໕. ສຕ຺ຕິສຸຕ຺ຕໍ

໒໒໗. ສາວຕ຺ຖິຍໍ ວິຫຣຕິ…ເປ… ‘‘ເສຍ຺ຍຖາປິ, ຠິກ຺ຂເວ, ສຕ຺ຕິ ຕິຓ຺ຫຜລາ. ອຖ ປຸຣິໂສ ອາຄຈ຺ເຉຍ຺ຍ – ‘ອຫໍ ອິມໍ ສຕ຺ຕິໍ ຕິຓ຺ຫຜລໍ ປາຓິນາ ວາ ມຸຏ຺ຐິນາ ວາ ປຏິເລຓິສ຺ສາມິ ປຏິໂກຏ຺ຏິສ຺ສາມິ ປຏິວຏ຺ເຏສ຺ສາມີ’ຕິ. ຕໍ ກິໍ ມຎ຺ຎຖ, ຠິກ຺ຂເວ, ຠພ຺ໂພ ນຸ ໂຂ ໂສ ປຸຣິໂສ ອມຸໍ ສຕ຺ຕິໍ ຕິຓ຺ຫຜລໍ ປາຓິນາ ວາ ມຸຏ຺ຐິນາ ວາ ປຏິເລເຓຕຸໍ ປຏິໂກຏ຺ເຏຕຸໍ ປຏິວຏ຺ເຏຕຸ’’ນ຺ຕິ? ‘‘ໂນ ເຫຕໍ, ຠນ຺ເຕ’’. ‘‘ຕໍ ກິສ຺ສ ເຫຕຸ’’? ‘‘ອສຸ ຫິ, ຠນ຺ເຕ, ສຕ຺ຕິ ຕິຓ຺ຫຜລາ ນ ສຸກຣາ ປາຓິນາ ວາ ມຸຏ຺ຐິນາ ວາ ປຏິເລເຓຕຸໍ ປຏິໂກຏ຺ເຏຕຸໍ ປຏິວຏ຺ເຏຕຸໍ. ຍາວເທວ ຈ ປນ ໂສ ປຸຣິໂສ ກິລມຖສ຺ສ ວິຆາຕສ຺ສ ຠາຄີ ອສ຺ສາ’’ຕິ.

‘‘ເອວເມວ ໂຂ, ຠິກ຺ຂເວ, ຍສ຺ສ ກສ຺ສຈິ ຠິກ຺ຂຸໂນ ເມຕ຺ຕາເຈໂຕວິມຸຕ຺ຕິ ຠາວິຕາ ພຫຸລີກຕາ ຍານີກຕາ ວຕ຺ຖຸກຕາ ອນຸຏ຺ຐິຕາ ປຣິຈິຕາ ສຸສມາຣທ຺ຘາ, ຕສ຺ສ ເຈ ອມນຸສ຺ໂສ ຈິຕ຺ຕໍ ຂິປິຕພ຺ພໍ ມຎ຺ເຎຍ຺ຍ; ອຖ ໂຂ ສ຺ເວວ ອມນຸສ຺ໂສ ກິລມຖສ຺ສ ວິຆາຕສ຺ສ ຠາຄີ ອສ຺ສ. ຕສ຺ມາຕິຫ, ຠິກ຺ຂເວ, ເອວໍ ສິກ຺ຂິຕພ຺ພໍ – ‘ເມຕ຺ຕາ ໂນ ເຈໂຕວິມຸຕ຺ຕິ ຠາວິຕາ ຠວິສ຺ສຕິ ພຫຸລີກຕາ ຍານີກຕາ ວຕ຺ຖຸກຕາ ອນຸຏ຺ຐິຕາ ປຣິຈິຕາ ສຸສມາຣທ຺ຘາ’ຕິ. ເອວຎ຺ຫິ ໂວ, ຠິກ຺ຂເວ, ສິກ຺ຂິຕພ຺ພ’’ນ຺ຕິ. ປຎ຺ຈມໍ.