໙. ເວຣມ຺ຠສຸຕ຺ຕໍ

໑໖໕. ສາວຕ຺ຖິຍໍ ວິຫຣຕິ…ເປ… ‘‘ທາຣຸໂຓ, ຠິກ຺ຂເວ, ລາຠສກ຺ກາຣສິໂລໂກ…ເປ… ອຘິຄມາຍ. ອຸປຣິ, ຠິກ຺ຂເວ, ອາກາເສ ເວຣມ຺ຠາ [ເວຣມ຺ພາ (ສີ. ປີ.)] ນາມ ວາຕາ ວາຍນ຺ຕິ. ຕຕ຺ຖ ໂຍ ປກ຺ຂີ ຄຈ຺ຉຕິ ຕເມນໍ ເວຣມ຺ຠາ ວາຕາ ຂິປນ຺ຕິ. ຕສ຺ສ ເວຣມ຺ຠວາຕກ຺ຂິຕ຺ຕສ຺ສ ອຎ຺ເຎເນວ ປາທາ ຄຈ຺ຉນ຺ຕິ, ອຎ຺ເຎນ ປກ຺ຂາ ຄຈ຺ຉນ຺ຕິ, ອຎ຺ເຎນ ສີສໍ ຄຈ຺ຉຕິ, ອຎ຺ເຎນ ກາໂຍ ຄຈ຺ຉຕິ. ເອວເມວ ໂຂ, ຠິກ຺ຂເວ, ອິເຘກຈ຺ໂຈ ຠິກ຺ຂຸ ລາຠສກ຺ກາຣສິໂລເກນ ອຠິຠູໂຕ ປຣິຍາທິຓ຺ຓຈິຕ຺ໂຕ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ຄາມໍ ວາ ນິຄມໍ ວາ ປິຓ຺ຑາຍ ປວິສຕິ ອຣກ຺ຂິເຕເນວ ກາເຍນ ອຣກ຺ຂິຕາຍ ວາຈາຍ ອຣກ຺ຂິເຕນ ຈິຕ຺ເຕນ, ອນຸປຏ຺ຐິຕາຍ ສຕິຍາ, ອສໍວຸເຕຫິ ອິນ຺ທ຺ຣິເຍຫິ. ໂສ ຕຕ຺ຖ ປສ຺ສຕິ ມາຕຸຄາມໍ ທຸນ຺ນິວຕ຺ຖໍ ວາ ທຸປ຺ປາຣຸຕໍ ວາ. ຕສ຺ສ ມາຕຸຄາມໍ ທິສ຺ວາ ທຸນ຺ນິວຕ຺ຖໍ ວາ ທຸປ຺ປາຣຸຕໍ ວາ ຣາໂຄ ຈິຕ຺ຕໍ ອນຸທ຺ຘໍເສຕິ. ໂສ ຣາຄານຸທ຺ຘໍສິເຕນ ຈິຕ຺ເຕນ ສິກ຺ຂໍ ປຈ຺ຈກ຺ຂາຍ ຫີນາຍາວຕ຺ຕຕິ. ຕສ຺ສ ອຎ຺ເຎ ຈີວຣໍ ຫຣນ຺ຕິ, ອຎ຺ເຎ ປຕ຺ຕໍ ຫຣນ຺ຕິ, ອຎ຺ເຎ ນິສີທນໍ ຫຣນ຺ຕິ, ອຎ຺ເຎ ສູຈິຆຣໍ ຫຣນ຺ຕິ, ເວຣມ຺ຠວາຕກ຺ຂິຕ຺ຕສ຺ເສວ ສກຸຓສ຺ສ. ເອວໍ ທາຣຸໂຓ ໂຂ, ຠິກ຺ຂເວ, ລາຠສກ຺ກາຣສິໂລໂກ…ເປ… ເອວຎ຺ຫິ ໂວ, ຠິກ຺ຂເວ, ສິກ຺ຂິຕພ຺ພ’’ນ຺ຕິ. ນວມໍ.