໙. ປິຓ຺ຑປາຕປາຣິສຸທ຺ຘິສຸຕ຺ຕໍ

໔໓໘. ເອວໍ ເມ ສຸຕໍ – ເອກໍ ສມຍໍ ຠຄວາ ຣາຊຄເຫ ວິຫຣຕິ ເວຬຸວເນ ກລນ຺ທກນິວາເປ. ອຖ ໂຂ ອາຍສ຺ມາ ສາຣິປຸຕ຺ໂຕ ສາຍນ຺ຫສມຍໍ ປຏິສລ຺ລານາ ວຸຏ຺ຐິໂຕ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ອາຍສ຺ມນ຺ຕໍ ສາຣິປຸຕ຺ຕໍ ຠຄວາ ເອຕທໂວຈ –

‘‘ວິປ຺ປສນ຺ນານິ ໂຂ ເຕ, ສາຣິປຸຕ຺ຕ, ອິນ຺ທ຺ຣິຍານິ, ປຣິສຸທ຺ໂຘ ຉວິວຓ຺ໂຓ ປຣິໂຍທາໂຕ. ກຕເມນ ໂຂ ຕ຺ວໍ, ສາຣິປຸຕ຺ຕ, ວິຫາເຣນ ເອຕຣຫິ ພຫຸລໍ ວິຫຣສີ’’ຕິ? ‘‘ສຸຎ຺ຎຕາວິຫາເຣນ ໂຂ ອຫໍ, ຠນ຺ເຕ, ເອຕຣຫິ ພຫຸລໍ ວິຫຣາມີ’’ຕິ. ‘‘ສາຘຸ, ສາຘຸ, ສາຣິປຸຕ຺ຕ! ມຫາປຸຣິສວິຫາເຣນ ກິຣ ຕ຺ວໍ, ສາຣິປຸຕ຺ຕ, ເອຕຣຫິ ພຫຸລໍ ວິຫຣສິ. ມຫາປຸຣິສວິຫາໂຣ ເອໂສ [ເຫສ (ສີ. ສ຺ຍາ. ກໍ. ປີ.)], ສາຣິປຸຕ຺ຕ, ຍທິທໍ – ສຸຎ຺ຎຕາ. ຕສ຺ມາຕິຫ, ສາຣິປຸຕ຺ຕ, ຠິກ຺ຂຸ ສເຈ ອາກງ຺ເຂຍ຺ຍ – ‘ສຸຎ຺ຎຕາວິຫາເຣນ ພຫຸລໍ [ເອຕຣຫິ ພຫຸລໍ (ສີ. ປີ.)] ວິຫເຣຍ຺ຍ’ນ຺ຕິ, ເຕນ, ສາຣິປຸຕ຺ຕ, ຠິກ຺ຂຸນາ ອິຕິ ປຏິສຎ຺ຈິກ຺ຂິຕພ຺ພໍ – ‘ເຍນ ຈາຫໍ ມຄ຺ເຄນ ຄາມໍ ປິຓ຺ຑາຍ ປາວິສິໍ, ຍສ຺ມິຎ຺ຈ ປເທເສ ປິຓ຺ຑາຍ ອຈຣິໍ, ເຍນ ຈ ມຄ຺ເຄນ ຄາມໂຕ ປິຓ຺ຑາຍ ປຏິກ຺ກມິໍ, ອຕ຺ຖິ ນຸ ໂຂ ເມ ຕຕ຺ຖ ຈກ຺ຂຸວິຎ຺ເຎຍ຺ເຍສຸ ຣູເປສຸ ຉນ຺ໂທ ວາ ຣາໂຄ ວາ ໂທໂສ ວາ ໂມໂຫ ວາ ປຏິຆໍ ວາປິ ເຈຕໂສ’ຕິ? ສເຈ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ເຍນ ຈາຫໍ ມຄ຺ເຄນ ຄາມໍ ປິຓ຺ຑາຍ ປາວິສິໍ, ຍສ຺ມິຎ຺ຈ ປເທເສ ປິຓ຺ຑາຍ ອຈຣິໍ, ເຍນ ຈ ມຄ຺ເຄນ ຄາມໂຕ ປິຓ຺ຑາຍ ປຏິກ຺ກມິໍ, ອຕ຺ຖິ ເມ ຕຕ຺ຖ ຈກ຺ຂຸວິຎ຺ເຎຍ຺ເຍສຸ ຣູເປສຸ ຉນ຺ໂທ ວາ ຣາໂຄ ວາ ໂທໂສ ວາ ໂມໂຫ ວາ ປຏິຆໍ ວາປິ ເຈຕໂສ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ເຕສໍເຍວ ປາປການໍ ອກຸສລານໍ ຘມ຺ມານໍ ປຫານາຍ ວາຍມິຕພ຺ພໍ. ສເຈ ປນ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ເຍນ ຈາຫໍ ມຄ຺ເຄນ ຄາມໍ ປິຓ຺ຑາຍ ປາວິສິໍ, ຍສ຺ມິຎ຺ຈ ປເທເສ ປິຓ຺ຑາຍ ອຈຣິໍ, ເຍນ ຈ ມຄ຺ເຄນ ຄາມໂຕ ປິຓ຺ຑາຍ ປຏິກ຺ກມິໍ, ນຕ຺ຖິ ເມ ຕຕ຺ຖ ຈກ຺ຂຸວິຎ຺ເຎຍ຺ເຍສຸ ຣູເປສຸ ຉນ຺ໂທ ວາ ຣາໂຄ ວາ ໂທໂສ ວາ ໂມໂຫ ວາ ປຏິຆໍ ວາປິ ເຈຕໂສ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ເຕເນວ ປີຕິປາໂມຊ຺ເຊນ ວິຫາຕພ຺ພໍ ອໂຫຣຕ຺ຕານຸສິກ຺ຂິນາ ກຸສເລສຸ ຘມ຺ເມສຸ.

໔໓໙. ‘‘ປຸນ ຈປຣໍ, ສາຣິປຸຕ຺ຕ, ຠິກ຺ຂຸນາ ອິຕິ ປຏິສຎ຺ຈິກ຺ຂິຕພ຺ພໍ – ‘ເຍນ ຈາຫໍ ມຄ຺ເຄນ ຄາມໍ ປິຓ຺ຑາຍ ປາວິສິໍ, ຍສ຺ມິຎ຺ຈ ປເທເສ ປິຓ຺ຑາຍ ອຈຣິໍ, ເຍນ ຈ ມຄ຺ເຄນ ຄາມໂຕ ປິຓ຺ຑາຍ ປຏິກ຺ກມິໍ, ອຕ຺ຖິ ນຸ ໂຂ ເມ ຕຕ຺ຖ ໂສຕວິຎ຺ເຎຍ຺ເຍສຸ ສທ຺ເທສຸ…ເປ… ຆານວິຎ຺ເຎຍ຺ເຍສຸ ຄນ຺ເຘສຸ… ຊິວ຺ຫາວິຎ຺ເຎຍ຺ເຍສຸ ຣເສສຸ … ກາຍວິຎ຺ເຎຍ຺ເຍສຸ ໂຜຏ຺ຐພ຺ເພສຸ… ມໂນວິຎ຺ເຎຍ຺ເຍສຸ ຘມ຺ເມສຸ ຉນ຺ໂທ ວາ ຣາໂຄ ວາ ໂທໂສ ວາ ໂມໂຫ ວາ ປຏິຆໍ ວາປິ ເຈຕໂສ’ຕິ? ສເຈ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ເຍນ ຈາຫໍ ມຄ຺ເຄນ ຄາມໍ ປິຓ຺ຑາຍ ປາວິສິໍ, ຍສ຺ມິຎ຺ຈ ປເທເສ ປິຓ຺ຑາຍ ອຈຣິໍ, ເຍນ ຈ ມຄ຺ເຄນ ຄາມໂຕ ປິຓ຺ຑາຍ ປຏິກ຺ກມິໍ, ອຕ຺ຖິ ເມ ຕຕ຺ຖ ມໂນວິຎ຺ເຎຍ຺ເຍສຸ ຘມ຺ເມສຸ ຉນ຺ໂທ ວາ ຣາໂຄ ວາ ໂທໂສ ວາ ໂມໂຫ ວາ ປຏິຆໍ ວາປິ ເຈຕໂສ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ເຕສໍເຍວ ປາປການໍ ອກຸສລານໍ ຘມ຺ມານໍ ປຫານາຍ ວາຍມິຕພ຺ພໍ. ສເຈ ປນ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ເຍນ ຈາຫໍ ມຄ຺ເຄນ ຄາມໍ ປິຓ຺ຑາຍ ປາວິສິໍ, ຍສ຺ມິຎ຺ຈ ປເທເສ ປິຓ຺ຑາຍ ອຈຣິໍ, ເຍນ ຈ ມຄ຺ເຄນ ຄາມໂຕ ປິຓ຺ຑາຍ ປຏິກ຺ກມິໍ, ນຕ຺ຖິ ເມ ຕຕ຺ຖ ມໂນວິຎ຺ເຎຍ຺ເຍສຸ ຘມ຺ເມສຸ ຉນ຺ໂທ ວາ ຣາໂຄ ວາ ໂທໂສ ວາ ໂມໂຫ ວາ ປຏິຆໍ ວາປິ ເຈຕໂສ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ເຕເນວ ປີຕິປາໂມຊ຺ເຊນ ວິຫາຕພ຺ພໍ ອໂຫຣຕ຺ຕານຸສິກ຺ຂິນາ ກຸສເລສຸ ຘມ຺ເມສຸ.

໔໔໐. ‘‘ປຸນ ຈປຣໍ, ສາຣິປຸຕ຺ຕ, ຠິກ຺ຂຸນາ ອິຕິ ປຏິສຎ຺ຈິກ຺ຂິຕພ຺ພໍ – ‘ປຫີນາ ນຸ ໂຂ ເມ ປຎ຺ຈ ກາມຄຸຓາ’ຕິ? ສເຈ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອປ຺ປຫີນາ ໂຂ ເມ ປຎ຺ຈ ກາມຄຸຓາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ປຎ຺ຈນ຺ນໍ ກາມຄຸຓານໍ ປຫານາຍ ວາຍມິຕພ຺ພໍ. ສເຈ ປນ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ປຫີນາ ໂຂ ເມ ປຎ຺ຈ ກາມຄຸຓາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ເຕເນວ ປີຕິປາໂມຊ຺ເຊນ ວິຫາຕພ຺ພໍ ອໂຫຣຕ຺ຕານຸສິກ຺ຂິນາ ກຸສເລສຸ ຘມ຺ເມສຸ.

໔໔໑. ‘‘ປຸນ ຈປຣໍ, ສາຣິປຸຕ຺ຕ, ຠິກ຺ຂຸນາ ອິຕິ ປຏິສຎ຺ຈິກ຺ຂິຕພ຺ພໍ – ‘ປຫີນາ ນຸ ໂຂ ເມ ປຎ຺ຈ ນີວຣຓາ’ຕິ? ສເຈ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອປ຺ປຫີນາ ໂຂ ເມ ປຎ຺ຈ ນີວຣຓາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ປຎ຺ຈນ຺ນໍ ນີວຣຓານໍ ປຫານາຍ ວາຍມິຕພ຺ພໍ. ສເຈ ປນ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ປຫີນາ ໂຂ ເມ ປຎ຺ຈ ນີວຣຓາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ເຕເນວ ປີຕິປາໂມຊ຺ເຊນ ວິຫາຕພ຺ພໍ ອໂຫຣຕ຺ຕານຸສິກ຺ຂິນາ ກຸສເລສຸ ຘມ຺ເມສຸ.

໔໔໒. ‘‘ປຸນ ຈປຣໍ, ສາຣິປຸຕ຺ຕ, ຠິກ຺ຂຸນາ ອິຕິ ປຏິສຎ຺ຈິກ຺ຂິຕພ຺ພໍ – ‘ປຣິຎ຺ຎາຕາ ນຸ ໂຂ ເມ ປຎ຺ຈຸປາທານກ຺ຂນ຺ຘາ’ຕິ? ສເຈ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອປຣິຎ຺ຎາຕາ ໂຂ ເມ ປຎ຺ຈຸປາທານກ຺ຂນ຺ຘາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ປຎ຺ຈນ຺ນໍ ອຸປາທານກ຺ຂນ຺ຘານໍ ປຣິຎ຺ຎາຍ ວາຍມິຕພ຺ພໍ. ສເຈ ປນ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ປຣິຎ຺ຎາຕາ ໂຂ ເມ ປຎ຺ຈຸປາທານກ຺ຂນ຺ຘາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ເຕເນວ ປີຕິປາໂມຊ຺ເຊນ ວິຫາຕພ຺ພໍ ອໂຫຣຕ຺ຕານຸສິກ຺ຂິນາ ກຸສເລສຸ ຘມ຺ເມສຸ.

໔໔໓. ‘‘ປຸນ ຈປຣໍ, ສາຣິປຸຕ຺ຕ, ຠິກ຺ຂຸນາ ອິຕິ ປຏິສຎ຺ຈິກ຺ຂິຕພ຺ພໍ – ‘ຠາວິຕາ ນຸ ໂຂ ເມ ຈຕ຺ຕາໂຣ ສຕິປຏ຺ຐານາ’ຕິ? ສເຈ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອຠາວິຕາ ໂຂ ເມ ຈຕ຺ຕາໂຣ ສຕິປຏ຺ຐານາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ຈຕຸນ຺ນໍ ສຕິປຏ຺ຐານານໍ ຠາວນາຍ ວາຍມິຕພ຺ພໍ. ສເຈ ປນ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ຠາວິຕາ ໂຂ ເມ ຈຕ຺ຕາໂຣ ສຕິປຏ຺ຐານາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ເຕເນວ ປີຕິປາໂມຊ຺ເຊນ ວິຫາຕພ຺ພໍ ອໂຫຣຕ຺ຕານຸສິກ຺ຂິນາ ກຸສເລສຸ ຘມ຺ເມສຸ.

໔໔໔. ‘‘ປຸນ ຈປຣໍ, ສາຣິປຸຕ຺ຕ, ຠິກ຺ຂຸນາ ອິຕິ ປຏິສຎ຺ຈິກ຺ຂິຕພ຺ພໍ – ‘ຠາວິຕາ ນຸ ໂຂ ເມ ຈຕ຺ຕາໂຣ ສມ຺ມປ຺ປຘານາ’ຕິ? ສເຈ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອຠາວິຕາ ໂຂ ເມ ຈຕ຺ຕາໂຣ ສມ຺ມປ຺ປຘານາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ຈຕຸນ຺ນໍ ສມ຺ມປ຺ປຘານານໍ ຠາວນາຍ ວາຍມິຕພ຺ພໍ. ສເຈ ປນ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ຠາວິຕາ ໂຂ ເມ ຈຕ຺ຕາໂຣ ສມ຺ມປ຺ປຘານາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ເຕເນວ ປີຕິປາໂມຊ຺ເຊນ ວິຫາຕພ຺ພໍ ອໂຫຣຕ຺ຕານຸສິກ຺ຂິນາ ກຸສເລສຸ ຘມ຺ເມສຸ.

໔໔໕. ‘‘ປຸນ ຈປຣໍ, ສາຣິປຸຕ຺ຕ, ຠິກ຺ຂຸນາ ອິຕິ ປຏິສຎ຺ຈິກ຺ຂິຕພ຺ພໍ – ‘ຠາວິຕາ ນຸ ໂຂ ເມ ຈຕ຺ຕາໂຣ ອິທ຺ຘິປາທາ’ຕິ? ສເຈ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອຠາວິຕາ ໂຂ ເມ ຈຕ຺ຕາໂຣ ອິທ຺ຘິປາທາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ຈຕຸນ຺ນໍ ອິທ຺ຘິປາທານໍ ຠາວນາຍ ວາຍມິຕພ຺ພໍ. ສເຈ ປນ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ຠາວິຕາ ໂຂ ເມ ຈຕ຺ຕາໂຣ ອິທ຺ຘິປາທາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ເຕເນວ ປີຕິປາໂມຊ຺ເຊນ ວິຫາຕພ຺ພໍ ອໂຫຣຕ຺ຕານຸສິກ຺ຂິນາ ກຸສເລສຸ ຘມ຺ເມສຸ.

໔໔໖. ‘‘ປຸນ ຈປຣໍ, ສາຣິປຸຕ຺ຕ, ຠິກ຺ຂຸນາ ອິຕິ ປຏິສຎ຺ຈິກ຺ຂິຕພ຺ພໍ – ‘ຠາວິຕານິ ນຸ ໂຂ ເມ ປຎ຺ຈິນ຺ທ຺ຣິຍານີ’ຕິ? ສເຈ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອຠາວິຕານິ ໂຂ ເມ ປຎ຺ຈິນ຺ທ຺ຣິຍານີ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ປຎ຺ຈນ຺ນໍ ອິນ຺ທ຺ຣິຍານໍ ຠາວນາຍ ວາຍມິຕພ຺ພໍ. ສເຈ ປນ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ຠາວິຕານິ ໂຂ ເມ ປຎ຺ຈິນ຺ທ຺ຣິຍານີ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ເຕເນວ ປີຕິປາໂມຊ຺ເຊນ ວິຫາຕພ຺ພໍ ອໂຫຣຕ຺ຕານຸສິກ຺ຂິນາ ກຸສເລສຸ ຘມ຺ເມສຸ.

໔໔໗. ‘‘ປຸນ ຈປຣໍ, ສາຣິປຸຕ຺ຕ, ຠິກ຺ຂຸນາ ອິຕິ ປຏິສຎ຺ຈິກ຺ຂິຕພ຺ພໍ – ‘ຠາວິຕານິ ນຸ ໂຂ ເມ ປຎ຺ຈ ພລານີ’ຕິ? ສເຈ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອຠາວິຕານິ ໂຂ ເມ ປຎ຺ຈ ພລານີ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ປຎ຺ຈນ຺ນໍ ພລານໍ ຠາວນາຍ ວາຍມິຕພ຺ພໍ. ສເຈ ປນ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ຠາວິຕານິ ໂຂ ເມ ປຎ຺ຈ ພລານີ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ເຕເນວ ປີຕິປາໂມຊ຺ເຊນ ວິຫາຕພ຺ພໍ ອໂຫຣຕ຺ຕານຸສິກ຺ຂິນາ ກຸສເລສຸ ຘມ຺ເມສຸ.

໔໔໘. ‘‘ປຸນ ຈປຣໍ, ສາຣິປຸຕ຺ຕ, ຠິກ຺ຂຸນາ ອິຕິ ປຏິສຎ຺ຈິກ຺ຂິຕພ຺ພໍ – ‘ຠາວິຕາ ນຸ ໂຂ ເມ ສຕ຺ຕ ໂພຊ຺ຌງ຺ຄາ’ຕິ? ສເຈ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອຠາວິຕາ ໂຂ ເມ ສຕ຺ຕ ໂພຊ຺ຌງ຺ຄາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ສຕ຺ຕນ຺ນໍ ໂພຊ຺ຌງ຺ຄານໍ ຠາວນາຍ ວາຍມິຕພ຺ພໍ. ສເຈ ປນ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ຠາວິຕາ ໂຂ ເມ ສຕ຺ຕ ໂພຊ຺ຌງ຺ຄາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ເຕເນວ ປີຕິປາໂມຊ຺ເຊນ ວິຫາຕພ຺ພໍ ອໂຫຣຕ຺ຕານຸສິກ຺ຂິນາ ກຸສເລສຸ ຘມ຺ເມສຸ.

໔໔໙. ‘‘ປຸນ ຈປຣໍ, ສາຣິປຸຕ຺ຕ, ຠິກ຺ຂຸນາ ອິຕິ ປຏິສຎ຺ຈິກ຺ຂິຕພ຺ພໍ – ‘ຠາວິໂຕ ນຸ ໂຂ ເມ ອຣິໂຍ ອຏ຺ຐງ຺ຄິໂກ ມຄ຺ໂຄ’ຕິ? ສເຈ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອຠາວິໂຕ ໂຂ ເມ ອຣິໂຍ ອຏ຺ຐງ຺ຄິໂກ ມຄ຺ໂຄ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ອຣິຍສ຺ສ ອຏ຺ຐງ຺ຄິກສ຺ສ ມຄ຺ຄສ຺ສ ຠາວນາຍ ວາຍມິຕພ຺ພໍ. ສເຈ ປນ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ຠາວິໂຕ ໂຂ ເມ ອຣິໂຍ ອຏ຺ຐງ຺ຄິໂກ ມຄ຺ໂຄ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ເຕເນວ ປີຕິປາໂມຊ຺ເຊນ ວິຫາຕພ຺ພໍ ອໂຫຣຕ຺ຕານຸສິກ຺ຂິນາ ກຸສເລສຸ ຘມ຺ເມສຸ.

໔໕໐. ‘‘ປຸນ ຈປຣໍ, ສາຣິປຸຕ຺ຕ, ຠິກ຺ຂຸນາ ອິຕິ ປຏິສຎ຺ຈິກ຺ຂິຕພ຺ພໍ – ‘ຠາວິຕາ ນຸ ໂຂ ເມ ສມໂຖ ຈ ວິປສ຺ສນາ ຈາ’ຕິ? ສເຈ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອຠາວິຕາ ໂຂ ເມ ສມໂຖ ຈ ວິປສ຺ສນາ ຈາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ສມຖວິປສ຺ສນານໍ ຠາວນາຍ ວາຍມິຕພ຺ພໍ. ສເຈ ປນ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ຠາວິຕາ ໂຂ ເມ ສມໂຖ ຈ ວິປສ຺ສນາ ຈາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ເຕເນວ ປີຕິປາໂມຊ຺ເຊນ ວິຫາຕພ຺ພໍ ອໂຫຣຕ຺ຕານຸສິກ຺ຂິນາ ກຸສເລສຸ ຘມ຺ເມສຸ.

໔໕໑. ‘‘ປຸນ ຈປຣໍ, ສາຣິປຸຕ຺ຕ, ຠິກ຺ຂຸນາ ອິຕິ ປຏິສຎ຺ຈິກ຺ຂິຕພ຺ພໍ – ‘ສຈ຺ຉິກຕາ ນຸ ໂຂ ເມ ວິຊ຺ຊາ ຈ ວິມຸຕ຺ຕິ ຈາ’ຕິ? ສເຈ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອສຈ຺ຉິກຕາ ໂຂ ເມ ວິຊ຺ຊາ ຈ ວິມຸຕ຺ຕິ ຈາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ວິຊ຺ຊາຍ ວິມຸຕ຺ຕິຍາ ສຈ຺ຉິກິຣິຍາຍ ວາຍມິຕພ຺ພໍ. ສເຈ ປນ, ສາຣິປຸຕ຺ຕ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ສຈ຺ຉິກຕາ ໂຂ ເມ ວິຊ຺ຊາ ຈ ວິມຸຕ຺ຕິ ຈາ’ຕິ, ເຕນ, ສາຣິປຸຕ຺ຕ, ຠິກ຺ຂຸນາ ເຕເນວ ປີຕິປາໂມຊ຺ເຊນ ວິຫາຕພ຺ພໍ ອໂຫຣຕ຺ຕານຸສິກ຺ຂິນາ ກຸສເລສຸ ຘມ຺ເມສຸ.

໔໕໒. ‘‘ເຍ ຫິ ເກຈິ, ສາຣິປຸຕ຺ຕ, ອຕີຕມທ຺ຘານໍ ສມຓາ ວາ ພ຺ຣາຫ຺ມຓາ ວາ ປິຓ຺ຑປາຕໍ ປຣິໂສເຘສຸໍ, ສພ຺ເພ ເຕ ເອວເມວ ປຈ຺ຈເວກ຺ຂິຕ຺ວາ ປຈ຺ຈເວກ຺ຂິຕ຺ວາ ປິຓ຺ຑປາຕໍ ປຣິໂສເຘສຸໍ. ເຍປິ ຫິ ເກຈິ, ສາຣິປຸຕ຺ຕ, ອນາຄຕມທ຺ຘານໍ ສມຓາ ວາ ພ຺ຣາຫ຺ມຓາ ວາ ປິຓ຺ຑປາຕໍ ປຣິໂສເຘສ຺ສນ຺ຕິ, ສພ຺ເພ ເຕ ເອວເມວ ປຈ຺ຈເວກ຺ຂິຕ຺ວາ ປຈ຺ຈເວກ຺ຂິຕ຺ວາ ປິຓ຺ຑປາຕໍ ປຣິໂສເຘສ຺ສນ຺ຕິ. ເຍປິ ຫິ ເກຈິ, ສາຣິປຸຕ຺ຕ, ເອຕຣຫິ ສມຓາ ວາ ພ຺ຣາຫ຺ມຓາ ວາ ປິຓ຺ຑປາຕໍ ປຣິໂສເຘນ຺ຕິ, ສພ຺ເພ ເຕ ເອວເມວ ປຈ຺ຈເວກ຺ຂິຕ຺ວາ ປຈ຺ຈເວກ຺ຂິຕ຺ວາ ປິຓ຺ຑປາຕໍ ປຣິໂສເຘນ຺ຕິ. ຕສ຺ມາຕິຫ, ສາຣິປຸຕ຺ຕ [ໂວ ສາຣິປຸຕ຺ຕ ເອວໍ ສິກ຺ຂິຕພ຺ພໍ (ສີ. ປີ.)], ‘ປຈ຺ຈເວກ຺ຂິຕ຺ວາ ປຈ຺ຈເວກ຺ຂິຕ຺ວາ ປິຓ຺ຑປາຕໍ ປຣິໂສເຘສ຺ສາມາ’ຕິ – ເອວຎ຺ຫິ ໂວ, ສາຣິປຸຕ຺ຕ, ສິກ຺ຂິຕພ຺ພ’’ນ຺ຕິ.

ອິທມໂວຈ ຠຄວາ. ອຕ຺ຕມໂນ ອາຍສ຺ມາ ສາຣິປຸຕ຺ໂຕ ຠຄວໂຕ ຠາສິຕໍ ອຠິນນ຺ທີຕິ.

ປິຓ຺ຑປາຕປາຣິສຸທ຺ຘິສຸຕ຺ຕໍ ນິຏ຺ຐິຕໍ ນວມໍ.