໒. ຈິຕ຺ຕລຕາວຄ຺ໂຄ

໑. ທາສິວິມານວຕ຺ຖຸ

໑໕໗. ‘‘ອປິ ສກ຺ໂກວ ເທວິນ຺ໂທ, ຣມ຺ເມ ຈິຕ຺ຕລຕາວເນ;

ສມນ຺ຕາ ອນຸປຣິຍາສິ, ນາຣີຄຓປຸຣກ຺ຂຕາ;

ໂອຠາເສນ຺ຕີ ທິສາ ສພ຺ພາ, ໂອສຘີ ວິຍ ຕາຣກາ.

໑໕໘. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໑໕໙. ‘‘ປຸຈ຺ຉາມິ ຕໍ ເທວິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໖໐. ສາ ເທວຕາ ອຕ຺ຕມນາ, ໂມຄ຺ຄລ຺ລາເນນ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລໍ.

໑໖໑. ‘‘ອຫໍ ມນຸສ຺ເສສຸ ມນຸສ຺ສຠູຕາ, ທາສີ ອໂຫສິໍ ປຣເປສ຺ສິຍາ [ປຣເປສິຍາ (ກ.)] ກຸເລ.

໑໖໒. ‘‘ອຸປາສິກາ ຈກ຺ຂຸມໂຕ, ໂຄຕມສ຺ສ ຍສສ຺ສິໂນ;

ຕສ຺ສາ ເມ ນິກ຺ກໂມ ອາສິ, ສາສເນ ຕສ຺ສ ຕາທິໂນ.

໑໖໓. ‘‘ກາມໍ ຠິຊ຺ຊຕຸຍໍ ກາໂຍ, ເນວ ອຕ຺ເຖຕ຺ຖ ສຓ຺ຐນໍ [ສນ຺ຖນໍ (ສີ. ສ຺ຍາ. ປີ.)];

ສິກ຺ຂາປທານໍ ປຎ຺ຈນ຺ນໍ, ມຄ຺ໂຄ ໂສວຕ຺ຖິໂກ ສິໂວ.

໑໖໔. ‘‘ອກຓ຺ຏໂກ ອຄຫໂນ, ອຸຊຸ ສພ຺ຠິ ປເວທິໂຕ;

ນິກ຺ກມສ຺ສ ຜລໍ ປສ຺ສ, ຍຖິທໍ ປາປຸຓິຕ຺ຖິກາ.

໑໖໕. ‘‘ອາມນ຺ຕນິກາ ຣຎ຺ໂຎມ຺ຫິ, ສກ຺ກສ຺ສ ວສວຕ຺ຕິໂນ;

ສຏ຺ຐິ ຕຸຣິຍ [ຕຸຣິຍ (ສີ. ສ຺ຍາ. ປີ.)] ສຫສ຺ສານິ, ປຏິໂພຘໍ ກໂຣນ຺ຕິ ເມ.

໑໖໖. ‘‘ອາລມ຺ໂພ ຄຄ຺ຄໂຣ [ຄຄ຺ຄໂມ (ສ຺ຍາ.), ຠຄ຺ຄໂຣ (ກ.)] ຠີໂມ [ຠິມ຺ໂມ (ກ.)], ສາຘຸວາທີ ຈ ສໍສໂຍ;

ໂປກ຺ຂໂຣ ຈ ສຸຜສ຺ໂສ ຈ, ວິຓາໂມກ຺ຂາ [ວິລາໂມກ຺ຂາ (ກ.)] ຈ ນາຣິໂຍ.

໑໖໗. ‘‘ນນ຺ທາ ເຈວ ສຸນນ຺ທາ ຈ, ໂສຓທິນ຺ນາ ສຸຈິມ຺ຫິຕາ [ສຸຈິມ຺ຠິກາ (ສ຺ຍາ.)];

ອລມ຺ພຸສາ ມິສ຺ສເກສີ ຈ, ປຸຓ຺ຑຣີກາຕິ ທາຣຸຓີ.

໑໖໘. ‘‘ເອຓີຜສ຺ສາ ສຸຜສ຺ສາ ຈ, ສຸຠທ຺ທາ ມຸທຸວາທິນີ;

ເອຕາ ຈຎ຺ຎາ ຈ ເສຍ຺ຍາເສ, ອຈ຺ຉຣານໍ ປໂພຘິກາ.

໑໖໙. ‘‘ຕາ ມໍ ກາເລນຸປາຄນ຺ຕ຺ວາ, ອຠິຠາສນ຺ຕິ ເທວຕາ;

ຫນ຺ທ ນຈ຺ຈາມ ຄາຍາມ, ຫນ຺ທ ຕໍ ຣມຍາມເສ.

໑໗໐. ‘‘ນຍິທໍ ອກຕປຸຎ຺ຎານໍ, ກຕປຸຎ຺ຎານເມວິທໍ;

ອໂສກໍ ນນ຺ທນໍ ຣມ຺ມໍ, ຕິທສານໍ ມຫາວນໍ.

໑໗໑. ‘‘ສຸຂໍ ອກຕປຸຎ຺ຎານໍ, ອິຘ ນຕ຺ຖິ ປຣຕ຺ຖ ຈ;

ສຸຂຎ຺ຈ ກຕປຸຎ຺ຎານໍ, ອິຘ ເຈວ ປຣຕ຺ຖ ຈ.

໑໗໒. ‘‘ເຕສໍ ສຫພ຺ຍກາມານໍ, ກຕ຺ຕພ຺ພໍ ກຸສລໍ ພຫຸໍ;

ກຕປຸຎ຺ຎາ ຫິ ໂມທນ຺ຕິ, ສຄ຺ເຄ ໂຠຄສມງ຺ຄິໂນ’’ຕິ.

ທາສິວິມານໍ ປຐມໍ.

໒. ລຂຸມາວິມານວຕ຺ຖຸ

໑໗໓. ‘‘ອຠິກ຺ກນ຺ເຕນ ວຓ຺ເຓນ, ຍາ ຕ຺ວໍ ຕິຏ຺ຐສິ ເທວເຕ;

ໂອຠາເສນ຺ຕີ ທິສາ ສພ຺ພາ, ໂອສຘີ ວິຍ ຕາຣກາ.

໑໗໔. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໑໗໕. ‘‘ປຸຈ຺ຉາມິ ຕໍ ເທວິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໗໖. ສາ ເທວຕາ ອຕ຺ຕມນາ, ໂມຄ຺ຄລ຺ລາເນນ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລໍ.

໑໗໗. ‘‘ເກວຏ຺ຏທ຺ວາຣາ ນິກ຺ຂມ຺ມ, ອຫຸ ມຍ຺ຫໍ ນິເວສນໍ;

ຕຕ຺ຖ ສຎ຺ຈຣມານານໍ, ສາວການໍ ມເຫສິນໍ.

໑໗໘. ‘‘ໂອທນໍ ກຸມ຺ມາສໍ [ສາກໍ (ສີ.)] ຑາກໍ, ໂລຓໂສວີຣກຎ຺ຈຫໍ;

ອທາສິໍ ອຸຊຸຠູເຕສຸ, ວິປ຺ປສນ຺ເນນ ເຈຕສາ.

໑໗໙. ‘‘ຈາຕຸທ຺ທສິໍ ປຎ຺ຈທສິໍ, ຍາ ຈ ປກ຺ຂສ຺ສ ອຏ຺ຐມີ;

ປາຏິຫາຣິຍປກ຺ຂຎ຺ຈ, ອຏ຺ຐງ຺ຄສຸສມາຄຕໍ.

໑໘໐. ‘‘ອຸໂປສຖໍ ອຸປວສິສ຺ສໍ, ສທາ ສີເລສຸ ສໍວຸຕາ;

ສຎ຺ຎມາ ສໍວິຠາຄາ ຈ, ວິມານໍ ອາວສາມຫໍ.

໑໘໑. ‘‘ປາຓາຕິປາຕາ ວິຣຕາ, ມຸສາວາທາ ຈ ສຎ຺ຎຕາ;

ເຖຍ຺ຍາ ຈ ອຕິຈາຣາ ຈ, ມຊ຺ຊປານາ ຈ ອາຣກາ.

໑໘໒. ‘‘ປຎ຺ຈສິກ຺ຂາປເທ ຣຕາ, ອຣິຍສຈ຺ຈານ ໂກວິທາ;

ອຸປາສິກາ ຈກ຺ຂຸມໂຕ, ໂຄຕມສ຺ສ ຍສສ຺ສິໂນ.

໑໘໓. ‘‘ເຕນ ເມຕາທິໂສ ວຓ຺ໂຓ…ເປ… ວຓ຺ໂຓ ຈ ເມ ສພ຺ພທິສາ ປຠາສຕີຕິ.

‘‘ມມ ຈ, ຠນ຺ເຕ, ວຈເນນ ຠຄວໂຕ ປາເທ ສິຣສາ ວນ຺ເທຍ຺ຍາສິ – ‘ລຂຸມາ ນາມ,ຠນ຺ເຕ,ອຸປາສິກາ ຠຄວໂຕ ປາເທ ສິຣສາ ວນ຺ທຕີ’ຕິ. ອນຈ຺ຉຣິຍໍ ໂຂ ປເນຕໍ, ຠນ຺ເຕ, ຍໍ ມໍ ຠຄວາ ອຎ຺ຎຕຣສ຺ມິໍ ສາມຎ຺ຎຜເລ ພ຺ຍາກເຣຍ຺ຍ [ພ຺ຍາກເຣຍ຺ຍາຕິ (?)]. ຕໍ ຠຄວາ ສກທາຄາມິຜເລ ພ຺ຍາກາສີ’’ຕິ.

ລຂຸມາວິມານໍ ທຸຕິຍໍ.

໓. ອາຈາມທາຍິກາວິມານວຕ຺ຖຸ

໑໘໕. ‘‘ປິຓ຺ຑາຍ ເຕ ຈຣນ຺ຕສ຺ສ, ຕຸຓ຺ຫີຠູຕສ຺ສ ຕິຏ຺ຐໂຕ;

ທລິທ຺ທາ ກປຓາ ນາຣີ, ປຣາຄາຣໍ ອປສ຺ສິຕາ [ອວສ຺ສິຕາ (ສີ.)].

໑໘໖. ‘‘ຍາ ເຕ ອທາສິ ອາຈາມໍ, ປສນ຺ນາ ເສຫິ ປາຓິຠິ;

ສາ ຫິຕ຺ວາ ມານຸສໍ ເທຫໍ, ກໍ ນຸ ສາ ທິສຕໍ ຄຕາ’’ຕິ.

໑໘໗. ‘‘ປິຓ຺ຑາຍ ເມ ຈຣນ຺ຕສ຺ສ, ຕຸຓ຺ຫີຠູຕສ຺ສ ຕິຏ຺ຐໂຕ;

ທລິທ຺ທາ ກປຓາ ນາຣີ, ປຣາຄາຣໍ ອປສ຺ສິຕາ.

໑໘໘. ‘‘ຍາ ເມ ອທາສິ ອາຈາມໍ, ປສນ຺ນາ ເສຫິ ປາຓິຠິ;

ສາ ຫິຕ຺ວາ ມານຸສໍ ເທຫໍ, ວິປ຺ປມຸຕ຺ຕາ ອິໂຕ ຈຸຕາ.

໑໘໙. ‘‘ນິມ຺ມານຣຕິໂນ ນາມ, ສນ຺ຕິ ເທວາ ມຫິທ຺ຘິກາ;

ຕຕ຺ຖ ສາ ສຸຂິຕາ ນາຣີ, ໂມທຕາຈາມທາຍິກາ’’ຕິ.

໑໙໐. ‘‘ອໂຫ ທານໍ ວຣາກິຍາ, ກສ຺ສເປ ສຸປ຺ປຕິຏ຺ຐິຕໍ;

ປຣາຠເຕນ ທາເນນ, ອິຊ຺ຌິຕ຺ຖ ວຕ ທກ຺ຂິຓາ.

໑໙໑. ‘‘ຍາ ມເຫສິຕ຺ຕໍ ກາເຣຍ຺ຍ, ຈກ຺ກວຕ຺ຕິສ຺ສ ຣາຊິໂນ;

ນາຣີ ສພ຺ພງ຺ຄກລ຺ຍາຓີ, ຠຕ຺ຕຸ ຈາໂນມທສ຺ສິກາ;

ເອຕສ຺ສາຈາມທານສ຺ສ, ກລໍ ນາຄ຺ຆຕິ ໂສຬສິໍ.

໑໙໒. ‘‘ສຕໍ ນິກ຺ຂາ ສຕໍ ອສ຺ສາ, ສຕໍ ອສ຺ສຕຣີຣຖາ;

ສຕໍ ກຎ຺ຎາສຫສ຺ສານິ, ອາມຸຕ຺ຕມຓິກຸຓ຺ຑລາ;

ເອຕສ຺ສາຈາມທານສ຺ສ, ກລໍ ນາຄ຺ຆນ຺ຕິ ໂສຬສິໍ.

໑໙໓. ‘‘ສຕໍ ເຫມວຕາ ນາຄາ, ອີສາທນ຺ຕາ ອຸຣູຬ຺ຫວາ;

ສຸວຓ຺ຓກຈ຺ຉາ ມາຕງ຺ຄາ, ເຫມກປ຺ປນວາສສາ [ເຫມກປ຺ປນິວາສສາ (ສ຺ຍາ. ກ.)];

ເອຕສ຺ສາຈາມທານສ຺ສ, ກລໍ ນາຄ຺ຆຕິ ໂສຬສິໍ.

໑໙໔. ‘‘ຈຕຸນ຺ນມປິ ທີປານໍ, ອິສ຺ສຣໍ ໂຍຘ ກາຣເຍ;

ເອຕສ຺ສາຈາມທານສ຺ສ, ກລໍ ນາຄ຺ຆຕິ ໂສຬສິ’’ນ຺ຕິ.

ອາຈາມທາຍິກາວິມານໍ ຕຕິຍໍ.

໔. ຈຓ຺ຑາລິວິມານວຕ຺ຖຸ

໑໙໕. ‘‘ຈຓ຺ຑາລິ ວນ຺ທ ປາທານິ, ໂຄຕມສ຺ສ ຍສສ຺ສິໂນ;

ຕເມວ [ຕເວວ (ສີ.)] ອນຸກມ຺ປາຍ, ອຏ຺ຐາສິ ອິສິສຕ຺ຕໂມ [ອິສິສຸຕ຺ຕໂມ (ສີ.)].

໑໙໖. ‘‘ອຠິປ຺ປສາເທຫິ ມນໍ, ອຣຫນ຺ຕມ຺ຫິ ຕາທິນິ [ຕາທິເນ (ສ຺ຍາ. ກ.)];

ຂິປ຺ປໍ ປຎ຺ຊລິກາ ວນ຺ທ, ປຣິຕ຺ຕໍ ຕວ ຊີວິຕ’’ນ຺ຕິ.

໑໙໗. ໂຈທິຕາ ຠາວິຕຕ຺ເຕນ, ສຣີຣນ຺ຕິມຘາຣິນາ;

ຈຓ຺ຑາລີ ວນ຺ທິ ປາທານິ, ໂຄຕມສ຺ສ ຍສສ຺ສິໂນ.

໑໙໘. ຕເມນໍ ອວຘີ ຄາວີ, ຈຓ຺ຑາລິໍ ປຎ຺ຊລິໍ ຐິຕໍ;

ນມສ຺ສມານໍ ສມ຺ພຸທ຺ຘໍ, ອນ຺ຘກາເຣ ປຠງ຺ກຣນ຺ຕິ.

໑໙໙. ‘‘ຂີຓາສວໍ ວິຄຕຣຊໍ ອເນຊໍ, ເອກໍ ອຣຎ຺ຎມ຺ຫິ ຣໂຫ ນິສິນ຺ນໍ;

ເທວິທ຺ຘິປຕ຺ຕາ ອຸປສງ຺ກມິຕ຺ວາ, ວນ຺ທາມິ ຕໍ ວີຣ ມຫານຸຠາວ’’ນ຺ຕິ.

໒໐໐. ‘‘ສຸວຓ຺ຓວຓ຺ຓາ ຊລິຕາ ມຫາຍສາ, ວິມານໂມຣຸຍ຺ຫ ອເນກຈິຕ຺ຕາ;

ປຣິວາຣິຕາ ອຈ຺ຉຣາສງ຺ຄເຓນ [ອຈ຺ຉຣານໍ ຄເຓນ (ສີ.)], ກາ ຕ຺ວໍ ສຸເຠ ເທວເຕ ວນ຺ທເສ ມມ’’ນ຺ຕິ.

໒໐໑. ‘‘ອຫໍ ຠທ຺ທນ຺ເຕ ຈຓ຺ຑາລີ, ຕຍາ ວີເຣນ [ເຖເຣນ (ກ.)] ເປສິຕາ;

ວນ຺ທິໍ ອຣຫໂຕ ປາເທ, ໂຄຕມສ຺ສ ຍສສ຺ສິໂນ.

໒໐໒. ‘‘ສາຫໍ ວນ຺ທິຕ຺ວາ [ວນ຺ທິຕ຺ວ (ສີ.)] ປາທານິ, ຈຸຕາ ຈຓ຺ຑາລໂຍນິຍາ;

ວິມານໍ ສພ຺ພໂຕ ຠທ຺ທໍ, ອຸປປນ຺ນມ຺ຫິ ນນ຺ທເນ.

໒໐໓. ‘‘ອຈ຺ຉຣານໍ ສຕສຫສ຺ສໍ, ປຸຣກ຺ຂຕ຺ວານ [ປຸຣກ຺ຂິຕ຺ວາ ມໍ (ສ຺ຍາ. ກ.)] ຕິຏ຺ຐຕິ;

ຕາສາຫໍ ປວຣາ ເສຏ຺ຐາ, ວຓ຺ເຓນ ຍສສາຍຸນາ.

໒໐໔. ‘‘ປຫູຕກຕກລ຺ຍາຓາ, ສມ຺ປຊານາ ປຏິສ຺ສຕາ [ປຕິສ຺ສຕາ (ສີ. ສ຺ຍາ.)];

ມຸນິໍ ກາຣຸຓິກໍ ໂລເກ, ຕໍ ຠນ຺ເຕ ວນ຺ທິຕຸມາຄຕາ’’ຕິ.

໒໐໕. ອິທໍ ວຕ຺ວານ ຈຓ຺ຑາລີ, ກຕຎ຺ຎູ ກຕເວທິນີ;

ວນ຺ທິຕ຺ວາ ອຣຫໂຕ ປາເທ, ຕຕ຺ເຖວນ຺ຕຣຘາຍຖາຕິ [ຕຕ຺ເຖວນ຺ຕຣຘາຍຕີຕິ (ສ຺ຍາ. ກ.)].

ຈຓ຺ຑາລິວິມານໍ ຈຕຸຕ຺ຖໍ.

໕. ຠທ຺ທິຕ຺ຖິວິມານວຕ຺ຖຸ

໒໐໖. ‘‘ນີລາ ປີຕາ ຈ ກາຬາ ຈ, ມຎ຺ຊິຏ຺ຐາ [ມຎ຺ເຊຏ຺ຐາ (ສີ.), ມຎ຺ຊຏ຺ຐາ (ປີ.)] ອຖ ໂລຫິຕາ;

ອຸຈ຺ຈາວຈານໍ ວຓ຺ຓານໍ, ກິຎ຺ຊກ຺ຂປຣິວາຣິຕາ.

໒໐໗. ‘‘ມນ຺ທາຣວານໍ ປຸປ຺ຜານໍ, ມາລໍ ຘາເຣສິ ມຸທ຺ຘນິ;

ນຍິເມ ອຎ຺ເຎສຸ ກາເຍສຸ, ຣຸກ຺ຂາ ສນ຺ຕິ ສຸເມຘເສ.

໒໐໘. ‘‘ເກນ ກາຍໍ ອຸປປນ຺ນາ, ຕາວຕິໍສໍ ຍສສ຺ສິນີ;

ເທວເຕ ປຸຈ຺ຉິຕາຈິກ຺ຂ, ກິສ຺ສ ກມ຺ມສ຺ສິທໍ ຜລ’’ນ຺ຕິ.

໒໐໙. ‘‘ຠທ຺ທິຕ຺ຖິກາຕິ [ຠທ຺ທິຕ຺ຖີຕິ (ສີ.)] ມໍ ອຎ຺ຎໍສຸ, ກິມິລາຍໍ ອຸປາສິກາ;

ສທ຺ຘາ ສີເລນ ສມ຺ປນ຺ນາ, ສໍວິຠາຄຣຕາ ສທາ.

໒໑໐. ‘‘ອຈ຺ຉາທນຎ຺ຈ ຠຕ຺ຕຎ຺ຈ, ເສນາສນໍ ປທີປິຍໍ;

ອທາສິໍ ອຸຊຸຠູເຕສຸ, ວິປ຺ປສນ຺ເນນ ເຈຕສາ.

໒໑໑. ‘‘ຈາຕຸທ຺ທສິໍ ປຎ຺ຈທສິໍ, ຍາ ຈ ປກ຺ຂສ຺ສ ອຏ຺ຐມີ;

ປາຏິຫາຣິຍປກ຺ຂຎ຺ຈ, ອຏ຺ຐງ຺ຄສຸສມາຄຕໍ.

໒໑໒. ‘‘ອຸໂປສຖໍ ອຸປວສິສ຺ສໍ, ສທາ ສີເລສຸ ສໍວຸຕາ;

ສຎ຺ຎມາ ສໍວິຠາຄາ ຈ, ວິມານໍ ອາວສາມຫໍ.

໒໑໓. ‘‘ປາຓາຕິປາຕາ ວິຣຕາ, ມຸສາວາທາ ຈ ສຎ຺ຎຕາ;

ເຖຍ຺ຍາ ຈ ອຕິຈາຣາ ຈ, ມຊ຺ຊປານາ ຈ ອາຣກາ.

໒໑໔. ‘‘ປຎ຺ຈສິກ຺ຂາປເທ ຣຕາ, ອຣິຍສຈ຺ຈານ ໂກວິທາ;

ອຸປາສິກາ ຈກ຺ຂຸມໂຕ, ອປ຺ປມາທວິຫາຣິນີ.

ກຕາວາສາ ກຕກຸສລາ ຕໂຕ ຈຸຕາ [ກຕາວກາສາ ກຕກຸສລາ (ກ.)],

ສຍໍ ປຠາ ອນຸວິຈຣາມິ ນນ຺ທນໍ.

໒໑໕. ‘‘ຠິກ຺ຂູ ຈາຫໍ ປຣມຫິຕານຸກມ຺ປເກ, ອໂຠຊຍິໍ ຕປສ຺ສິຍຸຄໍ ມຫາມຸນິໍ;

ກຕາວາສາ ກຕກຸສລາ ຕໂຕ ຈຸຕາ [ກຕາວກາສາ ກຕກຸສລາ (ກ.)], ສຍໍ ປຠາ ອນຸວິຈຣາມິ ນນ຺ທນໍ.

໒໑໖. ‘‘ອຏ຺ຐງ຺ຄິກໍ ອປຣິມິຕໍ ສຸຂາວຫໍ, ອຸໂປສຖໍ ສຕຕມຸປາວສິໍ ອຫໍ;

ກຕາວາສາ ກຕກຸສລາ ຕໂຕ ຈຸຕາ [ກຕາວກາສາ ກຕກຸສລາ (ກ.)], ສຍໍ ປຠາ ອນຸວິຈຣາມິ ນນ຺ທນ’’ນ຺ຕິ.

ຠທ຺ທິຕ຺ຖິວິມານໍ [ຠທ຺ທິຕ຺ຖິກາວິມານໍ (ສ຺ຍາ.)] ປຎ຺ຈມໍ.

໖. ໂສຓທິນ຺ນາວິມານວຕ຺ຖຸ

໒໑໗. ‘‘ອຠິກ຺ກນ຺ເຕນ ວຓ຺ເຓນ, ຍາ ຕ຺ວໍ ຕິຏ຺ຐສິ ເທວເຕ;

ໂອຠາເສນ຺ຕີ ທິສາ ສພ຺ພາ, ໂອສຘີ ວິຍ ຕາຣກາ.

໒໑໘. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໒໑໙. ‘‘ປຸຈ຺ຉາມິ ຕໍ ເທວິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໒໒໐. ສາ ເທວຕາ ອຕ຺ຕມນາ, ໂມຄ຺ຄລ຺ລາເນນ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລໍ.

໒໒໑. ‘‘ໂສຓທິນ຺ນາຕິ ມໍ ອຎ຺ຎໍສຸ, ນາຬນ຺ທາຍໍ ອຸປາສິກາ;

ສທ຺ຘາ ສີເລນ ສມ຺ປນ຺ນາ, ສໍວິຠາຄຣຕາ ສທາ.

໒໒໒. ‘‘ອຈ຺ຉາທນຎ຺ຈ ຠຕ຺ຕຎ຺ຈ, ເສນາສນໍ ປທີປິຍໍ;

ອທາສິໍ ອຸຊຸຠູເຕສຸ, ວິປ຺ປສນ຺ເນນ ເຈຕສາ.

໒໒໓. ‘‘ຈາຕຸທ຺ທສິໍ ປຎ຺ຈທສິໍ, ຍາ ຈ ປກ຺ຂສ຺ສ ອຏ຺ຐມີ;

ປາຏິຫາຣິຍປກ຺ຂຎ຺ຈ, ອຏ຺ຐງ຺ຄສຸສມາຄຕໍ.

໒໒໔. ‘‘ອຸໂປສຖໍ ອຸປວສິສ຺ສໍ, ສທາ ສີເລສຸ ສໍວຸຕາ;