໗. ອຸໂປສຖາວິມານວຕ຺ຖຸ

໒໒໙. ‘‘ອຠິກ຺ກນ຺ເຕນ ວຓ຺ເຓນ, ຍາ ຕ຺ວໍ ຕິຏ຺ຐສິ ເທວເຕ;

ໂອຠາເສນ຺ຕີ ທິສາ ສພ຺ພາ, ໂອສຘີ ວິຍ ຕາຣກາ.

໒໓໐. ‘‘ເກນ ເຕຕາທິໂສ ວຓ຺ໂຓ…ເປ…

ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໒໓໒. ສາ ເທວຕາ ອຕ຺ຕມນາ…ເປ… ຍສ຺ສ ກມ຺ມສ຺ສິທໍ ຜລໍ.

໒໓໓. ‘‘ອຸໂປສຖາຕິ ມໍ ອຎ຺ຎໍສຸ, ສາເກຕາຍໍ ອຸປາສິກາ;

ສທ຺ຘາ ສີເລນ ສມ຺ປນ຺ນາ, ສໍວິຠາຄຣຕາ ສທາ.

໒໓໔. ‘‘ອຈ຺ຉາທນຎ຺ຈ ຠຕ຺ຕຎ຺ຈ, ເສນາສນໍ ປທີປິຍໍ;

ອທາສິໍ ອຸຊຸຠູເຕສຸ, ວິປ຺ປສນ຺ເນນ ເຈຕສາ.

໒໓໕. ‘‘ຈາຕຸທ຺ທສິໍ ປຎ຺ຈທສິໍ, ຍາ ຈ ປກ຺ຂສ຺ສ ອຏ຺ຐມີ;

ປາຏິຫາຣິຍປກ຺ຂຎ຺ຈ, ອຏ຺ຐງ຺ຄສຸສມາຄຕໍ.

໒໓໖. ‘‘ອຸໂປສຖໍ ອຸປວສິສ຺ສໍ, ສທາ ສີເລສຸ ສໍວຸຕາ;

ສຎ຺ຎມາ ສໍວິຠາຄາ ຈ, ວິມານໍ ອາວສາມຫໍ.

໒໓໗. ‘‘ປາຓາຕິປາຕາ ວິຣຕາ, ມຸສາວາທາ ຈ ສຎ຺ຎຕາ;

ເຖຍ຺ຍາ ຈ ອຕິຈາຣາ ຈ, ມຊ຺ຊປານາ ຈ ອາຣກາ.

໒໓໘. ‘‘ປຎ຺ຈສິກ຺ຂາປເທ ຣຕາ, ອຣິຍສຈ຺ຈານ ໂກວິທາ;

ອຸປາສິກາ ຈກ຺ຂຸມໂຕ, ໂຄຕມສ຺ສ ຍສສ຺ສິໂນ.

໒໓໙. ‘‘ເຕນ ເມຕາທິໂສ ວຓ຺ໂຓ…ເປ…

ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

໒໔໑. ‘‘ອຠິກ຺ຂຓໍ ນນ຺ທນໍ ສຸຕ຺ວາ, ຉນ຺ໂທ ເມ ອຸທປຊ຺ຊຖ [ອຸປປຊ຺ຊຖ (ພຫູສຸ)];

ຕຕ຺ຖ ຈິຕ຺ຕໍ ປຓິຘາຍ, ອຸປປນ຺ນມ຺ຫິ ນນ຺ທນໍ.

໒໔໒. ‘‘ນາກາສິໍ ສຕ຺ຖຸ ວຈນໍ, ພຸທ຺ຘສ຺ສາທິຈ຺ຈພນ຺ຘຸໂນ;

ຫີເນ ຈິຕ຺ຕໍ ປຓິຘາຍ, ສາມ຺ຫິ ປຈ຺ຉານຸຕາປິນີ’’ຕິ.

໒໔໓. ‘‘ກີວ ຈິຣໍ ວິມານມ຺ຫິ, ອິຘ ວຈ຺ຉສຸໂປສເຖ [ວສ຺ສສຸໂປສເຖ (ສີ.)];

ເທວເຕ ປຸຈ຺ຉິຕາຈິກ຺ຂ, ຍທິ ຊານາສິ ອາຍຸໂນ’’ຕິ.

໒໔໔. ‘‘ສຏ຺ຐິວສ຺ສສຫສ຺ສານິ [ສຏ຺ຐິ ສຕສຫສ຺ສານິ (?)], ຕິສ຺ໂສ ຈ ວສ຺ສໂກຏິໂຍ;

ອິຘ ຐຕ຺ວາ ມຫາມຸນິ, ອິໂຕ ຈຸຕາ ຄມິສ຺ສາມິ;

ມນຸສ຺ສານໍ ສຫພ຺ຍຕ’’ນ຺ຕິ.

໒໔໕. ‘‘ມາ ຕ຺ວໍ ອຸໂປສເຖ ຠາຍິ, ສມ຺ພຸທ຺ເຘນາສິ ພ຺ຍາກຕາ;

ໂສຕາປນ຺ນາ ວິເສສຍິ, ປຫີນາ ຕວ ທຸຄ຺ຄຕີ’’ຕິ.

ອຸໂປສຖາວິມານໍ ສຕ຺ຕມໍ.