໑໐. ຕຕິຍສມຓພ຺ຣາຫ຺ມຓສຸຕ຺ຕໍ

໑໒໓. ສາວຕ຺ຖິຍໍ ວິຫຣຕິ…ເປ… ‘‘ເຍ ຫິ ເກຈິ, ຠິກ຺ຂເວ, ສມຓາ ວາ ພ຺ຣາຫ຺ມຓາ ວາ ປຖວີຘາຕຸໍ ນປ຺ປຊານນ຺ຕິ, ປຖວີຘາຕຸສມຸທຍໍ ນປ຺ປຊານນ຺ຕິ, ປຖວີຘາຕຸນິໂຣຘໍ ນປ຺ປຊານນ຺ຕິ, ປຖວີຘາຕຸນິໂຣຘຄາມິນິໍ ປຏິປທໍ ນປ຺ປຊານນ຺ຕິ…ເປ… ອາໂປຘາຕຸໍ ນປ຺ປຊານນ຺ຕິ… ເຕໂຊຘາຕຸໍ ນປ຺ປຊານນ຺ຕິ… ວາໂຍຘາຕຸໍ ນປ຺ປຊານນ຺ຕິ, ວາໂຍຘາຕຸສມຸທຍໍ ນປ຺ປຊານນ຺ຕິ, ວາໂຍຘາຕຸນິໂຣຘໍ ນປ຺ປຊານນ຺ຕິ, ວາໂຍຘາຕຸນິໂຣຘຄາມິນິໍ ປຏິປທໍ ນປ຺ປຊານນ຺ຕິ, ນ ເມ ເຕ, ຠິກ຺ຂເວ, ສມຓາ ວາ ພ຺ຣາຫ຺ມຓາ ວາ ສມເຓສຸ ວາ ສມຓສມ຺ມຕາ ພ຺ຣາຫ຺ມເຓສຸ ວາ ພ຺ຣາຫ຺ມຓສມ຺ມຕາ; ນ ຈ ປນ ເຕ ອາຍສ຺ມນ຺ໂຕ ສາມຎ຺ຎຕ຺ຖໍ ວາ ພ຺ຣຫ຺ມຎ຺ຎຕ຺ຖໍ ວາ ທິຏ຺ເຐວ ຘມ຺ເມ ສຍໍ ອຠິຎ຺ຎາ ສຈ຺ຉິກຕ຺ວາ ອຸປສມ຺ປຊ຺ຊ ວິຫຣນ຺ຕິ’’.

‘‘ເຍ ຈ ໂຂ ເກຈິ, ຠິກ຺ຂເວ, ສມຓາ ວາ ພ຺ຣາຫ຺ມຓາ ວາ ປຖວີຘາຕຸໍ ປຊານນ຺ຕິ, ປຖວີຘາຕຸສມຸທຍໍ ປຊານນ຺ຕິ, ປຖວີຘາຕຸນິໂຣຘໍ ປຊານນ຺ຕິ, ປຖວີຘາຕຸນິໂຣຘຄາມິນິໍ ປຏິປທໍ ປຊານນ຺ຕິ… ເຍ ຈ ໂຂ ເກຈິ, ຠິກ຺ຂເວ, ສມຓາ ວາ ພ຺ຣາຫ຺ມຓາ ວາ…ເປ… ອາໂປຘາຕຸໍ ປຊານນ຺ຕິ… ເຕໂຊຘາຕຸໍ ປຊານນ຺ຕິ… ວາໂຍຘາຕຸໍ ປຊານນ຺ຕິ, ວາໂຍຘາຕຸສມຸທຍໍ ປຊານນ຺ຕິ, ວາໂຍຘາຕຸນິໂຣຘໍ ປຊານນ຺ຕິ, ວາໂຍຘາຕຸນິໂຣຘຄາມິນິໍ ປຏິປທໍ ປຊານນ຺ຕິ, ເຕ ຈ ໂຂ ເມ, ຠິກ຺ຂເວ, ສມຓາ ວາ ພ຺ຣາຫ຺ມຓາ ວາ ສມເຓສຸ ເຈວ ສມຓສມ຺ມຕາ ພ຺ຣາຫ຺ມເຓສຸ ຈ ພ຺ຣາຫ຺ມຓສມ຺ມຕາ; ເຕ ຈ ປນາຍສ຺ມນ຺ໂຕ ສາມຎ຺ຎຕ຺ຖຎ຺ຈ ພ຺ຣຫ຺ມຎ຺ຎຕ຺ຖຎ຺ຈ ທິຏ຺ເຐວ ຘມ຺ເມ ສຍໍ ອຠິຎ຺ຎາ ສຈ຺ຉິກຕ຺ວາ ອຸປສມ຺ປຊ຺ຊ ວິຫຣນ຺ຕີ’’ຕິ. ທສມໍ.

ຈຕຸຕ຺ໂຖ ວຄ຺ໂຄ.

ຕສ຺ສຸທ຺ທານໍ –

ຈຕສ຺ໂສ ປຸພ຺ເພ ອຈຣິໍ, ໂນເຈທຎ຺ຈ ທຸກ຺ເຂນ ຈ;

ອຠິນນ຺ທຎ຺ຈ ອຸປ຺ປາໂທ, ຕໂຍ ສມຓພ຺ຣາຫ຺ມຓາຕິ.

ຘາຕຸສໍຍຸຕ຺ຕໍ ສມຕ຺ຕໍ.