໘. ເຈຕນາສຸຕ຺ຕໍ

໓໘. ສາວຕ຺ຖິນິທານໍ. ‘‘ຍຎ຺ຈ, ຠິກ຺ຂເວ, ເຈເຕຕິ ຍຎ຺ຈ ປກປ຺ເປຕິ ຍຎ຺ຈ ອນຸເສຕິ, ອາຣມ຺ມຓເມຕໍ [ອາຣມຓເມຕໍ (?)] ໂຫຕິ ວິຎ຺ຎາຓສ຺ສ ຐິຕິຍາ. ອາຣມ຺ມເຓ ສຕິ ປຕິຏ຺ຐາ ວິຎ຺ຎາຓສ຺ສ ໂຫຕິ. ຕສ຺ມິໍ ປຕິຏ຺ຐິເຕ ວິຎ຺ຎາເຓ ວິຣູຬ຺ເຫ ອາຍຕິໍ ປຸນພ຺ຠວາຠິນິພ຺ພຕ຺ຕິ ໂຫຕິ. ອາຍຕິໍ ປຸນພ຺ຠວາຠິນິພ຺ພຕ຺ຕິຍາ ສຕິ ອາຍຕິໍ ຊາຕິ ຊຣາມຣຓໍ ໂສກປຣິເທວທຸກ຺ຂໂທມນສ຺ສຸປາຍາສາ ສມ຺ຠວນ຺ຕິ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ’’.

‘‘ໂນ ເຈ, ຠິກ຺ຂເວ, ເຈເຕຕິ ໂນ ເຈ ປກປ຺ເປຕິ, ອຖ ເຈ ອນຸເສຕິ, ອາຣມ຺ມຓເມຕໍ ໂຫຕິ ວິຎ຺ຎາຓສ຺ສ ຐິຕິຍາ. ອາຣມ຺ມເຓ ສຕິ ປຕິຏ຺ຐາ ວິຎ຺ຎາຓສ຺ສ ໂຫຕິ. ຕສ຺ມິໍ ປຕິຏ຺ຐິເຕ ວິຎ຺ຎາເຓ ວິຣູຬ຺ເຫ ອາຍຕິໍ ປຸນພ຺ຠວາຠິນິພ຺ພຕ຺ຕິ ໂຫຕິ. ອາຍຕິໍ ປຸນພ຺ຠວາຠິນິພ຺ພຕ຺ຕິຍາ ສຕິ ອາຍຕິໍ ຊາຕິຊຣາມຣຓໍ ໂສກປຣິເທວທຸກ຺ຂໂທມນສ຺ສຸປາຍາສາ ສມ຺ຠວນ຺ຕິ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ສມຸທໂຍ ໂຫຕິ.

‘‘ຍໂຕ ຈ ໂຂ, ຠິກ຺ຂເວ, ໂນ ເຈວ ເຈເຕຕິ ໂນ ຈ ປກປ຺ເປຕິ ໂນ ຈ ອນຸເສຕິ, ອາຣມ຺ມຓເມຕໍ ນ ໂຫຕິ ວິຎ຺ຎາຓສ຺ສ ຐິຕິຍາ. ອາຣມ຺ມເຓ ອສຕິ ປຕິຏ຺ຐາ ວິຎ຺ຎາຓສ຺ສ ນ ໂຫຕິ. ຕທປ຺ປຕິຏ຺ຐິເຕ ວິຎ຺ຎາເຓ ອວິຣູຬ຺ເຫ ອາຍຕິໍ ປຸນພ຺ຠວາຠິນິພ຺ພຕ຺ຕິ ນ ໂຫຕິ. ອາຍຕິໍ ປຸນພ຺ຠວາຠິນິພ຺ພຕ຺ຕິຍາ ອສຕິ ອາຍຕິໍ ຊາຕິຊຣາມຣຓໍ ໂສກປຣິເທວທຸກ຺ຂໂທມນສ຺ສຸປາຍາສາ ນິຣຸຊ຺ຌນ຺ຕິ. ເອວເມຕສ຺ສ ເກວລສ຺ສ ທຸກ຺ຂກ຺ຂນ຺ຘສ຺ສ ນິໂຣໂຘ ໂຫຕີ’’ຕິ. ອຏ຺ຐມໍ.