໑໕. ອຸຕ຺ຕຣາວິມານວຕ຺ຖຸ

໑໒໔. ‘‘ອຠິກ຺ກນ຺ເຕນ ວຓ຺ເຓນ, ຍາ ຕ຺ວໍ ຕິຏ຺ຐສິ ເທວເຕ;

ໂອຠາເສນ຺ຕີ ທິສາ ສພ຺ພາ, ໂອສຘີ ວິຍ ຕາຣກາ.

໑໒໕. ‘‘ເກນ ເຕຕາທິໂສ ວຓ຺ໂຓ, ເກນ ເຕ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເຕ ໂຠຄາ, ເຍ ເກຈິ ມນໂສ ປິຍາ.

໑໒໖. ‘‘ປຸຈ຺ຉາມິ ຕໍ ເທວິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໒໗. ສາ ເທວຕາ ອຕ຺ຕມນາ, ໂມຄ຺ຄລ຺ລາເນນ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລໍ.

໑໒໘. ‘‘ອິສ຺ສາ ຈ ມຈ຺ເຉຣມໂຖ [ມຈ຺ຉຣິຍມໂຖ ຈ (ກ.)] ປຬາໂສ, ນາໂຫສິ ມຍ຺ຫໍ ຆຣມາວສນ຺ຕິຍາ;

ອກ຺ໂກຘນາ ຠຕ຺ຕຸວສານຸວຕ຺ຕິນີ, ອຸໂປສເຖ ນິຈ຺ຈຫມປ຺ປມຕ຺ຕາ.

໑໒໙. ‘‘ຈາຕຸທ຺ທສິໍ ປຎ຺ຈທສິໍ, ຍາ ຈ [ຍາວ (ສີ. ອຏ຺ຐ., ກ. ອຏ຺ຐ.) ເຖຣີຄາຖາອຏ຺ຐກຖາ ປສ຺ສິຕພ຺ພາ] ປກ຺ຂສ຺ສ ອຏ຺ຐມີ;

ປາຏິຫາຣິຍປກ຺ຂຎ຺ຈ, ອຏ຺ຐງ຺ຄສຸສມາຄຕໍ.

໑໓໐. ‘‘ອຸໂປສຖໍ ອຸປວສິສ຺ສໍ, ສທາ ສີເລສຸ ສໍວຸຕາ;

ສຎ຺ຎມາ ສໍວິຠາຄາ ຈ, ວິມານໍ ອາວສາມຫໍ [ອາວສາມິມໍ (ສີ. ອຏ຺ຐ., ກ.) ປຣໂຕ ປນ ສພ຺ພຕ຺ຖປິ ‘‘ອາວສາມຫໍ’’ ອິຈ຺ເຈວ ທິສ຺ສຕິ].

໑໓໑. ‘‘ປາຓາຕິປາຕາ ວິຣຕາ, ມຸສາວາທາ ຈ ສຎ຺ຎຕາ;

ເຖຍ຺ຍາ ຈ ອຕິຈາຣາ ຈ, ມຊ຺ຊປານາ ຈ ອາຣກາ [ອາຣຕາ (?)].

໑໓໒. ‘‘ປຎ຺ຈສິກ຺ຂາປເທ ຣຕາ, ອຣິຍສຈ຺ຈານ ໂກວິທາ;

ອຸປາສິກາ ຈກ຺ຂຸມໂຕ, ໂຄຕມສ຺ສ ຍສສ຺ສິໂນ.

໑໓໓. ‘‘ສາຫໍ ສເກນ ສີເລນ, ຍສສາ ຈ ຍສສ຺ສິນີ;

ອນຸໂຠມິ ສກໍ ປຸຎ຺ຎໍ, ສຸຂິຕາ ຈມ຺ຫິນາມຍາ.

໑໓໔. ‘‘ເຕນ ເມຕາທິໂສ ວຓ຺ໂຓ, ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ, ເຍ ເກຈິ ມນໂສ ປິຍາ.

໑໓໕. ‘‘ອກ຺ຂາມິ ເຕ ຠິກ຺ຂຸ ມຫານຸຠາວ, ມນຸສ຺ສຠູຕາ ຍມຫໍ ອກາສິໍ;

ເຕນມ຺ຫິ ເອວໍ ຊລິຕານຸຠາວາ, ວຓ຺ໂຓ ຈ ເມ ສພ຺ພທິສາ ປຠາສຕີຕິ.

໑໓໖. ‘‘ມມ ຈ, ຠນ຺ເຕ, ວຈເນນ ຠຄວໂຕ ປາເທ ສິຣສາ ວນ຺ເທຍ຺ຍາສິ – ‘ອຸຕ຺ຕຣາ ນາມ, ຠນ຺ເຕ, ອຸປາສິກາ ຠຄວໂຕ ປາເທ ສິຣສາ ວນ຺ທຕີ’ຕິ. ອນຈ຺ຉຣິຍໍ ໂຂ ປເນຕໍ, ຠນ຺ເຕ, ຍໍ ມໍ ຠຄວາ ອຎ຺ຎຕຣສ຺ມິໍ ສາມຎ຺ຎຜເລ ພ຺ຍາກເຣຍ຺ຍ [ພ຺ຍາກເຣຍ຺ຍາຕິ (?)], ຕໍ ຠຄວາ ສກທາຄາມິຜເລ ພ຺ຍາກາສີ’’ຕິ.

ອຸຕ຺ຕຣາວິມານໍ ປນ຺ນຣສມໍ.