໑໑. ປາປສາມເຓຣີສຸຕ຺ຕໍ

໒໒໒. ‘‘ອິຘາຫໍ, ອາວຸໂສ, ຄິຊ຺ຌກູຏາ ປພ຺ພຕາ ໂອໂຣຫນ຺ໂຕ ອທ຺ທສໍ ສາມເຓຣິໍ ເວຫາສໍ ຄຈ຺ຉນ຺ຕິໍ. ຕສ຺ສາ ສງ຺ຆາຏິປິ ອາທິຕ຺ຕາ ສມ຺ປຊ຺ຊລິຕາ ສໂຊຕິຠູຕາ, ປຕ຺ໂຕປິ ອາທິຕ຺ໂຕ ສມ຺ປຊ຺ຊລິໂຕ ສໂຊຕິຠູໂຕ, ກາຍພນ຺ຘນມ຺ປິ ອາທິຕ຺ຕໍ ສມ຺ປຊ຺ຊລິຕໍ ສໂຊຕິຠູຕໍ, ກາໂຍປິ ອາທິຕ຺ໂຕ ສມ຺ປຊ຺ຊລິໂຕ ສໂຊຕິຠູໂຕ. ສາ ສຸທໍ ອຏ຺ຏສ຺ສຣໍ ກໂຣຕິ. ຕສ຺ສ ມຍ຺ຫໍ, ອາວຸໂສ, ເອຕທໂຫສິ – ‘ອຈ຺ຉຣິຍໍ ວຕ, ໂຠ, ອພ຺ຠຸຕໍ ວຕ, ໂຠ! ເອວຣູໂປປິ ນາມ ສຕ຺ໂຕ ຠວິສ຺ສຕິ! ເອວຣູໂປປິ ນາມ ຍກ຺ໂຂ ຠວິສ຺ສຕິ! ເອວຣູໂປປິ ນາມ ອຕ຺ຕຠາວປຏິລາໂຠ ຠວິສ຺ສຕີ’’’ຕິ!!

ອຖ ໂຂ ຠຄວາ ຠິກ຺ຂູ ອາມນ຺ເຕສິ – ‘‘ຈກ຺ຂຸຠູຕາ ວຕ, ຠິກ຺ຂເວ, ສາວກາ ວິຫຣນ຺ຕິ; ຎາຓຠູຕາ ວຕ, ຠິກ຺ຂເວ, ສາວກາ ວິຫຣນ຺ຕິ, ຍຕ຺ຣ ຫິ ນາມ ສາວໂກ ເອວຣູປໍ ຎສ຺ສຕິ ວາ ທກ຺ຂຕິ ວາ ສກ຺ຂິໍ ວາ ກຣິສ຺ສຕິ. ປຸພ຺ເພວ ເມ ສາ, ຠິກ຺ຂເວ, ສາມເຓຣີ ທິຏ຺ຐາ ອໂຫສິ. ອປິ ຈາຫໍ ນ ພ຺ຍາກາສິໍ. ອຫຎ຺ເຈຕໍ ພ຺ຍາກເຣຍ຺ຍໍ, ປເຣ ຈ ເມ ນ ສທ຺ທເຫຍ຺ຍຸໍ. ເຍ ເມ ນ ສທ຺ທເຫຍ຺ຍຸໍ, ເຕສໍ ຕໍ ອສ຺ສ ທີຆຣຕ຺ຕໍ ອຫິຕາຍ ທຸກ຺ຂາຍ. ເອສາ, ຠິກ຺ຂເວ, ສາມເຓຣີ ກສ຺ສປສ຺ສ ສມ຺ມາສມ຺ພຸທ຺ຘສ຺ສ ປາວຈເນ ປາປສາມເຓຣີ ອໂຫສິ. ສາ ຕສ຺ສ ກມ຺ມສ຺ສ ວິປາເກນ ພຫູນິ ວສ຺ສານິ ພຫູນິ ວສ຺ສສຕານິ ພຫູນິ ວສ຺ສສຫສ຺ສານິ ພຫູນິ ວສ຺ສສຕສຫສ຺ສານິ ນິຣເຍ ປຈ຺ຈິຕ຺ວາ ຕສ຺ເສວ ກມ຺ມສ຺ສ ວິປາກາວເສເສນ ເອວຣູປໍ ອຕ຺ຕຠາວປຏິລາຠໍ ປຏິສໍເວທຍຕີ’’ຕິ. ເອກາທສມໍ.

ທຸຕິໂຍ ວຄ຺ໂຄ.

ຕສ຺ສຸທ຺ທານໍ –

ກູເປ ນິມຸຄ຺ໂຄ ຫິ ໂສ ປາຣທາຣິໂກ;

ຄູຖຂາທິ ອຫຸ ທຸຏ຺ຐພ຺ຣາຫ຺ມໂຓ.

ນິຈ຺ຉວິຕ຺ຖິ ອຕິຈາຣິນີ ອຫຸ;

ມງ຺ຄຸລິຕ຺ຖິ ອຫຸ ອິກ຺ຂຓິຕ຺ຖິກາ.

ໂອກິລິນິ ສປຕ຺ຕງ຺ຄາໂຣກິຣິ;

ສີສຈ຺ຉິນ຺ໂນ ອຫຸ ໂຈຣຆາຕໂກ.

ຠິກ຺ຂຸ ຠິກ຺ຂຸນີ ສິກ຺ຂມານາ;

ສາມເຓໂຣ ອຖ ສາມເຓຣິກາ.

ກສ຺ສປສ຺ສ ວິນຍສ຺ມິໍ ປພ຺ພຊ຺ຊໍ;

ປາປກມ຺ມໍ ກຣິໍສຸ ຕາວເທຕິ.

ລກ຺ຂຓສໍຍຸຕ຺ຕໍ ສມຕ຺ຕໍ.