໑໐. ທຸຕິຍປພ຺ພຕສຸຕ຺ຕໍ

໘໓. ສາວຕ຺ຖິຍໍ ວິຫຣຕິ…ເປ… ‘‘ເສຍ຺ຍຖາປິ, ຠິກ຺ຂເວ, ຫິມວາ ປພ຺ພຕຣາຊາ ປຣິກ຺ຂຍໍ ປຣິຍາທານໍ ຄຈ຺ເຉຍ຺ຍ, ຐເປຕ຺ວາ ສຕ຺ຕ ສາສປມຕ຺ຕິໂຍ ປາສາຓສກ຺ຂຣາ. ຕໍ ກິໍ ມຎ຺ຎຖ, ຠິກ຺ຂເວ, ກຕມໍ ນຸ ໂຂ ພຫຸຕຣໍ, ຍໍ ວາ ຫິມວໂຕ ປພ຺ພຕຣາຊສ຺ສ ປຣິກ຺ຂີຓໍ ປຣິຍາທິຓ຺ຓໍ ຍາ ວາ ສຕ຺ຕ ສາສປມຕ຺ຕິໂຍ ປາສາຓສກ຺ຂຣາ ອວສິຏ຺ຐາ’’ຕິ?

‘‘ເອຕເທວ, ຠນ຺ເຕ, ພຫຸຕຣໍ ຫິມວໂຕ ປພ຺ພຕຣາຊສ຺ສ ຍທິທໍ ປຣິກ຺ຂີຓໍ ປຣິຍາທິຓ຺ຓໍ; ອປ຺ປມຕ຺ຕິກາ ສຕ຺ຕ ສາສປມຕ຺ຕິໂຍ ປາສາຓສກ຺ຂຣາ ອວສິຏ຺ຐາ. ເນວ ສຕິມໍ ກລໍ ອຸເປນ຺ຕິ ນ ສຫສ຺ສິມໍ ກລໍ ອຸເປນ຺ຕິ ນ ສຕສຫສ຺ສິມໍ ກລໍ ອຸເປນ຺ຕິ ຫິມວໂຕ ປພ຺ພຕຣາຊສ຺ສ ປຣິກ຺ຂີຓໍ ປຣິຍາທິຓ຺ຓໍ ອຸປນິຘາຍ ສຕ຺ຕ ສາສປມຕ຺ຕິໂຍ ປາສາຓສກ຺ຂຣາ ອວສິຏ຺ຐາ’’ຕິ.

‘‘ເອວເມວ ໂຂ, ຠິກ຺ຂເວ, ອຣິຍສາວກສ຺ສ ທິຏ຺ຐິສມ຺ປນ຺ນສ຺ສ ປຸຄ຺ຄລສ຺ສ ອຠິສເມຕາວິໂນ ເອຕເທວ ພຫຸຕຣໍ ທຸກ຺ຂໍ ຍທິທໍ ປຣິກ຺ຂີຓໍ ປຣິຍາທິຓ຺ຓໍ; ອປ຺ປມຕ຺ຕກໍ ອວສິຏ຺ຐໍ. ເນວ ສຕິມໍ ກລໍ ອຸເປຕິ ນ ສຫສ຺ສິມໍ ກລໍ ອຸເປຕິ ນ ສຕສຫສ຺ສິມໍ ກລໍ ອຸເປຕິ ປຸຣິມໍ ທຸກ຺ຂກ຺ຂນ຺ຘໍ ປຣິກ຺ຂີຓໍ ປຣິຍາທິຓ຺ຓໍ ອຸປນິຘາຍ ຍທິທໍ ສຕ຺ຕກ຺ຂຕ຺ຕຸໍປຣມຕາ. ເອວໍ ມຫຕ຺ຖິໂຍ ໂຂ, ຠິກ຺ຂເວ, ຘມ຺ມາຠິສມໂຍ, ເອວໍ ມຫຕ຺ຖິໂຍ ຘມ຺ມຈກ຺ຂຸປຏິລາໂຠ’’ຕິ. ທສມໍ.