໑໖. ສິຣິມາວິມານວຕ຺ຖຸ

໑໓໗. ‘‘ຍຸຕ຺ຕາ ຈ ເຕ ປຣມອລງ຺ກຕາ ຫຍາ, ອໂຘມຸຂາ ອຆສິຄມາ ພລີ ຊວາ;

ອຠິນິມ຺ມິຕາ ປຎ຺ຈຣຖາສຕາ ຈ ເຕ, ອນ຺ເວນ຺ຕິ ຕໍ ສາຣຖິໂຈທິຕາ ຫຍາ.

໑໓໘. ‘‘ສາ ຕິຏ຺ຐສິ ຣຖວເຣ ອລງ຺ກຕາ, ໂອຠາສຍໍ ຊລມິວ ໂຊຕິ ປາວໂກ;

ປຸຈ຺ຉາມິ ຕໍ ວຣຕນຸ [ວຣຈາຣຸ (ກຕ຺ຖຈິ)] ອໂນມທສ຺ສເນ, ກສ຺ມາ ນຸ ກາຍາ ອນຘິວຣໍ ອຸປາຄມິ.

໑໓໙. ‘‘ກາມຄ຺ຄປຕ຺ຕານໍ ຍມາຫຸນຸຕ຺ຕຣໍ [… ນຸຕ຺ຕຣາ (ກ.), ອນຸຕ຺ຕຣາ (ສ຺ຍາ.)], ນິມ຺ມາຍ ນິມ຺ມາຍ ຣມນ຺ຕິ ເທວຕາ;

ຕສ຺ມາ ກາຍາ ອຈ຺ຉຣາ ກາມວຓ຺ຓິນີ, ອິຘາຄຕາ ອນຘິວຣໍ ນມສ຺ສິຕຸໍ.

໑໔໐. ‘‘ກິໍ ຕ຺ວໍ ປຸເຣ ສຸຈຣິຕມາຈຣີຘ [ສຸຈຣິຕໍ ອຈາຣິຘ (ປີ.)],

ເກນຈ຺ຉສິ ຕ຺ວໍ ອມິຕຍສາ ສຸເຂຘິຕາ;

ອິທ຺ຘີ ຈ ເຕ ອນຘິວຣາ ວິຫງ຺ຄມາ,

ວຓ຺ໂຓ ຈ ເຕ ທສ ທິສາ ວິໂຣຈຕິ.

໑໔໑. ‘‘ເທເວຫິ ຕ຺ວໍ ປຣິວຸຕາ ສກ຺ກຕາ ຈສິ,

ກຸໂຕ ຈຸຕາ ສຸຄຕິຄຕາສິ ເທວເຕ;

ກສ຺ສ ວາ ຕ຺ວໍ ວຈນກຣານຸສາສນິໍ,

ອາຈິກ຺ຂ ເມ ຕ຺ວໍ ຍທິ ພຸທ຺ຘສາວິກາ’’ຕິ.

໑໔໒. ‘‘ນຄນ຺ຕເຣ ນຄຣວເຣ ສຸມາປິເຕ, ປຣິຈາຣິກາ ຣາຊວຣສ຺ສ ສິຣິມໂຕ;

ນຈ຺ເຈ ຄີເຕ ປຣມສຸສິກ຺ຂິຕາ ອຫຸໍ, ສິຣິມາຕິ ມໍ ຣາຊຄເຫ ອເວທິໍສຸ [ອເວທິສຸໍ (?)].

໑໔໓. ‘‘ພຸທ຺ໂຘ ຈ ເມ ອິສິນິສໂຠ ວິນາຍໂກ, ອເທສຍີ ສມຸທຍທຸກ຺ຂນິຈ຺ຈຕໍ;

ອສງ຺ຂຕໍ ທຸກ຺ຂນິໂຣຘສສ຺ສຕໍ, ມຄ຺ຄຎ຺ຈິມໍ ອກຸຏິລມຎ຺ຊສໍ ສິວໍ.

໑໔໔. ‘‘ສຸຕ຺ວານຫໍ ອມຕປທໍ ອສງ຺ຂຕໍ, ຕຖາຄຕສ຺ສນຘິວຣສ຺ສ ສາສນໍ;

ສີເລສ຺ວຫໍ ປຣມສຸສໍວຸຕາ ອຫຸໍ, ຘມ຺ເມ ຐິຕາ ນຣວຣພຸທ຺ຘເທສິເຕ [ຠາສິເຕ (ສີ.)].

໑໔໕. ‘‘ຎຕ຺ວານຫໍ ວິຣຊປທໍ ອສງ຺ຂຕໍ, ຕຖາຄເຕນນຘິວເຣນ ເທສິຕໍ;

ຕຕ຺ເຖວຫໍ ສມຖສມາຘິມາຜຸສິໍ, ສາເຍວ ເມ ປຣມນິຍາມຕາ ອຫຸ.

໑໔໖. ‘‘ລທ຺ຘານຫໍ ອມຕວຣໍ ວິເສສນໍ, ເອກໍສິກາ ອຠິສມເຍ ວິເສສິຍ;

ອສໍສຍາ ພຫຸຊນປູຊິຕາ ອຫໍ, ຂິຑ຺ຑາຣຕິໍ [ຂິຑ຺ຑໍ ຣຕິໍ (ສ຺ຍາ. ປີ.)] ປຈ຺ຈນຸໂຠມນປ຺ປກໍ.

໑໔໗. ‘‘ເອວໍ ອຫໍ ອມຕທສມ຺ຫິ [ອມຕຣສມ຺ຫິ (ກ.)] ເທວຕາ, ຕຖາຄຕສ຺ສນຘິວຣສ຺ສ ສາວິກາ;

ຘມ຺ມທ຺ທສາ ປຐມຜເລ ປຕິຏ຺ຐິຕາ, ໂສຕາປນ຺ນາ ນ ຈ ປນ ມຕ຺ຖິ ທຸຄ຺ຄຕິ.

໑໔໘. ‘‘ສາ ວນ຺ທິຕຸໍ ອນຘິວຣໍ ອຸປາຄມິໍ, ປາສາທິເກ ກຸສລຣເຕ ຈ ຠິກ຺ຂໂວ;

ນມສ຺ສິຕຸໍ ສມຓສມາຄມໍ ສິວໍ, ສຄາຣວາ ສິຣິມໂຕ ຘມ຺ມຣາຊິໂນ.

໑໔໙. ‘‘ທິສ຺ວາ ມຸນິໍ ມຸທິຕມນມ຺ຫິ ປີຓິຕາ, ຕຖາຄຕໍ ນຣວຣທມ຺ມສາຣຖິໍ;

ຕຓ຺ຫຈ຺ຉິທໍ ກຸສລຣຕໍ ວິນາຍກໍ, ວນ຺ທາມຫໍ ປຣມຫິຕານຸກມ຺ປກ’’ນ຺ຕິ.

ສິຣິມາວິມານໍ ໂສຬສມໍ.