໙. ສຕ຺ຖາຣວນ຺ທນາສຸຕ຺ຕໍ

໒໖໕. ສາວຕ຺ຖິຍໍ ເຊຕວເນ. ‘‘ຠູຕປຸພ຺ພໍ, ຠິກ຺ຂເວ, ສກ຺ໂກ ເທວານມິນ຺ໂທ ມາຕລິໍ ສງ຺ຄາຫກໍ ອາມນ຺ເຕສິ – ‘ໂຍເຊຫິ, ສມ຺ມ ມາຕລິ, ສຫສ຺ສຍຸຕ຺ຕໍ ອາຊຎ຺ຎຣຖໍ, ອຸຍ຺ຍານຠູມິໍ ຄຈ຺ຉາມ ສຸຠູມິໍ ທສ຺ສນາຍາ’ຕິ. ‘ເອວໍ ຠທ຺ທນ຺ຕວາ’ຕິ ໂຂ, ຠິກ຺ຂເວ, ມາຕລິ ສງ຺ຄາຫໂກ ສກ຺ກສ຺ສ ເທວານມິນ຺ທສ຺ສ ປຏິສ຺ສຸຕ຺ວາ ສຫສ຺ສຍຸຕ຺ຕໍ ອາຊຎ຺ຎຣຖໍ ໂຍເຊຕ຺ວາ ສກ຺ກສ຺ສ ເທວານມິນ຺ທສ຺ສ ປຏິເວເທສິ – ‘ຍຸຕ຺ໂຕ ໂຂ ເຕ, ມາຣິສ, ສຫສ຺ສຍຸຕ຺ໂຕ ອາຊຎ຺ຎຣໂຖ. ຍສ຺ສ ທານິ ກາລໍ ມຎ຺ຎສີ’’’ຕິ. ອຖ ໂຂ, ຠິກ຺ຂເວ, ສກ຺ໂກ ເທວານມິນ຺ໂທ ເວຊຍນ຺ຕປາສາທາ ໂອໂຣຫນ຺ໂຕ ອຎ຺ຊລິໍ ກຕ຺ວາ ສຸທໍ ຠຄວນ຺ຕໍ ນມສ຺ສຕິ. ອຖ ໂຂ, ຠິກ຺ຂເວ, ມາຕລິ ສງ຺ຄາຫໂກ ສກ຺ກໍ ເທວານມິນ຺ທໍ ຄາຖາຍ ອຊ຺ຌຠາສິ –

‘‘ຍຎ຺ຫິ ເທວາ ມນຸສ຺ສາ ຈ, ຕໍ ນມສ຺ສນ຺ຕິ ວາສວ;

ອຖ ໂກ ນາມ ໂສ ຍກ຺ໂຂ, ຍໍ ຕ຺ວໍ ສກ຺ກ ນມສ຺ສສີ’’ຕິ.

‘‘ໂຍ ອິຘ ສມ຺ມາສມ຺ພຸທ຺ໂຘ, ອສ຺ມິໍ ໂລເກ ສເທວເກ;

ອໂນມນາມໍ ສຕ຺ຖາຣໍ, ຕໍ ນມສ຺ສາມິ ມາຕລິ.

‘‘ເຍສໍ ຣາໂຄ ຈ ໂທໂສ ຈ, ອວິຊ຺ຊາ ຈ ວິຣາຊິຕາ;

ຂີຓາສວາ ອຣຫນ຺ໂຕ, ເຕ ນມສ຺ສາມິ ມາຕລິ.

‘‘ເຍ ຣາຄໂທສວິນຍາ, ອວິຊ຺ຊາສມຕິກ຺ກມາ;

ເສກ຺ຂາ ອປຈຍາຣາມາ, ອປ຺ປມຕ຺ຕານຸສິກ຺ຂເຣ;

ເຕ ນມສ຺ສາມິ ມາຕລີ’’ຕິ.

‘‘ເສຏ຺ຐາ ຫິ ກິຣ ໂລກສ຺ມິໍ, ເຍ ຕ຺ວໍ ສກ຺ກ ນມສ຺ສສິ;

ອຫມ຺ປິ ເຕ ນມສ຺ສາມິ, ເຍ ນມສ຺ສສິ ວາສວາ’’ຕິ.

‘‘ອິທໍ ວຕ຺ວານ ມຆວາ, ເທວຣາຊາ ສຸຊມ຺ປຕິ;

ຠຄວນ຺ຕໍ ນມສ຺ສິຕ຺ວາ, ປມຸໂຂ ຣຖມາຣຸຫີ’’ຕິ.