໙. ອຸປຍນ຺ຕິສຸຕ຺ຕໍ

໖໙. ເອວໍ ເມ ສຸຕໍ – ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ຕຕ຺ຣ ໂຂ…ເປ… ‘‘ມຫາສມຸທ຺ໂທ, ຠິກ຺ຂເວ, ອຸປຍນ຺ໂຕ ມຫານທິໂຍ ອຸປຍາເປຕິ, ມຫານທິໂຍ ອຸປຍນ຺ຕິໂຍ ກຸນ຺ນທິໂຍ ອຸປຍາເປນ຺ຕິ, ກຸນ຺ນທິໂຍ ອຸປຍນ຺ຕິໂຍ ມຫາໂສພ຺ເຠ ອຸປຍາເປນ຺ຕິ, ມຫາໂສພ຺ຠາ ອຸປຍນ຺ຕາ ກຸໂສພ຺ເຠ ອຸປຍາເປນ຺ຕິ. ເອວເມວ ໂຂ, ຠິກ຺ຂເວ, ອວິຊ຺ຊາ ອຸປຍນ຺ຕີ ສງ຺ຂາເຣ ອຸປຍາເປຕິ, ສງ຺ຂາຣາ ອຸປຍນ຺ຕາ ວິຎ຺ຎາຓໍ ອຸປຍາເປນ຺ຕິ, ວິຎ຺ຎາຓໍ ອຸປຍນ຺ຕໍ ນາມຣູປໍ ອຸປຍາເປຕິ, ນາມຣູປໍ ອຸປຍນ຺ຕໍ ສຬາຍຕນໍ ອຸປຍາເປຕິ, ສຬາຍຕນໍ ອຸປຍນ຺ຕໍ ຜສ຺ສໍ ອຸປຍາເປຕິ, ຜສ຺ໂສ ອຸປຍນ຺ໂຕ ເວທນໍ ອຸປຍາເປຕິ, ເວທນາ ອຸປຍນ຺ຕີ ຕຓ຺ຫໍ ອຸປຍາເປຕິ, ຕຓ຺ຫາ ອຸປຍນ຺ຕີ ອຸປາທານໍ ອຸປຍາເປຕິ, ອຸປາທານໍ ອຸປຍນ຺ຕໍ ຠວໍ ອຸປຍາເປຕິ, ຠໂວ ອຸປຍນ຺ໂຕ ຊາຕິໍ ອຸປຍາເປຕິ, ຊາຕິ ອຸປຍນ຺ຕີ ຊຣາມຣຓໍ ອຸປຍາເປຕິ.

‘‘ມຫາສມຸທ຺ໂທ, ຠິກ຺ຂເວ, ອປຍນ຺ໂຕ ມຫານທິໂຍ ອປຍາເປຕິ, ມຫານທິໂຍ ອປຍນ຺ຕິໂຍ ກຸນ຺ນທິໂຍ ອປຍາເປນ຺ຕິ, ກຸນ຺ນທິໂຍ ອປຍນ຺ຕິໂຍ ມຫາໂສພ຺ເຠ ອປຍາເປນ຺ຕິ, ມຫາໂສພ຺ຠາ ອປຍນ຺ຕາ ກຸໂສພ຺ເຠ ອປຍາເປນ຺ຕິ. ເອວເມວ ໂຂ, ຠິກ຺ຂເວ, ອວິຊ຺ຊາ ອປຍນ຺ຕີ ສງ຺ຂາເຣ ອປຍາເປຕິ, ສງ຺ຂາຣາ ອປຍນ຺ຕາ ວິຎ຺ຎາຓໍ ອປຍາເປນ຺ຕິ, ວິຎ຺ຎາຓໍ ອປຍນ຺ຕໍ ນາມຣູປໍ ອປຍາເປຕິ, ນາມຣູປໍ ອປຍນ຺ຕໍ ສຬາຍຕນໍ ອປຍາເປຕິ, ສຬາຍຕນໍ ອປຍນ຺ຕໍ ຜສ຺ສໍ ອປຍາເປຕິ, ຜສ຺ໂສ ອປຍນ຺ໂຕ ເວທນໍ ອປຍາເປຕິ, ເວທນາ ອປຍນ຺ຕີ ຕຓ຺ຫໍ ອປຍາເປຕິ, ຕຓ຺ຫາ ອປຍນ຺ຕີ ອຸປາທານໍ ອປຍາເປຕິ, ອຸປາທານໍ ອປຍນ຺ຕໍ ຠວໍ ອປຍາເປຕິ, ຠໂວ ອປຍນ຺ໂຕ ຊາຕິໍ ອປຍາເປຕິ, ຊາຕິ ອປຍນ຺ຕີ ຊຣາມຣຓໍ ອປຍາເປຕີ’’ຕິ. ນວມໍ.