໑໑. ຕຕິຍປພ຺ພຕສຸຕ຺ຕໍ

໘໔. ສາວຕ຺ຖິຍໍ ວິຫຣຕິ…ເປ… ‘‘ເສຍ຺ຍຖາປິ, ຠິກ຺ຂເວ, ປຸຣິໂສ ສິເນຣຸສ຺ສ ປພ຺ພຕຣາຊສ຺ສ ສຕ຺ຕ ມຸຄ຺ຄມຕ຺ຕິໂຍ ປາສາຓສກ຺ຂຣາ ອຸປນິກ຺ຂິເປຍ຺ຍ. ຕໍ ກິໍ ມຎ຺ຎຖ, ຠິກ຺ຂເວ, ກຕມໍ ນຸ ໂຂ ພຫຸຕຣໍ, ຍາ ວາ ສຕ຺ຕ ມຸຄ຺ຄມຕ຺ຕິໂຍ ປາສາຓສກ຺ຂຣາ ອຸປນິກ຺ຂິຕ຺ຕາ ໂຍ ວາ ສິເນຣຸ [ອຸປນິກ຺ຂິຕ຺ຕາ, ສິເນຣຸ ວາ (ສີ.)] ປພ຺ພຕຣາຊາ’’ຕິ?

‘‘ເອຕເທວ, ຠນ຺ເຕ, ພຫຸຕຣໍ ຍທິທໍ ສິເນຣຸ ປພ຺ພຕຣາຊາ; ອປ຺ປມຕ຺ຕິກາ ສຕ຺ຕ ມຸຄ຺ຄມຕ຺ຕິໂຍ ປາສາຓສກ຺ຂຣາ ອຸປນິກ຺ຂິຕ຺ຕາ. ເນວ ສຕິມໍ ກລໍ ອຸເປນ຺ຕິ ນ ສຫສ຺ສິມໍ ກລໍ ອຸເປນ຺ຕິ ນ ສຕສຫສ຺ສິມໍ ກລໍ ອຸເປນ຺ຕິ ສິເນຣຸໍ ປພ຺ພຕຣາຊານໍ ອຸປນິຘາຍ ສຕ຺ຕ ມຸຄ຺ຄມຕ຺ຕິໂຍ ປາສາຓສກ຺ຂຣາ ອຸປນິກ຺ຂິຕ຺ຕາ’’ຕິ. ‘‘ເອວເມວ ໂຂ, ຠິກ຺ຂເວ, ອຣິຍສາວກສ຺ສ ທິຏ຺ຐິສມ຺ປນ຺ນສ຺ສ ປຸຄ຺ຄລສ຺ສ ອຘິຄມໍ ອຸປນິຘາຍ ອຎ຺ຎຕິຕ຺ຖິຍສມຓພ຺ຣາຫ຺ມຓປຣິພ຺ພາຊການໍ ອຘິຄໂມ ເນວ ສຕິມໍ ກລໍ ອຸເປຕິ ນ ສຫສ຺ສິມໍ ກລໍ ອຸເປຕິ ນ ສຕສຫສ຺ສິມໍ ກລໍ ອຸເປຕິ. ເອວໍ ມຫາຘິຄໂມ, ຠິກ຺ຂເວ, ທິຏ຺ຐິສມ຺ປນ຺ໂນ ປຸຄ຺ຄໂລ, ເອວໍ ມຫາຠິຎ຺ໂຎ’’ຕິ. ເອກາທສມໍ.

ອຠິສມຍສໍຍຸຕ຺ຕໍ ສມຕ຺ຕໍ.