໓. ອາຈາມທາຍິກາວິມານວຕ຺ຖຸ

໑໘໕. ‘‘ປິຓ຺ຑາຍ ເຕ ຈຣນ຺ຕສ຺ສ, ຕຸຓ຺ຫີຠູຕສ຺ສ ຕິຏ຺ຐໂຕ;

ທລິທ຺ທາ ກປຓາ ນາຣີ, ປຣາຄາຣໍ ອປສ຺ສິຕາ [ອວສ຺ສິຕາ (ສີ.)].

໑໘໖. ‘‘ຍາ ເຕ ອທາສິ ອາຈາມໍ, ປສນ຺ນາ ເສຫິ ປາຓິຠິ;

ສາ ຫິຕ຺ວາ ມານຸສໍ ເທຫໍ, ກໍ ນຸ ສາ ທິສຕໍ ຄຕາ’’ຕິ.

໑໘໗. ‘‘ປິຓ຺ຑາຍ ເມ ຈຣນ຺ຕສ຺ສ, ຕຸຓ຺ຫີຠູຕສ຺ສ ຕິຏ຺ຐໂຕ;

ທລິທ຺ທາ ກປຓາ ນາຣີ, ປຣາຄາຣໍ ອປສ຺ສິຕາ.

໑໘໘. ‘‘ຍາ ເມ ອທາສິ ອາຈາມໍ, ປສນ຺ນາ ເສຫິ ປາຓິຠິ;

ສາ ຫິຕ຺ວາ ມານຸສໍ ເທຫໍ, ວິປ຺ປມຸຕ຺ຕາ ອິໂຕ ຈຸຕາ.

໑໘໙. ‘‘ນິມ຺ມານຣຕິໂນ ນາມ, ສນ຺ຕິ ເທວາ ມຫິທ຺ຘິກາ;

ຕຕ຺ຖ ສາ ສຸຂິຕາ ນາຣີ, ໂມທຕາຈາມທາຍິກາ’’ຕິ.

໑໙໐. ‘‘ອໂຫ ທານໍ ວຣາກິຍາ, ກສ຺ສເປ ສຸປ຺ປຕິຏ຺ຐິຕໍ;

ປຣາຠເຕນ ທາເນນ, ອິຊ຺ຌິຕ຺ຖ ວຕ ທກ຺ຂິຓາ.

໑໙໑. ‘‘ຍາ ມເຫສິຕ຺ຕໍ ກາເຣຍ຺ຍ, ຈກ຺ກວຕ຺ຕິສ຺ສ ຣາຊິໂນ;

ນາຣີ ສພ຺ພງ຺ຄກລ຺ຍາຓີ, ຠຕ຺ຕຸ ຈາໂນມທສ຺ສິກາ;

ເອຕສ຺ສາຈາມທານສ຺ສ, ກລໍ ນາຄ຺ຆຕິ ໂສຬສິໍ.

໑໙໒. ‘‘ສຕໍ ນິກ຺ຂາ ສຕໍ ອສ຺ສາ, ສຕໍ ອສ຺ສຕຣີຣຖາ;

ສຕໍ ກຎ຺ຎາສຫສ຺ສານິ, ອາມຸຕ຺ຕມຓິກຸຓ຺ຑລາ;

ເອຕສ຺ສາຈາມທານສ຺ສ, ກລໍ ນາຄ຺ຆນ຺ຕິ ໂສຬສິໍ.

໑໙໓. ‘‘ສຕໍ ເຫມວຕາ ນາຄາ, ອີສາທນ຺ຕາ ອຸຣູຬ຺ຫວາ;

ສຸວຓ຺ຓກຈ຺ຉາ ມາຕງ຺ຄາ, ເຫມກປ຺ປນວາສສາ [ເຫມກປ຺ປນິວາສສາ (ສ຺ຍາ. ກ.)];

ເອຕສ຺ສາຈາມທານສ຺ສ, ກລໍ ນາຄ຺ຆຕິ ໂສຬສິໍ.

໑໙໔. ‘‘ຈຕຸນ຺ນມປິ ທີປານໍ, ອິສ຺ສຣໍ ໂຍຘ ກາຣເຍ;

ເອຕສ຺ສາຈາມທານສ຺ສ, ກລໍ ນາຄ຺ຆຕິ ໂສຬສິ’’ນ຺ຕິ.

ອາຈາມທາຍິກາວິມານໍ ຕຕິຍໍ.