໑໑. ປຐມປຕິພ຺ພຕາວິມານວຕ຺ຖຸ

໙໓. ‘‘ໂກຎ຺ຈາ ມຍູຣາ ທິວິຍາ ຈ ຫໍສາ, ວຄ຺ຄຸສ຺ສຣາ ໂກກິລາ ສມ຺ປຕນ຺ຕິ;

ປຸປ຺ຜາຠິກິຓ຺ຓໍ ຣມ຺ມມິທໍ ວິມານໍ, ອເນກຈິຕ຺ຕໍ ນຣນາຣິເສວິຕໍ [ນຣນາຣີຠິ ເສວິຕໍ (ກ.)].

໙໔. ‘‘ຕຕ຺ຖຈ຺ຉສິ ເທວິ ມຫານຸຠາເວ, ອິທ຺ຘີ ວິກຸພ຺ພນ຺ຕິ ອເນກຣູປາ;

ອິມາ ຈ ເຕ ອຈ຺ຉຣາໂຍ ສມນ຺ຕໂຕ, ນຈ຺ຈນ຺ຕິ ຄາຍນ຺ຕິ ປໂມທຍນ຺ຕິ ຈ.

໙໕. ‘‘ເທວິທ຺ຘິປຕ຺ຕາສິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໙໖. ສາ ເທວຕາ ອຕ຺ຕມນາ, ໂມຄ຺ຄລ຺ລາເນນ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລໍ.

໙໗. ‘‘ອຫໍ ມນຸສ຺ເສສຸ ມນຸສ຺ສຠູຕາ, ປຕິພ຺ພຕານຎ຺ຎມນາ ອໂຫສິໍ;

ມາຕາວ ປຸຕ຺ຕໍ ອນຸຣກ຺ຂມານາ, ກຸທ຺ຘາປິຫໍ [ກຸທ຺ຘາປຫໍ (ສີ.)] ນປ຺ຜຣຸສໍ ອໂວຈໍ.

໙໘. ‘‘ສຈ຺ເຈ ຐິຕາ ໂມສວຊ຺ຊໍ ປຫາຍ, ທາເນ ຣຕາ ສງ຺ຄຫິຕຕ຺ຕຠາວາ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ຕາ, ສກ຺ກຈ຺ຈ ທານໍ ວິປຸລໍ ອທາສິໍ.

໙໙. ‘‘ເຕນ ເມຕາທິໂສ ວຓ຺ໂຓ, ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ, ເຍ ເກຈິ ມນໂສ ປິຍາ.

໑໐໐. ‘‘ອກ຺ຂາມິ ເຕ ຠິກ຺ຂຸ ມຫານຸຠາວ, ມນຸສ຺ສຠູຕາ ຍມກາສິ ປຸຎ຺ຎໍ;

ເຕນມ຺ຫິ ເອວໍ ຊລິຕານຸຠາວາ, ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ປຐມປຕິພ຺ພຕາວິມານໍ ເອກາທສມໍ.