໓. ສູຈິໂລມສຸຕ຺ຕໍ

໒໓໗. ເອກໍ ສມຍໍ ຠຄວາ ຄຍາຍໍ ວິຫຣຕິ ຏງ຺ກິຕມຎ຺ເຈ ສູຈິໂລມສ຺ສ ຍກ຺ຂສ຺ສ ຠວເນ. ເຕນ ໂຂ ປນ ສມເຍນ ຂໂຣ ຈ ຍກ຺ໂຂ ສູຈິໂລໂມ ຈ ຍກ຺ໂຂ ຠຄວໂຕ ອວິທູເຣ ອຕິກ຺ກມນ຺ຕິ. ອຖ ໂຂ ຂໂຣ ຍກ຺ໂຂ ສູຈິໂລມໍ ຍກ຺ຂໍ ເອຕທໂວຈ – ‘‘ເອໂສ ສມໂຓ’’ຕິ! ‘‘ເນໂສ ສມໂຓ, ສມຓໂກ ເອໂສ’’. ‘‘ຍາວ ຊານາມິ ຍທິ ວາ ໂສ ສມໂຓ ຍທິ ວາ ປນ ໂສ ສມຓໂກ’’ຕິ.

ອຖ ໂຂ ສູຈິໂລໂມ ຍກ຺ໂຂ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວໂຕ ກາຍໍ ອຸປນາເມສິ. ອຖ ໂຂ ຠຄວາ ກາຍໍ ອປນາເມສິ. ອຖ ໂຂ ສູຈິໂລໂມ ຍກ຺ໂຂ ຠຄວນ຺ຕໍ ເອຕທໂວຈ – ‘‘ຠາຍສິ ມໍ ສມຓາ’’ຕິ? ‘‘ນ ຂ຺ວາຫໍ ຕໍ, ອາວຸໂສ, ຠາຍາມິ; ອປິ ຈ ເຕ ສມ຺ຜສ຺ໂສ ປາປໂກ’’ຕິ. ‘‘ປຎ຺ຫໍ ຕໍ, ສມຓ ປຸຈ຺ຉິສ຺ສາມິ. ສເຈ ເມ ນ ພ຺ຍາກຣິສ຺ສສິ, ຈິຕ຺ຕໍ ວາ ເຕ ຂິປິສ຺ສາມິ, ຫທຍໍ ວາ ເຕ ຜາເລສ຺ສາມິ, ປາເທສຸ ວາ ຄເຫຕ຺ວາ ປາຣຄງ຺ຄາຍ [ປາຣໍ ຄງ຺ຄາຍ (ກ.)] ຂິປິສ຺ສາມີ’’ຕິ. ‘‘ນ ຂ຺ວາຫໍ ຕໍ, ອາວຸໂສ, ປສ຺ສາມິ ສເທວເກ ໂລເກ ສມາຣເກ ສພ຺ຣຫ຺ມເກ ສສ຺ສມຓພ຺ຣາຫ຺ມຓິຍາ ປຊາຍ ສເທວມນຸສ຺ສາຍ, ໂຍ ເມ ຈິຕ຺ຕໍ ວາ ຂິເປຍ຺ຍ ຫທຍໍ ວາ ຜາເລຍ຺ຍ ປາເທສຸ ວາ ຄເຫຕ຺ວາ ປາຣຄງ຺ຄາຍ ຂິເປຍ຺ຍ; ອປິ ຈ ຕ຺ວໍ, ອາວຸໂສ, ປຸຈ຺ຉ ຍທາ ກງ຺ຂສີ’’ຕິ. ອຖ ໂຂ ສູຈິໂລໂມ ຍກ຺ໂຂ ຠຄວນ຺ຕໍ ຄາຖາຍ ອຊ຺ຌຠາສິ – ( ) [(ອຖ ໂຂ ສູຈິໂລໂມ ຍກ຺ໂຂ ຠຄວນ຺ຕໍ ຄາຖາຍ ອຊ຺ຌຠາສິ.) (ສີ.)]

‘‘ຣາໂຄ ຈ ໂທໂສ ຈ ກຸໂຕນິທານາ,

ອຣຕີ ຣຕີ ໂລມຫໍໂສ ກຸໂຕຊາ;

ກຸໂຕ ສມຸຏ຺ຐາຍ ມໂນວິຕກ຺ກາ,

ກຸມາຣກາ ຘງ຺ກມິໂວສ຺ສຊນ຺ຕີ’’ຕິ.

‘‘ຣາໂຄ ຈ ໂທໂສ ຈ ອິໂຕນິທານາ,

ອຣຕີ ຣຕີ ໂລມຫໍໂສ ອິໂຕຊາ;

ອິໂຕ ສມຸຏ຺ຐາຍ ມໂນວິຕກ຺ກາ,

ກຸມາຣກາ ຘງ຺ກມິໂວສ຺ສຊນ຺ຕິ.

‘‘ສ຺ເນຫຊາ ອຕ຺ຕສມ຺ຠູຕາ, ນິຄ຺ໂຣຘສ຺ເສວ ຂນ຺ຘຊາ;

ປຸຖູ ວິສຕ຺ຕາ ກາເມສຸ, ມາລຸວາວ ວິຕຕາ [ວິຕ຺ຖຕາ (ສ຺ຍາ. ກໍ.)] ວເນ.

‘‘ເຍ ນໍ ປຊານນ຺ຕິ ຍໂຕນິທານໍ,

ເຕ ນໍ ວິໂນເທນ຺ຕິ ສຸໂຓຫິ ຍກ຺ຂ;

ເຕ ທຸຕ຺ຕຣໍ ໂອຆມິມໍ ຕຣນ຺ຕິ,

ອຕິຓ຺ຓປຸພ຺ພໍ ອປຸນພ຺ຠວາຍາ’’ຕິ.