໕. ມານຕ຺ຖທ຺ຘສຸຕ຺ຕໍ

໒໐໑. ສາວຕ຺ຖິນິທານໍ. ເຕນ ໂຂ ປນ ສມເຍນ ມານຕ຺ຖທ຺ໂຘ ນາມ ພ຺ຣາຫ຺ມໂຓ ສາວຕ຺ຖິຍໍ ປຏິວສຕິ. ໂສ ເນວ ມາຕຣໍ ອຠິວາເທຕິ, ນ ປິຕຣໍ ອຠິວາເທຕິ, ນ ອາຈຣິຍໍ ອຠິວາເທຕິ, ນ ເຊຏ຺ຐຠາຕຣໍ ອຠິວາເທຕິ. ເຕນ ໂຂ ປນ ສມເຍນ ຠຄວາ ມຫຕິຍາ ປຣິສາຍ ປຣິວຸໂຕ ຘມ຺ມໍ ເທເສຕິ. ອຖ ໂຂ ມານຕ຺ຖທ຺ຘສ຺ສ ພ຺ຣາຫ຺ມຓສ຺ສ ເອຕທໂຫສິ – ‘‘ອຍໍ ໂຂ ສມໂຓ ໂຄຕໂມ ມຫຕິຍາ ປຣິສາຍ ປຣິວຸໂຕ ຘມ຺ມໍ ເທເສຕິ. ຍໍນູນາຫໍ ເຍນ ສມໂຓ ໂຄຕໂມ ເຕນຸປສງ຺ກເມຍ຺ຍໍ. ສເຈ ມໍ ສມໂຓ ໂຄຕໂມ ອາລປິສ຺ສຕິ, ອຫມ຺ປິ ຕໍ ອາລປິສ຺ສາມິ. ໂນ ເຈ ມໍ ສມໂຓ ໂຄຕໂມ ອາລປິສ຺ສຕິ, ອຫມ຺ປິ ນາລປິສ຺ສາມີ’’ຕິ. ອຖ ໂຂ ມານຕ຺ຖທ຺ໂຘ ພ຺ຣາຫ຺ມໂຓ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຕຸຓ຺ຫີຠູໂຕ ເອກມນ຺ຕໍ ອຏ຺ຐາສິ. ອຖ ໂຂ ຠຄວາ ຕໍ ນາລປິ. ອຖ ໂຂ ມານຕ຺ຖທ຺ໂຘ ພ຺ຣາຫ຺ມໂຓ – ‘ນາຍໍ ສມໂຓ ໂຄຕໂມ ກິຎ຺ຈິ ຊານາຕີ’ຕິ ຕໂຕວ ປຸນ ນິວຕ຺ຕິຕຸກາໂມ ອໂຫສິ. ອຖ ໂຂ ຠຄວາ ມານຕ຺ຖທ຺ຘສ຺ສ ພ຺ຣາຫ຺ມຓສ຺ສ ເຈຕສາ ເຈໂຕປຣິວິຕກ຺ກມຎ຺ຎາຍ ມານຕ຺ຖທ຺ຘໍ ພ຺ຣາຫ຺ມຓໍ ຄາຖາຍ ອຊ຺ຌຠາສິ –

‘‘ນ ມານໍ ພ຺ຣາຫ຺ມຓ ສາຘຸ, ອຕ຺ຖິກສ຺ສີຘ ພ຺ຣາຫ຺ມຓ;

ເຍນ ອຕ຺ເຖນ ອາຄຈ຺ຉິ, ຕເມວມນຸພ຺ຣູຫເຍ’’ຕິ.

ອຖ ໂຂ ມານຕ຺ຖທ຺ໂຘ ພ຺ຣາຫ຺ມໂຓ – ‘‘ຈິຕ຺ຕໍ ເມ ສມໂຓ ໂຄຕໂມ ຊານາຕີ’’ຕິ ຕຕ຺ເຖວ ຠຄວໂຕ ປາເທສຸ ສິຣສາ ນິປຕິຕ຺ວາ ຠຄວໂຕ ປາທານິ ມຸເຂນ ຈ ປຣິຈຸມ຺ພຕິ ປາຓີຫິ ຈ ປຣິສມ຺ພາຫຕິ, ນາມຎ຺ຈ ສາເວຕິ – ‘‘ມານຕ຺ຖທ຺ຘາຫໍ, ໂຠ ໂຄຕມ, ມານຕ຺ຖທ຺ຘາຫໍ, ໂຠ ໂຄຕມາ’’ຕິ. ອຖ ໂຂ ສາ ປຣິສາ ອພ຺ຠຸຕຈິຕ຺ຕຊາຕາ [ອພ຺ຠຸຕຈິຕ຺ຕຊາຕາ (ສີ. ສ຺ຍາ. ກໍ. ປີ.), ອຈ຺ຉຣິຍພ຺ຠຸຕຈິຕ຺ຕຊາຕາ (ກ.)] ອໂຫສິ – ‘ອຈ຺ຉຣິຍໍ ວຕ ໂຠ, ອພ຺ຠຸຕໍ ວຕ ໂຠ! ອຍຎ຺ຫິ ມານຕ຺ຖທ຺ໂຘ ພ຺ຣາຫ຺ມໂຓ ເນວ ມາຕຣໍ ອຠິວາເທຕິ, ນ ປິຕຣໍ ອຠິວາເທຕິ, ນ ອາຈຣິຍໍ ອຠິວາເທຕິ, ນ ເຊຏ຺ຐຠາຕຣໍ ອຠິວາເທຕິ; ອຖ ຈ ປນ ສມເຓ ໂຄຕເມ ເອວຣູປໍ ປຣມນິປຈ຺ຈກາຣໍ ກໂຣຕີ’ຕິ. ອຖ ໂຂ ຠຄວາ ມານຕ຺ຖທ຺ຘໍ ພ຺ຣາຫ຺ມຓໍ ເອຕທໂວຈ – ‘‘ອລໍ, ພ຺ຣາຫ຺ມຓ, ອຸຏ຺ເຐຫິ, ສເກ ອາສເນ ນິສີທ. ຍໂຕ ເຕ ມຍິ ຈິຕ຺ຕໍ ປສນ຺ນ’’ນ຺ຕິ. ອຖ ໂຂ ມານຕ຺ຖທ຺ໂຘ ພ຺ຣາຫ຺ມໂຓ ສເກ ອາສເນ ນິສີທິຕ຺ວາ ຠຄວນ຺ຕໍ ຄາຖາຍ ອຊ຺ຌຠາສິ –

‘‘ເກສຸ ນ ມານໍ ກຍິຣາຖ, ເກສຸ ຈສ຺ສ ສຄາຣໂວ;

ກ຺ຍສ຺ສ ອປຈິຕາ ອສ຺ສຸ, ກ຺ຍສ຺ສຸ ສາຘຸ ສຸປູຊິຕາ’’ຕິ.

‘‘ມາຕຣິ ປິຕຣິ ຈາປິ, ອໂຖ ເຊຏ຺ຐມ຺ຫິ ຠາຕຣິ;

ອາຈຣິເຍ ຈຕຸຕ຺ຖມ຺ຫິ,

ເຕສຸ ນ ມານໍ ກຍິຣາຖ;

ເຕສຸ ອສ຺ສ ສຄາຣໂວ,

ຕ຺ຍສ຺ສ ອປຈິຕາ ອສ຺ສຸ;

ຕ຺ຍສ຺ສຸ ສາຘຸ ສຸປູຊິຕາ.

‘‘ອຣຫນ຺ເຕ ສີຕີຠູເຕ, ກຕກິຈ຺ເຈ ອນາສເວ;

ນິຫຈ຺ຈ ມານໍ ອຖທ຺ໂຘ, ເຕ ນມສ຺ເສ ອນຸຕ຺ຕເຣ’’ຕິ.

ເອວໍ ວຸຕ຺ເຕ, ມານຕ຺ຖທ຺ໂຘ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ – ‘‘ອຠິກ຺ກນ຺ຕໍ, ໂຠ ໂຄຕມ…ເປ… ອຸປາສກໍ ມໍ ຠວໍ ໂຄຕໂມ ຘາເຣຕຸ ອຊ຺ຊຕຄ຺ເຄ ປາຓຸເປຕໍ ສຣຓໍ ຄຕ’’ນ຺ຕິ.