໕. ປຎ຺ຈກນິປາໂຕ

໑. ອຎ຺ຎຕຣາເຖຣີຄາຖາ

໖໗. ‘‘ປຓ຺ຓວີສຕິວສ຺ສານິ, ຍໂຕ ປພ຺ພຊິຕາ ອຫໍ;

ນາຈ຺ຉຣາສງ຺ຆາຕມຕ຺ຕມ຺ປິ, ຈິຕ຺ຕສ຺ສູປສມຊ຺ຌຄໍ.

໖໘. ‘‘ອລທ຺ຘາ ເຈຕໂສ ສນ຺ຕິໍ, ກາມຣາເຄນວສ຺ສຸຕາ;

ພາຫາ ປຄ຺ຄຍ຺ຫ ກນ຺ທນ຺ຕີ, ວິຫາຣໍ ປາວິສິໍ ອຫໍ.

໖໙. ‘‘ສາ ຠິກ຺ຂຸນິໍ ອຸປາຄຈ຺ຉິໍ, ຍາ ເມ ສທ຺ຘາຍິກາ ອຫຸ;

ສາ ເມ ຘມ຺ມມເທເສສິ, ຂນ຺ຘາຍຕນຘາຕຸໂຍ.

໗໐. ‘‘ຕສ຺ສາ ຘມ຺ມໍ ສຸຓິຕ຺ວານ, ເອກມນ຺ເຕ ອຸປາວິສິໍ;

ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ.

໗໑. ‘‘ເຈໂຕປຣິຈ຺ຈຎາຓຎ຺ຈ [ເຈໂຕປຣິຍຎາຓຎ຺ຈ (ກ.)], ໂສຕຘາຕຸ ວິໂສຘິຕາ;

ອິທ຺ຘີປິ ເມ ສຈ຺ຉິກຕາ, ປຕ຺ໂຕ ເມ ອາສວກ຺ຂໂຍ;

ຉຬຠິຎ຺ຎາ [ຉ ເມຠິຎ຺ຎາ (ສ຺ຍາ. ກ.)] ສຈ຺ຉິກຕາ, ກຕໍ ພຸທ຺ຘສ຺ສ ສາສນ’’ນ຺ຕິ.

… ອຎ຺ຎຕຣາ ເຖຣີ ….

໒. ວິມລາເຖຣີຄາຖາ

໗໒. ‘‘ມຕ຺ຕາ ວຓ຺ເຓນ ຣູເປນ, ໂສຠຄ຺ເຄນ ຍເສນ ຈ;

ໂຍພ຺ພເນນ ຈຸປຕ຺ຖທ຺ຘາ, ອຎ຺ຎາສມຕິມຎ຺ຎິຫໍ.

໗໓. ‘‘ວິຠູເສຕ຺ວາ ອິມໍ ກາຍໍ, ສຸຈິຕ຺ຕໍ ພາລລາປນໍ;

ອຏ຺ຐາສິໍ ເວສິທ຺ວາຣມ຺ຫິ, ລຸທ຺ໂທ ປາສມິໂວຑ຺ຑິຍ.

໗໔. ‘‘ປິລນ຺ຘນໍ ວິທໍເສນ຺ຕີ, ຄຸຍ຺ຫໍ ປກາສິກໍ ພຫຸໍ;

ອກາສິໍ ວິວິຘໍ ມາຍໍ, ອຸຊ຺ຊຄ຺ຆນ຺ຕີ ພຫຸໍ ຊນໍ.

໗໕. ‘‘ສາຊ຺ຊ ປິຓ຺ຑໍ ຈຣິຕ຺ວານ, ມຸຓ຺ຑາ ສງ຺ຆາຏິປາຣຸຕາ;

ນິສິນ຺ນາ ຣຸກ຺ຂມູລມ຺ຫິ, ອວິຕກ຺ກສ຺ສ ລາຠິນີ.

໗໖. ‘‘ສພ຺ເພ ໂຍຄາ ສມຸຈ຺ຉິນ຺ນາ, ເຍ ທິພ຺ພາ ເຍ ຈ ມານຸສາ;

ເຂເປຕ຺ວາ ອາສເວ ສພ຺ເພ, ສີຕິຠູຕາມ຺ຫິ ນິພ຺ພຸຕາ’’ຕິ.

… ວິມລາ ປຸຣາຓຄຓິກາ ເຖຣີ….

໓. ສີຫາເຖຣີຄາຖາ

໗໗. ‘‘ອໂຍນິໂສ ມນສິກາຣາ, ກາມຣາເຄນ ອຏ຺ຏິຕາ;

ອໂຫສິໍ ອຸທ຺ຘຕາ ປຸພ຺ເພ, ຈິຕ຺ເຕ ອວສວຕ຺ຕິນີ.

໗໘. ‘‘ປຣິຍຸຏ຺ຐິຕາ ກ຺ເລເສຫິ, ສຸຠສຎ຺ຎານຸວຕ຺ຕິນີ;

ສມໍ ຈິຕ຺ຕສ຺ສ ນ ລຠິໍ, ຣາຄຈິຕ຺ຕວສານຸຄາ.

໗໙. ‘‘ກິສາ ປຓ຺ຑຸ ວິວຓ຺ຓາ ຈ, ສຕ຺ຕ ວສ຺ສານິ ຈາຣິຫໍ;

ນາຫໍ ທິວາ ວາ ຣຕ຺ຕິໍ ວາ, ສຸຂໍ ວິນ຺ທິໍ ສຸທຸກ຺ຂິຕາ.

໘໐. ‘‘ຕໂຕ ຣຊ຺ຊຸໍ ຄເຫຕ຺ວານ, ປາວິສິໍ ວນມນ຺ຕຣໍ;

ວຣໍ ເມ ອິຘ ອຸພ຺ພນ຺ຘໍ, ຍຎ຺ຈ ຫີນໍ ປຸນາຈເຣ.

໘໑. ‘‘ທຬ຺ຫປາສໍ [ທຬ຺ຫໍ ປາສໍ (ສີ.)] ກຣິຕ຺ວານ, ຣຸກ຺ຂສາຂາຍ ພນ຺ຘິຍ;

ປກ຺ຂິປິໍ ປາສໍ ຄີວາຍໍ, ອຖ ຈິຕ຺ຕໍ ວິມຸຈ຺ຈິ ເມ’’ຕິ.

… ສີຫາ ເຖຣີ….

໔. ສຸນ຺ທຣີນນ຺ທາເຖຣີຄາຖາ

໘໒. ‘‘ອາຕຸຣໍ ອສຸຈິໍ ປູຕິໍ, ປສ຺ສ ນນ຺ເທ ສມຸສ຺ສຍໍ;

ອສຸຠາຍ ຈິຕ຺ຕໍ ຠາເວຫິ, ເອກຄ຺ຄໍ ສຸສມາຫິຕໍ.

໘໓. ‘‘ຍຖາ ອິທໍ ຕຖາ ເອຕໍ, ຍຖາ ເອຕໍ ຕຖາ ອິທໍ;

ທຸຄ຺ຄນ຺ຘໍ ປູຕິກໍ ວາຕິ, ພາລານໍ ອຠິນນ຺ທິຕໍ.

໘໔. ‘‘ເອວເມຕໍ ອເວກ຺ຂນ຺ຕີ, ຣຕ຺ຕິນ຺ທິວມຕນ຺ທິຕາ;

ຕໂຕ ສກາຍ ປຎ຺ຎາຍ, ອຠິນິພ຺ພິຊ຺ຌ [ອຠິນິພ຺ພິຊ຺ຊ (ສີ. ສ຺ຍາ.)] ທກ຺ຂິສໍ.

໘໕. ‘‘ຕສ຺ສາ ເມ ອປ຺ປມຕ຺ຕາຍ, ວິຈິນນ຺ຕິຍາ ໂຍນິໂສ;

ຍຖາຠູຕໍ ອຍໍ ກາໂຍ, ທິຏ຺ໂຐ ສນ຺ຕຣພາຫິໂຣ.

໘໖. ‘‘ອຖ ນິພ຺ພິນ຺ທຫໍ ກາເຍ, ອຊ຺ຌຕ຺ຕຎ຺ຈ ວິຣຊ຺ຊຫໍ;

ອປ຺ປມຕ຺ຕາ ວິສໍຍຸຕ຺ຕາ, ອຸປສນ຺ຕາມ຺ຫິ ນິພ຺ພຸຕາ’’ຕິ.

… ສຸນ຺ທຣີນນ຺ທາ ເຖຣີ….

໕. ນນ຺ທຸຕ຺ຕຣາເຖຣີຄາຖາ

໘໗. ‘‘ອຄ຺ຄິໍ ຈນ຺ທຎ຺ຈ ສູຣິຍຎ຺ຈ, ເທວຕາ ຈ ນມສ຺ສິຫໍ;

ນທີຕິຕ຺ຖານິ ຄນ຺ຕ຺ວານ, ອຸທກໍ ໂອຣຸຫາມິຫໍ.

໘໘. ‘‘ພຫູວຕສມາທານາ, ອຑ຺ຒໍ ສີສສ຺ສ ໂອລິຂິໍ;

ຉມາຍ ເສຍ຺ຍໍ ກປ຺ເປມິ, ຣຕ຺ຕິໍ ຠຕ຺ຕໍ ນ ຠຸຎ຺ຊຫໍ.

໘໙. ‘‘ວິຠູສາມຓ຺ຑນຣຕາ, ນ຺ຫາປນຸຈ຺ຉາທເນຫິ ຈ;

ອຸປກາສິໍ ອິມໍ ກາຍໍ, ກາມຣາເຄນ ອຏ຺ຏິຕາ.

໙໐. ‘‘ຕໂຕ ສທ຺ຘໍ ລຠິຕ຺ວານ, ປພ຺ພຊິໍ ອນຄາຣິຍໍ;

ທິສ຺ວາ ກາຍໍ ຍຖາຠູຕໍ, ກາມຣາໂຄ ສມູຫໂຕ.

໙໑. ‘‘ສພ຺ເພ ຠວາ ສມຸຈ຺ຉິນ຺ນາ, ອິຈ຺ຉາ ຈ ປຕ຺ຖນາປິ ຈ;

ສພ຺ພໂຍຄວິສໍຍຸຕ຺ຕາ, ສນ຺ຕິໍ ປາປຸຓິ ເຈຕໂສ’’ຕິ.

… ນນ຺ທຸຕ຺ຕຣາ ເຖຣີ….

໖. ມິຕ຺ຕາກາຬີເຖຣີຄາຖາ

໙໒. ‘‘ສທ຺ຘາຍ ປພ຺ພຊິຕ຺ວານ, ອຄາຣສ຺ມານຄາຣິຍໍ;

ວິຈຣິໍຫໍ ເຕນ ເຕນ, ລາຠສກ຺ກາຣອຸສ຺ສຸກາ.

໙໓. ‘‘ຣິຎ຺ຈິຕ຺ວາ ປຣມໍ ອຕ຺ຖໍ, ຫີນມຕ຺ຖໍ ອເສວິຫໍ;

ກິເລສານໍ ວສໍ ຄນ຺ຕ຺ວາ, ສາມຎ຺ຎຕ຺ຖໍ ນ ພຸຊ຺ຌິຫໍ.

໙໔. ‘‘ຕສ຺ສາ ເມ ອຫຸ ສໍເວໂຄ, ນິສິນ຺ນາຍ ວິຫາຣເກ;

ອຸມ຺ມຄ຺ຄປຏິປນ຺ນາມ຺ຫິ, ຕຓ຺ຫາຍ ວສມາຄຕາ.

໙໕. ‘‘ອປ຺ປກໍ ຊີວິຕໍ ມຍ຺ຫໍ, ຊຣາ ພ຺ຍາຘິ ຈ ມທ຺ທຕິ;

ປຸຣາຍໍ ຠິຊ຺ຊຕິ [ຊຣາຍ ຠິຊ຺ຊເຕ (ສີ.)] ກາໂຍ, ນ ເມ ກາໂລ ປມຊ຺ຊິຕຸໍ.

໙໖. ‘‘ຍຖາຠູຕມເວກ຺ຂນ຺ຕີ, ຂນ຺ຘານໍ ອຸທຍພ຺ພຍໍ;

ວິມຸຕ຺ຕຈິຕ຺ຕາ ອຸຏ຺ຐາສິໍ, ກຕໍ ພຸທ຺ຘສ຺ສ ສາສນ’’ນ຺ຕິ.

… ມິຕ຺ຕາ ກາຬີ ເຖຣີ….

໗. ສກຸລາເຖຣີຄາຖາ

໙໗. ‘‘ອຄາຣສ຺ມິໍ ວສນ຺ຕີຫໍ, ຘມ຺ມໍ ສຸຕ຺ວານ ຠິກ຺ຂຸໂນ;

ອທ຺ທສໍ ວິຣຊໍ ຘມ຺ມໍ, ນິພ຺ພານໍ ປທມຈ຺ຈຸຕໍ.

໙໘. ‘‘ສາຫໍ ປຸຕ຺ຕໍ ຘີຕຣຎ຺ຈ, ຘນຘຎ຺ຎຎ຺ຈ ຉຑ຺ຑິຍ;

ເກເສ ເຉທາປຍິຕ຺ວານ, ປພ຺ພຊິໍ ອນຄາຣິຍໍ.

໙໙. ‘‘ສິກ຺ຂມານາ ອຫໍ ສນ຺ຕີ, ຠາເວນ຺ຕີ ມຄ຺ຄມຎ຺ຊສໍ;

ປຫາສິໍ ຣາຄໂທສຎ຺ຈ, ຕເທກຏ຺ເຐ ຈ ອາສເວ.

໑໐໐. ‘‘ຠິກ຺ຂຸນີ ອຸປສມ຺ປຊ຺ຊ, ປຸພ຺ພຊາຕິມນຸສ຺ສຣິໍ;

ທິພ຺ພຈກ຺ຂຸ ວິໂສຘິຕໍ [ວິໂສຘິຕໍ ທິພ຺ພຈກ຺ຂຸ (ສີ.)], ວິມລໍ ສາຘຸຠາວິຕໍ.

໑໐໑. ‘‘ສງ຺ຂາເຣ ປຣໂຕ ທິສ຺ວາ, ເຫຕຸຊາເຕ ປໂລກິເຕ [ປໂລກິເນ (ກ.)];

ປຫາສິໍ ອາສເວ ສພ຺ເພ, ສີຕິຠູຕາມ຺ຫິ ນິພ຺ພຸຕາ’’ຕິ.

… ສກຸລາ ເຖຣີ….

໘. ໂສຓາເຖຣີຄາຖາ

໑໐໒. ‘‘ທສ ປຸຕ຺ເຕ ວິຊາຍິຕ຺ວາ, ອສ຺ມິໍ ຣູປສມຸສ຺ສເຍ;

ຕໂຕຫໍ ທຸພ຺ພລາ ຊິຓ຺ຓາ, ຠິກ຺ຂຸນິໍ ອຸປສງ຺ກມິໍ.

໑໐໓. ‘‘ສາ ເມ ຘມ຺ມມເທເສສິ, ຂນ຺ຘາຍຕນຘາຕຸໂຍ;

ຕສ຺ສາ ຘມ຺ມໍ ສຸຓິຕ຺ວານ, ເກເສ ເຉຕ຺ວານ ປພ຺ພຊິໍ.

໑໐໔. ‘‘ຕສ຺ສາ ເມ ສິກ຺ຂມານາຍ, ທິພ຺ພຈກ຺ຂຸ ວິໂສຘິຕໍ;

ປຸພ຺ເພນິວາສໍ ຊານາມິ, ຍຕ຺ຖ ເມ ວຸສິຕໍ ປຸເຣ.

໑໐໕. ‘‘ອນິມິຕ຺ຕຎ຺ຈ ຠາເວມິ, ເອກຄ຺ຄາ ສຸສມາຫິຕາ;

ອນນ຺ຕຣາວິໂມກ຺ຂາສິໍ, ອນຸປາທາຍ ນິພ຺ພຸຕາ.

໑໐໖. ‘‘ປຎ຺ຈກ຺ຂນ຺ຘາ ປຣິຎ຺ຎາຕາ, ຕິຏ຺ຐນ຺ຕິ ຉິນ຺ນມູລກາ;

ຘິ ຕວຕ຺ຖຸ ຊເຣ ຊມ຺ເມ, ນຕ຺ຖິ ທານິ ປຸນພ຺ຠໂວ’’ຕິ.

… ໂສຓາ ເຖຣີ….

໙. ຠທ຺ທາກຸຓ຺ຑລເກສາເຖຣີຄາຖາ

໑໐໗. ‘‘ລູນເກສີ ປງ຺ກຘຣີ, ເອກສາຏີ ປຸເຣ ຈຣິໍ;

ອວຊ຺ເຊ ວຊ຺ຊມຕິນີ, ວຊ຺ເຊ ຈາວຊ຺ຊທສ຺ສິນີ.

໑໐໘. ‘‘ທິວາວິຫາຣາ ນິກ຺ຂມ຺ມ, ຄິຊ຺ຌກູຏມ຺ຫິ ປພ຺ພເຕ;

ອທ຺ທສໍ ວິຣຊໍ ພຸທ຺ຘໍ, ຠິກ຺ຂຸສງ຺ຆປຸຣກ຺ຂຕໍ.

໑໐໙. ‘‘ນິຫຈ຺ຈ ຊາຓຸໍ ວນ຺ທິຕ຺ວາ, ສມ຺ມຸຂາ ອຎ຺ຊລິໍ ອກໍ;

‘ເອຫິ ຠທ຺ເທ’ຕິ ມໍ ອວຈ, ສາ ເມ ອາສູປສມ຺ປທາ.

໑໑໐. ‘‘ຈິຓ຺ຓາ ອງ຺ຄາ ຈ ມຄຘາ, ວຊ຺ຊີ ກາສີ ຈ ໂກສລາ;

ອນຓາ ປຓ຺ຓາສວສ຺ສານິ, ຣຏ຺ຐປິຓ຺ຑໍ ອຠຸຎ຺ຊຫໍ.

໑໑໑. ‘‘ປຸຎ຺ຎໍ ວຕ ປສວິ ພຫຸໍ, ສປ຺ປຎ຺ໂຎ ວຕາຍໍ ອຸປາສໂກ;

ໂຍ ຠທ຺ທາຍ ຈີວຣໍ ອທາສິ, ວິປ຺ປມຸຕ຺ຕາຍ ສພ຺ພຄນ຺ເຖຫີ’’ຕິ.

… ຠທ຺ທາ ກຸຓ຺ຑລເກສາ ເຖຣີ….

໑໐. ປຏາຈາຣາເຖຣີຄາຖາ

໑໑໒. ‘‘ນງ຺ຄເລຫິ ກສໍ ເຂຕ຺ຕໍ, ພີຊານິ ປວປໍ ຉມາ;

ປຸຕ຺ຕທາຣານິ ໂປເສນ຺ຕາ, ຘນໍ ວິນ຺ທນ຺ຕິ ມາຓວາ.

໑໑໓. ‘‘ກິມຫໍ ສີລສມ຺ປນ຺ນາ, ສຕ຺ຖຸສາສນກາຣິກາ;

ນິພ຺ພານໍ ນາຘິຄຈ຺ຉາມິ, ອກຸສີຕາ ອນຸທ຺ຘຕາ.

໑໑໔. ‘‘ປາເທ ປກ຺ຂາລຍິຕ຺ວານ, ອຸທເກສຸ ກໂຣມຫໍ;

ປາໂທທກຎ຺ຈ ທິສ຺ວານ, ຖລໂຕ ນິນ຺ນມາຄຕໍ.

໑໑໕. ‘‘ຕໂຕ ຈິຕ຺ຕໍ ສມາເຘສິໍ, ອສ຺ສໍ ຠທ຺ຣໍວຊານິຍໍ;

ຕໂຕ ທີປໍ ຄເຫຕ຺ວານ, ວິຫາຣໍ ປາວິສິໍ ອຫໍ;

ເສຍ຺ຍໍ ໂອໂລກຍິຕ຺ວານ, ມຎ຺ຈກມ຺ຫິ ອຸປາວິສິໍ.

໑໑໖. ‘‘ຕໂຕ ສູຈິໍ ຄເຫຕ຺ວານ, ວຏ຺ຏິໍ ໂອກສ຺ສຍາມຫໍ;

ປທີປສ຺ເສວ ນິພ຺ພານໍ, ວິໂມກ຺ໂຂ ອຫຸ ເຈຕໂສ’’ຕິ.

… ປຏາຈາຣາ ເຖຣີ….

໑໑. ຕິໍສມຕ຺ຕາເຖຣີຄາຖາ

໑໑໗. ‘‘‘ມຸສລານິ ຄເຫຕ຺ວານ, ຘຎ຺ຎໍ ໂກຏ຺ເຏນ຺ຕິ ມາຓວາ [ມານວາ (ສີ.)];

ປຸຕ຺ຕທາຣານິ ໂປເສນ຺ຕາ, ຘນໍ ວິນ຺ທນ຺ຕິ ມາຓວາ.

໑໑໘. ‘‘‘ກໂຣຖ ພຸທ຺ຘສາສນໍ, ຍໍ ກຕ຺ວາ ນານຸຕປ຺ປຕິ;

ຂິປ຺ປໍ ປາທານິ ໂຘວິຕ຺ວາ, ເອກມນ຺ເຕ ນິສີທຖ;

ເຈໂຕສມຖມນຸຍຸຕ຺ຕາ, ກໂຣຖ ພຸທ຺ຘສາສນໍ’.

໑໑໙. ‘‘ຕສ຺ສາ ຕາ [ຕໍ (ສີ.)] ວຈນໍ ສຸຕ຺ວາ, ປຏາຈາຣາຍ ສາສນໍ;

ປາເທ ປກ຺ຂາລຍິຕ຺ວານ, ເອກມນ຺ຕໍ ອຸປາວິສຸໍ;

ເຈໂຕສມຖມນຸຍຸຕ຺ຕາ, ອກໍສຸ ພຸທ຺ຘສາສນໍ.

໑໒໐. ‘‘ຣຕ຺ຕິຍາ ປຸຣິເມ ຍາເມ, ປຸພ຺ພຊາຕິມນຸສ຺ສຣຸໍ;

ຣຕ຺ຕິຍາ ມຊ຺ຌິເມ ຍາເມ, ທິພ຺ພຈກ຺ຂຸໍ ວິໂສຘຍຸໍ;

ຣຕ຺ຕິຍາ ປຈ຺ຉິເມ ຍາເມ, ຕໂມຂນ຺ຘໍ ປທາລຍຸໍ.

໑໒໑. ‘‘ອຸຏ຺ຐາຍ ປາເທ ວນ຺ທິໍສຸ, ‘ກຕາ ເຕ ອນຸສາສນີ;

ອິນ຺ທໍວ ເທວາ ຕິທສາ, ສງ຺ຄາເມ ອປຣາຊິຕໍ;

ປຸຣກ຺ຂຕ຺ວາ ວິຫສ຺ສາມ [ວິຫຣາມ (ສີ.), ວິຫຣິສ຺ສາມ (ສ຺ຍາ.)], ເຕວິຊ຺ຊາມ຺ຫ ອນາສວາ’’’ຕິ.

ອິຕ຺ຖໍ ສຸທໍ ຕິໍສມຕ຺ຕາ ເຖຣີ ຠິກ຺ຂຸນິໂຍ ປຏາຈາຣາຍ ສນ຺ຕິເກ ອຎ຺ຎໍ ພ຺ຍາກຣິໍສູຕິ.

໑໒. ຈນ຺ທາເຖຣີຄາຖາ

໑໒໒. ‘‘ທຸຄ຺ຄຕາຫໍ ປຸເຣ ອາສິໍ, ວິຘວາ ຈ ອປຸຕ຺ຕິກາ;

ວິນາ ມິຕ຺ເຕຫິ ຎາຕີຫິ, ຠຕ຺ຕໂຈຬສ຺ສ ນາຘິຄໍ.

໑໒໓. ‘‘ປຕ຺ຕໍ ທຓ຺ຑຎ຺ຈ ຄຓ຺ຫິຕ຺ວາ, ຠິກ຺ຂມານາ ກຸລາ ກຸລໍ;

ສີຕຸຓ຺ເຫນ ຈ ຑຍ຺ຫນ຺ຕີ, ສຕ຺ຕ ວສ຺ສານິ ຈາຣິຫໍ.

໑໒໔. ‘‘ຠິກ຺ຂຸນິໍ ປຸນ ທິສ຺ວານ, ອນ຺ນປານສ຺ສ ລາຠິນິໍ;

ອຸປສງ຺ກມ຺ມ ອໂວຈໍ [ອໂວຈິໍ (ກ.)], ‘ປພ຺ພຊ຺ຊໍ ອນຄາຣິຍໍ’.

໑໒໕. ‘‘ສາ ຈ ມໍ ອນຸກມ຺ປາຍ, ປພ຺ພາເຊສິ ປຏາຈາຣາ;

ຕໂຕ ມໍ ໂອວທິຕ຺ວານ, ປຣມຕ຺ເຖ ນິໂຍຊຍິ.

໑໒໖. ‘‘ຕສ຺ສາຫໍ ວຈນໍ ສຸຕ຺ວາ, ອກາສິໍ ອນຸສາສນິໍ;

ອໂມໂຆ ອຍ຺ຍາໂຍວາໂທ, ເຕວິຊ຺ຊາມ຺ຫິ ອນາສວາ’’ຕິ.