖໍ ອາຊານາສີ’’ຕິ? ‘‘ຣູປໍ ໂຂ, ຠນ຺ເຕ, ມຎ຺ຎມາໂນ ພທ຺ໂຘ ມາຣສ຺ສ; ອມຎ຺ຎມາໂນ ມຸຕ຺ໂຕ ປາປິມໂຕ. ເວທນໍ… ສຎ຺ຎໍ… ສງ຺ຂາເຣ… ວິຎ຺ຎາຓໍ ມຎ຺ຎມາໂນ ພທ຺ໂຘ ມາຣສ຺ສ; ອມຎ຺ຎມາໂນ ມຸຕ຺ໂຕ ປາປິມໂຕ. ອິມສ຺ສ ຂ຺ວາຫໍ, ຠນ຺ເຕ, ຠຄວຕາ ສໍຂິຕ຺ເຕນ ຠາສິຕສ຺ສ ເອວໍ ວິຕ຺ຖາເຣນ ອຕ຺ຖໍ ອາຊານາມີ’’ຕິ.

‘‘ສາຘຸ ສາຘຸ, ຠິກ຺ຂຸ! ສາຘຸ ໂຂ ຕ຺ວໍ, ຠິກ຺ຂຸ, ມຍາ ສໍຂິຕ຺ເຕນ ຠາສິຕສ຺ສ ວິຕ຺ຖາເຣນ ອຕ຺ຖໍ ອາຊານາສິ. ຣູປໍ ໂຂ, ຠິກ຺ຂຸ, ມຎ຺ຎມາໂນ ພທ຺ໂຘ ມາຣສ຺ສ; ອມຎ຺ຎມາໂນ ມຸຕ຺ໂຕ ປາປິມໂຕ. ເວທນໍ… ສຎ຺ຎໍ… ສງ຺ຂາເຣ… ວິຎ຺ຎາຓໍ ມຎ຺ຎມາໂນ ພທ຺ໂຘ ມາຣສ຺ສ; ອມຎ຺ຎມາໂນ ມຸຕ຺ໂຕ ປາປິມໂຕ. ອິມສ຺ສ ໂຂ, ຠິກ຺ຂຸ, ມຍາ ສໍຂິຕ຺ເຕນ ຠາສິຕສ຺ສ ເອວໍ ວິຕ຺ຖາເຣນ ອຕ຺ໂຖ ທຏ຺ຐພ຺ໂພ’’ຕິ…ເປ… ອຎ຺ຎຕໂຣ ຈ ປນ ໂສ ຠິກ຺ຂຸ ອຣຫຕໍ ອໂຫສີຕິ. ທຸຕິຍໍ.