໔. ເສວິຕພ຺ພາເສວິຕພ຺ພສຸຕ຺ຕໍ

໑໐໙. ເອວໍ ເມ ສຸຕໍ – ເອກໍ ສມຍໍ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ຕຕ຺ຣ ໂຂ ຠຄວາ ຠິກ຺ຂູ ອາມນ຺ເຕສິ – ‘‘ຠິກ຺ຂໂວ’’ຕິ. ‘‘ຠທນ຺ເຕ’’ຕິ ເຕ ຠິກ຺ຂູ ຠຄວໂຕ ປຈ຺ຈສ຺ໂສສຸໍ. ຠຄວາ ເອຕທໂວຈ – ‘‘ເສວິຕພ຺ພາເສວິຕພ຺ພໍ ໂວ, ຠິກ຺ຂເວ, ຘມ຺ມປຣິຍາຍໍ ເທເສສ຺ສາມິ. ຕໍ ສຸຓາຖ, ສາຘຸກໍ ມນສິ ກໂຣຖ; ຠາສິສ຺ສາມີ’’ຕິ. ‘‘ເອວໍ, ຠນ຺ເຕ’’ຕິ ໂຂ ເຕ ຠິກ຺ຂູ ຠຄວໂຕ ປຈ຺ຈສ຺ໂສສຸໍ. ຠຄວາ ເອຕທໂວຈ –

‘‘ກາຍສມາຈາຣໍປາຫໍ [ປຫໍ (ສພ຺ພຕ຺ຖ)], ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ກາຍສມາຈາຣໍ. ວຈີສມາຈາຣໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ວຈີສມາຈາຣໍ. ມໂນສມາຈາຣໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ມໂນສມາຈາຣໍ. ຈິຕ຺ຕຸປ຺ປາທໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ຈິຕ຺ຕຸປ຺ປາທໍ. ສຎ຺ຎາປຏິລາຠໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ສຎ຺ຎາປຏິລາຠໍ. ທິຏ຺ຐິປຏິລາຠໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ທິຏ຺ຐິປຏິລາຠໍ. ອຕ຺ຕຠາວປຏິລາຠໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ອຕ຺ຕຠາວປຏິລາຠ’’ນ຺ຕິ.

ເອວໍ ວຸຕ຺ເຕ ອາຍສ຺ມາ ສາຣິປຸຕ຺ໂຕ ຠຄວນ຺ຕໍ ເອຕທໂວຈ – ‘‘ອິມສ຺ສ ໂຂ ອຫໍ, ຠນ຺ເຕ, ຠຄວຕາ ສໍຂິຕ຺ເຕນ ຠາສິຕສ຺ສ, ວິຕ຺ຖາເຣນ ອຕ຺ຖໍ ອວິຠຕ຺ຕສ຺ສ, ເອວໍ ວິຕ຺ຖາເຣນ ອຕ຺ຖໍ ອາຊານາມິ.

໑໑໐. ‘‘‘ກາຍສມາຈາຣໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ກາຍສມາຈາຣ’ນ຺ຕິ – ອິຕິ ໂຂ ປເນຕໍ ວຸຕ຺ຕໍ ຠຄວຕາ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຍຖາຣູປໍ, ຠນ຺ເຕ, ກາຍສມາຈາຣໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ, ເອວຣູໂປ ກາຍສມາຈາໂຣ ນ ເສວິຕພ຺ໂພ; ຍຖາຣູປຎ຺ຈ ໂຂ, ຠນ຺ເຕ, ກາຍສມາຈາຣໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ, ເອວຣູໂປ ກາຍສມາຈາໂຣ ເສວິຕພ຺ໂພ.

໑໑໑. ‘‘ກຖໍຣູປໍ, ຠນ຺ເຕ, ກາຍສມາຈາຣໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ? ອິຘ, ຠນ຺ເຕ, ເອກຈ຺ໂຈ ປາຓາຕິປາຕີ ໂຫຕິ ລຸທ຺ໂທ ໂລຫິຕປາຓິ ຫຕປ຺ປຫເຕ ນິວິຏ຺ໂຐ ອທຍາປນ຺ໂນ ປາຓຠູເຕສຸ; ອທິນ຺ນາທາຍີ ໂຂ ປນ ໂຫຕິ, ຍໍ ຕໍ ປຣສ຺ສ ປຣວິຕ຺ຕູປກຣຓໍ ຄາມຄຕໍ ວາ ອຣຎ຺ຎຄຕໍ ວາ ຕໍ ອທິນ຺ນໍ ເຖຍ຺ຍສງ຺ຂາຕໍ ອາທາຕາ ໂຫຕິ; ກາເມສຸມິຈ຺ຉາຈາຣີ ໂຂ ປນ ໂຫຕິ, ຍາ ຕາ ມາຕຸຣກ຺ຂິຕາ ປິຕຸຣກ຺ຂິຕາ ມາຕາປິຕຸຣກ຺ຂິຕາ ຠາຕຸຣກ຺ຂິຕາ ຠຄິນິຣກ຺ຂິຕາ ຎາຕິຣກ຺ຂິຕາ ໂຄຕ຺ຕຣກ຺ຂິຕາ ຘມ຺ມຣກ຺ຂິຕາ ສສ຺ສາມິກາ ສປຣິທຓ຺ຑາ ອນ຺ຕມໂສ ມາລາຄຸຬປຣິກ຺ຂິຕ຺ຕາປິ ຕຖາຣູປາສຸ ຈາຣິຕ຺ຕໍ ອາປຊ຺ຊິຕາ ໂຫຕິ – ເອວຣູປໍ, ຠນ຺ເຕ, ກາຍສມາຈາຣໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ.

‘‘ກຖໍຣູປໍ, ຠນ຺ເຕ, ກາຍສມາຈາຣໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ? ອິຘ, ຠນ຺ເຕ, ເອກຈ຺ໂຈ ປາຓາຕິປາຕໍ ປຫາຍ ປາຓາຕິປາຕາ ປຏິວິຣໂຕ ໂຫຕິ ນິຫິຕທຓ຺ໂຑ ນິຫິຕສຕ຺ໂຖ, ລຊ຺ຊີ ທຍາປນ຺ໂນ ສພ຺ພປາຓຠູຕຫິຕານຸກມ຺ປີ ວິຫຣຕິ; ອທິນ຺ນາທານໍ ປຫາຍ ອທິນ຺ນາທານາ ປຏິວິຣໂຕ ໂຫຕິ, ຍໍ ຕໍ ປຣສ຺ສ ປຣວິຕ຺ຕູປກຣຓໍ ຄາມຄຕໍ ວາ ອຣຎ຺ຎຄຕໍ ວາ ຕໍ ນາທິນ຺ນໍ ເຖຍ຺ຍສງ຺ຂາຕໍ ອາທາຕາ ໂຫຕິ; ກາເມສຸມິຈ຺ຉາຈາຣໍ ປຫາຍ ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ຍາ ຕາ ມາຕຸຣກ຺ຂິຕາ ປິຕຸຣກ຺ຂິຕາ ມາຕາປິຕຸຣກ຺ຂິຕາ ຠາຕຸຣກ຺ຂິຕາ ຠຄິນິຣກ຺ຂິຕາ ຎາຕິຣກ຺ຂິຕາ ໂຄຕ຺ຕຣກ຺ຂິຕາ ຘມ຺ມຣກ຺ຂິຕາ ສສ຺ສາມິກາ ສປຣິທຓ຺ຑາ ອນ຺ຕມໂສ ມາລາຄຸຬປຣິກ຺ຂິຕ຺ຕາປິ ຕຖາຣູປາສຸ ນ ຈາຣິຕ຺ຕໍ ອາປຊ຺ຊິຕາ ໂຫຕິ – ເອວຣູປໍ, ຠນ຺ເຕ, ກາຍສມາຈາຣໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ. ‘ກາຍສມາຈາຣໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ກາຍສມາຈາຣ’ນ຺ຕິ – ອິຕິ ຍໍ ຕໍ ວຸຕ຺ຕໍ ຠຄວຕາ ອິທເມຕໍ ປຏິຈ຺ຈ ວຸຕ຺ຕໍ.

‘‘‘ວຈີສມາຈາຣໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ວຈີສມາຈາຣ’ນ຺ຕິ – ອິຕິ ໂຂ ປເນຕໍ ວຸຕ຺ຕໍ ຠຄວຕາ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຍຖາຣູປໍ, ຠນ຺ເຕ, ວຈີສມາຈາຣໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ, ເອວຣູໂປ ວຈີສມາຈາໂຣ ນ ເສວິຕພ຺ໂພ; ຍຖາຣູປຎ຺ຈ ໂຂ, ຠນ຺ເຕ, ວຈີສມາຈາຣໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ ເອວຣູໂປ ວຈີສມາຈາໂຣ ເສວິຕພ຺ໂພ.

໑໑໒. ‘‘ກຖໍຣູປໍ, ຠນ຺ເຕ, ວຈີສມາຈາຣໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ? ອິຘ, ຠນ຺ເຕ, ເອກຈ຺ໂຈ ມຸສາວາທີ ໂຫຕິ, ສຠາຄໂຕ [ສຠຄ຺ຄໂຕ (ພຫູສຸ)] ວາ ປຣິສາຄໂຕ [ປຣິສຄ຺ຄໂຕ (ພຫູສຸ)] ວາ ຎາຕິມຊ຺ຌຄໂຕ ວາ ປູຄມຊ຺ຌຄໂຕ ວາ ຣາຊກຸລມຊ຺ຌຄໂຕ ວາ ອຠິນີໂຕ ສກ຺ຂິປຸຏ຺ໂຐ – ‘ເອຫມ຺ໂຠ ປຸຣິສ, ຍໍ ຊານາສິ ຕໍ ວເທຫີ’ຕິ ໂສ ອຊານໍ ວາ ອາຫ – ‘ຊານາມີ’ຕິ, ຊານໍ ວາ ອາຫ – ‘ນ ຊານາມີ’ຕິ; ອປສ຺ສໍ ວາ ອາຫ – ‘ປສ຺ສາມີ’ຕິ, ປສ຺ສໍ ວາ ອາຫ – ‘ນ ປສ຺ສາມີ’ຕິ – ອິຕິ [ປສ຺ສ ມ. ນິ. ໑.໔໔໐ ສາເລຍ຺ຍກສຸຕ຺ເຕ] ອຕ຺ຕເຫຕຸ ວາ ປຣເຫຕຸ ວາ ອາມິສກິຎ຺ຈິກ຺ຂເຫຕຸ [ກິຎ຺ຈກ຺ຂເຫຕຸ (ສີ.)] ວາ ສມ຺ປຊານມຸສາ ຠາສິຕາ ໂຫຕິ; ປິສຸຓວາໂຈ ໂຂ ປນ ໂຫຕິ, ອິໂຕ ສຸຕ຺ວາ ອມຸຕ຺ຣ ອກ຺ຂາຕາ ອິເມສໍ ເຠທາຍ, ອມຸຕ຺ຣ ວາ ສຸຕ຺ວາ ອິເມສໍ ອກ຺ຂາຕາ ອມູສໍ ເຠທາຍ – ອິຕິ ສມຄ຺ຄານໍ ວາ ເຠຕ຺ຕາ, ຠິນ຺ນານໍ ວາ ອນຸປ຺ປທາຕາ, ວຄ຺ຄາຣາໂມ, ວຄ຺ຄຣໂຕ, ວຄ຺ຄນນ຺ທີ, ວຄ຺ຄກຣຓິໍ ວາຈໍ ຠາສິຕາ ໂຫຕິ; ຜຣຸສວາໂຈ ໂຂ ປນ ໂຫຕິ, ຍາ ສາ ວາຈາ ກຓ຺ຑກາ ກກ຺ກສາ ຜຣຸສາ ປຣກຏຸກາ ປຣາຠິສຊ຺ຊນີ ໂກຘສາມນ຺ຕາ ອສມາຘິສໍວຕ຺ຕນິກາ, ຕຖາຣູປິໍ ວາຈໍ ຠາສິຕາ ໂຫຕິ; ສມ຺ຜປ຺ປລາປີ ໂຂ ປນ ໂຫຕິ ອກາລວາທີ ອຠູຕວາທີ ອນຕ຺ຖວາທີ ອຘມ຺ມວາທີ ອວິນຍວາທີ, ອນິຘານວຕິໍ ວາຈໍ ຠາສິຕາ ໂຫຕິ ອກາເລນ ອນປເທສໍ ອປຣິຍນ຺ຕວຕິໍ ອນຕ຺ຖສໍຫິຕໍ – ເອວຣູປໍ, ຠນ຺ເຕ, ວຈີສມາຈາຣໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ.

‘‘ກຖໍຣູປໍ, ຠນ຺ເຕ, ວຈີສມາຈາຣໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ? ອິຘ, ຠນ຺ເຕ, ເອກຈ຺ໂຈ ມຸສາວາທໍ ປຫາຍ ມຸສາວາທາ ປຏິວິຣໂຕ ໂຫຕິ ສຠາຄໂຕ ວາ ປຣິສາຄໂຕ ວາ ຎາຕິມຊ຺ຌຄໂຕ ວາ ປູຄມຊ຺ຌຄໂຕ ວາ ຣາຊກຸລມຊ຺ຌຄໂຕ ວາ ອຠິນີໂຕ ສກ຺ຂິປຸຏ຺ໂຐ – ‘ເອຫມ຺ໂຠ ປຸຣິສ, ຍໍ ຊານາສິ ຕໍ ວເທຫີ’ຕິ ໂສ ອຊານໍ ວາ ອາຫ – ‘ນ ຊານາມີ’ຕິ, ຊານໍ ວາ ອາຫ – ‘ຊານາມີ’ຕິ, ອປສ຺ສໍ ວາ ອາຫ – ‘ນ ປສ຺ສາມີ’ຕິ, ປສ຺ສໍ ວາ ອາຫ – ‘ປສ຺ສາມີ’ຕິ – ອິຕິ ອຕ຺ຕເຫຕຸ ວາ ປຣເຫຕຸ ວາ ອາມິສກິຎ຺ຈິກ຺ຂເຫຕຸ ວາ ນ ສມ຺ປຊານມຸສາ ຠາສິຕາ ໂຫຕິ; ປິສຸຓໍ ວາຈໍ ປຫາຍ ປິສຸຓາຍ ວາຈາຍ ປຏິວິຣໂຕ ໂຫຕິ, ອິໂຕ ສຸຕ຺ວາ ນ ອມຸຕ຺ຣ ອກ຺ຂາຕາ ອິເມສໍ ເຠທາຍ, ອມຸຕ຺ຣ ວາ ສຸຕ຺ວາ ນ ອິເມສໍ ອກ຺ຂາຕາ ອມູສໍ ເຠທາຍ – ອິຕິ ຠິນ຺ນານໍ ວາ ສນ຺ຘາຕາ ສຫິຕານໍ ວາ ອນຸປ຺ປທາຕາ ສມຄ຺ຄາຣາໂມ ສມຄ຺ຄຣໂຕ ສມຄ຺ຄນນ຺ທີ ສມຄ຺ຄກຣຓິໍ ວາຈໍ ຠາສິຕາ ໂຫຕິ; ຜຣຸສໍ ວາຈໍ ປຫາຍ ຜຣຸສາຍ ວາຈາຍ ປຏິວິຣໂຕ ໂຫຕິ, ຍາ ສາ ວາຈາ ເນລາ ກຓ຺ຓສຸຂາ ເປມນີຍາ ຫທຍງ຺ຄມາ ໂປຣີ ພຫຸຊນກນ຺ຕາ ພຫຸຊນມນາປາ ຕຖາຣູປິໍ ວາຈໍ ຠາສິຕາ ໂຫຕິ; ສມ຺ຜປ຺ປລາປໍ ປຫາຍ ສມ຺ຜປ຺ປລາປາ ປຏິວິຣໂຕ ໂຫຕິ ກາລວາທີ ຠູຕວາທີ ອຕ຺ຖວາທີ ຘມ຺ມວາທີ ວິນຍວາທີ, ນິຘານວຕິໍ ວາຈໍ ຠາສິຕາ ໂຫຕິ ກາເລນ ສາປເທສໍ ປຣິຍນ຺ຕວຕິໍ ອຕ຺ຖສໍຫິຕໍ – ເອວຣູປໍ, ຠນ຺ເຕ, ວຈີສມາຈາຣໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ. ‘ວຈີສມາຈາຣໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ວຈີສມາຈາຣ’ນ຺ຕິ – ອິຕິ ຍໍ ຕໍ ວຸຕ຺ຕໍ ຠຄວຕາ ອິທເມຕໍ ປຏິຈ຺ຈ ວຸຕ຺ຕໍ.

‘‘‘ມໂນສມາຈາຣໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ມໂນສມາຈາຣ’ນ຺ຕິ – ອິຕິ ໂຂ ປເນຕໍ ວຸຕ຺ຕໍ ຠຄວຕາ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຍຖາຣູປໍ, ຠນ຺ເຕ, ມໂນສມາຈາຣໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ ເອວຣູໂປ ມໂນສມາຈາໂຣ ນ ເສວິຕພ຺ໂພ; ຍຖາຣູປຎ຺ຈ ໂຂ, ຠນ຺ເຕ, ມໂນສມາຈາຣໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ ເອວຣູໂປ ມໂນສມາຈາໂຣ ເສວິຕພ຺ໂພ.

໑໑໓. ‘‘ກຖໍຣູປໍ, ຠນ຺ເຕ, ມໂນສມາຈາຣໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ? ອິຘ, ຠນ຺ເຕ, ເອກຈ຺ໂຈ ອຠິຊ຺ຌາລຸ ໂຫຕິ, ຍໍ ຕໍ ປຣສ຺ສ ປຣວິຕ຺ຕູປກຣຓໍ ຕໍ ອຠິຊ຺ຌາຕາ ໂຫຕິ – ‘ອໂຫ ວຕ ຍໍ ປຣສ຺ສ ຕໍ ມມສ຺ສາ’ຕິ; ພ຺ຍາປນ຺ນຈິຕ຺ໂຕ ໂຂ ປນ ໂຫຕິ ປທຸຏ຺ຐມນສງ຺ກປ຺ໂປ – ‘ອິເມ ສຕ຺ຕາ ຫຎ຺ຎນ຺ຕຸ ວາ ວຊ຺ຌນ຺ຕຸ ວາ ອຸຈ຺ຉິຊ຺ຊນ຺ຕຸ ວາ ວິນສ຺ສນ຺ຕຸ ວາ ມາ ວາ ອເຫສຸ’ນ຺ຕິ – ເອວຣູປໍ, ຠນ຺ເຕ, ມໂນສມາຈາຣໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ.

‘‘ກຖໍຣູປໍ, ຠນ຺ເຕ, ມໂນສມາຈາຣໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ? ອິຘ, ຠນ຺ເຕ, ເອກຈ຺ໂຈ ອນຠິຊ຺ຌາລຸ ໂຫຕິ, ຍໍ ຕໍ ປຣສ຺ສ ປຣວິຕ຺ຕູປກຣຓໍ ຕໍ ນາຠິຊ຺ຌາຕາ ໂຫຕິ – ‘ອໂຫ ວຕ ຍໍ ປຣສ຺ສ ຕໍ ມມສ຺ສາ’ຕິ; ອພ຺ຍາປນ຺ນຈິຕ຺ໂຕ ໂຂ ປນ ໂຫຕິ ອປ຺ປທຸຏ຺ຐມນສງ຺ກປ຺ໂປ – ‘ອິເມ ສຕ຺ຕາ ອເວຣາ ອພ຺ຍາພຊ຺ຌາ [ອພ຺ຍາປຊ຺ຌາ (ສີ. ສ຺ຍາ. ກໍ. ປີ. ກ.)] ອນີຆາ ສຸຂີ ອຕ຺ຕານໍ ປຣິຫຣນ຺ຕູ’ຕິ – ເອວຣູປໍ, ຠນ຺ເຕ, ມໂນສມາຈາຣໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ. ‘ມໂນສມາຈາຣໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ມໂນສມາຈາຣ’ນ຺ຕິ – ອິຕິ ຍໍ ຕໍ ວຸຕ຺ຕໍ ຠຄວຕາ ອິທເມຕໍ ປຏິຈ຺ຈ ວຸຕ຺ຕໍ.

໑໑໔. ‘‘‘ຈິຕ຺ຕຸປ຺ປາທໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ຈິຕ຺ຕຸປ຺ປາທ’ນ຺ຕິ – ອິຕິ ໂຂ ປເນຕໍ ວຸຕ຺ຕໍ ຠຄວຕາ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຍຖາຣູປໍ, ຠນ຺ເຕ, ຈິຕ຺ຕຸປ຺ປາທໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ ເອວຣູໂປ ຈິຕ຺ຕຸປ຺ປາໂທ ນ ເສວິຕພ຺ໂພ; ຍຖາຣູປຎ຺ຈ ໂຂ, ຠນ຺ເຕ, ຈິຕ຺ຕຸປ຺ປາທໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ ເອວຣູໂປ ຈິຕ຺ຕຸປ຺ປາໂທ ເສວິຕພ຺ໂພ.

‘‘ກຖໍຣູປໍ, ຠນ຺ເຕ, ຈິຕ຺ຕຸປ຺ປາທໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ? ອິຘ, ຠນ຺ເຕ, ເອກຈ຺ໂຈ ອຠິຊ຺ຌາລຸ ໂຫຕິ, ອຠິຊ຺ຌາສຫຄເຕນ ເຈຕສາ ວິຫຣຕິ; ພ຺ຍາປາທວາ ໂຫຕິ, ພ຺ຍາປາທສຫຄເຕນ ເຈຕສາ ວິຫຣຕິ; ວິເຫສວາ ໂຫຕິ, ວິເຫສາສຫຄເຕນ ເຈຕສາ ວິຫຣຕິ – ເອວຣູປໍ, ຠນ຺ເຕ, ຈິຕ຺ຕຸປ຺ປາທໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ.

‘‘ກຖໍຣູປໍ, ຠນ຺ເຕ, ຈິຕ຺ຕຸປ຺ປາທໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ? ອິຘ, ຠນ຺ເຕ, ເອກຈ຺ໂຈ ອນຠິຊ຺ຌາລຸ ໂຫຕິ, ອນຠິຊ຺ຌາສຫຄເຕນ ເຈຕສາ ວິຫຣຕິ; ອພ຺ຍາປາທວາ ໂຫຕິ, ອພ຺ຍາປາທສຫຄເຕນ ເຈຕສາ ວິຫຣຕິ; ອວິເຫສວາ ໂຫຕິ, ອວິເຫສາສຫຄເຕນ ເຈຕສາ ວິຫຣຕິ – ເອວຣູປໍ, ຠນ຺ເຕ, ຈິຕ຺ຕຸປ຺ປາທໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ. ‘ຈິຕ຺ຕຸປ຺ປາທໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ຈິຕ຺ຕຸປ຺ປາທ’ນ຺ຕິ – ອິຕິ ຍໍ ຕໍ ວຸຕ຺ຕໍ ຠຄວຕາ ອິທເມຕໍ ປຏິຈ຺ຈ ວຸຕ຺ຕໍ.

໑໑໕. ‘‘‘ສຎ຺ຎາປຏິລາຠໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ສຎ຺ຎາປຏິລາຠ’ນ຺ຕິ – ອິຕິ ໂຂ ປເນຕໍ ວຸຕ຺ຕໍ ຠຄວຕາ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຍຖາຣູປໍ, ຠນ຺ເຕ, ສຎ຺ຎາປຏິລາຠໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ ເອວຣູໂປ ສຎ຺ຎາປຏິລາໂຠ ນ ເສວິຕພ຺ໂພ; ຍຖາຣູປຎ຺ຈ ໂຂ, ຠນ຺ເຕ, ສຎ຺ຎາປຏິລາຠໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ ເອວຣູໂປ ສຎ຺ຎາປຏິລາໂຠ ເສວິຕພ຺ໂພ.

‘‘ກຖໍຣູປໍ, ຠນ຺ເຕ, ສຎ຺ຎາປຏິລາຠໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ? ອິຘ, ຠນ຺ເຕ, ເອກຈ຺ໂຈ ອຠິຊ຺ຌາລຸ ໂຫຕິ, ອຠິຊ຺ຌາສຫຄຕາຍ ສຎ຺ຎາຍ ວິຫຣຕິ; ພ຺ຍາປາທວາ ໂຫຕິ, ພ຺ຍາປາທສຫຄຕາຍ ສຎ຺ຎາຍ ວິຫຣຕິ; ວິເຫສວາ ໂຫຕິ, ວິເຫສາສຫຄຕາຍ ສຎ຺ຎາຍ ວິຫຣຕິ – ເອວຣູປໍ, ຠນ຺ເຕ, ສຎ຺ຎາປຏິລາຠໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ.

‘‘ກຖໍຣູປໍ, ຠນ຺ເຕ, ສຎ຺ຎາປຏິລາຠໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ? ອິຘ, ຠນ຺ເຕ, ເອກຈ຺ໂຈ ອນຠິຊ຺ຌາລຸ ໂຫຕິ, ອນຠິຊ຺ຌາສຫຄຕາຍ ສຎ຺ຎາຍ ວິຫຣຕິ; ອພ຺ຍາປາທວາ ໂຫຕິ, ອພ຺ຍາປາທສຫຄຕາຍ ສຎ຺ຎາຍ ວິຫຣຕິ; ອວິເຫສວາ ໂຫຕິ, ອວິເຫສາສຫຄຕາຍ ສຎ຺ຎາຍ ວິຫຣຕິ – ເອວຣູປໍ, ຠນ຺ເຕ, ສຎ຺ຎາປຏິລາຠໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ. ‘ສຎ຺ຎາປຏິລາຠໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ສຎ຺ຎາປຏິລາຠ’ນ຺ຕິ – ອິຕິ ຍໍ ຕໍ ວຸຕ຺ຕໍ ຠຄວຕາ ອິທເມຕໍ ປຏິຈ຺ຈ ວຸຕ຺ຕໍ.

໑໑໖. ‘‘‘ທິຏ຺ຐິປຏິລາຠໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ທິຏ຺ຐິປຏິລາຠ’ນ຺ຕິ – ອິຕິ ໂຂ ປເນຕໍ ວຸຕ຺ຕໍ ຠຄວຕາ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຍຖາຣູປໍ, ຠນ຺ເຕ, ທິຏ຺ຐິປຏິລາຠໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ ເອວຣູໂປ ທິຏ຺ຐິປຏິລາໂຠ ນ ເສວິຕພ຺ໂພ; ຍຖາຣູປຎ຺ຈ ໂຂ, ຠນ຺ເຕ, ທິຏ຺ຐິປຏິລາຠໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ – ເອວຣູໂປ ທິຏ຺ຐິປຏິລາໂຠ ເສວິຕພ຺ໂພ.

‘‘ກຖໍຣູປໍ, ຠນ຺ເຕ, ທິຏ຺ຐິປຏິລາຠໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ? ອິຘ, ຠນ຺ເຕ, ເອກຈ຺ໂຈ ເອວໍທິຏ຺ຐິໂກ ໂຫຕິ – ‘ນຕ຺ຖິ ທິນ຺ນໍ, ນຕ຺ຖິ ຍິຏ຺ຐໍ, ນຕ຺ຖິ ຫຸຕໍ, ນຕ຺ຖິ ສຸກຕທຸກ຺ກຏານໍ ກມ຺ມານໍ ຜລໍ ວິປາໂກ, ນຕ຺ຖິ ອຍໍ ໂລໂກ, ນຕ຺ຖິ ປໂຣ ໂລໂກ, ນຕ຺ຖິ ມາຕາ, ນຕ຺ຖິ ປິຕາ, ນຕ຺ຖິ ສຕ຺ຕາ ໂອປປາຕິກາ, ນຕ຺ຖິ ໂລເກ ສມຓພ຺ຣາຫ຺ມຓາ ສມ຺ມຄ຺ຄຕາ ສມ຺ມາປຏິປນ຺ນາ ເຍ ອິມຎ຺ຈ ໂລກໍ ປຣຎ຺ຈ ໂລກໍ ສຍໍ ອຠິຎ຺ຎາ ສຈ຺ຉິກຕ຺ວາ ປເວເທນ຺ຕີ’ຕິ – ເອວຣູປໍ, ຠນ຺ເຕ, ທິຏ຺ຐິປຏິລາຠໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ.

‘‘ກຖໍຣູປໍ, ຠນ຺ເຕ, ທິຏ຺ຐິປຏິລາຠໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ? ອິຘ, ຠນ຺ເຕ, ເອກຈ຺ໂຈ ເອວໍທິຏ຺ຐິໂກ ໂຫຕິ – ‘ອຕ຺ຖິ ທິນ຺ນໍ, ອຕ຺ຖິ ຍິຏ຺ຐໍ, ອຕ຺ຖິ ຫຸຕໍ, ອຕ຺ຖິ ສຸກຕທຸກ຺ກຏານໍ ກມ຺ມານໍ ຜລໍ ວິປາໂກ, ອຕ຺ຖິ ອຍໍ ໂລໂກ, ອຕ຺ຖິ ປໂຣ ໂລໂກ, ອຕ຺ຖິ ມາຕາ, ອຕ຺ຖິ ປິຕາ, ອຕ຺ຖິ ສຕ຺ຕາ ໂອປປາຕິກາ, ອຕ຺ຖິ ໂລເກ ສມຓພ຺ຣາຫ຺ມຓາ ສມ຺ມຄ຺ຄຕາ ສມ຺ມາປຏິປນ຺ນາ ເຍ ອິມຎ຺ຈ ໂລກໍ ປຣຎ຺ຈ ໂລກໍ ສຍໍ ອຠິຎ຺ຎາ ສຈ຺ຉິກຕ຺ວາ ປເວເທນ຺ຕີ’ຕິ – ເອວຣູປໍ, ຠນ຺ເຕ, ທິຏ຺ຐິປຏິລາຠໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ. ‘ທິຏ຺ຐິປຏິລາຠໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ທິຏ຺ຐິປຏິລາຠ’ນ຺ຕິ – ອິຕິ ຍໍ ຕໍ ວຸຕ຺ຕໍ ຠຄວຕາ ອິທເມຕໍ ປຏິຈ຺ຈ ວຸຕ຺ຕໍ.

໑໑໗. ‘‘‘ອຕ຺ຕຠາວປຏິລາຠໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ອຕ຺ຕຠາວປຏິລາຠ’ນ຺ຕິ – ອິຕິ ໂຂ ປເນຕໍ ວຸຕ຺ຕໍ ຠຄວຕາ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຍຖາຣູປໍ, ຠນ຺ເຕ, ອຕ຺ຕຠາວປຏິລາຠໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ – ເອວຣູໂປ ອຕ຺ຕຠາວປຏິລາໂຠ ນ ເສວິຕພ຺ໂພ; ຍຖາຣູປຎ຺ຈ ໂຂ, ຠນ຺ເຕ, ອຕ຺ຕຠາວປຏິລາຠໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ – ເອວຣູໂປ ອຕ຺ຕຠາວປຏິລາໂຠ ເສວິຕພ຺ໂພ.

‘‘ກຖໍຣູປໍ, ຠນ຺ເຕ, ອຕ຺ຕຠາວປຏິລາຠໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ? ສພ຺ຍາພຊ຺ຌໍ [ສພ຺ຍາປຊ຺ຌໍ (ສີ. ສ຺ຍາ. ກໍ. ປີ. ກ.)], ຠນ຺ເຕ, ອຕ຺ຕຠາວປຏິລາຠໍ ອຠິນິພ຺ພຕ຺ຕຍໂຕ ອປຣິນິຏ຺ຐິຕຠາວາຍ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ; ອພ຺ຍາພຊ຺ຌໍ, ຠນ຺ເຕ, ອຕ຺ຕຠາວປຏິລາຠໍ ອຠິນິພ຺ພຕ຺ຕຍໂຕ ປຣິນິຏ຺ຐິຕຠາວາຍ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ. ‘ອຕ຺ຕຠາວປຏິລາຠໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ອຕ຺ຕຠາວປຏິລາຠ’ນ຺ຕິ – ອິຕິ ຍໍ ຕໍ ວຸຕ຺ຕໍ ຠຄວຕາ ອິທເມຕໍ ປຏິຈ຺ຈ ວຸຕ຺ຕໍ.

‘‘ອິມສ຺ສ ໂຂ ອຫໍ, ຠນ຺ເຕ, ຠຄວຕາ ສໍຂິຕ຺ເຕນ ຠາສິຕສ຺ສ, ວິຕ຺ຖາເຣນ ອຕ຺ຖໍ ອວິຠຕ຺ຕສ຺ສ, ເອວໍ ວິຕ຺ຖາເຣນ ອຕ຺ຖໍ ອາຊານາມີ’’ຕິ.

໑໑໘. ‘‘ສາຘຸ ສາຘຸ, ສາຣິປຸຕ຺ຕ! ສາຘຸ ໂຂ ຕ຺ວໍ, ສາຣິປຸຕ຺ຕ, ອິມສ຺ສ ມຍາ ສໍຂິຕ຺ເຕນ ຠາສິຕສ຺ສ, ວິຕ຺ຖາເຣນ ອຕ຺ຖໍ ອວິຠຕ຺ຕສ຺ສ, ເອວໍ ວິຕ຺ຖາເຣນ ອຕ຺ຖໍ ອາຊານາສິ.

‘‘‘ກາຍສມາຈາຣໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ກາຍສມາຈາຣ’ນ຺ຕິ – ອິຕິ ໂຂ ປເນຕໍ ວຸຕ຺ຕໍ ມຍາ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຍຖາຣູປໍ, ສາຣິປຸຕ຺ຕ, ກາຍສມາຈາຣໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ ເອວຣູໂປ ກາຍສມາຈາໂຣ ນ ເສວິຕພ຺ໂພ; ຍຖາຣູປຎ຺ຈ ໂຂ, ສາຣິປຸຕ຺ຕ, ກາຍສມາຈາຣໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ – ເອວຣູໂປ ກາຍສມາຈາໂຣ ເສວິຕພ຺ໂພ.

‘‘ກຖໍຣູປໍ, ສາຣິປຸຕ຺ຕ, ກາຍສມາຈາຣໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ? ອິຘ, ສາຣິປຸຕ຺ຕ, ເອກຈ຺ໂຈ ປາຓາຕິປາຕີ ໂຫຕິ ລຸທ຺ໂທ ໂລຫິຕປາຓິ ຫຕປ຺ປຫເຕ ນິວິຏ຺ໂຐ ອທຍາປນ຺ໂນ ປາຓຠູເຕສຸ; ອທິນ຺ນາທາຍີ ໂຂ ປນ ໂຫຕິ, ຍໍ ຕໍ ປຣສ຺ສ ປຣວິຕ຺ຕູປກຣຓໍ ຄາມຄຕໍ ວາ ອຣຎ຺ຎຄຕໍ ວາ ຕໍ ອທິນ຺ນໍ ເຖຍ຺ຍສງ຺ຂາຕໍ ອາທາຕາ ໂຫຕິ; ກາເມສຸມິຈ຺ຉາຈາຣີ ໂຂ ປນ ໂຫຕິ, ຍາ ຕາ ມາຕຸຣກ຺ຂິຕາ ປິຕຸຣກ຺ຂິຕາ ມາຕາປິຕຸຣກ຺ຂິຕາ ຠາຕຸຣກ຺ຂິຕາ ຠຄິນິຣກ຺ຂິຕາ ຎາຕິຣກ຺ຂິຕາ ໂຄຕ຺ຕຣກ຺ຂິຕາ ຘມ຺ມຣກ຺ຂິຕາ ສສ຺ສາມິກາ ສປຣິທຓ຺ຑາ ອນ຺ຕມໂສ ມາລາຄຸຬປຣິກ຺ຂິຕ຺ຕາປິ ຕຖາຣູປາສຸ ຈາຣິຕ຺ຕໍ ອາປຊ຺ຊິຕາ ໂຫຕິ – ເອວຣູປໍ, ສາຣິປຸຕ຺ຕ, ກາຍສມາຈາຣໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ.

‘‘ກຖໍຣູປໍ, ສາຣິປຸຕ຺ຕ, ກາຍສມາຈາຣໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ? ອິຘ, ສາຣິປຸຕ຺ຕ, ເອກຈ຺ໂຈ ປາຓາຕິປາຕໍ ປຫາຍ ປາຓາຕິປາຕາ ປຏິວິຣໂຕ ໂຫຕິ ນິຫິຕທຓ຺ໂຑ ນິຫິຕສຕ຺ໂຖ, ລຊ຺ຊີ ທຍາປນ຺ໂນ ສພ຺ພປາຓຠູຕຫິຕານຸກມ຺ປີ ວິຫຣຕິ; ອທິນ຺ນາທານໍ ປຫາຍ ອທິນ຺ນາທານາ ປຏິວິຣໂຕ ໂຫຕິ, ຍໍ ຕໍ ປຣສ຺ສ ປຣວິຕ຺ຕູປກຣຓໍ ຄາມຄຕໍ ວາ ອຣຎ຺ຎຄຕໍ ວາ ຕໍ ນາທິນ຺ນໍ ເຖຍ຺ຍສງ຺ຂາຕໍ ອາທາຕາ ໂຫຕິ; ກາເມສຸມິຈ຺ຉາຈາຣໍ ປຫາຍ ກາເມສຸມິຈ຺ຉາຈາຣາ ປຏິວິຣໂຕ ໂຫຕິ, ຍາ ຕາ ມາຕຸຣກ຺ຂິຕາ ປິຕຸຣກ຺ຂິຕາ ມາຕາປິຕຸຣກ຺ຂິຕາ ຠາຕຸຣກ຺ຂິຕາ ຠຄິນິຣກ຺ຂິຕາ ຎາຕິຣກ຺ຂິຕາ ໂຄຕ຺ຕຣກ຺ຂິຕາ ຘມ຺ມຣກ຺ຂິຕາ ສສ຺ສາມິກາ ສປຣິທຓ຺ຑາ ອນ຺ຕມໂສ ມາລາຄຸຬປຣິກ຺ຂິຕ຺ຕາປິ ຕຖາຣູປາສຸ ນ ຈາຣິຕ຺ຕໍ ອາປຊ຺ຊິຕາ ໂຫຕິ – ເອວຣູປໍ, ສາຣິປຸຕ຺ຕ, ກາຍສມາຈາຣໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ. ‘ກາຍສມາຈາຣໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ກາຍສມາຈາຣ’ນ຺ຕິ – ອິຕິ ຍໍ ຕໍ ວຸຕ຺ຕໍ ມຍາ ອິທເມຕໍ ປຏິຈ຺ຈ ວຸຕ຺ຕໍ.

‘‘ວຈີສມາຈາຣໍປາຫໍ, ຠິກ຺ຂເວ, ທຸວິເຘນ ວທາມິ …ເປ… ມໂນສມາຈາຣໍປາຫໍ, ຠິກ຺ຂເວ, ທຸວິເຘນ ວທາມິ…ເປ… ຈິຕ຺ຕຸປ຺ປາທໍປາຫໍ, ຠິກ຺ຂເວ, ທຸວິເຘນ ວທາມິ…ເປ… ສຎ຺ຎາປຏິລາຠໍປາຫໍ, ຠິກ຺ຂເວ, ທຸວິເຘນ ວທາມິ…ເປ… ທິຏ຺ຐິປຏິລາຠໍປາຫໍ, ຠິກ຺ຂເວ, ທຸວິເຘນ ວທາມິ…ເປ….

‘‘‘ອຕ຺ຕຠາວປຏິລາຠໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ອຕ຺ຕຠາວປຏິລາຠ’ນ຺ຕິ – ອິຕິ ໂຂ ປເນຕໍ ວຸຕ຺ຕໍ ມຍາ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຍຖາຣູປໍ, ສາຣິປຸຕ຺ຕ, ອຕ຺ຕຠາວປຏິລາຠໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ ເອວຣູໂປ ອຕ຺ຕຠາວປຏິລາໂຠ ນ ເສວິຕພ຺ໂພ; ຍຖາຣູປຎ຺ຈ ໂຂ, ສາຣິປຸຕ຺ຕ, ອຕ຺ຕຠາວປຏິລາຠໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ – ເອວຣູໂປ ອຕ຺ຕຠາວປຏິລາໂຠ ເສວິຕພ຺ໂພ.

‘‘ກຖໍຣູປໍ, ສາຣິປຸຕ຺ຕ, ອຕ຺ຕຠາວປຏິລາຠໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ? ສພ຺ຍາພຊ຺ຌໍ, ສາຣິປຸຕ຺ຕ, ອຕ຺ຕຠາວປຏິລາຠໍ ອຠິນິພ຺ພຕ຺ຕຍໂຕ ອປຣິນິຏ຺ຐິຕຠາວາຍ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ; ອພ຺ຍາພຊ຺ຌໍ, ສາຣິປຸຕ຺ຕ, ອຕ຺ຕຠາວປຏິລາຠໍ ອຠິນິພ຺ພຕ຺ຕຍໂຕ ປຣິນິຏ຺ຐິຕຠາວາຍ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ. ‘ອຕ຺ຕຠາວປຏິລາຠໍປາຫໍ, ຠິກ຺ຂເວ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຕຎ຺ຈ ອຎ຺ຎມຎ຺ຎໍ ອຕ຺ຕຠາວປຏິລາຠ’ນ຺ຕິ – ອິຕິ ຍໍ ຕໍ ວຸຕ຺ຕໍ ມຍາ ອິທເມຕໍ ປຏິຈ຺ຈ ວຸຕ຺ຕໍ. ອິມສ຺ສ ໂຂ, ສາຣິປຸຕ຺ຕ, ມຍາ ສໍຂິຕ຺ເຕນ ຠາສິຕສ຺ສ ເອວໍ ວິຕ຺ຖາເຣນ ອຕ຺ໂຖ ທຏ຺ຐພ຺ໂພ.

໑໑໙. ‘‘ຈກ຺ຂຸວິຎ຺ເຎຍ຺ຍໍ ຣູປໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ໂສຕວິຎ຺ເຎຍ຺ຍໍ ສທ຺ທໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ ອເສວິຕພ຺ພມ຺ປິ; ຆານວິຎ຺ເຎຍ຺ຍໍ ຄນ຺ຘໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ຊິວ຺ຫາວິຎ຺ເຎຍ຺ຍໍ ຣສໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ກາຍວິຎ຺ເຎຍ຺ຍໍ ໂຜຏ຺ຐພ຺ພໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ; ມໂນວິຎ຺ເຎຍ຺ຍໍ ຘມ຺ມໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’’ຕິ.

ເອວໍ ວຸຕ຺ເຕ, ອາຍສ຺ມາ ສາຣິປຸຕ຺ໂຕ ຠຄວນ຺ຕໍ ເອຕທໂວຈ – ‘‘ອິມສ຺ສ ໂຂ ອຫໍ, ຠນ຺ເຕ, ຠຄວຕາ ສໍຂິຕ຺ເຕນ ຠາສິຕສ຺ສ, ວິຕ຺ຖາເຣນ ອຕ຺ຖໍ ອວິຠຕ຺ຕສ຺ສ, ເອວໍ ວິຕ຺ຖາເຣນ ອຕ຺ຖໍ ອາຊານາມິ. ‘ຈກ຺ຂຸວິຎ຺ເຎຍ຺ຍໍ ຣູປໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’ຕິ – ອິຕິ ໂຂ ປເນຕໍ ວຸຕ຺ຕໍ ຠຄວຕາ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຍຖາຣູປໍ, ຠນ຺ເຕ, ຈກ຺ຂຸວິຎ຺ເຎຍ຺ຍໍ ຣູປໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ ເອວຣູປໍ ຈກ຺ຂຸວິຎ຺ເຎຍ຺ຍໍ ຣູປໍ ນ ເສວິຕພ຺ພໍ; ຍຖາຣູປຎ຺ຈ ໂຂ, ຠນ຺ເຕ, ຈກ຺ຂຸວິຎ຺ເຎຍ຺ຍໍ ຣູປໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ ເອວຣູປໍ ຈກ຺ຂຸວິຎ຺ເຎຍ຺ຍໍ ຣູປໍ ເສວິຕພ຺ພໍ. ‘ຈກ຺ຂຸວິຎ຺ເຎຍ຺ຍໍ ຣູປໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’ຕິ – ອິຕິ ຍໍ ຕໍ ວຸຕ຺ຕໍ ຠຄວຕາ ອິທເມຕໍ ປຏິຈ຺ຈ ວຸຕ຺ຕໍ.

‘‘ໂສຕວິຎ຺ເຎຍ຺ຍໍ ສທ຺ທໍປາຫໍ, ສາຣິປຸຕ຺ຕ…ເປ… ເອວຣູໂປ ໂສຕວິຎ຺ເຎຍ຺ໂຍ ສທ຺ໂທ ນ ເສວິຕພ຺ໂພ… ເອວຣູໂປ ໂສຕວິຎ຺ເຎຍ຺ໂຍ ສທ຺ໂທ ເສວິຕພ຺ໂພ… ເອວຣູໂປ ຆານວິຎ຺ເຎຍ຺ໂຍ ຄນ຺ໂຘ ນ ເສວິຕພ຺ໂພ… ເອວຣູໂປ ຆານວິຎ຺ເຎຍ຺ໂຍ ຄນ຺ໂຘ ເສວິຕພ຺ໂພ… ເອວຣູໂປ ຊິວ຺ຫາວິຎ຺ເຎຍ຺ໂຍ ຣໂສ ນ ເສວິຕພ຺ໂພ… ເອວຣູໂປ ຊິວ຺ຫາວິຎ຺ເຎຍ຺ໂຍ ຣໂສ ເສວິຕພ຺ໂພ… ກາຍວິຎ຺ເຎຍ຺ຍໍ ໂຜຏ຺ຐພ຺ພໍປາຫໍ, ສາຣິປຸຕ຺ຕ … ເອວຣູໂປ ກາຍວິຎ຺ເຎຍ຺ໂຍ ໂຜຏ຺ຐພ຺ໂພ ນ ເສວິຕພ຺ໂພ… ເອວຣູໂປ ກາຍວິຎ຺ເຎຍ຺ໂຍ ໂຜຏ຺ຐພ຺ໂພ ເສວິຕພ຺ໂພ.

‘‘‘ມໂນວິຎ຺ເຎຍ຺ຍໍ ຘມ຺ມໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’ຕິ – ອິຕິ ໂຂ ປເນຕໍ ວຸຕ຺ຕໍ ຠຄວຕາ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຍຖາຣູປໍ, ຠນ຺ເຕ, ມໂນວິຎ຺ເຎຍ຺ຍໍ ຘມ຺ມໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ ເອວຣູໂປ ມໂນວິຎ຺ເຎຍ຺ໂຍ ຘມ຺ໂມ ນ ເສວິຕພ຺ໂພ; ຍຖາຣູປຎ຺ຈ ໂຂ, ຠນ຺ເຕ, ມໂນວິຎ຺ເຎຍ຺ຍໍ ຘມ຺ມໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ ເອວຣູໂປ ມໂນວິຎ຺ເຎຍ຺ໂຍ ຘມ຺ໂມ ເສວິຕພ຺ໂພ. ‘ມໂນວິຎ຺ເຎຍ຺ຍໍ ຘມ຺ມໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’ຕິ – ອິຕິ ຍໍ ຕໍ ວຸຕ຺ຕໍ ຠຄວຕາ ອິທເມຕໍ ປຏິຈ຺ຈ ວຸຕ຺ຕໍ. ອິມສ຺ສ ໂຂ ອຫໍ, ຠນ຺ເຕ, ຠຄວຕາ ສໍຂິຕ຺ເຕນ ຠາສິຕສ຺ສ, ວິຕ຺ຖາເຣນ ອຕ຺ຖໍ ອວິຠຕ຺ຕສ຺ສ, ເອວໍ ວິຕ຺ຖາເຣນ ອຕ຺ຖໍ ອາຊານາມີ’’ຕິ.

໑໒໐. ‘‘ສາຘຸ ສາຘຸ, ສາຣິປຸຕ຺ຕ! ສາຘຸ ໂຂ ຕ຺ວໍ, ສາຣິປຸຕ຺ຕ, ອິມສ຺ສ ມຍາ ສໍຂິຕ຺ເຕນ ຠາສິຕສ຺ສ, ວິຕ຺ຖາເຣນ ອຕ຺ຖໍ ອວິຠຕ຺ຕສ຺ສ, ເອວໍ ວິຕ຺ຖາເຣນ ອຕ຺ຖໍ ອາຊານາສິ. ‘ຈກ຺ຂຸວິຎ຺ເຎຍ຺ຍໍ ຣູປໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’ຕິ – ອິຕິ ໂຂ ປເນຕໍ ວຸຕ຺ຕໍ ມຍາ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຍຖາຣູປໍ, ສາຣິປຸຕ຺ຕ, ຈກ຺ຂຸວິຎ຺ເຎຍ຺ຍໍ ຣູປໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ ເອວຣູປໍ ຈກ຺ຂຸວິຎ຺ເຎຍ຺ຍໍ ຣູປໍ ນ ເສວິຕພ຺ພໍ; ຍຖາຣູປຎ຺ຈ ໂຂ, ສາຣິປຸຕ຺ຕ, ຈກ຺ຂຸວິຎ຺ເຎຍ຺ຍໍ ຣູປໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ ເອວຣູປໍ ຈກ຺ຂຸວິຎ຺ເຎຍ຺ຍໍ ຣູປໍ ເສວິຕພ຺ພໍ. ‘ຈກ຺ຂຸວິຎ຺ເຎຍ຺ຍໍ ຣູປໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’ຕິ – ອິຕິ ຍໍ ຕໍ ວຸຕ຺ຕໍ ມຍາ ອິທເມຕໍ ປຏິຈ຺ຈ ວຸຕ຺ຕໍ.

‘‘ໂສຕວິຎ຺ເຎຍ຺ຍໍ ສທ຺ທໍປາຫໍ, ສາຣິປຸຕ຺ຕ…ເປ… ເອວຣູໂປ ໂສຕວິຎ຺ເຎຍ຺ໂຍ ສທ຺ໂທ ນ ເສວິຕພ຺ໂພ… ເອວຣູໂປ ໂສຕວິຎ຺ເຎຍ຺ໂຍ ສທ຺ໂທ ເສວິຕພ຺ໂພ… ເອວຣູໂປ ຆານວິຎ຺ເຎຍ຺ໂຍ ຄນ຺ໂຘ ນ ເສວິຕພ຺ໂພ… ເອວຣູໂປ ຆານວິຎ຺ເຎຍ຺ໂຍ ຄນ຺ໂຘ ເສວິຕພ຺ໂພ… ເອວຣູໂປ ຊິວ຺ຫາວິຎ຺ເຎຍ຺ໂຍ ຣໂສ ນ ເສວິຕພ຺ໂພ… ເອວຣູໂປ ຊິວ຺ຫາວິຎ຺ເຎຍ຺ໂຍ ຣໂສ ເສວິຕພ຺ໂພ… ເອວຣູໂປ ກາຍວິຎ຺ເຎຍ຺ໂຍ ໂຜຏ຺ຐພ຺ໂພ ນ ເສວິຕພ຺ໂພ… ເອວຣູໂປ ກາຍວິຎ຺ເຎຍ຺ໂຍ ໂຜຏ຺ຐພ຺ໂພ ເສວິຕພ຺ໂພ.

‘‘ມໂນວິຎ຺ເຎຍ຺ຍໍ ຘມ຺ມໍປາຫໍ, ສາຣິປຸຕ຺ຕ…ເປ… ເອວຣູໂປ ມໂນວິຎ຺ເຎຍ຺ໂຍ ຘມ຺ໂມ ນ ເສວິຕພ຺ໂພ… ເອວຣູໂປ ມໂນວິຎ຺ເຎຍ຺ໂຍ ຘມ຺ໂມ ເສວິຕພ຺ໂພ. ‘ມໂນວິຎ຺ເຎຍ຺ຍໍ ຘມ຺ມໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’ຕິ – ອິຕິ ຍໍ ຕໍ ວຸຕ຺ຕໍ ມຍາ ອິທເມຕໍ ປຏິຈ຺ຈ ວຸຕ຺ຕໍ. ອິມສ຺ສ ໂຂ, ສາຣິປຸຕ຺ຕ, ມຍາ ສໍຂິຕ຺ເຕນ ຠາສິຕສ຺ສ ເອວໍ ວິຕ຺ຖາເຣນ ອຕ຺ໂຖ ທຏ຺ຐພ຺ໂພ.

໑໒໑. ‘‘ຈີວຣໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປິ…ເປ… ປິຓ຺ຑປາຕໍປາຫໍ, ສາຣິປຸຕ຺ຕ… ເສນາສນໍປາຫໍ, ສາຣິປຸຕ຺ຕ… ຄາມໍປາຫໍ, ສາຣິປຸຕ຺ຕ… ນິຄມໍປາຫໍ, ສາຣິປຸຕ຺ຕ… ນຄຣໍປາຫໍ, ສາຣິປຸຕ຺ຕ… ຊນປທໍປາຫໍ, ສາຣິປຸຕ຺ຕ… ປຸຄ຺ຄລໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’’ຕິ.

ເອວໍ ວຸຕ຺ເຕ, ອາຍສ຺ມາ ສາຣິປຸຕ຺ໂຕ ຠຄວນ຺ຕໍ ເອຕທໂວຈ – ‘‘ອິມສ຺ສ ໂຂ ອຫໍ, ຠນ຺ເຕ, ຠຄວຕາ ສໍຂິຕ຺ເຕນ ຠາສິຕສ຺ສ, ວິຕ຺ຖາເຣນ ອຕ຺ຖໍ ອວິຠຕ຺ຕສ຺ສ, ເອວໍ ວິຕ຺ຖາເຣນ ອຕ຺ຖໍ ອາຊານາມິ. ‘ຈີວຣໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’ຕິ – ອິຕິ ໂຂ ປເນຕໍ ວຸຕ຺ຕໍ ຠຄວຕາ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຍຖາຣູປໍ, ຠນ຺ເຕ, ຈີວຣໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ ເອວຣູປໍ ຈີວຣໍ ນ ເສວິຕພ຺ພໍ; ຍຖາຣູປຎ຺ຈ ໂຂ, ຠນ຺ເຕ, ຈີວຣໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ ເອວຣູປໍ ຈີວຣໍ ເສວິຕພ຺ພໍ. ‘ຈີວຣໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’ຕິ – ອິຕິ ຍໍ ຕໍ ວຸຕ຺ຕໍ ຠຄວຕາ ອິທເມຕໍ ປຏິຈ຺ຈ ວຸຕ຺ຕໍ.

‘‘ປິຓ຺ຑປາຕໍປາຫໍ, ສາຣິປຸຕ຺ຕ…ເປ… ເອວຣູໂປ ປິຓ຺ຑປາໂຕ ນ ເສວິຕພ຺ໂພ… ເອວຣູໂປ ປິຓ຺ຑປາໂຕ ເສວິຕພ຺ໂພ… ເສນາສນໍປາຫໍ, ສາຣິປຸຕ຺ຕ…ເປ… ເອວຣູປໍ ເສນາສນໍ ນ ເສວິຕພ຺ພໍ… ເອວຣູປໍ ເສນາສນໍ ເສວິຕພ຺ພໍ… ຄາມໍປາຫໍ, ສາຣິປຸຕ຺ຕ …ເປ… ເອວຣູໂປ ຄາໂມ ນ ເສວິຕພ຺ໂພ… ເອວຣູໂປ ຄາໂມ ເສວິຕພ຺ໂພ… ເອວຣູໂປ ນິຄໂມ ນ ເສວິຕພ຺ໂພ… ເອວຣູໂປ ນິຄໂມ ເສວິຕພ຺ໂພ… ເອວຣູປໍ ນຄຣໍ ນ ເສວິຕພ຺ພໍ… ເອວຣູປໍ ນຄຣໍ ເສວິຕພ຺ພໍ… ເອວຣູໂປ ຊນປໂທ ນ ເສວິຕພ຺ໂພ… ເອວຣູໂປ ຊນປໂທ ເສວິຕພ຺ໂພ.

‘‘‘ປຸຄ຺ຄລໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’ຕິ – ອິຕິ ໂຂ ປເນຕໍ ວຸຕ຺ຕໍ ຠຄວຕາ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຍຖາຣູປໍ, ຠນ຺ເຕ, ປຸຄ຺ຄລໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ ເອວຣູໂປ ປຸຄ຺ຄໂລ ນ ເສວິຕພ຺ໂພ; ຍຖາຣູປຎ຺ຈ ໂຂ, ຠນ຺ເຕ, ປຸຄ຺ຄລໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ ເອວຣູໂປ ປຸຄ຺ຄໂລ ເສວິຕພ຺ໂພ. ‘ປຸຄ຺ຄລໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’ຕິ – ອິຕິ ຍໍ ຕໍ ວຸຕ຺ຕໍ ຠຄວຕາ ອິທເມຕໍ ປຏິຈ຺ຈ ວຸຕ຺ຕນ຺ຕິ. ອິມສ຺ສ ໂຂ ອຫໍ, ຠນ຺ເຕ, ຠຄວຕາ ສໍຂິຕ຺ເຕນ ຠາສິຕສ຺ສ, ວິຕ຺ຖາເຣນ ອຕ຺ຖໍ ອວິຠຕ຺ຕສ຺ສ ເອວໍ ວິຕ຺ຖາເຣນ ອຕ຺ຖໍ ອາຊານາມີ’’ຕິ.

໑໒໒. ‘‘ສາຘຸ ສາຘຸ, ສາຣິປຸຕ຺ຕ! ສາຘຸ ໂຂ ຕ຺ວໍ, ສາຣິປຸຕ຺ຕ, ອິມສ຺ສ ມຍາ ສໍຂິຕ຺ເຕນ ຠາສິຕສ຺ສ, ວິຕ຺ຖາເຣນ ອຕ຺ຖໍ ອວິຠຕ຺ຕສ຺ສ ເອວໍ ວິຕ຺ຖາເຣນ ອຕ຺ຖໍ ອາຊານາສິ. ‘ຈີວຣໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’ຕິ – ອິຕິ ໂຂ ປເນຕໍ ວຸຕ຺ຕໍ ມຍາ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຍຖາຣູປໍ, ສາຣິປຸຕ຺ຕ, ຈີວຣໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ ເອວຣູປໍ ຈີວຣໍ ນ ເສວິຕພ຺ພໍ; ຍຖາຣູປຎ຺ຈ ໂຂ, ສາຣິປຸຕ຺ຕ, ຈີວຣໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ ເອວຣູປໍ ຈີວຣໍ ເສວິຕພ຺ພໍ. ‘ຈີວຣໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’ຕິ – ອິຕິ ຍໍ ຕໍ ວຸຕ຺ຕໍ ມຍາ ອິທເມຕໍ ປຏິຈ຺ຈ ວຸຕ຺ຕໍ. (ຍຖາ ປຐມໍ ຕຖາ ວິຕ຺ຖາເຣຕພ຺ພໍ) ເອວຣູໂປ ປິຓ຺ຑປາໂຕ… ເອວຣູປໍ ເສນາສນໍ… ເອວຣູໂປ ຄາໂມ… ເອວຣູໂປ ນິຄໂມ… ເອວຣູປໍ ນຄຣໍ… ເອວຣູໂປ ຊນປໂທ.

‘‘‘ປຸຄ຺ຄລໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’ຕິ – ອິຕິ ໂຂ ປເນຕໍ ວຸຕ຺ຕໍ ມຍາ. ກິຎ຺ເຈຕໍ ປຏິຈ຺ຈ ວຸຕ຺ຕໍ? ຍຖາຣູປໍ, ສາຣິປຸຕ຺ຕ, ປຸຄ຺ຄລໍ ເສວໂຕ ອກຸສລາ ຘມ຺ມາ ອຠິວຑ຺ຒນ຺ຕິ, ກຸສລາ ຘມ຺ມາ ປຣິຫາຍນ຺ຕິ ເອວຣູໂປ ປຸຄ຺ຄໂລ ນ ເສວິຕພ຺ໂພ; ຍຖາຣູປຎ຺ຈ ໂຂ, ສາຣິປຸຕ຺ຕ, ປຸຄ຺ຄລໍ ເສວໂຕ ອກຸສລາ ຘມ຺ມາ ປຣິຫາຍນ຺ຕິ, ກຸສລາ ຘມ຺ມາ ອຠິວຑ຺ຒນ຺ຕິ ເອວຣູໂປ ປຸຄ຺ຄໂລ ເສວິຕພ຺ໂພ. ‘ປຸຄ຺ຄລໍປາຫໍ, ສາຣິປຸຕ຺ຕ, ທຸວິເຘນ ວທາມິ – ເສວິຕພ຺ພມ຺ປິ, ອເສວິຕພ຺ພມ຺ປີ’ຕິ – ອິຕິ ຍໍ ຕໍ ວຸຕ຺ຕໍ ມຍາ ອິທເມຕໍ ປຏິຈ຺ຈ ວຸຕ຺ຕໍ. ອິມສ຺ສ ໂຂ, ສາຣິປຸຕ຺ຕ, ມຍາ ສໍຂິຕ຺ເຕນ ຠາສິຕສ຺ສ ເອວໍ ວິຕ຺ຖາເຣນ ອຕ຺ໂຖ ທຏ຺ຐພ຺ໂພ.

໑໒໓. ‘‘ສພ຺ເພປິ ເຈ, ສາຣິປຸຕ຺ຕ, ຂຕ຺ຕິຍາ ອິມສ຺ສ ມຍາ ສໍຂິຕ຺ເຕນ ຠາສິຕສ຺ສ ເອວໍ ວິຕ຺ຖາເຣນ ອຕ຺ຖໍ ອາຊາເນຍ຺ຍຸໍ, ສພ຺ເພສານມ຺ປິສ຺ສ ຂຕ຺ຕິຍານໍ ທີຆຣຕ຺ຕໍ ຫິຕາຍ ສຸຂາຍ. ສພ຺ເພປິ ເຈ, ສາຣິປຸຕ຺ຕ, ພ຺ຣາຫ຺ມຓາ…ເປ… ສພ຺ເພປິ ເຈ, ສາຣິປຸຕ຺ຕ, ເວສ຺ສາ… ສພ຺ເພປິ ເຈ, ສາຣິປຸຕ຺ຕ, ສຸທ຺ທາ ອິມສ຺ສ ມຍາ ສໍຂິຕ຺ເຕນ ຠາສິຕສ຺ສ ເອວໍ ວິຕ຺ຖາເຣນ ອຕ຺ຖໍ ອາຊາເນຍ຺ຍຸໍ, ສພ຺ເພສານມ຺ປິສ຺ສ ສຸທ຺ທານໍ ທີຆຣຕ຺ຕໍ ຫິຕາຍ ສຸຂາຍ. ສເທວໂກປິ ເຈ, ສາຣິປຸຕ຺ຕ, ໂລໂກ ສມາຣໂກ ສພ຺ຣຫ຺ມໂກ ສສ຺ສມຓພ຺ຣາຫ຺ມຓີ ປຊາ ສເທວມນຸສ຺ສາ ອິມສ຺ສ ມຍາ ສໍຂິຕ຺ເຕນ ຠາສິຕສ຺ສ ເອວໍ ວິຕ຺ຖາເຣນ ອຕ຺ຖໍ ອາຊາເນຍ຺ຍ, ສເທວກສ຺ສປິສ຺ສ ໂລກສ຺ສ ສມາຣກສ຺ສ ສພ຺ຣຫ຺ມກສ຺ສ ສສ຺ສມຓພ຺ຣາຫ຺ມຓິຍາ ປຊາຍ ສເທວມນຸສ຺ສາຍ ທີຆຣຕ຺ຕໍ ຫິຕາຍ ສຸຂາຍາ’’ຕິ.

ອິທມໂວຈ ຠຄວາ. ອຕ຺ຕມໂນ ອາຍສ຺ມາ ສາຣິປຸຕ຺ໂຕ ຠຄວໂຕ ຠາສິຕໍ ອຠິນນ຺ທີຕິ.

ເສວິຕພ຺ພາເສວິຕພ຺ພສຸຕ຺ຕໍ ນິຏ຺ຐິຕໍ ຈຕຸຕ຺ຖໍ.