໗. ອາຓິສຸຕ຺ຕໍ

໒໒໙. ສາວຕ຺ຖິຍໍ ວິຫຣຕິ…ເປ… ‘‘ຠູຕປຸພ຺ພໍ, ຠິກ຺ຂເວ, ທສາຣຫານໍ ອານໂກ [ອາຓໂກ (ສີ.)] ນາມ ມຸທິງ຺ໂຄ ອໂຫສິ. ຕສ຺ສ ທສາຣຫາ ອານເກ ຆຏິເຕ ອຎ຺ຎໍ ອາຓິໍ ໂອທຫິໍສຸ. ອຫຸ ໂຂ ໂສ, ຠິກ຺ຂເວ, ສມໂຍ ຍໍ ອານກສ຺ສ ມຸທິງ຺ຄສ຺ສ ໂປຣາຓໍ ໂປກ຺ຂຣຜລກໍ ອນ຺ຕຣຘາຍິ. ອາຓິສງ຺ຆາໂຏວ ອວສິສ຺ສິ. ເອວເມວ ໂຂ, ຠິກ຺ຂເວ, ຠວິສ຺ສນ຺ຕິ ຠິກ຺ຂູ ອນາຄຕມທ຺ຘານໍ, ເຍ ເຕ ສຸຕ຺ຕນ຺ຕາ ຕຖາຄຕຠາສິຕາ ຄມ຺ຠີຣາ ຄມ຺ຠີຣຕ຺ຖາ ໂລກຸຕ຺ຕຣາ ສຸຎ຺ຎຕປ຺ປຏິສໍຍຸຕ຺ຕາ, ເຕສຸ ຠຎ຺ຎມາເນສຸ ນ ສຸສ຺ສູສິສ຺ສນ຺ຕິ ນ ໂສຕໍ ໂອທຫິສ຺ສນ຺ຕິ ນ ອຎ຺ຎາ ຈິຕ຺ຕໍ ອຸປຏ຺ຐາເປສ຺ສນ຺ຕິ ນ ຈ ເຕ ຘມ຺ເມ ອຸຄ຺ຄເຫຕພ຺ພໍ ປຣິຍາປຸຓິຕພ຺ພໍ ມຎ຺ຎິສ຺ສນ຺ຕິ’’.

‘‘ເຍ ປນ ເຕ ສຸຕ຺ຕນ຺ຕາ ກວິກຕາ ກາເວຍ຺ຍາ ຈິຕ຺ຕກ຺ຂຣາ ຈິຕ຺ຕພ຺ຍຎ຺ຊນາ ພາຫິຣກາ ສາວກຠາສິຕາ, ເຕສຸ ຠຎ຺ຎມາເນສຸ ສຸສ຺ສູສິສ຺ສນ຺ຕິ, ໂສຕໍ ໂອທຫິສ຺ສນ຺ຕິ, ອຎ຺ຎາ ຈິຕ຺ຕໍ ອຸປຏ຺ຐາເປສ຺ສນ຺ຕິ, ເຕ ຈ ຘມ຺ເມ ອຸຄ຺ຄເຫຕພ຺ພໍ ປຣິຍາປຸຓິຕພ຺ພໍ ມຎ຺ຎິສ຺ສນ຺ຕິ. ເອວເມເຕສໍ, ຠິກ຺ຂເວ, ສຸຕ຺ຕນ຺ຕານໍ ຕຖາຄຕຠາສິຕານໍ ຄມ຺ຠີຣານໍ ຄມ຺ຠີຣຕ຺ຖານໍ ໂລກຸຕ຺ຕຣານໍ ສຸຎ຺ຎຕປ຺ປຏິສໍຍຸຕ຺ຕານໍ ອນ຺ຕຣຘານໍ ຠວິສ຺ສຕິ. ຕສ຺ມາຕິຫ, ຠິກ຺ຂເວ, ເອວໍ ສິກ຺ຂິຕພ຺ພໍ – ‘ເຍ ເຕ ສຸຕ຺ຕນ຺ຕາ ຕຖາຄຕຠາສິຕາ ຄມ຺ຠີຣາ ຄມ຺ຠີຣຕ຺ຖາ ໂລກຸຕ຺ຕຣາ ສຸຎ຺ຎຕປ຺ປຏິສໍຍຸຕ຺ຕາ, ເຕສຸ ຠຎ຺ຎມາເນສຸ ສຸສ຺ສູສິສ຺ສາມ, ໂສຕໍ ໂອທຫິສ຺ສາມ, ອຎ຺ຎາ ຈິຕ຺ຕໍ ອຸປຏ຺ຐາເປສ຺ສາມ, ເຕ ຈ ຘມ຺ເມ ອຸຄ຺ຄເຫຕພ຺ພໍ ປຣິຍາປຸຓິຕພ຺ພໍ ມຎ຺ຎິສ຺ສາມາ’ຕິ. ເອວຎ຺ຫິ ໂວ, ຠິກ຺ຂເວ, ສິກ຺ຂິຕພ຺ພ’’ນ຺ຕິ. ສຕ຺ຕມໍ.