໖. ຉກ຺ກນິປາໂຕ

໑. ປຎ຺ຈສຕມຕ຺ຕາເຖຣີຄາຖາ

໑໒໗. ‘‘ຍສ຺ສ ມຄ຺ຄໍ ນ ຊານາສິ, ອາຄຕສ຺ສ ຄຕສ຺ສ ວາ;

ຕໍ ກຸໂຕ ຈາຄຕໍ ສຕ຺ຕໍ [ສນ຺ຕໍ (ສີ.), ປຸຕ຺ຕໍ (ສ຺ຍາ.)], ‘ມມ ປຸຕ຺ໂຕ’ຕິ ໂຣທສິ.

໑໒໘. ‘‘ມຄ຺ຄຎ຺ຈ ໂຂສ຺ສ [ໂຂ’ຖ (ສ຺ຍາ. ກ.)] ຊານາສິ, ອາຄຕສ຺ສ ຄຕສ຺ສ ວາ;

ນ ນໍ ສມນຸໂສເຈສິ, ເອວໍຘມ຺ມາ ຫິ ປາຓິໂນ.

໑໒໙. ‘‘ອຍາຈິໂຕ ຕຕາຄຈ຺ຉິ, ນານຸຎ຺ຎາໂຕ [ອນນຸຎ຺ຎາໂຕ (ສີ. ສ຺ຍາ.)] ອິໂຕ ຄໂຕ;

ກຸໂຕຈິ ນູນ ອາຄນ຺ຕ຺ວາ, ວສິຕ຺ວາ ກຕິປາຫກໍ;

ອິໂຕປິ ອຎ຺ເຎນ ຄໂຕ, ຕໂຕປຎ຺ເຎນ ຄຈ຺ຉຕິ.

໑໓໐. ‘‘ເປໂຕ ມນຸສ຺ສຣູເປນ, ສໍສຣນ຺ໂຕ ຄມິສ຺ສຕິ;

ຍຖາຄໂຕ ຕຖາ ຄໂຕ, ກາ ຕຕ຺ຖ ປຣິເທວນາ’’.

໑໓໑. ‘‘ອພ຺ພຫີ [ອພ຺ພຸຍ຺ຫໍ (ສ຺ຍາ.)] ວຕ ເມ ສລ຺ລໍ, ທຸທ຺ທສໍ ຫທຍສ຺ສິຕໍ;

ຍາ ເມ ໂສກປເຣຕາຍ, ປຸຕ຺ຕໂສກໍ ພ຺ຍປານຸທິ.

໑໓໒. ‘‘ສາຊ຺ຊ ອພ຺ພູຬ຺ຫສລ຺ລາຫໍ, ນິຈ຺ຉາຕາ ປຣິນິພ຺ພຸຕາ;

ພຸທ຺ຘໍ ຘມ຺ມຎ຺ຈ ສງ຺ຆຎ຺ຈ, ອຸເປມິ ສຣຓໍ ມຸນິໍ’’.

ອິຕ຺ຖໍ ສຸທໍ ປຎ຺ຈສຕມຕ຺ຕາ ເຖຣີ ຠິກ຺ຂຸນິໂຍ…ເປ….

໒. ວາເສຏ຺ຐີເຖຣີຄາຖາ

໑໓໓. ‘‘ປຸຕ຺ຕໂສເກນຫໍ ອຏ຺ຏາ, ຂິຕ຺ຕຈິຕ຺ຕາ ວິສຎ຺ຎິນີ;

ນຄ຺ຄາ ປກິຓ຺ຓເກສີ ຈ, ເຕນ ເຕນ ວິຈາຣິຫໍ.

໑໓໔. ‘‘ວີຖິ [ວສິໍ (ສີ.)] ສງ຺ກາຣກູເຏສຸ, ສຸສາເນ ຣຖິຍາສຸ ຈ;

ອຈຣິໍ ຕີຓິ ວສ຺ສານິ, ຂຸປ຺ປິປາສາສມປ຺ປິຕາ.

໑໓໕. ‘‘ອຖທ຺ທສາສິໍ ສຸຄຕໍ, ນຄຣໍ ມິຖິລໍ ປຕິ [ຄຕໍ (ກ.)];

ອທນ຺ຕານໍ ທເມຕາຣໍ, ສມ຺ພຸທ຺ຘມກຸໂຕຠຍໍ.

໑໓໖. ‘‘ສຈິຕ຺ຕໍ ປຏິລທ຺ຘານ, ວນ຺ທິຕ຺ວານ ອຸປາວິສິໍ;

ໂສ ເມ ຘມ຺ມມເທເສສິ, ອນຸກມ຺ປາຍ ໂຄຕໂມ.

໑໓໗. ‘‘ຕສ຺ສ ຘມ຺ມໍ ສຸຓິຕ຺ວານ, ປພ຺ພຊິໍ ອນຄາຣິຍໍ;

ຍຸຎ຺ຊນ຺ຕີ ສຕ຺ຖຸວຈເນ, ສຈ຺ຉາກາສິໍ ປທໍ ສິວໍ.

໑໓໘. ‘‘ສພ຺ເພ ໂສກາ ສມຸຈ຺ຉິນ຺ນາ, ປຫີນາ ເອຕທນ຺ຕິກາ;

ປຣິຎ຺ຎາຕາ ຫິ ເມ ວຕ຺ຖູ, ຍໂຕ ໂສການ ສມ຺ຠໂວ’’ຕິ.

… ວາເສຏ຺ຐີ ເຖຣີ….

໓. ເຂມາເຖຣີຄາຖາ

໑໓໙. ‘‘ທຫຣາ ຕ຺ວໍ ຣູປວຕີ, ອຫມ຺ປິ ທຫໂຣ ຍຸວາ;

ປຎ຺ຈງ຺ຄິເກນ ຕຸຣິເຍນ [ຕູເຣນ (ກ.)], ເອຫິ ເຂເມ ຣມາມເສ’’.

໑໔໐. ‘‘ອິມິນາ ປູຕິກາເຍນ, ອາຕຸເຣນ ປຠງ຺ຄຸນາ;

ອຏ຺ຏິຍາມິ ຫຣາຍາມິ, ກາມຕຓ຺ຫາ ສມູຫຕາ.

໑໔໑. ‘‘ສຕ຺ຕິສູລູປມາ ກາມາ, ຂນ຺ຘາສໍ ອຘິກຸຏ຺ຏນາ;

ຍໍ ‘ຕ຺ວໍ ກາມຣຕິໍ’ ພ຺ຣູສິ, ‘ອຣຕີ’ ທານິ ສາ ມມ.

໑໔໒. ‘‘ສພ຺ພຕ຺ຖ ວິຫຕາ ນນ຺ທີ, ຕໂມຂນ຺ໂຘ ປທາລິໂຕ;

ເອວໍ ຊານາຫິ ປາປິມ, ນິຫໂຕ ຕ຺ວມສິ ອນ຺ຕກ.

໑໔໓. ‘‘ນກ຺ຂຕ຺ຕານິ ນມສ຺ສນ຺ຕາ, ອຄ຺ຄິໍ ປຣິຈຣໍ ວເນ;

ຍຖາຠຸຈ຺ຈມຊານນ຺ຕາ, ພາລາ ສຸທ຺ຘິມມຎ຺ຎຖ.

໑໔໔. ‘‘ອຫຎ຺ຈ ໂຂ ນມສ຺ສນ຺ຕີ, ສມ຺ພຸທ຺ຘໍ ປຸຣິສຸຕ຺ຕມໍ;

ປມຸຕ຺ຕາ [ປຣິມຸຕ຺ຕາ (ສີ. ສ຺ຍາ.)] ສພ຺ພທຸກ຺ເຂຫິ, ສຕ຺ຖຸສາສນກາຣິກາ’’ຕິ.

… ເຂມາ ເຖຣີ….

໔. ສຸຊາຕາເຖຣີຄາຖາ

໑໔໕. ‘‘ອລງ຺ກຕາ ສຸວສນາ, ມາລິນີ ຈນ຺ທໂນກ຺ຂິຕາ;

ສພ຺ພາຠຣຓສຎ຺ຉນ຺ນາ, ທາສີຄຓປຸຣກ຺ຂຕາ.

໑໔໖. ‘‘ອນ຺ນໍ ປານຎ຺ຈ ອາທາຍ, ຂຊ຺ຊໍ ໂຠຊ຺ຊໍ ອນປ຺ປກໍ;

ເຄຫໂຕ ນິກ຺ຂມິຕ຺ວານ, ອຸຍ຺ຍານມຠິຫາຣຍິໍ.

໑໔໗. ‘‘ຕຕ຺ຖ ຣມິຕ຺ວາ ກີຬິຕ຺ວາ, ອາຄຈ຺ຉນ຺ຕີ ສກໍ ຆຣໍ;

ວິຫາຣໍ ທຏ຺ຐຸໍ ປາວິສິໍ, ສາເກເຕ ອຎ຺ຊນໍ ວນໍ.

໑໔໘. ‘‘ທິສ຺ວານ ໂລກປຊ຺ໂຊຕໍ, ວນ຺ທິຕ຺ວານ ອຸປາວິສິໍ;

ໂສ ເມ ຘມ຺ມມເທເສສິ, ອນຸກມ຺ປາຍ ຈກ຺ຂຸມາ.

໑໔໙. ‘‘ສຸຕ຺ວາ ຈ ໂຂ ມເຫສິສ຺ສ, ສຈ຺ຈໍ ສມ຺ປຏິວິຊ຺ຌຫໍ;

ຕຕ຺ເຖວ ວິຣຊໍ ຘມ຺ມໍ, ຜຸສຍິໍ ອມຕໍ ປທໍ.

໑໕໐. ‘‘ຕໂຕ ວິຎ຺ຎາຕສທ຺ຘມ຺ມາ, ປພ຺ພຊິໍ ອນຄາຣິຍໍ;

ຕິສ຺ໂສ ວິຊ຺ຊາ ອນຸປ຺ປຕ຺ຕາ, ອໂມຆໍ ພຸທ຺ຘສາສນ’’ນ຺ຕິ.

… ສຸຊາຕາ ເຖຣີ….

໕. ອໂນປມາເຖຣີຄາຖາ

໑໕໑. ‘‘ອຸຈ຺ເຈ ກຸເລ ອຫໍ ຊາຕາ, ພຫຸວິຕ຺ເຕ ມຫທ຺ຘເນ;

ວຓ຺ຓຣູເປນ ສມ຺ປນ຺ນາ, ຘີຕາ ມຊ຺ຌສ຺ສ [ເມຆສ຺ສ (ສີ.), ເມຆິສ຺ສ (ສ຺ຍາ.)] ອຕ຺ຣຊາ.

໑໕໒. ‘‘ປຕ຺ຖິຕາ ຣາຊປຸຕ຺ເຕຫິ, ເສຏ຺ຐິປຸຕ຺ເຕຫິ ຄິຊ຺ຌິຕາ [ເສຏ຺ຐິປຸຕ຺ເຕຫິ ຠິຊ຺ຌິຕາ (ສີ.)];

ປິຕຸ ເມ ເປສຍີ ທູຕໍ, ເທຖ ມຍ຺ຫໍ ອໂນປມໍ.

໑໕໓. ‘‘ຍຕ຺ຕກໍ ຕຸລິຕາ ເອສາ, ຕຸຍ຺ຫໍ ຘີຕາ ອໂນປມາ;

ຕໂຕ ອຏ຺ຐຄຸຓໍ ທສ຺ສໍ, ຫິຣຎ຺ຎໍ ຣຕນານິ ຈ.

໑໕໔. ‘‘ສາຫໍ ທິສ຺ວານ ສມ຺ພຸທ຺ຘໍ, ໂລກເຊຏ຺ຐໍ ອນຸຕ຺ຕຣໍ;

ຕສ຺ສ ປາທານິ ວນ຺ທິຕ຺ວາ, ເອກມນ຺ຕໍ ອຸປາວິສິໍ.

໑໕໕. ‘‘ໂສ ເມ ຘມ຺ມມເທເສສິ, ອນຸກມ຺ປາຍ ໂຄຕໂມ;

ນິສິນ຺ນາ ອາສເນ ຕສ຺ມິໍ, ຜຸສຍິໍ ຕຕິຍໍ ຜລໍ.

໑໕໖. ‘‘ຕໂຕ ເກສານິ ເຉຕ຺ວານ, ປພ຺ພຊິໍ ອນຄາຣິຍໍ;

ອຊ຺ຊ ເມ ສຕ຺ຕມີ ຣຕ຺ຕິ, ຍໂຕ ຕຓ຺ຫາ ວິໂສສິຕາ’’ຕິ.

… ອໂນປມາ ເຖຣີ….

໖. ມຫາປຊາປຕິໂຄຕມີເຖຣີຄາຖາ

໑໕໗. ‘‘ພຸທ຺ຘ ວີຣ ນໂມ ຕ຺ຍຕ຺ຖຸ, ສພ຺ພສຕ຺ຕານມຸຕ຺ຕມ;

ໂຍ ມໍ ທຸກ຺ຂາ ປໂມເຈສິ, ອຎ຺ຎຎ຺ຈ ພຫຸກໍ ຊນໍ.

໑໕໘. ‘‘ສພ຺ພທຸກ຺ຂໍ ປຣິຎ຺ຎາຕໍ, ເຫຕຸຕຓ຺ຫາ ວິໂສສິຕາ;

ຠາວິໂຕ ອຏ຺ຐງ຺ຄິໂກ [ອຣິຍຏ຺ຐງ຺ຄິໂກ (ສີ. ກ.), ຠາວິຕຏ຺ຐງ຺ຄິໂກ (ສ຺ຍາ.)] ມຄ຺ໂຄ, ນິໂຣໂຘ ຜຸສິໂຕ ມຍາ.

໑໕໙. ‘‘ມາຕາ ປຸຕ຺ໂຕ ປິຕາ ຠາຕາ, ອຍ຺ຍກາ ຈ ປຸເຣ ອຫຸໍ;

ຍຖາຠຸຈ຺ຈມຊານນ຺ຕີ, ສໍສຣິໍຫໍ ອນິພ຺ພິສໍ.

໑໖໐. ‘‘ທິຏ຺ໂຐ ຫິ ເມ ໂສ ຠຄວາ, ອນ຺ຕິໂມຍໍ ສມຸສ຺ສໂຍ;

ວິກ຺ຂີໂຓ ຊາຕິສໍສາໂຣ, ນຕ຺ຖິ ທານິ ປຸນພ຺ຠໂວ.

໑໖໑. ‘‘ອາຣທ຺ຘວີຣິເຍ ປຫິຕຕ຺ເຕ, ນິຈ຺ຈໍ ທຬ຺ຫປຣກ຺ກເມ;

ສມຄ຺ເຄ ສາວເກ ປສ຺ເສ, ເອສາ ພຸທ຺ຘານ ວນ຺ທນາ.

໑໖໒. ‘‘ພຫູນໍ [ພຫຸນ຺ນໍ (ສີ. ສ຺ຍາ.)] ວຕ ອຕ຺ຖາຍ, ມາຍາ ຊນຍິ ໂຄຕມໍ;

ພ຺ຍາຘິມຣຓຕຸນ຺ນານໍ, ທຸກ຺ຂກ຺ຂນ຺ຘໍ ພ຺ຍປານຸທີ’’ຕິ.

… ມຫາປຊາປຕິໂຄຕມີ ເຖຣີ….

໗. ຄຸຕ຺ຕາເຖຣີຄາຖາ

໑໖໓. ‘‘ຄຸຕ຺ເຕ ຍທຕ຺ຖໍ ປພ຺ພຊ຺ຊາ, ຫິຕ຺ວາ ປຸຕ຺ຕໍ ວສຸໍ ປິຍໍ;

ຕເມວ ອນຸພ຺ຣູເຫຫິ, ມາ ຈິຕ຺ຕສ຺ສ ວສໍ ຄມິ.

໑໖໔. ‘‘ຈິຕ຺ເຕນ ວຎ຺ຈິຕາ ສຕ຺ຕາ, ມາຣສ຺ສ ວິສເຍ ຣຕາ;

ອເນກຊາຕິສໍສາຣໍ, ສນ຺ຘາວນ຺ຕິ ອວິທ຺ທສູ.

໑໖໕. ‘‘ກາມຈ຺ຉນ຺ທຎ຺ຈ ພ຺ຍາປາທໍ, ສກ຺ກາຍທິຏ຺ຐິເມວ ຈ;

ສີລພ຺ພຕປຣາມາສໍ, ວິຈິກິຈ຺ຉຎ຺ຈ ປຎ຺ຈມໍ.

໑໖໖. ‘‘ສໍໂຍຊນານິ ເອຕານິ, ປຊຫິຕ຺ວານ ຠິກ຺ຂຸນີ;

ໂອຣມ຺ຠາຄມນີຍານິ, ນຍິທໍ ປຸນເຣຫິສິ.

໑໖໗. ‘‘ຣາຄໍ ມານໍ ອວິຊ຺ຊຎ຺ຈ, ອຸທ຺ຘຈ຺ຈຎ຺ຈ ວິວຊ຺ຊິຍ;

ສໍໂຍຊນານິ ເຉຕ຺ວານ, ທຸກ຺ຂສ຺ສນ຺ຕໍ ກຣິສ຺ສສິ.

໑໖໘. ‘‘ເຂເປຕ຺ວາ ຊາຕິສໍສາຣໍ, ປຣິຎ຺ຎາຍ ປຸນພ຺ຠວໍ;

ທິຏ຺ເຐວ ຘມ຺ເມ ນິຈ຺ຉາຕາ, ອຸປສນ຺ຕາ ຈຣິສ຺ສຕີ’’ຕິ.

… ຄຸຕ຺ຕາ ເຖຣີ….

໘. ວິຊຍາເຖຣີຄາຖາ

໑໖໙. ‘‘ຈຕຸກ຺ຂຕ຺ຕຸໍ ປຎ຺ຈກ຺ຂຕ຺ຕຸໍ, ວິຫາຣາ ອຸປນິກ຺ຂມິໍ;

ອລທ຺ຘາ ເຈຕໂສ ສນ຺ຕິໍ, ຈິຕ຺ເຕ ອວສວຕ຺ຕິນີ.

໑໗໐. ‘‘ຠິກ຺ຂຸນິໍ ອຸປສງ຺ກມ຺ມ, ສກ຺ກຈ຺ຈໍ ປຣິປຸຈ຺ຉຫໍ;

ສາ ເມ ຘມ຺ມມເທເສສິ, ຘາຕຸອາຍຕນານິ ຈ.

໑໗໑. ‘‘ຈຕ຺ຕາຣິ ອຣິຍສຈ຺ຈານິ, ອິນ຺ທ຺ຣິຍານິ ພລານິ ຈ;

ໂພຊ຺ຌງ຺ຄຏ຺ຐງ຺ຄິກໍ ມຄ຺ຄໍ, ອຸຕ຺ຕມຕ຺ຖສ຺ສ ປຕ຺ຕິຍາ.

໑໗໒. ‘‘ຕສ຺ສາຫໍ ວຈນໍ ສຸຕ຺ວາ, ກໂຣນ຺ຕີ ອນຸສາສນິໍ;

ຣຕ຺ຕິຍາ ປຸຣິເມ ຍາເມ, ປຸພ຺ພຊາຕິມນຸສ຺ສຣິໍ.

໑໗໓. ‘‘ຣຕ຺ຕິຍາ ມຊ຺ຌິເມ ຍາເມ, ທິພ຺ພຈກ຺ຂຸໍ ວິໂສຘຍິໍ;

ຣຕ຺ຕິຍາ ປຈ຺ຉິເມ ຍາເມ, ຕໂມຂນ຺ຘໍ ປທາລຍິໍ.

໑໗໔. ‘‘ປີຕິສຸເຂນ ຈ ກາຍໍ, ຜຣິຕ຺ວາ ວິຫຣິໍ ຕທາ;

ສຕ຺ຕມິຍາ ປາເທ ປສາເຣສິໍ, ຕໂມຂນ຺ຘໍ ປທາລິຍາ’’ຕິ.

… ວິຊຍາ ເຖຣີ….

ຉກ຺ກນິປາໂຕ ນິຏ຺ຐິໂຕ.