໖. ສມ຺ມສສຸຕ຺ຕໍ

໖໖. ເອວໍ ເມ ສຸຕໍ – ເອກໍ ສມຍໍ ຠຄວາ ກຸຣູສຸ ວິຫຣຕິ ກມ຺ມາສຘມ຺ມໍ ນາມ ກຸຣູນໍ ນິຄໂມ. ຕຕ຺ຣ ໂຂ ຠຄວາ ຠິກ຺ຂູ ອາມນ຺ເຕສິ – ‘‘ຠິກ຺ຂໂວ’’ຕິ. ‘‘ຠທນ຺ເຕ’’ຕິ ເຕ ຠິກ຺ຂູ ຠຄວໂຕ ປຈ຺ຈສ຺ໂສສຸໍ. ຠຄວາ ເອຕທໂວຈ – ‘‘ສມ຺ມສຖ ໂນ ຕຸມ຺ເຫ, ຠິກ຺ຂເວ, ອນ຺ຕຣໍ ສມ຺ມສ’’ນ຺ຕິ [ອນ຺ຕຣາ ສມ຺ມສນນ຺ຕິ (ສີ.)]. ເອວໍ ວຸຕ຺ເຕ, ອຎ຺ຎຕໂຣ ຠິກ຺ຂຸ ຠຄວນ຺ຕໍ ເອຕທໂວຈ – ‘‘ອຫໍ ໂຂ, ຠນ຺ເຕ, ສມ຺ມສາມິ ອນ຺ຕຣໍ ສມ຺ມສ’’ນ຺ຕິ. ‘‘ຍຖາ ກຖໍ ປນ ຕ຺ວໍ, ຠິກ຺ຂຸ, ສມ຺ມສສິ ອນ຺ຕຣໍ ສມ຺ມສ’’ນ຺ຕິ? ອຖ ໂຂ ໂສ ຠິກ຺ຂຸ ພ຺ຍາກາສິ. ຍຖາ ໂສ ຠິກ຺ຂຸ ພ຺ຍາກາສິ ນ ໂສ ຠິກ຺ຂຸ ຠຄວໂຕ ຈິຕ຺ຕໍ ອາຣາເຘສິ.

ເອວໍ ວຸຕ຺ເຕ, ອາຍສ຺ມາ ອານນ຺ໂທ ຠຄວນ຺ຕໍ ເອຕທໂວຈ – ‘‘ເອຕສ຺ສ, ຠຄວາ, ກາໂລ; ເອຕສ຺ສ, ສຸຄຕ, ກາໂລ; ຍໍ ຠຄວາ ອນ຺ຕຣໍ ສມ຺ມສໍ ຠາເສຍ຺ຍ. ຠຄວໂຕ ສຸຕ຺ວາ ຠິກ຺ຂູ ຘາເຣສ຺ສນ຺ຕີ’’ຕິ. ‘‘ເຕນຫານນ຺ທ, ສຸຓາຖ, ສາຘຸກໍ ມນສິ ກໂຣຖ; ຠາສິສ຺ສາມີ’’ຕິ. ‘‘ເອວໍ, ຠນ຺ເຕ’’ຕິ ໂຂ ເຕ ຠິກ຺ຂູ ຠຄວໂຕ ປຈ຺ຈສ຺ໂສສຸໍ. ຠຄວາ ເອຕທໂວຈ –

‘‘ອິຘ, ຠິກ຺ຂເວ, ຠິກ຺ຂຸ ສມ຺ມສມາໂນ ສມ຺ມສຕິ ອນ຺ຕຣໍ ສມ຺ມສໍ [ສມ຺ມສນໍ (ສີ.)] – ‘ຍໍ ໂຂ ອິທໍ ອເນກວິຘໍ ນານປ຺ປກາຣກໍ ທຸກ຺ຂໍ ໂລເກ ອຸປ຺ປຊ຺ຊຕິ ຊຣາມຣຓໍ. ອິທໍ ໂຂ ທຸກ຺ຂໍ ກິໍນິທານໍ ກິໍສມຸທຍໍ ກິໍຊາຕິກໍ ກິໍປຠວໍ, ກິສ຺ມິໍ ສຕິ ຊຣາມຣຓໍ ໂຫຕິ, ກິສ຺ມິໍ ອສຕິ ຊຣາມຣຓໍ ນ ໂຫຕີ’ຕິ? ໂສ ສມ຺ມສມາໂນ ເອວໍ ຊານາຕິ – ‘ຍໍ ໂຂ ອິທໍ ອເນກວິຘໍ ນານປ຺ປກາຣກໍ ທຸກ຺ຂໍ ໂລເກ ອຸປ຺ປຊ຺ຊຕິ ຊຣາມຣຓໍ. ອິທໍ ໂຂ ທຸກ຺ຂໍ ອຸປຘິນິທານໍ ອຸປຘິສມຸທຍໍ ອຸປຘິຊາຕິກໍ ອຸປຘິປຠວໍ, ອຸປຘິສ຺ມິໍ ສຕິ ຊຣາມຣຓໍ ໂຫຕິ, ອຸປຘິສ຺ມິໍ ອສຕິ ຊຣາມຣຓໍ ນ ໂຫຕີ’ຕິ. ໂສ ຊຣາມຣຓຎ຺ຈ ປຊານາຕິ ຊຣາມຣຓສມຸທຍຎ຺ຈ ປຊານາຕິ ຊຣາມຣຓນິໂຣຘຎ຺ຈ ປຊານາຕິ ຍາ ຈ ຊຣາມຣຓນິໂຣຘສາຣຸປ຺ປຄາມິນີ ປຏິປທາ ຕຎ຺ຈ ປຊານາຕິ. ຕຖາປຏິປນ຺ໂນ ຈ ໂຫຕິ ອນຸຘມ຺ມຈາຣີ. ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ສພ຺ພໂສ ສມ຺ມາ ທຸກ຺ຂກ຺ຂຍາຍ ປຏິປນ຺ໂນ ຊຣາມຣຓນິໂຣຘາຍ.

‘‘ອຖາປຣໍ ສມ຺ມສມາໂນ ສມ຺ມສຕິ ອນ຺ຕຣໍ ສມ຺ມສໍ – ‘ອຸປຘິ ປນາຍໍ ກິໍນິທາໂນ ກິໍສມຸທໂຍ ກິໍຊາຕິໂກ ກິໍປຠໂວ, ກິສ຺ມິໍ ສຕິ ອຸປຘິ ໂຫຕິ, ກິສ຺ມິໍ ອສຕິ ອຸປຘິ ນ ໂຫຕີ’ຕິ? ໂສ ສມ຺ມສມາໂນ ເອວໍ ຊານາຕິ – ‘ອຸປຘິ ຕຓ຺ຫານິທາໂນ ຕຓ຺ຫາສມຸທໂຍ ຕຓ຺ຫາຊາຕິໂກ ຕຓ຺ຫາປຠໂວ, ຕຓ຺ຫາຍ ສຕິ ອຸປຘິ ໂຫຕິ, ຕຓ຺ຫາຍ ອສຕິ ອຸປຘິ ນ ໂຫຕີ’ຕິ. ໂສ ອຸປຘິຎ຺ຈ ປຊານາຕິ ອຸປຘິສມຸທຍຎ຺ຈ ປຊານາຕິ ອຸປຘິນິໂຣຘຎ຺ຈ ປຊານາຕິ ຍາ ຈ ອຸປຘິນິໂຣຘສາຣຸປ຺ປຄາມິນີ ປຏິປທາ ຕຎ຺ຈ ປຊານາຕິ. ຕຖາ ປຏິປນ຺ໂນ ຈ ໂຫຕິ ອນຸຘມ຺ມຈາຣີ. ອຍໍ ວຸຈ຺ຈຕິ, ຠິກ຺ຂເວ, ຠິກ຺ຂຸ ສພ຺ພໂສ ສມ຺ມາ ທຸກ຺ຂກ຺ຂຍາຍ ປຏິປນ຺ໂນ ອຸປຘິນິໂຣຘາຍ.

‘‘ອຖາປຣໍ ສມ຺ມສມາໂນ ສມ຺ມສຕິ ອນ຺ຕຣໍ ສມ຺ມສໍ – ‘ຕຓ຺ຫາ ປນາຍໍ ກຕ຺ຖ ອຸປ຺ປຊ຺ຊມານາ ອຸປ຺ປຊ຺ຊຕິ, ກຕ຺ຖ ນິວິສມານາ ນິວິສຕີ’ຕິ? ໂສ ສມ຺ມສມາໂນ ເອວໍ ຊານາຕິ – ຍໍ ໂຂ ໂລເກ ປິຍຣູປໍ ສາຕຣູປໍ ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ. ກິຎ຺ຈ ໂລເກ ປິຍຣູປໍ ສາຕຣູປໍ? ຈກ຺ຂຸໍ ໂລເກ ປິຍຣູປໍ, ສາຕຣູປໍ. ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ, ເອຕ຺ຖ ນິວິສມານາ ນິວິສຕິ. ໂສຕໍ ໂລເກ ປິຍຣູປໍ ສາຕຣູປໍ…ເປ… ຆານໍ ໂລເກ ປິຍຣູປໍ ສາຕຣູປໍ… ຊິວ຺ຫາ ໂລເກ ປິຍຣູປໍ ສາຕຣູປໍ… ກາໂຍ ໂລເກ ປິຍຣູປໍ ສາຕຣູປໍ… ມໂນ ໂລເກ ປິຍຣູປໍ ສາຕຣູປໍ ເອຕ຺ເຖສາ ຕຓ຺ຫາ ອຸປ຺ປຊ຺ຊມານາ ອຸປ຺ປຊ຺ຊຕິ ເອຕ຺ຖ ນິວິສມານາ ນິວິສຕິ.

‘‘ເຍ ຫິ ເກຈິ, ຠິກ຺ຂເວ, ອຕີຕມທ຺ຘານໍ ສມຓາ ວາ ພ຺ຣາຫ຺ມຓາ ວາ ຍໍ ໂລເກ ປິຍຣູປໍ ສາຕຣູປໍ ຕໍ ນິຈ຺ຈໂຕ ອທ຺ທກ຺ຂຸໍ ສຸຂໂຕ ອທ຺ທກ຺ຂຸໍ ອຕ຺ຕໂຕ ອທ຺ທກ຺ຂຸໍ ອາໂຣຄ຺ຍໂຕ ອທ຺ທກ຺ຂຸໍ ເຂມໂຕ ອທ຺ທກ຺ຂຸໍ. ເຕ ຕຓ຺ຫໍ ວຑ຺ເຒສຸໍ. ເຍ ຕຓ຺ຫໍ ວຑ຺ເຒສຸໍ ເຕ ອຸປຘິໍ ວຑ຺ເຒສຸໍ. ເຍ ອຸປຘິໍ ວຑ຺ເຒສຸໍ ເຕ ທຸກ຺ຂໍ ວຑ຺ເຒສຸໍ. ເຍ ທຸກ຺ຂໍ ວຑ຺ເຒສຸໍ ເຕ ນ ປຣິມຸຈ຺ຈິໍສຸ ຊາຕິຍາ ຊຣາຍ ມຣເຓນ ໂສເກຫິ ປຣິເທເວຫິ ທຸກ຺ເຂຫິ ໂທມນສ຺ເສຫິ ອຸປາຍາເສຫິ, ນ ປຣິມຸຈ຺ຈິໍສຸ ທຸກ຺ຂສ຺ມາຕິ ວທາມິ.

‘‘ເຍປິ ຫິ ເກຈິ, ຠິກ຺ຂເວ, ອນາຄຕມທ຺ຘານໍ ສມຓາ ວາ ພ຺ຣາຫ຺ມຓາ ວາ ຍໍ ໂລເກ ປິຍຣູປໍ ສາຕຣູປໍ ຕໍ ນິຈ຺ຈໂຕ ທກ຺ຂິສ຺ສນ຺ຕິ [ທກ຺ຂິນ຺ຕິ (ສີ.)] ສຸຂໂຕ ທກ຺ຂິສ຺ສນ຺ຕິ ອຕ຺ຕໂຕ ທກ຺ຂິສ຺ສນ຺ຕິ ອາໂຣຄ຺ຍໂຕ ທກ຺ຂິສ຺ສນ຺ຕິ ເຂມໂຕ ທກ຺ຂິສ຺ສນ຺ຕິ. ເຕ ຕຓ຺ຫໍ ວຑ຺ຒິສ຺ສນ຺ຕິ. ເຍ ຕຓ຺ຫໍ ວຑ຺ຒິສ຺ສນ຺ຕິ ເຕ ອຸປຘິໍ ວຑ຺ຒິສ຺ສນ຺ຕິ. ເຍ ອຸປຘິໍ ວຑ຺ຒິສ຺ສນ຺ຕິ ເຕ ທຸກ຺ຂໍ ວຑ຺ຒິສ຺ສນ຺ຕິ. ເຍ ທຸກ຺ຂໍ ວຑ຺ຒິສ຺ສນ຺ຕິ ເຕ ນ ປຣິມຸຈ຺ຈິສ຺ສນ຺ຕິ ຊາຕິຍາ ຊຣາຍ ມຣເຓນ ໂສເກຫິ ປຣິເທເວຫິ ທຸກ຺ເຂຫິ ໂທມນສ຺ເສຫິ ອຸປາຍາເສຫິ, ນ ປຣິມຸຈ຺ຈິສ຺ສນ຺ຕິ ທຸກ຺ຂສ຺ມາຕິ ວທາມິ.

‘‘ເຍປິ ຫິ ເກຈິ, ຠິກ຺ຂເວ, ເອຕຣຫິ ສມຓາ ວາ ພ຺ຣາຫ຺ມຓາ ວາ ຍໍ ໂລເກ ປິຍຣູປໍ ສາຕຣູປໍ ຕໍ ນິຈ຺ຈໂຕ ປສ຺ສນ຺ຕິ ສຸຂໂຕ ປສ຺ສນ຺ຕິ ອຕ຺ຕໂຕ ປສ຺ສນ຺ຕິ ອາໂຣຄ຺ຍໂຕ ປສ຺ສນ຺ຕິ ເຂມໂຕ ປສ຺ສນ຺ຕິ. ເຕ ຕຓ຺ຫໍ ວຑ຺ເຒນ຺ຕິ. ເຍ ຕຓ຺ຫໍ ວຑ຺ເຒນ຺ຕິ ເຕ ອຸປຘິໍ ວຑ຺ເຒນ຺ຕິ. ເຍ ອຸປຘິໍ ວຑ຺ເຒນ຺ຕິ ເຕ ທຸກ຺ຂໍ ວຑ຺ເຒນ຺ຕິ. ເຍ ທຸກ຺ຂໍ ວຑ຺ເຒນ຺ຕິ ເຕ ນ ປຣິມຸຈ຺ຈນ຺ຕິ ຊາຕິຍາ ຊຣາຍ ມຣເຓນ ໂສເກຫິ ປຣິເທເວຫິ ທຸກ຺ເຂຫິ ໂທມນສ຺ເສຫິ ອຸປາຍາເສຫິ, ນ ປຣິມຸຈ຺ຈນ຺ຕິ ທຸກ຺ຂສ຺ມາຕິ ວທາມິ.

‘‘ເສຍ຺ຍຖາປິ, ຠິກ຺ຂເວ, ອາປານີຍກໍໂສ ວຓ຺ຓສມ຺ປນ຺ໂນ ຄນ຺ຘສມ຺ປນ຺ໂນ ຣສສມ຺ປນ຺ໂນ. ໂສ ຈ ໂຂ ວິເສນ ສໍສຏ຺ໂຐ. ອຖ ປຸຣິໂສ ອາຄຈ຺ເຉຍ຺ຍ ຆມ຺ມາຠິຕຕ຺ໂຕ ຆມ຺ມປເຣໂຕ ກິລນ຺ໂຕ ຕສິໂຕ ປິປາສິໂຕ. ຕເມນໍ ເອວໍ ວເທຍ຺ຍຸໍ – ‘ອຍໍ ເຕ, ອມ຺ໂຠ ປຸຣິສ, ອາປານີຍກໍໂສ ວຓ຺ຓສມ຺ປນ຺ໂນ ຄນ຺ຘສມ຺ປນ຺ໂນ ຣສສມ຺ປນ຺ໂນ; ໂສ ຈ ໂຂ ວິເສນ ສໍສຏ຺ໂຐ. ສເຈ ອາກງ຺ຂສິ ປິວ. ປິວໂຕ ຫິ ໂຂ ຕໍ ຉາເທສ຺ສຕິ ວຓ຺ເຓນປິ ຄນ຺ເຘນປິ ຣເສນປິ, ປິວິຕ຺ວາ ຈ ປນ ຕໂຕນິທານໍ ມຣຓໍ ວາ ນິຄຈ຺ຉສິ ມຣຓມຕ຺ຕໍ ວາ ທຸກ຺ຂ’ນ຺ຕິ. ໂສ ຕໍ ອາປານີຍກໍສໍ ສຫສາ ອປ຺ປຏິສງ຺ຂາ ປິເວຍ຺ຍ, ນປ຺ປຏິນິສ຺ສຊ຺ເຊຍ຺ຍ. ໂສ ຕໂຕນິທານໍ ມຣຓໍ ວາ ນິຄຈ຺ເຉຍ຺ຍ ມຣຓມຕ຺ຕໍ ວາ ທຸກ຺ຂໍ. ເອວເມວ ໂຂ, ຠິກ຺ຂເວ, ເຍ ຫິ ເກຈິ ອຕີຕມທ຺ຘານໍ ສມຓາ ວາ ພ຺ຣາຫ຺ມຓາ ວາ ຍໍ ໂລເກ ປິຍຣູປໍ…ເປ… ອນາຄຕມທ຺ຘານໍ…ເປ… ເອຕຣຫິ ສມຓາ ວາ ພ຺ຣາຫ຺ມຓາ ວາ ຍໍ ໂລເກ ປິຍຣູປໍ ສາຕຣູປໍ ຕໍ ນິຈ຺ຈໂຕ ປສ຺ສນ຺ຕິ ສຸຂໂຕ ປສ຺ສນ຺ຕິ ອຕ຺ຕໂຕ ປສ຺ສນ຺ຕິ ອາໂຣຄ຺ຍໂຕ ປສ຺ສນ຺ຕິ ເຂມໂຕ ປສ຺ສນ຺ຕິ, ເຕ ຕຓ຺ຫໍ ວຑ຺ເຒນ຺ຕິ. ເຍ ຕຓ຺ຫໍ ວຑ຺ເຒນ຺ຕິ ເຕ ອຸປຘິໍ ວຑ຺ເຒນ຺ຕິ. ເຍ ອຸປຘິໍ ວຑ຺ເຒນ຺ຕິ ເຕ ທຸກ຺ຂໍ ວຑ຺ເຒນ຺ຕິ. ເຍ ທຸກ຺ຂໍ ວຑ຺ເຒນ຺ຕິ ເຕ ນ ປຣິມຸຈ຺ຈນ຺ຕິ ຊາຕິຍາ ຊຣາຍ ມຣເຓນ ໂສເກຫິ ປຣິເທເວຫິ ທຸກ຺ເຂຫິ ໂທມນສ຺ເສຫິ ອຸປາຍາເສຫິ, ນ ປຣິມຸຈ຺ຈນ຺ຕິ ທຸກ຺ຂສ຺ມາຕິ ວທາມິ.

‘‘ເຍ ຈ ໂຂ ເກຈິ, ຠິກ຺ຂເວ, ອຕີຕມທ຺ຘານໍ ສມຓາ ວາ ພ຺ຣາຫ຺ມຓາ ວາ ຍໍ ໂລເກ ປິຍຣູປໍ ສາຕຣູປໍ ຕໍ ອນິຈ຺ຈໂຕ ອທ຺ທກ຺ຂຸໍ ທຸກ຺ຂໂຕ ອທ຺ທກ຺ຂຸໍ ອນຕ຺ຕໂຕ ອທ຺ທກ຺ຂຸໍ ໂຣຄໂຕ ອທ຺ທກ຺ຂຸໍ ຠຍໂຕ ອທ຺ທກ຺ຂຸໍ, ເຕ ຕຓ຺ຫໍ ປຊຫິໍສຸ. ເຍ ຕຓ຺ຫໍ ປຊຫິໍສຸ ເຕ ອຸປຘິໍ ປຊຫິໍສຸ. ເຍ ອຸປຘິໍ ປຊຫິໍສຸ ເຕ ທຸກ຺ຂໍ ປຊຫິໍສຸ. ເຍ ທຸກ຺ຂໍ ປຊຫິໍສຸ ເຕ ປຣິມຸຈ຺ຈິໍສຸ ຊາຕິຍາ ຊຣາຍ ມຣເຓນ ໂສເກຫິ ປຣິເທເວຫິ ທຸກ຺ເຂຫິ ໂທມນສ຺ເສຫິ ອຸປາຍາເສຫິ, ປຣິມຸຈ຺ຈິໍສຸ ທຸກ຺ຂສ຺ມາຕິ ວທາມິ.

‘‘ເຍປິ ຫິ ເກຈິ, ຠິກ຺ຂເວ, ອນາຄຕມທ຺ຘານໍ ສມຓາ ວາ ພ຺ຣາຫ຺ມຓາ ວາ ຍໍ ໂລເກ ປິຍຣູປໍ ສາຕຣູປໍ ຕໍ ອນິຈ຺ຈໂຕ ທກ຺ຂິສ຺ສນ຺ຕິ ທຸກ຺ຂໂຕ ທກ຺ຂິສ຺ສນ຺ຕິ ອນຕ຺ຕໂຕ ທກ຺ຂິສ຺ສນ຺ຕິ ໂຣຄໂຕ ທກ຺ຂິສ຺ສນ຺ຕິ ຠຍໂຕ ທກ຺ຂິສ຺ສນ຺ຕິ, ເຕ ຕຓ຺ຫໍ ປຊຫິສ຺ສນ຺ຕິ. ເຍ ຕຓ຺ຫໍ ປຊຫິສ຺ສນ຺ຕິ…ເປ… ປຣິມຸຈ຺ຈິສ຺ສນ຺ຕິ ທຸກ຺ຂສ຺ມາຕິ ວທາມິ.

‘‘ເຍປິ ຫິ ເກຈິ, ຠິກ຺ຂເວ, ເອຕຣຫິ ສມຓາ ວາ ພ຺ຣາຫ຺ມຓາ ວາ ຍໍ ໂລເກ ປິຍຣູປໍ ສາຕຣູປໍ ຕໍ ອນິຈ຺ຈໂຕ ປສ຺ສນ຺ຕິ ທຸກ຺ຂໂຕ ປສ຺ສນ຺ຕິ ອນຕ຺ຕໂຕ ປສ຺ສນ຺ຕິ ໂຣຄໂຕ ປສ຺ສນ຺ຕິ ຠຍໂຕ ປສ຺ສນ຺ຕິ, ເຕ ຕຓ຺ຫໍ ປຊຫນ຺ຕິ. ເຍ ຕຓ຺ຫໍ ປຊຫນ຺ຕິ ເຕ ອຸປຘິໍ ປຊຫນ຺ຕິ. ເຍ ອຸປຘິໍ ປຊຫນ຺ຕິ ເຕ ທຸກ຺ຂໍ ປຊຫນ຺ຕິ. ເຍ ທຸກ຺ຂໍ ປຊຫນ຺ຕິ ເຕ ປຣິມຸຈ຺ຈນ຺ຕິ ຊາຕິຍາ ຊຣາຍ ມຣເຓນ ໂສເກຫິ ປຣິເທເວຫິ ທຸກ຺ເຂຫິ ໂທມນສ຺ເສຫິ ອຸປາຍາເສຫິ, ປຣິມຸຈ຺ຈນ຺ຕິ ທຸກ຺ຂສ຺ມາຕິ ວທາມິ.

‘‘ເສຍ຺ຍຖາປິ, ຠິກ຺ຂເວ, ອາປານີຍກໍໂສ ວຓ຺ຓສມ຺ປນ຺ໂນ ຄນ຺ຘສມ຺ປນ຺ໂນ ຣສສມ຺ປນ຺ໂນ. ໂສ ຈ ໂຂ ວິເສນ ສໍສຏ຺ໂຐ. ອຖ ປຸຣິໂສ ອາຄຈ຺ເຉຍ຺ຍ ຆມ຺ມາຠິຕຕ຺ໂຕ ຆມ຺ມປເຣໂຕ ກິລນ຺ໂຕ ຕສິໂຕ ປິປາສິໂຕ. ຕເມນໍ ເອວໍ ວເທຍ຺ຍຸໍ – ‘ອຍໍ ເຕ, ອມ຺ໂຠ ປຸຣິສ, ອາປານີຍກໍໂສ ວຓ຺ຓສມ຺ປນ຺ໂນ ຄນ຺ຘສມ຺ປນ຺ໂນ ຣສສມ຺ປນ຺ໂນ ໂສ ຈ ໂຂ ວິເສນ ສໍສຏ຺ໂຐ. ສເຈ ອາກງ຺ຂສິ ປິວ. ປິວໂຕ ຫິ ໂຂ ຕໍ ຉາເທສ຺ສຕິ ວຓ຺ເຓນປິ ຄນ຺ເຘນປິ ຣເສນປິ; ປິວິຕ຺ວາ ຈ ປນ ຕໂຕນິທານໍ ມຣຓໍ ວາ ນິຄຈ຺ຉສິ ມຣຓມຕ຺ຕໍ ວາ ທຸກ຺ຂ’ນ຺ຕິ. ອຖ ໂຂ, ຠິກ຺ຂເວ, ຕສ຺ສ ປຸຣິສສ຺ສ ເອວມສ຺ສ – ‘ສກ຺ກາ ໂຂ ເມ ອຍໍ ສຸຣາປິປາສິຕາ [ສຸຣາປິປາສາ (?)] ປານີເຍນ ວາ ວິເນຕຸໍ ທຘິມຓ຺ຑເກນ ວາ ວິເນຕຸໍ ຠຏ຺ຐໂລຓິກາຍ [ມຏ຺ຐໂລຓິກາຍ (ສີ. ສ຺ຍາ. ກໍ. ປີ.)] ວາ ວິເນຕຸໍ ໂລຓໂສວີຣເກນ ວາ ວິເນຕຸໍ, ນ ຕ຺ເວວາຫໍ ຕໍ ປິເວຍ຺ຍໍ, ຍໍ ມມ ອສ຺ສ ທີຆຣຕ຺ຕໍ ຫິຕາຍ ສຸຂາຍາ’ຕິ. ໂສ ຕໍ ອາປານີຍກໍສໍ ປຏິສງ຺ຂາ ນ ປິເວຍ຺ຍ, ປຏິນິສ຺ສຊ຺ເຊຍ຺ຍ. ໂສ ຕໂຕນິທານໍ ນ ມຣຓໍ ວາ ນິຄຈ຺ເຉຍ຺ຍ ມຣຓມຕ຺ຕໍ ວາ ທຸກ຺ຂໍ. ເອວເມວ ໂຂ, ຠິກ຺ຂເວ, ເຍ ຫິ ເກຈິ ອຕີຕມທ຺ຘານໍ ສມຓາ ວາ ພ຺ຣາຫ຺ມຓາ ວາ ຍໍ ໂລເກ ປິຍຣູປໍ ສາຕຣູປໍ ຕໍ ອນິຈ຺ຈໂຕ ອທ຺ທກ຺ຂຸໍ ທຸກ຺ຂໂຕ ອທ຺ທກ຺ຂຸໍ ອນຕ຺ຕໂຕ ອທ຺ທກ຺ຂຸໍ ໂຣຄໂຕ ອທ຺ທກ຺ຂຸໍ ຠຍໂຕ ອທ຺ທກ຺ຂຸໍ, ເຕ ຕຓ຺ຫໍ ປຊຫິໍສຸ. ເຍ ຕຓ຺ຫໍ ປຊຫິໍສຸ ເຕ ອຸປຘິໍ ປຊຫິໍສຸ. ເຍ ອຸປຘິໍ ປຊຫິໍສຸ ເຕ ທຸກ຺ຂໍ ປຊຫິໍສຸ. ເຍ ທຸກ຺ຂໍ ປຊຫິໍສຸ ເຕ ປຣິມຸຈ຺ຈິໍສຸ ຊາຕິຍາ ຊຣາຍ ມຣເຓນ ໂສເກຫິ ປຣິເທເວຫິ ທຸກ຺ເຂຫິ ໂທມນສ຺ເສຫິ ອຸປາຍາເສຫິ, ປຣິມຸຈ຺ຈິໍສຸ ທຸກ຺ຂສ຺ມາຕິ ວທາມິ.

‘‘ເຍປິ ຫິ ເກຈິ, ຠິກ຺ຂເວ, ອນາຄຕມທ຺ຘານໍ…ເປ… ເອຕຣຫິ ສມຓາ ວາ ພ຺ຣາຫ຺ມຓາ ວາ ຍໍ ໂລເກ ປິຍຣູປໍ ສາຕຣູປໍ ຕໍ ອນິຈ຺ຈໂຕ ປສ຺ສນ຺ຕິ ທຸກ຺ຂໂຕ ປສ຺ສນ຺ຕິ ອນຕ຺ຕໂຕ ປສ຺ສນ຺ຕິ ໂຣຄໂຕ ປສ຺ສນ຺ຕິ ຠຍໂຕ ປສ຺ສນ຺ຕິ, ເຕ ຕຓ຺ຫໍ ປຊຫນ຺ຕິ. ເຍ ຕຓ຺ຫໍ ປຊຫນ຺ຕິ ເຕ ອຸປຘິໍ ປຊຫນ຺ຕິ. ເຍ ອຸປຘິໍ ປຊຫນ຺ຕິ ເຕ ທຸກ຺ຂໍ ປຊຫນ຺ຕິ. ເຍ ທຸກ຺ຂໍ ປຊຫນ຺ຕິ ເຕ ປຣິມຸຈ຺ຈນ຺ຕິ ຊາຕິຍາ ຊຣາຍ ມຣເຓນ ໂສເກຫິ ປຣິເທເວຫິ ທຸກ຺ເຂຫິ ໂທມນສ຺ເສຫິ ອຸປາຍາເສຫິ, ປຣິມຸຈ຺ຈນ຺ຕິ ທຸກ຺ຂສ຺ມາຕິ ວທາມີ’’ຕິ. ຉຏ຺ຐໍ.