໑໒. ທຸຕິຍປຕິພ຺ພຕາວິມານວຕ຺ຖຸ

໑໐໑. ‘‘ເວຬຸຣິຍຖມ຺ຠໍ ຣຸຈິຣໍ ປຠສ຺ສຣໍ, ວິມານມາຣຸຍ຺ຫ ອເນກຈິຕ຺ຕໍ;

ຕຕ຺ຖຈ຺ຉສິ ເທວິ ມຫານຸຠາເວ, ອຸຈ຺ຈາວຈາ ອິທ຺ຘິ ວິກຸພ຺ພມານາ;

ອິມາ ຈ ເຕ ອຈ຺ຉຣາໂຍ ສມນ຺ຕໂຕ, ນຈ຺ຈນ຺ຕິ ຄາຍນ຺ຕິ ປໂມທຍນ຺ຕິ ຈ.

໑໐໒. ‘‘ເທວິທ຺ຘິປຕ຺ຕາສິ ມຫານຸຠາເວ, ມນຸສ຺ສຠູຕາ ກິມກາສິ ປຸຎ຺ຎໍ;

ເກນາສິ ເອວໍ ຊລິຕານຸຠາວາ, ວຓ຺ໂຓ ຈ ເຕ ສພ຺ພທິສາ ປຠາສຕີ’’ຕິ.

໑໐໓. ສາ ເທວຕາ ອຕ຺ຕມນາ, ໂມຄ຺ຄລ຺ລາເນນ ປຸຈ຺ຉິຕາ;

ປຎ຺ຫໍ ປຸຏ຺ຐາ ວິຍາກາສິ, ຍສ຺ສ ກມ຺ມສ຺ສິທໍ ຜລໍ.

໑໐໔. ‘‘ອຫໍ ມນຸສ຺ເສສຸ ມນຸສ຺ສຠູຕາ, ອຸປາສິກາ ຈກ຺ຂຸມໂຕ ອໂຫສິໍ;

ປາຓາຕິປາຕາ ວິຣຕາ ອໂຫສິໍ, ໂລເກ ອທິນ຺ນໍ ປຣິວຊ຺ຊຍິສ຺ສໍ.

໑໐໕. ‘‘ອມຊ຺ຊປາ ໂນ ຈ [ນາປິ (ສ຺ຍາ.)] ມຸສາ ອຠາຓິໍ [ອຠາສິໍ (ກ.)], ສເກນ ສາມິນາ [ສາມິນາວ (ສີ.)] ອໂຫສິໍ ຕຸຏ຺ຐາ;

ອນ຺ນຎ຺ຈ ປານຎ຺ຈ ປສນ຺ນຈິຕ຺ຕາ, ສກ຺ກຈ຺ຈ ທານໍ ວິປຸລໍ ອທາສິໍ.

໑໐໖. ‘‘ເຕນ ເມຕາທິໂສ ວຓ຺ໂຓ, ເຕນ ເມ ອິຘ ມິຊ຺ຌຕິ;

ອຸປ຺ປຊ຺ຊນ຺ຕິ ຈ ເມ ໂຠຄາ, ເຍ ເກຈິ ມນໂສ ປິຍາ.

໑໐໗. ‘‘ອກ຺ຂາມິ ເຕ ຠິກ຺ຂຸ ມຫານຸຠາວ, ມນຸສ຺ສຠູຕາ ຍມກາສິ ປຸຎ຺ຎໍ;

ເຕນມ຺ຫິ ເອວໍ ຊລິຕານຸຠາວາ, ວຓ຺ໂຓ ຈ ເມ ສພ຺ພທິສາ ປຠາສຕີ’’ຕິ.

ທຸຕິຍປຕິພ຺ພຕາວິມານໍ ທ຺ວາທສມໍ.