໒. ອຸທຍສຸຕ຺ຕໍ

໑໙໘. ສາວຕ຺ຖິນິທານໍ. ອຖ ໂຂ ຠຄວາ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ເຍນ ອຸທຍສ຺ສ ພ຺ຣາຫ຺ມຓສ຺ສ ນິເວສນໍ ເຕນຸປສງ຺ກມິ. ອຖ ໂຂ ອຸທໂຍ ພ຺ຣາຫ຺ມໂຓ ຠຄວໂຕ ປຕ຺ຕໍ ໂອທເນນ ປູເຣສິ. ທຸຕິຍມ຺ປິ ໂຂ ຠຄວາ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ເຍນ ອຸທຍສ຺ສ ພ຺ຣາຫ຺ມຓສ຺ສ ນິເວສນໍ ເຕນຸປສງ຺ກມິ…ເປ… ຕຕິຍມ຺ປິ ໂຂ ອຸທໂຍ ພ຺ຣາຫ຺ມໂຓ ຠຄວໂຕ ປຕ຺ຕໍ ໂອທເນນ ປູເຣຕ຺ວາ ຠຄວນ຺ຕໍ ເອຕທໂວຈ – ‘‘ປກຏ຺ຐໂກຍໍ ສມໂຓ ໂຄຕໂມ ປຸນປ຺ປຸນໍ ອາຄຈ຺ຉຕີ’’ຕິ.

‘‘ປຸນປ຺ປຸນຎ຺ເຈວ ວປນ຺ຕິ ພີຊໍ, ປຸນປ຺ປຸນໍ ວສ຺ສຕິ ເທວຣາຊາ;

ປຸນປ຺ປຸນໍ ເຂຕ຺ຕໍ ກສນ຺ຕິ ກສ຺ສກາ, ປຸນປ຺ປຸນໍ ຘຎ຺ຎມຸເປຕິ ຣຏ຺ຐໍ.

‘‘ປຸນປ຺ປຸນໍ ຍາຈກາ ຍາຈຍນ຺ຕິ, ປຸນປ຺ປຸນໍ ທານປຕີ ທທນ຺ຕິ;

ປຸນປ຺ປຸນໍ ທານປຕີ ທທິຕ຺ວາ, ປຸນປ຺ປຸນໍ ສຄ຺ຄມຸເປນ຺ຕິ ຐານໍ.

‘‘ປຸນປ຺ປຸນໍ ຂີຣນິກາ ທຸຫນ຺ຕິ, ປຸນປ຺ປຸນໍ ວຈ຺ໂຉ ອຸເປຕິ ມາຕຣໍ;

ປຸນປ຺ປຸນໍ ກິລມຕິ ຜນ຺ທຕິ ຈ, ປຸນປ຺ປຸນໍ ຄພ຺ຠມຸເປຕິ ມນ຺ໂທ.

‘‘ປຸນປ຺ປຸນໍ ຊາຍຕິ ມີຍຕິ ຈ, ປຸນປ຺ປຸນໍ ສິວຖິກໍ [ສີວຖິກໍ (ສີ. ສ຺ຍາ. ກໍ. ປີ.)] ຫຣນ຺ຕິ;

ມຄ຺ຄຎ຺ຈ ລທ຺ຘາ ອປຸນພ຺ຠວາຍ, ນ ປຸນປ຺ປຸນໍ ຊາຍຕິ ຠູຣິປຎ຺ໂຎ’’ຕິ [ປຸນປ຺ປຸນໍ ຊາຍຕິ ຠູຣິປຎ຺ໂຎຕິ (ສ຺ຍາ. ກໍ. ກ.)].

ເອວໍ ວຸຕ຺ເຕ, ອຸທໂຍ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ – ‘‘ອຠິກ຺ກນ຺ຕໍ, ໂຠ ໂຄຕມ…ເປ… ອຸປາສກໍ ມໍ ຠວໍ ໂຄຕໂມ ຘາເຣຕຸ ອຊ຺ຊຕຄ຺ເຄ ປາຓຸເປຕໍ ສຣຓໍ ຄຕ’’ນ຺ຕິ.