໖. ຊຣາວຄ຺ໂຄ

໑. ຊຣາສຸຕ຺ຕໍ

໕໑. ‘‘ກິໍສຸ ຍາວ ຊຣາ ສາຘຸ, ກິໍສຸ ສາຘຸ ປຕິຏ຺ຐິຕໍ;

ກິໍສຸ ນຣານໍ ຣຕນໍ, ກິໍສຸ ໂຈເຣຫິ ທູຫຣ’’ນ຺ຕິ.

‘‘ສີລໍ ຍາວ ຊຣາ ສາຘຸ, ສທ຺ຘາ ສາຘຸ ປຕິຏ຺ຐິຕາ;

ປຎ຺ຎາ ນຣານໍ ຣຕນໍ, ປຸຎ຺ຎໍ ໂຈເຣຫິ ທູຫຣ’’ນ຺ຕິ.

໒. ອຊຣສາສຸຕ຺ຕໍ

໕໒. ‘‘ກິໍສຸ ອຊຣສາ ສາຘຸ, ກິໍສຸ ສາຘຸ ອຘິຏ຺ຐິຕໍ;

ກິໍສຸ ນຣານໍ ຣຕນໍ, ກິໍສຸ ໂຈເຣຫ຺ຍຫາຣິຍ’’ນ຺ຕິ.

‘‘ສີລໍ ອຊຣສາ ສາຘຸ, ສທ຺ຘາ ສາຘຸ ອຘິຏ຺ຐິຕາ;

ປຎ຺ຎາ ນຣານໍ ຣຕນໍ, ປຸຎ຺ຎໍ ໂຈເຣຫ຺ຍຫາຣິຍ’’ນ຺ຕິ.

໓. ມິຕ຺ຕສຸຕ຺ຕໍ

໕໓. ‘‘ກິໍສຸ ປວສໂຕ [ປຖວໂຕ (ປີ. ກ.)] ມິຕ຺ຕໍ, ກິໍສຸ ມິຕ຺ຕໍ ສເກ ຆເຣ;

ກິໍ ມິຕ຺ຕໍ ອຕ຺ຖຊາຕສ຺ສ, ກິໍ ມິຕ຺ຕໍ ສມ຺ປຣາຍິກ’’ນ຺ຕິ.

‘‘ສຕ຺ໂຖ ປວສໂຕ ມິຕ຺ຕໍ, ມາຕາ ມິຕ຺ຕໍ ສເກ ຆເຣ;

ສຫາໂຍ ອຕ຺ຖຊາຕສ຺ສ, ໂຫຕິ ມິຕ຺ຕໍ ປຸນປ຺ປຸນໍ;

ສຍໍກຕານິ ປຸຎ຺ຎານິ, ຕໍ ມິຕ຺ຕໍ ສມ຺ປຣາຍິກ’’ນ຺ຕິ.

໔. ວຕ຺ຖຸສຸຕ຺ຕໍ

໕໔. ‘‘ກິໍສຸ ວຕ຺ຖຸ ມນຸສ຺ສານໍ, ກິໍສູຘ ປຣໂມ ສຂາ;

ກິໍສຸ ຠູຕາ ອຸປຊີວນ຺ຕິ, ເຍ ປາຓາ ປຖວິສ຺ສິຕາ’’ຕິ [ປຖວິໍ ສິຕາຕິ (ສີ. ສ຺ຍາ. ກໍ. ປີ.)].

‘‘ປຸຕ຺ຕາ ວຕ຺ຖຸ ມນຸສ຺ສານໍ, ຠຣິຍາ ຈ [ຠຣິຍາວ (ສີ.), ຠຣິຍາ (ສ຺ຍາ. ກໍ.)] ປຣໂມ ສຂາ;

ວຸຏ຺ຐິໍ ຠູຕາ ອຸປຊີວນ຺ຕິ, ເຍ ປາຓາ ປຖວິສ຺ສິຕາ’’ຕິ.

໕. ປຐມຊນສຸຕ຺ຕໍ

໕໕. ‘‘ກິໍສຸ ຊເນຕິ ປຸຣິສໍ, ກິໍສຸ ຕສ຺ສ ວິຘາວຕິ;

ກິໍສຸ ສໍສາຣມາປາທິ, ກິໍສຸ ຕສ຺ສ ມຫພ຺ຠຍ’’ນ຺ຕິ.

‘‘ຕຓ຺ຫາ ຊເນຕິ ປຸຣິສໍ, ຈິຕ຺ຕມສ຺ສ ວິຘາວຕິ;

ສຕ຺ໂຕ ສໍສາຣມາປາທິ, ທຸກ຺ຂມສ຺ສ ມຫພ຺ຠຍ’’ນ຺ຕິ.

໖. ທຸຕິຍຊນສຸຕ຺ຕໍ

໕໖. ‘‘ກິໍສຸ ຊເນຕິ ປຸຣິສໍ, ກິໍສຸ ຕສ຺ສ ວິຘາວຕິ;

ກິໍສຸ ສໍສາຣມາປາທິ, ກິສ຺ມາ ນ ປຣິມຸຈ຺ຈຕີ’’ຕິ.

‘‘ຕຓ຺ຫາ ຊເນຕິ ປຸຣິສໍ, ຈິຕ຺ຕມສ຺ສ ວິຘາວຕິ;

ສຕ຺ໂຕ ສໍສາຣມາປາທິ, ທຸກ຺ຂາ ນ ປຣິມຸຈ຺ຈຕີ’’ຕິ.

໗. ຕຕິຍຊນສຸຕ຺ຕໍ

໕໗. ‘‘ກິໍສຸ ຊເນຕິ ປຸຣິສໍ, ກິໍສຸ ຕສ຺ສ ວິຘາວຕິ;

ກິໍສຸ ສໍສາຣມາປາທິ, ກິໍສຸ ຕສ຺ສ ປຣາຍນ’’ນ຺ຕິ.

‘‘ຕຓ຺ຫາ ຊເນຕິ ປຸຣິສໍ, ຈິຕ຺ຕມສ຺ສ ວິຘາວຕິ;

ສຕ຺ໂຕ ສໍສາຣມາປາທິ, ກມ຺ມໍ ຕສ຺ສ ປຣາຍນ’’ນ຺ຕິ.

໘. ອຸປ຺ປຖສຸຕ຺ຕໍ

໕໘. ‘‘ກິໍສຸ ອຸປ຺ປໂຖ ອກ຺ຂາໂຕ, ກິໍສຸ ຣຕ຺ຕິນ຺ທິວກ຺ຂໂຍ;

ກິໍ ມລໍ ພ຺ຣຫ຺ມຈຣິຍສ຺ສ, ກິໍ ສິນານມໂນທກ’’ນ຺ຕິ.

‘‘ຣາໂຄ ອຸປ຺ປໂຖ ອກ຺ຂາໂຕ, ວໂຍ ຣຕ຺ຕິນ຺ທິວກ຺ຂໂຍ;

ອິຕ຺ຖີ ມລໍ ພ຺ຣຫ຺ມຈຣິຍສ຺ສ, ເອຕ຺ຖາຍໍ ສຊ຺ຊເຕ ປຊາ;

ຕໂປ ຈ ພ຺ຣຫ຺ມຈຣິຍຎ຺ຈ, ຕໍ ສິນານມໂນທກ’’ນ຺ຕິ.

໙. ທຸຕິຍສຸຕ຺ຕໍ

໕໙. ‘‘ກິໍສຸ ທຸຕິຍາ [ທຸຕິຍໍ (ສ຺ຍາ. ກໍ. ປີ.)] ປຸຣິສສ຺ສ ໂຫຕິ, ກິໍສຸ ເຈນໍ ປສາສຕິ;

ກິສ຺ສ ຈາຠິຣໂຕ ມຈ຺ໂຈ, ສພ຺ພທຸກ຺ຂາ ປມຸຈ຺ຈຕີ’’ຕິ.

‘‘ສທ຺ຘາ ທຸຕິຍາ ປຸຣິສສ຺ສ ໂຫຕິ, ປຎ຺ຎາ ເຈນໍ ປສາສຕິ;

ນິພ຺ພານາຠິຣໂຕ ມຈ຺ໂຈ, ສພ຺ພທຸກ຺ຂາ ປມຸຈ຺ຈຕີ’’ຕິ.

໑໐. ກວິສຸຕ຺ຕໍ

໖໐. ‘‘ກິໍສຸ ນິທານໍ ຄາຖານໍ, ກິໍສຸ ຕາສໍ ວິຍຎ຺ຊນໍ;

ກິໍສຸ ສນ຺ນິສ຺ສິຕາ ຄາຖາ, ກິໍສຸ ຄາຖານມາສໂຍ’’ຕິ.

‘‘ຉນ຺ໂທ ນິທານໍ ຄາຖານໍ, ອກ຺ຂຣາ ຕາສໍ ວິຍຎ຺ຊນໍ;

ນາມສນ຺ນິສ຺ສິຕາ ຄາຖາ, ກວິ ຄາຖານມາສໂຍ’’ຕິ.

ຊຣາວຄ຺ໂຄ ຉຏ຺ໂຐ.

ຕສ຺ສຸທ຺ທານໍ –

ຊຣາ ອຊຣສາ ມິຕ຺ຕໍ, ວຕ຺ຖຸ ຕີຓິ ຊນານິ ຈ;

ອຸປ຺ປໂຖ ຈ ທຸຕິໂຍ ຈ, ກວິນາ ປູຣິໂຕ ວຄ຺ໂຄຕິ.