໖. ວິຫາຣວິມານວຕ຺ຖຸ

໗໒໙. ‘‘ອຠິກ຺ກນ຺ເຕນ ວຓ຺ເຓນ…ເປ… ໂອສຘີ ວິຍ ຕາຣກາ.

໗໓໐. ‘‘ຕສ຺ສາ ເຕ ນຈ຺ຈມານາຍ, ອງ຺ຄມງ຺ເຄຫິ ສພ຺ພໂສ;

ທິພ຺ພາ ສທ຺ທາ ນິຈ຺ຉຣນ຺ຕິ, ສວນີຍາ ມໂນຣມາ.

໗໓໑. ‘‘ຕສ຺ສາ ເຕ ນຈ຺ຈມານາຍ, ອງ຺ຄມງ຺ເຄຫິ ສພ຺ພໂສ;

ທິພ຺ພາ ຄນ຺ຘາ ປວາຍນ຺ຕິ, ສຸຈິຄນ຺ຘາ ມໂນຣມາ.

໗໓໒. ‘‘ວິວຕ຺ຕມານາ ກາເຍນ, ຍາ ເວຓີສຸ ປິຬນ຺ຘນາ;

ເຕສໍ ສຸຍ຺ຍຕິ ນິຄ຺ໂຆໂສ, ຕຸຣິເຍ ປຎ຺ຈງ຺ຄິເກ ຍຖາ.

໗໓໓. ‘‘ວຏໍສກາ ວາຕຘຸຕາ, ວາເຕນ ສມ຺ປກມ຺ປິຕາ;

ເຕສໍ ສຸຍ຺ຍຕິ ນິຄ຺ໂຆໂສ, ຕຸຣິເຍ ປຎ຺ຈງ຺ຄິເກ ຍຖາ.

໗໓໔. ‘‘ຍາປິ ເຕ ສິຣສ຺ມິໍ ມາລາ, ສຸຈິຄນ຺ຘາ ມໂນຣມາ;

ວາຕິ ຄນ຺ໂຘ ທິສາ ສພ຺ພາ, ຣຸກ຺ໂຂ ມຎ຺ຊູສໂກ ຍຖາ.

໗໓໕. ‘‘ຆາຍເສ ຕໍ ສຸຈິຄນ຺ຘໍ, ຣູປໍ ປສ຺ສສິ ອມານຸສໍ;

ເທວເຕ ປຸຈ຺ຉິຕາຈິກ຺ຂ, ກິສ຺ສ ກມ຺ມສ຺ສິທໍ ຜລ’’ນ຺ຕິ.

໗໓໖. ‘‘ສາວຕ຺ຖິຍໍ ມຍ຺ຫໍ ສຂີ ຠທນ຺ເຕ, ສງ຺ຆສ຺ສ ກາເຣສິ ມຫາວິຫາຣໍ;

ຕຕ຺ຖປ຺ປສນ຺ນາ ອຫມານຸໂມທິໍ, ທິສ຺ວາ ອຄາຣຎ຺ຈ ປິຍຎ຺ຈ ເມຕໍ.

໗໓໗. ‘‘ຕາເຍວ ເມ ສຸທ຺ຘນຸໂມທນາຍ, ລທ຺ຘໍ ວິມານພ຺ຠຸຕທສ຺ສເນຍ຺ຍໍ;

ສມນ຺ຕໂຕ ໂສຬສໂຍຊນານິ, ເວຫາຍສໍ ຄຈ຺ຉຕິ ອິທ຺ຘິຍາ ມມ.

໗໓໘. ‘‘ກູຏາຄາຣາ ນິເວສາ ເມ, ວິຠຕ຺ຕາ ຠາຄໂສ ມິຕາ;

ທທ຺ທລ຺ລມານາ ອາຠນ຺ຕິ, ສມນ຺ຕາ ສຕໂຍຊນໍ.

໗໓໙. ‘‘ໂປກ຺ຂຣຎ຺ໂຎ ຈ ເມ ເອຕ຺ຖ, ປຸຖຸໂລມນິເສວິຕາ;

ອຈ຺ໂຉທກາ [ອຈ຺ໂຉທິກາ (ສີ.)] ວິປ຺ປສນ຺ນາ, ໂສຓ຺ຓວາລຸກສນ຺ຖຕາ.

໗໔໐. ‘‘ນານາປທຸມສຎ຺ຉນ຺ນາ, ປຸຓ຺ຑຣີກສໂມຕຕາ [ປຓ຺ຑຣີກສໂມນຕາ (ສີ.)];

ສຸຣຠີ ສມ຺ປວາຍນ຺ຕິ, ມນຸຎ຺ຎາ ມາລຸເຕຣິຕາ.

໗໔໑. ‘‘ຊມ຺ພຸໂຍ ປນສາ ຕາລາ, ນາຬິເກຣວນານິ ຈ;

ອນ຺ໂຕນິເວສເນ ຊາຕາ, ນານາຣຸກ຺ຂາ ອໂຣປິມາ.

໗໔໒. ‘‘ນານາຕູຣິຍສງ຺ຆຸຏ຺ຐໍ, ອຈ຺ຉຣາຄຓໂຆສິຕໍ;

ໂຍປິ ມໍ ສຸປິເນ ປສ຺ເສ, ໂສປິ ວິຕ຺ໂຕ ສິຍາ ນໂຣ.

໗໔໓. ‘‘ເອຕາທິສໍ ອພ຺ຠຸຕທສ຺ສເນຍ຺ຍໍ, ວິມານໍ ສພ຺ພໂສປຠໍ;

ມມ ກມ຺ເມຫິ ນິພ຺ພຕ຺ຕໍ, ອລໍ ປຸຎ຺ຎານິ ກາຕເວ’’ຕິ.

໗໔໔. ‘‘ຕາເຍວ ເຕ ສຸທ຺ຘນຸໂມທນາຍ, ລທ຺ຘໍ ວິມານພ຺ຠຸຕທສ຺ສເນຍ຺ຍໍ;

ຍາ ເຈວ ສາ ທານມທາສິ ນາຣີ, ຕສ຺ສາ ຄຕິໍ ພ຺ຣູຫິ ກຸຫິໍ ອຸປ຺ປນ຺ນາ [ອຸປປນ຺ນາ (ກ.)] ສາ’’ຕິ.

໗໔໕. ‘‘ຍາ ສາ ອຫຸ ມຍ຺ຫໍ ສຂີ ຠທນ຺ເຕ, ສງ຺ຆສ຺ສ ກາເຣສິ ມຫາວິຫາຣໍ;

ວິຎ຺ຎາຕຘມ຺ມາ ສາ ອທາສິ ທານໍ, ອຸປ຺ປນ຺ນາ ນິມ຺ມານຣຕີສຸ ເທເວສຸ.

໗໔໖. ‘‘ປຊາປຕີ ຕສ຺ສ ສຸນິມ຺ມິຕສ຺ສ, ອຈິນ຺ຕິຍາ ກມ຺ມວິປາກາ ຕສ຺ສ;

ຍເມຕໍ ປຸຈ຺ຉສິ ກຸຫິໍ ອຸປ຺ປນ຺ນາ [ອຸປປນ຺ນາ (ກ.)] ສາຕິ, ຕໍ ເຕ ວິຍາກາສິໍ ອນຎ຺ຎຖາ ອຫໍ.

໗໔໗. ‘‘ເຕນຫຎ຺ເຎປິ ສມາທເປຖ, ສງ຺ຆສ຺ສ ທານານິ ທທາຖ ວິຕ຺ຕາ;

ຘມ຺ມຎ຺ຈ ສຸຓາຖ ປສນ຺ນມານສາ, ສຸທຸລ຺ລໂຠ ລທ຺ໂຘ ມນຸສ຺ສລາໂຠ.

໗໔໘. ‘‘ຍໍ ມຄ຺ຄໍ ມຄ຺ຄາຘິປຕີ ອເທສຍິ [ມຄ຺ຄາຘິປຕ຺ຍເທສຍິ (ສີ.)], ພ຺ຣຫ຺ມສ຺ສໂຣ ກຎ຺ຈນສນ຺ນິຠຕ຺ຕໂຈ;

ສງ຺ຆສ຺ສ ທານານິ ທທາຖ ວິຕ຺ຕາ, ມຫປ຺ຜລາ ຍຕ຺ຖ ຠວນ຺ຕິ ທກ຺ຂິຓາ.

໗໔໙. [ຂຸ. ປາ. ໖.໖; ສຸ. ນິ. ໒໒໙] ‘‘ເຍ ປຸຄ຺ຄລາ ອຏ຺ຐ ສຕໍ ປສຕ຺ຖາ, ຈຕ຺ຕາຣິ ເອຕານິ ຍຸຄານິ ໂຫນ຺ຕິ;

ເຕ ທກ຺ຂິເຓຍ຺ຍາ ສຸຄຕສ຺ສ ສາວກາ, ເອເຕສຸ ທິນ຺ນານິ ມຫປ຺ຜລານິ.

໗໕໐. [ວິ. ວ. ໖໔໑] ‘‘ຈຕ຺ຕາໂຣ ຈ ປຏິປນ຺ນາ, ຈຕ຺ຕາໂຣ ຈ ຜເລ ຐິຕາ;

ເອສ ສງ຺ໂຆ ອຸຊຸຠູໂຕ, ປຎ຺ຎາສີລສມາຫິໂຕ.

໗໕໑. [ວິ. ວ. ໖໔໒] ‘‘ຍຊມານານໍ ມນຸສ຺ສານໍ, ປຸຎ຺ຎເປກ຺ຂານ ປາຓິນໍ;

ກໂຣຕໍ ໂອປຘິກໍ ປຸຎ຺ຎໍ, ສງ຺ເຆ ທິນ຺ນໍ ມຫປ຺ຜລໍ.

໗໕໒. [ວິ. ວ. ໖໔໓] ‘‘ເອໂສ ຫິ ສງ຺ໂຆ ວິປຸໂລ ມຫຄ຺ຄໂຕ, ເອສປ຺ປເມຍ຺ໂຍ ອຸທຘີວ ສາຄໂຣ;

ເອເຕຫິ ເສຏ຺ຐາ ນຣວີຣສາວກາ, ປຠງ຺ກຣາ ຘມ຺ມມຸທີຣຍນ຺ຕິ [ນຕ຺ເຖຕ຺ຖ ປາຐເຠໂທ].

໗໕໓. [ວິ. ວ. ໖໔໔] ‘‘ເຕສໍ ສຸທິນ຺ນໍ ສຸຫຸຕໍ ສຸຍິຏ຺ຐໍ, ເຍ ສງ຺ຆມຸທ຺ທິສ຺ສ ທທນ຺ຕິ ທານໍ;

ສາ ທກ຺ຂິຓາ ສງ຺ຆຄຕາ ປຕິຏ຺ຐິຕາ, ມຫປ຺ຜລາ ໂລກວິທູນ [ໂລກວິທູຫິ (ກ.)] ວຓ຺ຓິຕາ.

໗໕໔. ‘‘ເອຕາທິສໍ ຍຎ຺ຎມນຸສ຺ສຣນ຺ຕາ, ເຍ ເວທຊາຕາ ວິຈຣນ຺ຕິ ໂລເກ;

ວິເນຍ຺ຍ ມຈ຺ເຉຣມລໍ ສມູລໍ, ອນິນ຺ທິຕາ ສຄ຺ຄມຸເປນ຺ຕິ ຐານ’’ນ຺ຕິ.

ວິຫາຣວິມານໍ ຉຏ຺ຐໍ.

ຠາຓວາຣໍ ທຸຕິຍໍ ນິຏ຺ຐິຕໍ.