໓. ອສ຺ສຸສຸຕ຺ຕໍ

໑໒໖. ສາວຕ຺ຖິຍໍ ວິຫຣຕິ…ເປ… ‘‘ອນມຕຄ຺ໂຄຍໍ, ຠິກ຺ຂເວ, ສໍສາໂຣ. ປຸພ຺ພາ ໂກຏິ ນ ປຎ຺ຎາຍຕິ ອວິຊ຺ຊານີວຣຓານໍ ສຕ຺ຕານໍ ຕຓ຺ຫາສໍໂຍຊນານໍ ສນ຺ຘາວຕໍ ສໍສຣຕໍ. ຕໍ ກິໍ ມຎ຺ຎຖ, ຠິກ຺ຂເວ, ກຕມໍ ນຸ ໂຂ ພຫຸຕຣໍ, ຍໍ ວາ ໂວ ອິມິນາ ທີເຆນ ອທ຺ຘຸນາ ສນ຺ຘາວຕໍ ສໍສຣຕໍ ອມນາປສມ຺ປໂຍຄາ ມນາປວິປ຺ປໂຍຄາ ກນ຺ທນ຺ຕານໍ ໂຣທນ຺ຕານໍ [ຣຸທນ຺ຕານໍ (ສີ.)] ອສ຺ສຸ ປສ຺ສນ຺ນໍ [ປສ຺ສນ຺ທໍ (ກ. ສີ.), ປສນ຺ທໍ (ສ຺ຍາ. ກໍ.), ປສນ຺ນໍ (ປີ. ກ.)] ປຄ຺ຆຣິຕໍ, ຍໍ ວາ ຈຕູສຸ ມຫາສມຸທ຺ເທສຸ ອຸທກ’’ນ຺ຕິ? ‘‘ຍຖາ ໂຂ ມຍໍ, ຠນ຺ເຕ, ຠຄວຕາ ຘມ຺ມໍ ເທສິຕໍ ອາຊານາມ, ເອຕເທວ, ຠນ຺ເຕ, ພຫຸຕຣໍ ຍໍ ໂນ ອິມິນາ ທີເຆນ ອທ຺ຘຸນາ ສນ຺ຘາວຕໍ ສໍສຣຕໍ ອມນາປສມ຺ປໂຍຄາ ມນາປວິປ຺ປໂຍຄາ ກນ຺ທນ຺ຕານໍ ໂຣທນ຺ຕານໍ ອສ຺ສຸ ປສ຺ສນ຺ນໍ ປຄ຺ຆຣິຕໍ, ນ ຕ຺ເວວ ຈຕູສຸ ມຫາສມຸທ຺ເທສຸ ອຸທກ’’ນ຺ຕິ.

‘‘ສາຘຸ ສາຘຸ, ຠິກ຺ຂເວ, ສາຘຸ ໂຂ ເມ ຕຸມ຺ເຫ, ຠິກ຺ຂເວ, ເອວໍ ຘມ຺ມໍ ເທສິຕໍ ອາຊານາຖ. ເອຕເທວ, ຠິກ຺ຂເວ, ພຫຸຕຣໍ ຍໍ ໂວ ອິມິນາ ທີເຆນ ອທ຺ຘຸນາ ສນ຺ຘາວຕໍ ສໍສຣຕໍ ອມນາປສມ຺ປໂຍຄາ ມນາປວິປ຺ປໂຍຄາ ກນ຺ທນ຺ຕານໍ ໂຣທນ຺ຕານໍ ອສ຺ສຸ ປສ຺ສນ຺ນໍ ປຄ຺ຆຣິຕໍ, ນ ຕ຺ເວວ ຈຕູສຸ ມຫາສມຸທ຺ເທສຸ ອຸທກໍ. ທີຆຣຕ຺ຕໍ ໂວ, ຠິກ຺ຂເວ, ມາຕຸມຣຓໍ ປຈ຺ຈນຸຠູຕໍ; ເຕສໍ ວາ ມາຕຸມຣຓໍ ປຈ຺ຈນຸໂຠນ຺ຕານໍ ອມນາປສມ຺ປໂຍຄາ ມນາປວິປ຺ປໂຍຄາ ກນ຺ທນ຺ຕານໍ ໂຣທນ຺ຕານໍ ອສ຺ສຸ ປສ຺ສນ຺ນໍ ປຄ຺ຆຣິຕໍ, ນ ຕ຺ເວວ ຈຕູສຸ ມຫາສມຸທ຺ເທສຸ ອຸທກໍ. ທີຆຣຕ຺ຕໍ ໂວ, ຠິກ຺ຂເວ, ປິຕຸມຣຓໍ ປຈ຺ຈນຸຠູຕໍ …ເປ… ຠາຕຸມຣຓໍ ປຈ຺ຈນຸຠູຕໍ… ຠຄິນິມຣຓໍ ປຈ຺ຈນຸຠູຕໍ… ປຸຕ຺ຕມຣຓໍ ປຈ຺ຈນຸຠູຕໍ… ຘີຕຸມຣຓໍ ປຈ຺ຈນຸຠູຕໍ… ຎາຕິພ຺ຍສນໍ ປຈ຺ຈນຸຠູຕໍ… ໂຠຄພ຺ຍສນໍ ປຈ຺ຈນຸຠູຕໍ. ທີຆຣຕ຺ຕໍ ໂວ, ຠິກ຺ຂເວ, ໂຣຄພ຺ຍສນໍ ປຈ຺ຈນຸຠູຕໍ, ເຕສໍ ໂວ ໂຣຄພ຺ຍສນໍ ປຈ຺ຈນຸໂຠນ຺ຕານໍ ອມນາປສມ຺ປໂຍຄາ ມນາປວິປ຺ປໂຍຄາ ກນ຺ທນ຺ຕານໍ ໂຣທນ຺ຕານໍ ອສ຺ສຸ ປສ຺ສນ຺ນໍ ປຄ຺ຆຣິຕໍ, ນ ຕ຺ເວວ ຈຕູສຸ ມຫາສມຸທ຺ເທສຸ ອຸທກໍ. ຕໍ ກິສ຺ສ ເຫຕຸ? ອນມຕຄ຺ໂຄຍໍ, ຠິກ຺ຂເວ, ສໍສາໂຣ …ເປ… ຍາວຎ຺ຈິທໍ, ຠິກ຺ຂເວ, ອລເມວ ສພ຺ພສງ຺ຂາເຣສຸ ນິພ຺ພິນ຺ທິຕຸໍ, ອລໍ ວິຣຊ຺ຊິຕຸໍ, ອລໍ ວິມຸຈ຺ຈິຕຸ’’ນ຺ຕິ. ຕຕິຍໍ.