໔. ຆຏີກາຣສຸຕ຺ຕໍ

໑໐໕. ເອກມນ຺ຕໍ ຐິໂຕ ໂຂ ຆຏີກາໂຣ ເທວປຸຕ຺ໂຕ ຠຄວໂຕ ສນ຺ຕິເກ ອິມໍ ຄາຖໍ ອຠາສິ –

‘‘ອວິຫໍ ອຸປປນ຺ນາເສ, ວິມຸຕ຺ຕາ ສຕ຺ຕ ຠິກ຺ຂໂວ;

ຣາຄໂທສປຣິກ຺ຂີຓາ, ຕິຓ຺ຓາ ໂລເກ ວິສຕ຺ຕິກ’’ນ຺ຕິ.

‘‘ເກ ຈ ເຕ ອຕຣຸໍ ປງ຺ກໍ, ມຈ຺ຈຸເຘຍ຺ຍໍ ສຸທຸຕ຺ຕຣໍ;

ເກ ຫິຕ຺ວາ ມານຸສໍ ເທຫໍ, ທິພ຺ພໂຍຄໍ ອຸປຈ຺ຈຄຸ’’ນ຺ຕິ.

‘‘ອຸປໂກ ປລຄຓ຺ໂຑ [ຜລຄຓ຺ໂຑ (ກ.)] ຈ, ປຸກ຺ກຸສາຕິ ຈ ເຕ ຕໂຍ;

ຠທ຺ທິໂຍ ຂຓ຺ຑເທໂວ ຈ, ພາຫຸຣຄ຺ຄິ ຈ ສງ຺ຄິໂຍ [ພາຫຸທນ຺ຕີ ຈ ປິງ຺ຄິໂຍ (ສີ. ສ຺ຍາ.)];

ເຕ ຫິຕ຺ວາ ມານຸສໍ ເທຫໍ, ທິພ຺ພໂຍຄໍ ອຸປຈ຺ຈຄຸ’’ນ຺ຕິ.

‘‘ກຸສລີ ຠາສສີ ເຕສໍ, ມາຣປາສປ຺ປຫາຍິນໍ;

ກສ຺ສ ເຕ ຘມ຺ມມຎ຺ຎາຍ, ອຈ຺ຉິທຸໍ ຠວພນ຺ຘນ’’ນ຺ຕິ.

‘‘ນ ອຎ຺ຎຕ຺ຣ ຠຄວຕາ, ນາຎ຺ຎຕ຺ຣ ຕວ ສາສນາ;

ຍສ຺ສ ເຕ ຘມ຺ມມຎ຺ຎາຍ, ອຈ຺ຉິທຸໍ ຠວພນ຺ຘນໍ.

‘‘ຍຕ຺ຖ ນາມຎ຺ຈ ຣູປຎ຺ຈ, ອເສສໍ ອຸປຣຸຊ຺ຌຕິ;

ຕໍ ເຕ ຘມ຺ມໍ ອິຘຎ຺ຎາຍ, ອຈ຺ຉິທຸໍ ຠວພນ຺ຘນ’’ນ຺ຕິ.

‘‘ຄມ຺ຠີຣໍ ຠາສສີ ວາຈໍ, ທຸພ຺ພິຊານໍ ສຸທຸພ຺ພຸຘໍ;

ກສ຺ສ ຕ຺ວໍ ຘມ຺ມມຎ຺ຎາຍ, ວາຈໍ ຠາສສິ ອີທິສ’’ນ຺ຕິ.

‘‘ກຸມ຺ຠກາໂຣ ປຸເຣ ອາສິໍ, ເວກຬິງ຺ເຄ ຆຏີກໂຣ;

ມາຕາເປຕ຺ຕິຠໂຣ ອາສິໍ, ກສ຺ສປສ຺ສ ອຸປາສໂກ.

‘‘ວິຣໂຕ ເມຖຸນາ ຘມ຺ມາ, ພ຺ຣຫ຺ມຈາຣີ ນິຣາມິໂສ;

ອຫຸວາ ເຕ ສຄາເມຍ຺ໂຍ, ອຫຸວາ ເຕ ປຸເຣ ສຂາ.

‘‘ໂສຫເມເຕ ປຊານາມິ, ວິມຸຕ຺ເຕ ສຕ຺ຕ ຠິກ຺ຂໂວ;

ຣາຄໂທສປຣິກ຺ຂີເຓ, ຕິຓ຺ເຓ ໂລເກ ວິສຕ຺ຕິກ’’ນ຺ຕິ.

‘‘ເອວເມຕໍ ຕທາ ອາສິ, ຍຖາ ຠາສສິ ຠຄ຺ຄວ;

ກຸມ຺ຠກາໂຣ ປຸເຣ ອາສິ, ເວກຬິງ຺ເຄ ຆຏີກໂຣ.

‘‘ມາຕາເປຕ຺ຕິຠໂຣ ອາສິ, ກສ຺ສປສ຺ສ ອຸປາສໂກ;

ວິຣໂຕ ເມຖຸນາ ຘມ຺ມາ, ພ຺ຣຫ຺ມຈາຣີ ນິຣາມິໂສ;

ອຫຸວາ ເມ ສຄາເມຍ຺ໂຍ, ອຫຸວາ ເມ ປຸເຣ ສຂາ’’ຕິ.

‘‘ເອວເມຕໍ ປຸຣາຓານໍ, ສຫາຍານໍ ອຫຸ ສງ຺ຄໂມ;

ອຸຠິນ຺ນໍ ຠາວິຕຕ຺ຕານໍ, ສຣີຣນ຺ຕິມຘາຣິນ’’ນ຺ຕິ.