໑໒. ອາຬວກສຸຕ຺ຕໍ

໒໔໖. ເອວໍ ເມ ສຸຕໍ – ເອກໍ ສມຍໍ ຠຄວາ ອາຬວິຍໍ ວິຫຣຕິ ອາຬວກສ຺ສ ຍກ຺ຂສ຺ສ ຠວເນ. ອຖ ໂຂ ອາຬວໂກ ຍກ຺ໂຂ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ເອຕທໂວຈ – ‘‘ນິກ຺ຂມ, ສມຓາ’’ຕິ. ‘‘ສາຘາວຸໂສ’’ຕິ ຠຄວາ ນິກ຺ຂມິ. ‘‘ປວິສ, ສມຓາ’’ຕິ. ‘‘ສາຘາວຸໂສ’’ຕິ ຠຄວາ ປາວິສິ. ທຸຕິຍມ຺ປິ ໂຂ ອາຬວໂກ ຍກ຺ໂຂ ຠຄວນ຺ຕໍ ເອຕທໂວຈ – ‘‘ນິກ຺ຂມ, ສມຓາ’’ຕິ. ‘‘ສາຘາວຸໂສ’’ຕິ ຠຄວາ ນິກ຺ຂມິ. ‘‘ປວິສ, ສມຓາ’’ຕິ. ‘‘ສາຘາວຸໂສ’’ຕິ ຠຄວາ ປາວິສິ. ຕຕິຍມ຺ປິ ໂຂ ອາຬວໂກ ຍກ຺ໂຂ ຠຄວນ຺ຕໍ ເອຕທໂວຈ – ‘‘ນິກ຺ຂມ, ສມຓາ’’ຕິ. ‘‘ສາຘາວຸໂສ’’ຕິ ຠຄວາ ນິກ຺ຂມິ. ‘‘ປວິສ, ສມຓາ’’ຕິ. ‘‘ສາຘາວຸໂສ’’ຕິ ຠຄວາ ປາວິສິ. ຈຕຸຕ຺ຖມ຺ປິ ໂຂ ອາຬວໂກ ຍກ຺ໂຂ ຠຄວນ຺ຕໍ ເອຕທໂວຈ – ‘‘ນິກ຺ຂມ, ສມຓາ’’ຕິ. ‘‘ນ ຂ຺ວາຫໍ ຕໍ, ອາວຸໂສ, ນິກ຺ຂມິສ຺ສາມິ. ຍໍ ເຕ ກຣຓີຍໍ ຕໍ ກໂຣຫີ’’ຕິ. ‘‘ປຎ຺ຫໍ ຕໍ, ສມຓ, ປຸຈ຺ຉິສ຺ສາມິ. ສເຈ ເມ ນ ພ຺ຍາກຣິສ຺ສສິ, ຈິຕ຺ຕໍ ວາ ເຕ ຂິປິສ຺ສາມິ, ຫທຍໍ ວາ ເຕ ຜາເລສ຺ສາມິ, ປາເທສຸ ວາ ຄເຫຕ຺ວາ ປາຣຄງ຺ຄາຍ ຂິປິສ຺ສາມີ’’ຕິ. ‘‘ນ ຂ຺ວາຫໍ ຕໍ, ອາວຸໂສ, ປສ຺ສາມິ ສເທວເກ ໂລເກ ສມາຣເກ ສພ຺ຣຫ຺ມເກ ສສ຺ສມຓພ຺ຣາຫ຺ມຓິຍາ ປຊາຍ ສເທວມນຸສ຺ສາຍ, ເຍ ເມ ຈິຕ຺ຕໍ ວາ ຂິເປຍ຺ຍ ຫທຍໍ ວາ ຜາເລຍ຺ຍ, ປາເທສຸ ວາ ຄເຫຕ຺ວາ ປາຣຄງ຺ຄາຍ ຂິເປຍ຺ຍ. ອປິ ຈ ຕ຺ວໍ, ອາວຸໂສ, ປຸຈ຺ຉ ຍທາ ກງ຺ຂສີ’’ຕິ [(ອຖ ໂຂ ອາຬວໂກ ຍກ຺ໂຂ ຠຄວນ຺ຕໍ ຄາຖາຍ ອຊ຺ຌຠາສິ.) (ສີ.)].

‘‘ກິໍສູຘ ວິຕ຺ຕໍ ປຸຣິສສ຺ສ ເສຏ຺ຐໍ, ກິໍສຸ ສຸຈິຓ຺ຓໍ ສຸຂມາວຫາຕິ;

ກິໍສຸ ຫເວ ສາທຸຕຣໍ ຣສານໍ, ກຖໍຊີວິໍ ຊີວິຕມາຫຸ ເສຏ຺ຐ’’ນ຺ຕິ.

‘‘ສທ຺ຘີຘ ວິຕ຺ຕໍ ປຸຣິສ຺ສ ເສຏ຺ຐໍ, ຘມ຺ໂມ ສຸຈິຓ຺ໂຓ ສຸຂມາວຫາຕິ;

ສຈ຺ຈໍ ຫເວ ສາທຸຕຣໍ ຣສານໍ, ປຎ຺ຎາຊີວິໍ ຊີວິຕມາຫຸ ເສຏ຺ຐ’’ນ຺ຕິ.

‘‘ກຖໍສຸ ຕຣຕິ ໂອຆໍ, ກຖໍສຸ ຕຣຕິ ອຓ຺ຓວໍ;

ກຖໍສຸ ທຸກ຺ຂມຈ຺ເຈຕິ, ກຖໍສຸ ປຣິສຸຊ຺ຌຕີ’’ຕິ.

‘‘ສທ຺ຘາຍ ຕຣຕິ ໂອຆໍ, ອປ຺ປມາເທນ ອຓ຺ຓວໍ;

ວີຣິເຍນ ທຸກ຺ຂມຈ຺ເຈຕິ, ປຎ຺ຎາຍ ປຣິສຸຊ຺ຌຕີ’’ຕິ.

‘‘ກຖໍສຸ ລຠເຕ ປຎ຺ຎໍ, ກຖໍສຸ ວິນ຺ທເຕ ຘນໍ;

ກຖໍສຸ ກິຕ຺ຕິໍ ປປ຺ໂປຕິ, ກຖໍ ມິຕ຺ຕານິ ຄນ຺ຖຕິ;

ອສ຺ມາ ໂລກາ ປຣໍ ໂລກໍ, ກຖໍ ເປຈ຺ຈ ນ ໂສຈຕີ’’ຕິ.

‘‘ສທ຺ທຫາໂນ ອຣຫຕໍ, ຘມ຺ມໍ ນິພ຺ພານປຕ຺ຕິຍາ;

ສຸສ຺ສູສໍ [ສຸສ຺ສູສາ (ສີ. ປີ.)] ລຠເຕ ປຎ຺ຎໍ, ອປ຺ປມຕ຺ໂຕ ວິຈກ຺ຂໂຓ.

‘‘ປຕິຣູປກາຣີ ຘຸຣວາ, ອຸຏ຺ຐາຕາ ວິນ຺ທເຕ ຘນໍ;

ສຈ຺ເຈນ ກິຕ຺ຕິໍ ປປ຺ໂປຕິ, ທທໍ ມິຕ຺ຕານິ ຄນ຺ຖຕິ;

ອສ຺ມາ ໂລກາ ປຣໍ ໂລກໍ, ເອວໍ ເປຈ຺ຈ ນ ໂສຈຕິ.

‘‘ຍສ຺ເສເຕ ຈຕຸໂຣ ຘມ຺ມາ, ສທ຺ຘສ຺ສ ຆຣເມສິໂນ;

ສຈ຺ຈໍ ທມ຺ໂມ ຘິຕິ ຈາໂຄ, ສ ເວ ເປຈ຺ຈ ນ ໂສຈຕິ.

‘‘ອິງ຺ຆ ອຎ຺ເຎປິ ປຸຈ຺ຉສ຺ສຸ, ປຸຖູ ສມຓພ຺ຣາຫ຺ມເຓ;

ຍທິ ສຈ຺ຈາ ທມ຺ມາ ຈາຄາ, ຂນ຺ຕ຺ຍາ ຠິຍ຺ໂຍຘ ວິຊ຺ຊຕີ’’ຕິ.

‘‘ກຖໍ ນຸ ທານິ ປຸຈ຺ເຉຍ຺ຍໍ, ປຸຖູ ສມຓພ຺ຣາຫ຺ມເຓ;

ໂຍຫໍ [ໂສຫໍ (ສີ.), ສ຺ວາຫໍ (ກ.)] ອຊ຺ຊ ປຊານາມິ, ໂຍ ອຕ຺ໂຖ ສມ຺ປຣາຍິໂກ.

‘‘ອຕ຺ຖາຍ ວຕ ເມ ພຸທ຺ໂຘ, ວາສາຍາຬວິມາຄມາ [ມາຄໂຕ (ປີ. ກ.)];

ໂຍຫໍ [ໂສຫໍ (ສີ.)] ອຊ຺ຊ ປຊານາມິ, ຍຕ຺ຖ ທິນ຺ນໍ ມຫປ຺ຜລໍ.

‘‘ໂສ ອຫໍ ວິຈຣິສ຺ສາມິ, ຄາມາ ຄາມໍ ປຸຣາ ປຸຣໍ;

ນມສ຺ສມາໂນ ສມ຺ພຸທ຺ຘໍ, ຘມ຺ມສ຺ສ ຈ ສຸຘມ຺ມຕ’’ນ຺ຕິ.

ຍກ຺ຂສໍຍຸຕ຺ຕໍ ສມຕ຺ຕໍ.