໑໐. ອຸເຕນສຸຕ຺ຕໍ

໗໐. ເອວໍ ເມ ສຸຕໍ – ເອກໍ ສມຍໍ ຠຄວາ ໂກສມ຺ພິຍໍ ວິຫຣຕິ ໂຆສິຕາຣາເມ. ເຕນ ໂຂ ປນ ສມເຍນ ຣຎ຺ໂຎ ອຸເຕນສ຺ສ [ອຸເທນສ຺ສ (ສີ. ສ຺ຍາ. ປີ.)] ອຸຍ຺ຍານຄຕສ຺ສ ອນ຺ເຕປຸຣໍ ທຑ຺ຒໍ ໂຫຕິ, ປຎ຺ຈ ຈ ອິຕ຺ຖິສຕານິ [ປຎ຺ຈ ອິຕ຺ຖິສຕານິ (ສີ. ສ຺ຍາ. ປີ.)] ກາລງ຺ກຕານິ ໂຫນ຺ຕິ ສາມາວຕີປມຸຂານິ.

ອຖ ໂຂ ສມ຺ພຫຸລາ ຠິກ຺ຂູ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ໂກສມ຺ພິໍ ປິຓ຺ຑາຍ ປາວິສິໍສຸ. ໂກສມ຺ພິຍໍ ປິຓ຺ຑາຍ ຈຣິຕ຺ວາ ປຈ຺ຉາຠຕ຺ຕໍ ປິຓ຺ຑປາຕປຏິກ຺ກນ຺ຕາ ເຍນ ຠຄວາ ເຕນຸປສງ຺ກມິໍສຸ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິໍສຸ. ເອກມນ຺ຕໍ ນິສິນ຺ນາ ໂຂ ເຕ ຠິກ຺ຂູ ຠຄວນ຺ຕໍ ເອຕທໂວຈຸໍ – ‘‘ອິຘ, ຠນ຺ເຕ, ຣຎ຺ໂຎ ອຸເຕນສ຺ສ ອຸຍ຺ຍານຄຕສ຺ສ ອນ຺ເຕປຸຣໍ ທຑ຺ຒໍ, ປຎ຺ຈ ຈ ອິຕ຺ຖິສຕານິ ກາລງ຺ກຕານິ ສາມາວຕີປມຸຂານິ. ຕາສໍ, ຠນ຺ເຕ, ອຸປາສິການໍ ກາ ຄຕິ ໂກ ອຠິສມ຺ປຣາໂຍ’’ຕິ?

‘‘ສນ຺ເຕຕ຺ຖ, ຠິກ຺ຂເວ, ອຸປາສິກາໂຍ ໂສຕາປນ຺ນາ, ສນ຺ຕິ ສກທາຄາມິນິໂຍ, ສນ຺ຕິ ອນາຄາມິນິໂຍ. ສພ຺ພາ ຕາ, ຠິກ຺ຂເວ, ອຸປາສິກາໂຍ ອນິປ຺ຜລາ ກາລງ຺ກຕາ’’ຕິ.

ອຖ ໂຂ ຠຄວາ ເອຕມຕ຺ຖໍ ວິທິຕ຺ວາ ຕາຍໍ ເວລາຍໍ ອິມໍ ອຸທານໍ ອຸທາເນສິ –

‘‘ໂມຫສມ຺ພນ຺ຘໂນ ໂລໂກ, ຠພ຺ພຣູໂປວ ທິສ຺ສຕິ;

ອຸປຘິພນ຺ຘໂນ [ອຸປຘິສມ຺ພນ຺ຘໂນ (ກ. ສີ.)] ພາໂລ, ຕມສາ ປຣິວາຣິໂຕ;

ສສ຺ສໂຕຣິວ [ສສ຺ສຕິ ວິຍ (ກ. ສີ.)] ຂາຍຕິ, ປສ຺ສໂຕ ນຕ຺ຖິ ກິຎ຺ຈນ’’ນ຺ຕິ. ທສມໍ;

ຕສ຺ສຸທ຺ທານໍ –

ທ຺ເວ ຠທ຺ທິຍາ ທ຺ເວ ຈ ສຕ຺ຕາ, ລກຸຓ຺ຑໂກ ຕຓ຺ຫາຂໂຍ;

ປປຎ຺ຈຂໂຍ ຈ ກຈ຺ຈາໂນ, ອຸທປານຎ຺ຈ ອຸເຕໂນຕິ.

ຈູຬວຄ຺ໂຄ [ຈຸລ຺ລວຄ຺ໂຄ (ສີ.), ຈູລວຄ຺ໂຄ (ປີ.)] ສຕ຺ຕໂມ ນິຏ຺ຐິໂຕ.