໑. ອສ຺ສຸຕວາສຸຕ຺ຕໍ

໖໑. ເອວໍ ເມ ສຸຕໍ – ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ…ເປ… ‘‘ອສ຺ສຸຕວາ, ຠິກ຺ຂເວ, ປຸຖຸຊ຺ຊໂນ ອິມສ຺ມິໍ ຈາຕຸມຫາຠູຕິກສ຺ມິໍ ກາຍສ຺ມິໍ ນິພ຺ພິນ຺ເທຍ຺ຍປິ ວິຣຊ຺ເຊຍ຺ຍປິ ວິມຸຈ຺ເຈຍ຺ຍປິ. ຕໍ ກິສ຺ສ ເຫຕຸ? [ຈາຕຸມ຺ມຫາຠູຕິກສ຺ມິໍ (ສີ. ສ຺ຍາ. ກໍ.)] ທິສ຺ສຕິ, ຠິກ຺ຂເວ [ທິສ຺ສຕິ ຫິ ຠິກ຺ຂເວ (ສີ. ສ຺ຍາ. ກໍ.)], ອິມສ຺ສ ຈາຕຸມຫາຠູຕິກສ຺ສ ກາຍສ຺ສ ອາຈໂຍປິ ອປຈໂຍປິ ອາທານມ຺ປິ ນິກ຺ເຂປນມ຺ປິ. ຕສ຺ມາ ຕຕ຺ຣາສ຺ສຸຕວາ ປຸຖຸຊ຺ຊໂນ ນິພ຺ພິນ຺ເທຍ຺ຍປິ ວິຣຊ຺ເຊຍ຺ຍປິ ວິມຸຈ຺ເຈຍ຺ຍປິ’’.

‘‘ຍຎ຺ຈ ໂຂ ເອຕໍ, ຠິກ຺ຂເວ, ວຸຈ຺ຈຕິ ຈິຕ຺ຕໍ ອິຕິປິ, ມໂນ ອິຕິປິ, ວິຎ຺ຎາຓໍ ອິຕິປິ, ຕຕ຺ຣາສ຺ສຸຕວາ ປຸຖຸຊ຺ຊໂນ ນາລໍ ນິພ຺ພິນ຺ທິຕຸໍ ນາລໍ ວິຣຊ຺ຊິຕຸໍ ນາລໍ ວິມຸຈ຺ຈິຕຸໍ. ຕໍ ກິສ຺ສ ເຫຕຸ? ທີຆຣຕ຺ຕຎ຺ເຫຕໍ, ຠິກ຺ຂເວ, ອສ຺ສຸຕວໂຕ ປຸຖຸຊ຺ຊນສ຺ສ ອຊ຺ໂຌສິຕໍ ມມາຍິຕໍ ປຣາມຏ຺ຐໍ – ‘ເອຕໍ ມມ, ເອໂສຫມສ຺ມິ, ເອໂສ ເມ ອຕ຺ຕາ’ຕິ. ຕສ຺ມາ ຕຕ຺ຣາສ຺ສຸຕວາ ປຸຖຸຊ຺ຊໂນ ນາລໍ ນິພ຺ພິນ຺ທິຕຸໍ ນາລໍ ວິຣຊ຺ຊິຕຸໍ ນາລໍ ວິມຸຈ຺ຈິຕຸໍ.

‘‘ວຣໍ, ຠິກ຺ຂເວ, ອສ຺ສຸຕວາ ປຸຖຸຊ຺ຊໂນ ອິມໍ ຈາຕຸມຫາຠູຕິກໍ ກາຍໍ ອຕ຺ຕໂຕ ອຸປຄຈ຺ເຉຍ຺ຍ, ນ ຕ຺ເວວ ຈິຕ຺ຕໍ. ຕໍ ກິສ຺ສ ເຫຕຸ? ທິສ຺ສຕາຍໍ, ຠິກ຺ຂເວ, ຈາຕຸມຫາຠູຕິໂກ ກາໂຍ ເອກມ຺ປິ ວສ຺ສໍ ຕິຏ຺ຐມາໂນ ທ຺ເວປິ ວສ຺ສານິ ຕິຏ຺ຐມາໂນ ຕີຓິປິ ວສ຺ສານິ ຕິຏ຺ຐມາໂນ ຈຕ຺ຕາຣິປິ ວສ຺ສານິ ຕິຏ຺ຐມາໂນ ປຎ຺ຈປິ ວສ຺ສານິ ຕິຏ຺ຐມາໂນ ທສປິ ວສ຺ສານິ ຕິຏ຺ຐມາໂນ ວີສຕິປິ ວສ຺ສານິ ຕິຏ຺ຐມາໂນ ຕິໍສມ຺ປິ ວສ຺ສານິ ຕິຏ຺ຐມາໂນ ຈຕ຺ຕາຣີສມ຺ປິ ວສ຺ສານິ ຕິຏ຺ຐມາໂນ ປຎ຺ຎາສມ຺ປິ ວສ຺ສານິ ຕິຏ຺ຐມາໂນ ວສ຺ສສຕມ຺ປິ ຕິຏ຺ຐມາໂນ, ຠິຍ຺ໂຍປິ ຕິຏ຺ຐມາໂນ.

‘‘ຍຎ຺ຈ ໂຂ ເອຕໍ, ຠິກ຺ຂເວ, ວຸຈ຺ຈຕິ ຈິຕ຺ຕໍ ອິຕິປິ, ມໂນ ອິຕິປິ, ວິຎ຺ຎາຓໍ ອິຕິປິ, ຕໍ ຣຕ຺ຕິຍາ ຈ ທິວສສ຺ສ ຈ ອຎ຺ຎເທວ ອຸປ຺ປຊ຺ຊຕິ ອຎ຺ຎໍ ນິຣຸຊ຺ຌຕິ. ເສຍ຺ຍຖາປິ, ຠິກ຺ຂເວ, ມກ຺ກໂຏ ອຣຎ຺ເຎ ປວເນ ຈຣມາໂນ ສາຂໍ ຄຓ຺ຫຕິ, ຕໍ ມຸຎ຺ຈິຕ຺ວາ ອຎ຺ຎໍ ຄຓ຺ຫຕິ, ຕໍ ມຸຎ຺ຈິຕ຺ວາ ອຎ຺ຎໍ ຄຓ຺ຫຕິ; ເອວເມວ ໂຂ, ຠິກ຺ຂເວ, ຍມິທໍ ວຸຈ຺ຈຕິ ຈິຕ຺ຕໍ ອິຕິປິ, ມໂນ ອິຕິປິ, ວິຎ຺ຎາຓໍ ອິຕິປິ, ຕໍ ຣຕ຺ຕິຍາ ຈ ທິວສສ຺ສ ຈ ອຎ຺ຎເທວ ອຸປ຺ປຊ຺ຊຕິ ອຎ຺ຎໍ ນິຣຸຊ຺ຌຕິ.

‘‘ຕຕ຺ຣ, ຠິກ຺ຂເວ, ສຸຕວາ ອຣິຍສາວໂກ ປຏິຈ຺ຈສມຸປ຺ປາທໍເຍວ ສາຘຸກໍ ໂຍນິໂສ ມນສິ ກໂຣຕິ – ‘ອິຕິ ອິມສ຺ມິໍ ສຕິ ອິທໍ ໂຫຕິ, ອິມສ຺ສຸປ຺ປາທາ ອິທໍ ອຸປ຺ປຊ຺ຊຕິ; ອິມສ຺ມິໍ ອສຕິ ອິທໍ ນ ໂຫຕິ, ອິມສ຺ສ ນິໂຣຘາ ອິທໍ ນິຣຸຊ຺ຌຕິ – ຍທິທໍ ອວິຊ຺ຊາປຈ຺ຈຍາ ສງ຺ຂາຣາ; ສງ຺ຂາຣປຈ຺ຈຍາ ວິຎ຺ຎາຓໍ…ເປ… ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ. ອວິຊ຺ຊາຍ ຕ຺ເວວ ອເສສວິຣາຄນິໂຣຘາ ສງ຺ຂາຣນິໂຣໂຘ; ສງ຺ຂາຣນິໂຣຘາ ວິຎ຺ຎາຓນິໂຣໂຘ…ເປ… ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ນິໂຣໂຘ ໂຫຕີ’’’ຕິ.

‘‘ເອວໍ ປສ຺ສໍ, ຠິກ຺ຂເວ, ສຸຕວາ ອຣິຍສາວໂກ ຣູປສ຺ມິມ຺ປິ ນິພ຺ພິນ຺ທຕິ, ເວທນາຍປິ ນິພ຺ພິນ຺ທຕິ, ສຎ຺ຎາຍປິ ນິພ຺ພິນ຺ທຕິ, ສງ຺ຂາເຣສຸປິ ນິພ຺ພິນ຺ທຕິ, ວິຎ຺ຎາຓສ຺ມິມ຺ປິ ນິພ຺ພິນ຺ທຕິ; ນິພ຺ພິນ຺ທໍ ວິຣຊ຺ຊຕິ, ວິຣາຄາ ວິມຸຈ຺ຈຕິ, ວິມຸຕ຺ຕສ຺ມິໍ ວິມຸຕ຺ຕມິຕິ ຎາຓໍ ໂຫຕິ. ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາ’ຕິ ປຊານາຕີ’’ຕິ. ປຐມໍ.