໔. ທຸຕິຍຫາລິທ຺ທິການິສຸຕ຺ຕໍ

໔. ເອວໍ ເມ ສຸຕໍ – ເອກໍ ສມຍໍ ອາຍສ຺ມາ ມຫາກຈ຺ຈາໂນ ອວນ຺ຕີສຸ ວິຫຣຕິ ກຸຣຣຆເຣ ປປາເຕ ປພ຺ພເຕ. ອຖ ໂຂ ຫາລິທ຺ທິການິ ຄຫປຕິ ເຍນາຍສ຺ມາ ມຫາກຈ຺ຈາໂນ…ເປ… ເອກມນ຺ຕໍ ນິສິນ຺ໂນ ໂຂ ຫາລິທ຺ທິການິ ຄຫປຕິ ອາຍສ຺ມນ຺ຕໍ ມຫາກຈ຺ຈານໍ ເອຕທໂວຈ – ‘‘ວຸຕ຺ຕມິທໍ, ຠນ຺ເຕ, ຠຄວຕາ ສກ຺ກປຎ຺ເຫ – ‘ເຍ ເຕ ສມຓພ຺ຣາຫ຺ມຓາ ຕຓ຺ຫາສງ຺ຂຍວິມຸຕ຺ຕາ, ເຕ ອຈ຺ຈນ຺ຕນິຏ຺ຐາ ອຈ຺ຈນ຺ຕໂຍຄກ຺ເຂມິໂນ ອຈ຺ຈນ຺ຕພ຺ຣຫ຺ມຈາຣິໂນ ອຈ຺ຈນ຺ຕປຣິໂຍສານາ ເສຏ຺ຐາ ເທວມນຸສ຺ສານ’’’ນ຺ຕິ.

‘‘ອິມສ຺ສ ນຸ ໂຂ, ຠນ຺ເຕ, ຠຄວຕາ ສໍຂິຕ຺ເຕນ ຠາສິຕສ຺ສ ກຖໍ ວິຕ຺ຖາເຣນ ອຕ຺ໂຖ ທຏ຺ຐພ຺ໂພ’’ຕິ?

‘‘ຣູປຘາຕຸຍາ ໂຂ, ຄຫປຕິ, ໂຍ ຉນ຺ໂທ ໂຍ ຣາໂຄ ຍາ ນນ຺ທີ ຍາ ຕຓ຺ຫາ ເຍ ອຸປຍຸປາທານາ ເຈຕໂສ ອຘິຏ຺ຐານາຠິນິເວສານຸສຍາ, ເຕສໍ ຂຍາ ວິຣາຄາ ນິໂຣຘາ ຈາຄາ ປຏິນິສ຺ສຄ຺ຄາ ຈິຕ຺ຕໍ ສຸວິມຸຕ຺ຕນ຺ຕິ ວຸຈ຺ຈຕິ.

‘‘ເວທນາຘາຕຸຍາ ໂຂ, ຄຫປຕິ… ສຎ຺ຎາຘາຕຸຍາ ໂຂ, ຄຫປຕິ… ສງ຺ຂາຣຘາຕຸຍາ ໂຂ, ຄຫປຕິ… ວິຎ຺ຎາຓຘາຕຸຍາ ໂຂ, ຄຫປຕິ, ໂຍ ຉນ຺ໂທ ໂຍ ຣາໂຄ ຍາ ນນ຺ທີ ຍາ ຕຓ຺ຫາ ເຍ ອຸປຍຸປາທານາ ເຈຕໂສ ອຘິຏ຺ຐານາຠິນິເວສານຸສຍາ, ເຕສໍ ຂຍາ ວິຣາຄາ ນິໂຣຘາ ຈາຄາ ປຏິນິສ຺ສຄ຺ຄາ ຈິຕ຺ຕໍ ສຸວິມຸຕ຺ຕນ຺ຕິ ວຸຈ຺ຈຕິ.

‘‘ອິຕິ ໂຂ, ຄຫປຕິ, ຍໍ ຕໍ ວຸຕ຺ຕໍ ຠຄວຕາ ສກ຺ກປຎ຺ເຫ – ‘ເຍ ເຕ ສມຓພ຺ຣາຫ຺ມຓາ ຕຓ຺ຫາສງ຺ຂຍວິມຸຕ຺ຕາ ເຕ ອຈ຺ຈນ຺ຕນິຏ຺ຐາ ອຈ຺ຈນ຺ຕໂຍຄກ຺ເຂມິໂນ ອຈ຺ຈນ຺ຕພ຺ຣຫ຺ມຈາຣິໂນ ອຈ຺ຈນ຺ຕປຣິໂຍສານາ ເສຏ຺ຐາ ເທວມນຸສ຺ສານ’’’ນ຺ຕິ.

‘‘ອິມສ຺ສ ໂຂ, ຄຫປຕິ, ຠຄວຕາ ສໍຂິຕ຺ເຕນ ຠາສິຕສ຺ສ ເອວໍ ວິຕ຺ຖາເຣນ ອຕ຺ໂຖ ທຏ຺ຐພ຺ໂພ’’ຕິ. ຈຕຸຕ຺ຖໍ.