໕. ອາທິຕ຺ຕວຄ຺ໂຄ

໑. ອາທິຕ຺ຕສຸຕ຺ຕໍ

໔໑. ເອວໍ ເມ ສຸຕໍ – ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ອຖ ໂຂ ອຎ຺ຎຕຣາ ເທວຕາ ອຠິກ຺ກນ຺ຕາຍ ຣຕ຺ຕິຍາ ອຠິກ຺ກນ຺ຕວຓ຺ຓາ ເກວລກປ຺ປໍ ເຊຕວນໍ ໂອຠາເສຕ຺ວາ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ອຏ຺ຐາສິ. ເອກມນ຺ຕໍ ຐິຕາ ໂຂ ສາ ເທວຕາ ຠຄວໂຕ ສນ຺ຕິເກ ອິມາ ຄາຖາໂຍ ອຠາສິ –

‘‘ອາທິຕ຺ຕສ຺ມິໍ ອຄາຣສ຺ມິໍ, ຍໍ ນີຫຣຕິ ຠາຊນໍ;

ຕໍ ຕສ຺ສ ໂຫຕິ ອຕ຺ຖາຍ, ໂນ ຈ ຍໍ ຕຕ຺ຖ ຑຍ຺ຫຕິ.

‘‘ເອວໍ ອາທິຕ຺ຕໂກ ໂລໂກ, ຊຣາຍ ມຣເຓນ ຈ;

ນີຫເຣເຖວ ທາເນນ, ທິນ຺ນໍ ໂຫຕິ ສຸນີຫຕໍ.

‘‘ທິນ຺ນໍ ສຸຂຜລໍ ໂຫຕິ, ນາທິນ຺ນໍ ໂຫຕິ ຕໍ ຕຖາ;

ໂຈຣາ ຫຣນ຺ຕິ ຣາຊາໂນ, ອຄ຺ຄິ ຑຫຕິ ນສ຺ສຕິ.

‘‘ອຖ ອນ຺ເຕນ ຊຫຕິ, ສຣີຣໍ ສປຣິຄ຺ຄຫໍ;

ເອຕທຎ຺ຎາຍ ເມຘາວີ, ຠຸຎ຺ເຊຖ ຈ ທເທຖ ຈ;

ທຕ຺ວາ ຈ ຠຸຕ຺ວາ ຈ ຍຖານຸຠາວໍ;

ອນິນ຺ທິໂຕ ສຄ຺ຄມຸເປຕິ ຐານ’’ນ຺ຕິ.

໒. ກິໍທທສຸຕ຺ຕໍ

໔໒. ‘‘ກິໍທໂທ ພລໂທ ໂຫຕິ, ກິໍທໂທ ໂຫຕິ ວຓ຺ຓໂທ;

ກິໍທໂທ ສຸຂໂທ ໂຫຕິ, ກິໍທໂທ ໂຫຕິ ຈກ຺ຂຸໂທ;

ໂກ ຈ ສພ຺ພທໂທ ໂຫຕິ, ຕໍ ເມ ອກ຺ຂາຫິ ປຸຈ຺ຉິໂຕ’’ຕິ.

‘‘ອນ຺ນໂທ ພລໂທ ໂຫຕິ, ວຕ຺ຖໂທ ໂຫຕິ ວຓ຺ຓໂທ;

ຍານໂທ ສຸຂໂທ ໂຫຕິ, ທີປໂທ ໂຫຕິ ຈກ຺ຂຸໂທ.

‘‘ໂສ ຈ ສພ຺ພທໂທ ໂຫຕິ, ໂຍ ທທາຕິ ອຸປສ຺ສຍໍ;

ອມຕໍ ທໂທ ຈ ໂສ ໂຫຕິ, ໂຍ ຘມ຺ມມນຸສາສຕີ’’ຕິ.

໓. ອນ຺ນສຸຕ຺ຕໍ

໔໓. ‘‘ອນ຺ນເມວາຠິນນ຺ທນ຺ຕິ, ອຸຠເຍ ເທວມານຸສາ;

ອຖ ໂກ ນາມ ໂສ ຍກ຺ໂຂ, ຍໍ ອນ຺ນໍ ນາຠິນນ຺ທຕີ’’ຕິ.

‘‘ເຍ ນໍ ທທນ຺ຕິ ສທ຺ຘາຍ, ວິປ຺ປສນ຺ເນນ ເຈຕສາ;

ຕເມວ ອນ຺ນໍ ຠຊຕິ, ອສ຺ມິໍ ໂລເກ ປຣມ຺ຫິ ຈ.

‘‘ຕສ຺ມາ ວິເນຍ຺ຍ ມຈ຺ເຉຣໍ, ທຊ຺ຊາ ທານໍ ມລາຠິຠູ;

ປຸຎ຺ຎານິ ປຣໂລກສ຺ມິໍ, ປຕິຏ຺ຐາ ໂຫນ຺ຕິ ປາຓິນ’’ນ຺ຕິ.

໔. ເອກມູລສຸຕ຺ຕໍ

໔໔. ‘‘ເອກມູລໍ ທ຺ວິຣາວຏ຺ຏໍ, ຕິມລໍ ປຎ຺ຈປຕ຺ຖຣໍ;

ສມຸທ຺ທໍ ທ຺ວາທສາວຏ຺ຏໍ, ປາຕາລໍ ອຕຣີ ອິສີ’’ຕິ.

໕. ອໂນມສຸຕ຺ຕໍ

໔໕. ‘‘ອໂນມນາມໍ ນິປຸຓຕ຺ຖທສ຺ສິໍ, ປຎ຺ຎາທທໍ ກາມາລເຍ ອສຕ຺ຕໍ;

ຕໍ ປສ຺ສຖ ສພ຺ພວິທຸໍ ສຸເມຘໍ, ອຣິເຍ ປເຖ ກມມານໍ ມເຫສິ’’ນ຺ຕິ.

໖. ອຈ຺ຉຣາສຸຕ຺ຕໍ

໔໖. ‘‘ອຈ຺ຉຣາຄຓສງ຺ຆຸຏ຺ຐໍ, ປິສາຈຄຓເສວິຕໍ;

ວນນ຺ຕໍ ໂມຫນໍ ນາມ, ກຖໍ ຍາຕ຺ຣາ ຠວິສ຺ສຕີ’’ຕິ.

‘‘ອຸຊຸໂກ ນາມ ໂສ ມຄ຺ໂຄ, ອຠຍາ ນາມ ສາ ທິສາ;

ຣໂຖ ອກູຊໂນ ນາມ, ຘມ຺ມຈກ຺ເກຫິ ສໍຍຸໂຕ.

‘‘ຫິຣີ ຕສ຺ສ ອປາລມ຺ໂພ, ສຕ຺ຍສ຺ສ ປຣິວາຣຓໍ;

ຘມ຺ມາຫໍ ສາຣຖິໍ ພ຺ຣູມິ, ສມ຺ມາທິຏ຺ຐິປຸເຣຊວໍ.

‘‘ຍສ຺ສ ເອຕາທິສໍ ຍານໍ, ອິຕ຺ຖິຍາ ປຸຣິສສ຺ສ ວາ;

ສ ເວ ເອເຕນ ຍາເນນ, ນິພ຺ພານສ຺ເສວ ສນ຺ຕິເກ’’ຕິ.

໗. ວນໂຣປສຸຕ຺ຕໍ

໔໗. ‘‘ເກສໍ ທິວາ ຈ ຣຕ຺ໂຕ ຈ, ສທາ ປຸຎ຺ຎໍ ປວຑ຺ຒຕິ;

ຘມ຺ມຏ຺ຐາ ສີລສມ຺ປນ຺ນາ, ເກ ຊນາ ສຄ຺ຄຄາມິໂນ’’ຕິ.

‘‘ອາຣາມໂຣປາ ວນໂຣປາ, ເຍ ຊນາ ເສຕຸກາຣກາ;

ປປຎ຺ຈ ອຸທປານຎ຺ຈ, ເຍ ທທນ຺ຕິ ອຸປສ຺ສຍໍ.

‘‘ເຕສໍ ທິວາ ຈ ຣຕ຺ໂຕ ຈ, ສທາ ປຸຎ຺ຎໍ ປວຑ຺ຒຕິ;

ຘມ຺ມຏ຺ຐາ ສີລສມ຺ປນ຺ນາ, ເຕ ຊນາ ສຄ຺ຄຄາມິໂນ’’ຕິ.

໘. ເຊຕວນສຸຕ຺ຕໍ

໔໘. ‘‘ອິທຎ຺ຫິ ຕໍ ເຊຕວນໍ, ອິສິສງ຺ຆນິເສວິຕໍ;

ອາວຸຕ຺ຖໍ [ອາວຸຏ຺ຐໍ (ກ.)] ຘມ຺ມຣາເຊນ, ປີຕິສຎ຺ຊນນໍ ມມ.

‘‘ກມ຺ມໍ ວິຊ຺ຊາ ຈ ຘມ຺ໂມ ຈ, ສີລໍ ຊີວິຕມຸຕ຺ຕມໍ;

ເອເຕນ ມຈ຺ຈາ ສຸຊ຺ຌນ຺ຕິ, ນ ໂຄຕ຺ເຕນ ຘເນນ ວາ.

‘‘ຕສ຺ມາ ຫິ ປຓ຺ຑິໂຕ ໂປໂສ, ສມ຺ປສ຺ສໍ ອຕ຺ຖມຕ຺ຕໂນ;

ໂຍນິໂສ ວິຈິເນ ຘມ຺ມໍ, ເອວໍ ຕຕ຺ຖ ວິສຸຊ຺ຌຕິ.

‘‘ສາຣິປຸຕ຺ໂຕວ ປຎ຺ຎາຍ, ສີເລນ ອຸປສເມນ ຈ;

ໂຍປິ ປາຣງ຺ຄໂຕ ຠິກ຺ຂຸ, ເອຕາວປຣໂມ ສິຍາ’’ຕິ.

໙. ມຈ຺ຉຣິສຸຕ຺ຕໍ

໔໙. ‘‘ເຍຘ ມຈ຺ຉຣິໂນ ໂລເກ, ກທຣິຍາ ປຣິຠາສກາ;

ອຎ຺ເຎສໍ ທທມານານໍ, ອນ຺ຕຣາຍກຣາ ນຣາ.

‘‘ກີທິໂສ ເຕສໍ ວິປາໂກ, ສມ຺ປຣາໂຍ ຈ ກີທິໂສ;

ຠຄວນ຺ຕໍ ປຸຏ຺ຐຸມາຄມ຺ມ, ກຖໍ ຊາເນມຸ ຕໍ ມຍ’’ນ຺ຕິ.

‘‘ເຍຘ ມຈ຺ຉຣິໂນ ໂລເກ, ກທຣິຍາ ປຣິຠາສກາ;

ອຎ຺ເຎສໍ ທທມານານໍ, ອນ຺ຕຣາຍກຣາ ນຣາ.

‘‘ນິຣຍໍ ຕິຣຈ຺ຉານໂຍນິໍ, ຍມໂລກໍ ອຸປປຊ຺ຊເຣ;

ສເຈ ເອນ຺ຕິ ມນຸສ຺ສຕ຺ຕໍ, ທລິທ຺ເທ ຊາຍເຣ ກຸເລ.

‘‘ໂຈຬໍ ປິຓ຺ໂຑ ຣຕີ ຂິຑ຺ຑາ, ຍຕ຺ຖ ກິຈ຺ເຉນ ລພ຺ຠຕິ;

ປຣໂຕ ອາສີສເຣ [ອາສິໍສເຣ (ສີ. ສ຺ຍາ. ກໍ. ປີ.)] ພາລາ, ຕມ຺ປິ ເຕສໍ ນ ລພ຺ຠຕິ;

ທິຏ຺ເຐ ຘມ຺ເມສ ວິປາໂກ, ສມ຺ປຣາເຍ [ສມ຺ປຣາໂຍ (ສ຺ຍາ. ກໍ. ປີ.)] ຈ ທຸຄ຺ຄຕີ’’ຕິ.

‘‘ອິຕິເຫຕໍ ວິຊານາມ, ອຎ຺ຎໍ ປຸຈ຺ຉາມ ໂຄຕມ;

ເຍຘ ລທ຺ຘາ ມນຸສ຺ສຕ຺ຕໍ, ວທຎ຺ຎູ ວີຕມຈ຺ຉຣາ.

‘‘ພຸທ຺ເຘ ປສນ຺ນາ ຘມ຺ເມ ຈ, ສງ຺ເຆ ຈ ຕິພ຺ພຄາຣວາ;

ກີທິໂສ ເຕສໍ ວິປາໂກ, ສມ຺ປຣາໂຍ ຈ ກີທິໂສ;

ຠຄວນ຺ຕໍ ປຸຏ຺ຐຸມາຄມ຺ມ, ກຖໍ ຊາເນມຸ ຕໍ ມຍ’’ນ຺ຕິ.

‘‘ເຍຘ ລທ຺ຘາ ມນຸສ຺ສຕ຺ຕໍ, ວທຎ຺ຎູ ວີຕມຈ຺ຉຣາ;

ພຸທ຺ເຘ ປສນ຺ນາ ຘມ຺ເມ ຈ, ສງ຺ເຆ ຈ ຕິພ຺ພຄາຣວາ;

ເອເຕ ສຄ຺ຄາ [ສຄ຺ເຄ (ສີ. ສ຺ຍາ. ກໍ.)] ປກາສນ຺ຕິ, ຍຕ຺ຖ ເຕ ອຸປປຊ຺ຊເຣ.

‘‘ສເຈ ເອນ຺ຕິ ມນຸສ຺ສຕ຺ຕໍ, ອຑ຺ເຒ ອາຊາຍເຣ ກຸເລ;

ໂຈຬໍ ປິຓ຺ໂຑ ຣຕີ ຂິຑ຺ຑາ, ຍຕ຺ຖາກິຈ຺ເຉນ ລພ຺ຠຕິ.

‘‘ປຣສມ຺ຠເຕສຸ ໂຠເຄສຸ, ວສວຕ຺ຕີວ ໂມທເຣ;

ທິຏ຺ເຐ ຘມ຺ເມສ ວິປາໂກ, ສມ຺ປຣາເຍ ຈ ສຸຄ຺ຄຕີ’’ຕິ.

໑໐. ຆຏີກາຣສຸຕ຺ຕໍ

໕໐. ‘‘ອວິຫໍ ອຸປປນ຺ນາເສ, ວິມຸຕ຺ຕາ ສຕ຺ຕ ຠິກ຺ຂໂວ;

ຣາຄໂທສປຣິກ຺ຂີຓາ, ຕິຓ຺ຓາ ໂລເກ ວິສຕ຺ຕິກ’’ນ຺ຕິ.

‘‘ເກ ຈ ເຕ ອຕຣຸໍ ປງ຺ກໍ [ສງ຺ຄໍ (ສີ. ສ຺ຍາ.)], ມຈ຺ຈຸເຘຍ຺ຍໍ ສຸທຸຕ຺ຕຣໍ;

ເກ ຫິຕ຺ວາ ມານຸສໍ ເທຫໍ, ທິພ຺ພໂຍຄໍ ອຸປຈ຺ຈຄຸ’’ນ຺ຕິ.

‘‘ອຸປໂກ ປລຄຓ຺ໂຑ ຈ, ປຸກ຺ກຸສາຕິ ຈ ເຕ ຕໂຍ;

ຠທ຺ທິໂຍ ຂຓ຺ຑເທໂວ ຈ, ພາຫຸຣຄ຺ຄິ ຈ ສິງ຺ຄິໂຍ [ພຫຸທນ຺ຕີ ຈ ປິງ຺ຄໂຍ (ສີ.)];

ເຕ ຫິຕ຺ວາ ມານຸສໍ ເທຫໍ, ທິພ຺ພໂຍຄໍ ອຸປຈ຺ຈຄຸ’’ນ຺ຕິ.

‘‘ກຸສລີ ຠາສສີ ເຕສໍ, ມາຣປາສປ຺ປຫາຍິນໍ;

ກສ຺ສ ເຕ ຘມ຺ມມຎ຺ຎາຍ, ອຈ຺ຉິທຸໍ ຠວພນ຺ຘນ’’ນ຺ຕິ.

‘‘ນ ອຎ຺ຎຕ຺ຣ ຠຄວຕາ, ນາຎ຺ຎຕ຺ຣ ຕວ ສາສນາ;

ຍສ຺ສ ເຕ ຘມ຺ມມຎ຺ຎາຍ, ອຈ຺ຉິທຸໍ ຠວພນ຺ຘນໍ.

‘‘ຍຕ຺ຖ ນາມຎ຺ຈ ຣູປຎ຺ຈ, ອເສສໍ ອຸປຣຸຊ຺ຌຕິ;

ຕໍ ເຕ ຘມ຺ມໍ ອິຘຎ຺ຎາຍ, ອຈ຺ຉິທຸໍ ຠວພນ຺ຘນ’’ນ຺ຕິ.

‘‘ຄມ຺ຠີຣໍ ຠາສສີ ວາຈໍ, ທຸພ຺ພິຊານໍ ສຸທຸພ຺ພຸຘໍ;

ກສ຺ສ ຕ຺ວໍ ຘມ຺ມມຎ຺ຎາຍ, ວາຈໍ ຠາສສິ ອີທິສ’’ນ຺ຕິ.

‘‘ກຸມ຺ຠກາໂຣ ປຸເຣ ອາສິໍ, ເວກຬິງ຺ເຄ [ເວຫຬິງ຺ເຄ (ສີ.), ເວຠຬິງ຺ເຄ (ສ຺ຍາ. ກໍ.)] ຆຏີກໂຣ;

ມາຕາເປຕ຺ຕິຠໂຣ ອາສິໍ, ກສ຺ສປສ຺ສ ອຸປາສໂກ.

‘‘ວິຣໂຕ ເມຖຸນາ ຘມ຺ມາ, ພ຺ຣຫ຺ມຈາຣີ ນິຣາມິໂສ;

ອຫຸວາ ເຕ ສຄາເມຍ຺ໂຍ, ອຫຸວາ ເຕ ປຸເຣ ສຂາ.

‘‘ໂສຫເມເຕ ປຊານາມິ, ວິມຸຕ຺ເຕ ສຕ຺ຕ ຠິກ຺ຂໂວ;

ຣາຄໂທສປຣິກ຺ຂີເຓ, ຕິຓ຺ເຓ ໂລເກ ວິສຕ຺ຕິກ’’ນ຺ຕິ.

‘‘ເອວເມຕໍ ຕທາ ອາສິ, ຍຖາ ຠາສສິ ຠຄ຺ຄວ;

ກຸມ຺ຠກາໂຣ ປຸເຣ ອາສິ, ເວກຬິງ຺ເຄ ຆຏີກໂຣ;

ມາຕາເປຕ຺ຕິຠໂຣ ອາສິ, ກສ຺ສປສ຺ສ ອຸປາສໂກ.

‘‘ວິຣໂຕ ເມຖຸນາ ຘມ຺ມາ, ພ຺ຣຫ຺ມຈາຣີ ນິຣາມິໂສ;

ອຫຸວາ ເມ ສຄາເມຍ຺ໂຍ, ອຫຸວາ ເມ ປຸເຣ ສຂາ’’ຕິ.

‘‘ເອວເມຕໍ ປຸຣາຓານໍ, ສຫາຍານໍ ອຫຸ ສງ຺ຄໂມ;

ອຸຠິນ຺ນໍ ຠາວິຕຕ຺ຕານໍ, ສຣີຣນ຺ຕິມຘາຣິນ’’ນ຺ຕິ.

ອາທິຕ຺ຕວຄ຺ໂຄ ປຎ຺ຈໂມ.

ຕສ຺ສຸທ຺ທານໍ –

ອາທິຕ຺ຕໍ ກິໍທທໍ ອນ຺ນໍ, ເອກມູລອໂນມິຍໍ;

ອຈ຺ຉຣາວນໂຣປເຊຕໍ, ມຈ຺ຉເຣນ ຆຏີກໂຣຕິ.