໑໖. ມຫານິປາໂຕ

໑. ສຸເມຘາເຖຣີຄາຖາ

໔໕໐. ມນ຺ຕາວຕິຍາ ນຄເຣ, ຣຎ຺ໂຎ ໂກຎ຺ຈສ຺ສ ອຄ຺ຄມເຫສິຍາ;

ຘີຕາ ອາສິໍ ສຸເມຘາ, ປສາທິຕາ ສາສນກເຣຫິ.

໔໕໑. ສີລວຕີ ຈິຕ຺ຕກຖາ, ພຫຸສ຺ສຸຕາ ພຸທ຺ຘສາສເນ ວິນີຕາ;

ມາຕາປິຕໂຣ ອຸປຄມ຺ມ, ຠຓຕິ ‘‘ອຸຠໂຍ ນິສາເມຖ.

໔໕໒. ‘‘ນິພ຺ພານາຠິຣຕາຫໍ, ອສສ຺ສຕໍ ຠວຄຕໍ ຍທິປິ ທິພ຺ພໍ;

ກິມງ຺ຄໍ ປນ [ກິມງ຺ຄ ປນ (ສີ. ສ຺ຍາ.), ກິໍ ປນ (?)] ຕຸຈ຺ຉາ ກາມາ, ອປ຺ປສ຺ສາທາ ພຫຸວິຆາຕາ.

໔໕໓. ‘‘ກາມາ ກຏຸກາ ອາສີວິສູປມາ, ເຍສຸ ມຸຈ຺ຉິຕາ ພາລາ;

ເຕ ທີຆຣຕ຺ຕໍ ນິຣເຍ, ສມປ຺ປິຕາ ຫຎ຺ຎນ຺ເຕ ທຸກ຺ຂິຕາ [ຫຎ຺ຎເຣ ທຸຂິຕາ (?)].

໔໕໔. ‘‘ໂສຈນ຺ຕິ ປາປກມ຺ມາ, ວິນິປາເຕ ປາປວທ຺ຘິໂນ ສທາ;

ກາເຍນ ຈ ວາຈາຍ ຈ, ມນສາ ຈ ອສໍວຸຕາ ພາລາ.

໔໕໕. ‘‘ພາລາ ເຕ ທຸປ຺ປຎ຺ຎາ, ອເຈຕນາ ທຸກ຺ຂສມຸທໂຍຣຸທ຺ຘາ;

ເທສນ຺ເຕ ອຊານນ຺ຕາ, ນ ພຸຊ຺ຌເຣ ອຣິຍສຈ຺ຈານິ.

໔໕໖. ‘‘ສຈ຺ຈານິ ອມ຺ມ ພຸທ຺ຘວຣເທສິຕານິ, ເຕ ພຫຸຕຣາ ອຊານນ຺ຕາ ເຍ;

ອຠິນນ຺ທນ຺ຕິ ຠວຄຕໍ, ປິເຫນ຺ຕິ ເທເວສຸ ອຸປປຕ຺ຕິໍ.

໔໕໗. ‘‘ເທເວສຸປິ ອຸປປຕ຺ຕິ, ອສສ຺ສຕາ ຠວຄເຕ ອນິຈ຺ຈມ຺ຫິ;

ນ ຈ ສນ຺ຕສນ຺ຕິ ພາລາ, ປຸນປ຺ປຸນໍ ຊາຍິຕພ຺ພສ຺ສ.

໔໕໘. ‘‘ຈຕ຺ຕາໂຣ ວິນິປາຕາ, ທຸເວ [ທ຺ເວ (ສພ຺ພຕ຺ຖ)] ຈ ຄຕິໂຍ ກຖຎ຺ຈິ ລພ຺ຠນ຺ຕິ;

ນ ຈ ວິນິປາຕຄຕານໍ, ປພ຺ພຊ຺ຊາ ອຕ຺ຖິ ນິຣເຍສຸ.

໔໕໙. ‘‘ອນຸຊານາຖ ມໍ ອຸຠໂຍ, ປພ຺ພຊິຕຸໍ ທສພລສ຺ສ ປາວຈເນ;

ອປ຺ໂປສ຺ສຸກ຺ກາ ຆຏິສ຺ສໍ, ຊາຕິມຣຓປ຺ປຫານາຍ.

໔໖໐. ‘‘ກິໍ ຠວຄເຕ [ຠວຄເຕນ (ສ຺ຍາ.)] ອຠິນນ຺ທິເຕນ, ກາຍກລິນາ ອສາເຣນ;

ຠວຕຓ຺ຫາຍ ນິໂຣຘາ, ອນຸຊານາຖ ປພ຺ພຊິສ຺ສາມິ.

໔໖໑. ‘‘ພຸທ຺ຘານໍ ອຸປ຺ປາໂທ ວິວຊ຺ຊິໂຕ, ອກ຺ຂໂຓ ຂໂຓ ລທ຺ໂຘ;

ສີລານິ ພ຺ຣຫ຺ມຈຣິຍໍ, ຍາວຊີວໍ ນ ທູເສຍ຺ຍໍ’’.

໔໖໒. ເອວໍ ຠຓຕິ ສຸເມຘາ, ມາຕາປິຕໂຣ ‘‘ນ ຕາວ ອາຫາຣໍ;

ອາຫຣິສ຺ສໍ [ອາຫຣິຍາມິ (ສີ.), ອາຫາຣິສໍ (?)] ຄຫຏ຺ຐາ, ມຣຓວສໍ ຄຕາວ ເຫສ຺ສາມິ’’.

໔໖໓. ມາຕາ ທຸກ຺ຂິຕາ ໂຣທຕິ ປິຕາ ຈ, ອສ຺ສາ ສພ຺ພໂສ ສມຠິຫໂຕ;

ຆເຏນ຺ຕິ ສຎ຺ຎາເປຕຸໍ, ປາສາທຕເລ ຉມາປຕິຕໍ.

໔໖໔. ‘‘ອຸຏ຺ເຐຫິ ປຸຕ຺ຕກ ກິໍ ໂສຈິເຕນ, ທິນ຺ນາສິ ວາຣຓວຕິມ຺ຫິ;

ຣາຊາ ອນີກຣຕ຺ໂຕ [ອຓີກທຕ຺ໂຕ (ສີ. ສ຺ຍາ.)], ອຠິຣູໂປ ຕສ຺ສ ຕ຺ວໍ ທິນ຺ນາ.

໔໖໕. ‘‘ອຄ຺ຄມເຫສີ ຠວິສ຺ສສິ, ອນິກຣຕ຺ຕສ຺ສ ຣາຊິໂນ ຠຣິຍາ;

ສີລານິ ພ຺ຣຫ຺ມຈຣິຍໍ, ປພ຺ພຊ຺ຊາ ທຸກ຺ກຣາ ປຸຕ຺ຕກ.

໔໖໖. ‘‘ຣຊ຺ເຊ ອາຓາຘນມິສ຺ສຣິຍໍ, ໂຠຄາ ສຸຂາ ທຫຣິກາສິ;

ຠຸຎ຺ຊາຫິ ກາມໂຠເຄ, ວາເຣຍ຺ຍໍ ໂຫຕຸ ເຕ ປຸຕ຺ຕ’’.

໔໖໗. ອຖ ເນ ຠຓຕິ ສຸເມຘາ, ‘‘ມາ ເອທິສິການິ ຠວຄຕມສາຣໍ;

ປພ຺ພຊ຺ຊາ ວາ ໂຫຫິຕິ, ມຣຓໍ ວາ ເມ ນ ເຈວ ວາເຣຍ຺ຍໍ.

໔໖໘. ‘‘ກິມິວ ປູຕິກາຍມສຸຈິໍ, ສວນຄນ຺ຘໍ ຠຍານກໍ ກຸຓປໍ;

ອຠິສໍວິເສຍ຺ຍໍ ຠສ຺ຕໍ, ອສກິໍ ປຄ຺ຆຣິຕໍ ອສຸຈິປຸຓ຺ຓໍ.

໔໖໙. ‘‘ກິມິວ ຕາຫໍ ຊານນ຺ຕີ, ວິກຸລກໍ ມໍສໂສຓິຕຸປລິຕ຺ຕໍ;

ກິມິກຸລາລຍໍ ສກຸຓຠຕ຺ຕໍ, ກເຬວຣໍ ກິສ຺ສ ທິຍ຺ຍຕິ.

໔໗໐. ‘‘ນິພ຺ພຸຍ຺ຫຕິ ສຸສານໍ, ອຈິຣໍ ກາໂຍ ອເປຕວິຎ຺ຎາໂຓ;

ຉຸທ຺ໂຘ [ຉຑ຺ຑິໂຕ (ສ຺ຍາ.), ຉຸຏ຺ໂຐ (ກ.)] ກຬິງ຺ຄຣໍ ວິຍ, ຊິຄຸຈ຺ຉມາເນຫິ ຎາຕີຫິ.

໔໗໑. ‘‘ຉຸທ຺ຘູນ [ຉຑ຺ຑູນ (ສ຺ຍາ.), ຉຸຏ຺ຐູນ (ກ.)] ນໍ ສຸສາເນ, ປຣຠຕ຺ຕໍ ນ຺ຫາຍນ຺ຕິ [ນ຺ຫາຍເຣ (?)] ຊິຄຸຈ຺ຉນ຺ຕາ;

ນິຍກາ ມາຕາປິຕໂຣ, ກິໍ ປນ ສາຘາຣຓາ ຊນຕາ.

໔໗໒. ‘‘ອຊ຺ໂຌສິຕາ ອສາເຣ, ກເຬວເຣ ອຏ຺ຐິນ຺ຫາຣຸສງ຺ຆາເຕ;

ເຂຬສ຺ສຸຈ຺ຈາຣສ຺ສວ, ປຣິປຸຓ຺ເຓ [ເຂຬສ຺ສຸຈ຺ຈາຣປສ຺ສວປຣິປຸຓ຺ເຓ (ສີ.)] ປູຕິກາຍມ຺ຫິ.

໔໗໓. ‘‘ໂຍ ນໍ ວິນິພ຺ຠຸຊິຕ຺ວາ, ອພ຺ຠນ຺ຕຣມສ຺ສ ພາຫິຣໍ ກຍິຣາ;

ຄນ຺ຘສ຺ສ ອສຫມານາ, ສກາປິ ມາຕາ ຊິຄຸຈ຺ເຉຍ຺ຍ.

໔໗໔. ‘‘ຂນ຺ຘຘາຕຸອາຍຕນໍ, ສງ຺ຂຕໍ ຊາຕິມູລກໍ ທຸກ຺ຂໍ;

ໂຍນິໂສ ອນຸວິຈິນນ຺ຕີ, ວາເຣຍ຺ຍໍ ກິສ຺ສ ອິຈ຺ເຉຍ຺ຍໍ.

໔໗໕. ‘‘ທິວເສ ທິວເສ ຕິສຕ຺ຕິ, ສຕານິ ນວນວາ ປເຕຍ຺ຍຸໍ ກາຍມ຺ຫິ;

ວສ຺ສສຕມ຺ປິ ຈ ຆາໂຕ, ເສຍ຺ໂຍ ທຸກ຺ຂສ຺ສ ເຈວໍ ຂໂຍ.

໔໗໖. ‘‘ອຊ຺ຌຸປຄຈ຺ເຉ ຆາຕໍ, ໂຍ ວິຎ຺ຎາເຍວໍ ສຕ຺ຖຸໂນ ວຈນໍ;

‘ທີໂຆ ເຕສໍ [ໂວ (ກ.)] ສໍສາໂຣ, ປຸນປ຺ປຸນໍ ຫຎ຺ຎມານານໍ’.

໔໗໗. ‘‘ເທເວສຸ ມນຸສ຺ເສສຸ ຈ, ຕິຣຈ຺ຉານໂຍນິຍາ ອສຸຣກາເຍ;

ເປເຕສຸ ຈ ນິຣເຍສຸ ຈ, ອປຣິມິຕາ ທິສ຺ສເຣ ຆາຕາ.

໔໗໘. ‘‘ຆາຕາ ນິຣເຍສຸ ພຫູ, ວິນິປາຕຄຕສ຺ສ ປີຬິຍມານສ຺ສ [ກິລິສ຺ສມານສ຺ສ (ສ຺ຍາ. ກ.)];

ເທເວສຸປິ ອຕ຺ຕາຓໍ, ນິພ຺ພານສຸຂາ ປຣໍ ນຕ຺ຖິ.

໔໗໙. ‘‘ປຕ຺ຕາ ເຕ ນິພ຺ພານໍ, ເຍ ຍຸຕ຺ຕາ ທສພລສ຺ສ ປາວຈເນ;

ອປ຺ໂປສ຺ສຸກ຺ກາ ຆເຏນ຺ຕິ, ຊາຕິມຣຓປ຺ປຫານາຍ.

໔໘໐. ‘‘ອຊ຺ເຊວ ຕາຕຠິນິກ຺ຂມິສ຺ສໍ, ໂຠເຄຫິ ກິໍ ອສາເຣຫິ;

ນິພ຺ພິນ຺ນາ ເມ ກາມາ, ວນ຺ຕສມາ ຕາລວຕ຺ຖຸກຕາ’’.

໔໘໑. ສາ ເຈວໍ ຠຓຕິ ປິຕຣມນີກຣຕ຺ໂຕ ຈ ຍສ຺ສ ສາ ທິນ຺ນາ;

ອຸປຍາສິ ວາຣຓວເຕ, ວາເຣຍ຺ຍມຸປຏ຺ຐິເຕ ກາເລ.

໔໘໒. ອຖ ອສິຕນິຈິຕມຸທຸເກ, ເກເສ ຂຄ຺ເຄນ ຉິນ຺ທິຍ ສຸເມຘາ;

ປາສາທໍ ປິທຫິຕ຺ວາ [ປິເຘຕ຺ວາ (ສີ. ສ຺ຍາ.), ປິຘິຕ຺ວາ (ກ.)], ປຐມຊ຺ຌານໍ ສມາປຊ຺ຊິ.

໔໘໓. ສາ ຈ ຕຫິໍ ສມາປນ຺ນາ, ອນີກຣຕ຺ໂຕ ຈ ອາຄໂຕ ນຄຣໍ;

ປາສາເທ ຈ [ປາສາເທວ (ສີ. ສ຺ຍາ.)] ສຸເມຘາ, ອນິຈ຺ຈສຎ຺ຎໍ [ອນິຈ຺ຈສຎ຺ຎາ (ສພ຺ພຕ຺ຖ)] ສຸຠາເວຕິ.

໔໘໔. ສາ ຈ ມນສິ ກໂຣຕິ, ອນີກຣຕ຺ໂຕ ຈ ອາຣຸຫີ ຕຸຣິຕໍ;

ມຓິກນກຠູສິຕງ຺ໂຄ, ກຕຎ຺ຊລີ ຍາຈຕິ ສຸເມຘໍ.

໔໘໕. ‘‘ຣຊ຺ເຊ ອາຓາຘນມິສ຺ສຣິຍໍ, ໂຠຄາ ສຸຂາ ທຫຣິກາສິ;

ຠຸຎ຺ຊາຫິ ກາມໂຠເຄ, ກາມສຸຂາ ທຸລ຺ລຠາ ໂລເກ.

໔໘໖. ‘‘ນິສ຺ສຏ຺ຐໍ ເຕ ຣຊ຺ຊໍ, ໂຠເຄ ຠຸຎ຺ຊສ຺ສຸ ເທຫິ ທານານິ;

ມາ ທຸມ຺ມນາ ອໂຫສິ, ມາຕາປິຕໂຣ ເຕ ທຸກ຺ຂິຕາ’’ [ມາຕາປິຕໂຣ ຈ ເຕ ທຸຂິຕາ (?)].

໔໘໗. ຕໍ ຕໍ ຠຓຕິ ສຸເມຘາ, ກາເມຫິ ອນຕ຺ຖິກາ ວິຄຕໂມຫາ;

‘‘ມາ ກາເມ ອຠິນນ຺ທິ, ກາເມສ຺ວາທີນວໍ ປສ຺ສ.

໔໘໘. ‘‘ຈາຕຸທ຺ທີໂປ ຣາຊາ ມນ຺ຘາຕາ, ອາສິ ກາມໂຠຄິນ ມຄ຺ໂຄ;

ອຕິຕ຺ໂຕ ກາລງ຺ກໂຕ, ນ ຈສ຺ສ ປຣິປູຣິຕາ ອິຈ຺ຉາ.

໔໘໙. ‘‘ສຕ຺ຕ ຣຕນານິ ວສ຺ເສຍ຺ຍ, ວຸຏ຺ຐິມາ ທສທິສາ ສມນ຺ເຕນ;

ນ ຈຕ຺ຖິ ຕິຕ຺ຕິ ກາມານໍ, ອຕິຕ຺ຕາວ ມຣນ຺ຕິ ນຣາ.

໔໙໐. ‘‘ອສິສູນູປມາ ກາມາ, ກາມາ ສປ຺ປສິໂຣປມາ;

ອຸກ຺ໂກປມາ ອນຸທຫນ຺ຕິ, ອຏ຺ຐິກງ຺ກລ [ກງ຺ຂລ (ສີ.)] ສນ຺ນິຠາ.

໔໙໑. ‘‘ອນິຈ຺ຈາ ອທ຺ຘຸວາ ກາມາ, ພຫຸທຸກ຺ຂາ ມຫາວິສາ;

ອໂຍຄຸໂຬວ ສນ຺ຕຕ຺ໂຕ, ອຆມູລາ ທຸຂປ຺ຜລາ.

໔໙໒. ‘‘ຣຸກ຺ຂປ຺ຜລູປມາ ກາມາ, ມໍສເປສູປມາ ທຸຂາ;

ສຸປິໂນປມາ ວຎ຺ຈນິຍາ, ກາມາ ຍາຈິຕກູປມາ.

໔໙໓. ‘‘ສຕ຺ຕິສູລູປມາ ກາມາ, ໂຣໂຄ ຄຓ຺ໂຑ ອຆໍ ນິຆໍ;

ອງ຺ຄາຣກາສຸສທິສາ, ອຆມູລໍ ຠຍໍ ວໂຘ.

໔໙໔. ‘‘ເອວໍ ພຫຸທຸກ຺ຂາ ກາມາ, ອກ຺ຂາຕາ ອນ຺ຕຣາຍິກາ;

ຄຈ຺ຉຖ ນ ເມ ຠຄວເຕ, ວິສ຺ສາໂສ ອຕ຺ຖິ ອຕ຺ຕໂນ.

໔໙໕. ‘‘ກິໍ ມມ ປໂຣ ກຣິສ຺ສຕິ, ອຕ຺ຕໂນ ສີສມ຺ຫິ ຑຍ຺ຫມານມ຺ຫິ;

ອນຸພນ຺ເຘ ຊຣາມຣເຓ, ຕສ຺ສ ຆາຕາຍ ຆຏິຕພ຺ພໍ’’.

໔໙໖. ທ຺ວາຣໍ ອປາປຸຣິຕ຺ວານຫໍ [ອວາປຸຣິຕ຺ວາຫໍ (ສີ.)], ມາຕາປິຕໂຣ ອນີກຣຕ຺ຕຎ຺ຈ;

ທິສ຺ວານ ຉມໍ ນິສິນ຺ເນ, ໂຣທນ຺ເຕ ອິທມໂວຈໍ.

໔໙໗. ‘‘ທີໂຆ ພາລານໍ ສໍສາໂຣ, ປຸນປ຺ປຸນຎ຺ຈ ໂຣທຕໍ;

ອນມຕຄ຺ເຄ ປິຕຸ ມຣເຓ, ຠາຕຸ ວເຘ ອຕ຺ຕໂນ ຈ ວເຘ.

໔໙໘. ‘‘ອສ຺ສຸ ຖຎ຺ຎໍ ຣຸຘິຣໍ, ສໍສາຣໍ ອນມຕຄ຺ຄໂຕ ສຣຖ;

ສຕ຺ຕານໍ ສໍສຣຕໍ, ສຣາຫິ ອຏ຺ຐີນຎ຺ຈ ສນ຺ນິຈຍໍ.

໔໙໙. ‘‘ສຣ ຈຕຸໂຣທຘີ [ສຣສ຺ສຸ ຈຕຸໂຣ ອຸທຘີ (?)], ອຸປນີເຕ ອສ຺ສຸຖຎ຺ຎຣຸຘິຣມ຺ຫິ;

ສຣ ເອກກປ຺ປມຏ຺ຐີນໍ, ສຎ຺ຈຍໍ ວິປຸເລນ ສມໍ.

໕໐໐. ‘‘ອນມຕຄ຺ເຄ ສໍສຣໂຕ, ມຫິໍ [ມຫາມຫິໍ (?)] ຊມ຺ພຸທີປມຸປນີຕໍ;

ໂກລຏ຺ຐິມຕ຺ຕຄຸຬິກາ, ມາຕາ ມາຕຸສ຺ເວວ ນປ຺ປໂຫນ຺ຕິ.

໕໐໑. ‘‘ຕິຓກຏ຺ຐສາຂາປລາສໍ [ສຣ ຕິຓກຏ຺ຐສາຂາປລາສໍ (ສີ.)], ອຸປນີຕໍ ອນມຕຄ຺ຄໂຕ ສຣ;

ຈຕຸຣງ຺ຄຸລິກາ ຆຏິກາ, ປິຕຸປິຕຸສ຺ເວວ ນປ຺ປໂຫນ຺ຕິ.

໕໐໒. ‘‘ສຣ ກາຓກຈ຺ຉປໍ ປຸພ຺ພສມຸທ຺ເທ, ອປຣໂຕ ຈ ຍຸຄຉິທ຺ທໍ;

ສິຣໍ [ສຣ (ສີ.)] ຕສ຺ສ ຈ ປຏິມຸກ຺ກໍ, ມນຸສ຺ສລາຠມ຺ຫິ ໂອປມ຺ມໍ.

໕໐໓. ‘‘ສຣ ຣູປໍ ເຜຓປິຓ຺ໂຑປມສ຺ສ, ກາຍກລິໂນ ອສາຣສ຺ສ;

ຂນ຺ເຘ ປສ຺ສ ອນິຈ຺ເຈ, ສຣາຫິ ນິຣເຍ ພຫຸວິຆາເຕ.

໕໐໔. ‘‘ສຣ ກຏສິໍ ວຑ຺ເຒນ຺ເຕ, ປຸນປ຺ປຸນໍ ຕາສຸ ຕາສຸ ຊາຕີສຸ;

ສຣ ກຸມ຺ຠີລຠຍານິ ຈ, ສຣາຫິ ຈຕ຺ຕາຣິ ສຈ຺ຈານິ.

໕໐໕. ‘‘ອມຕມ຺ຫິ ວິຊ຺ຊມາເນ, ກິໍ ຕວ ປຎ຺ຈກຏຸເກນ ປີເຕນ;

ສພ຺ພາ ຫິ ກາມຣຕິໂຍ, ກຏຸກຕຣາ ປຎ຺ຈກຏຸເກນ.

໕໐໖. ‘‘ອມຕມ຺ຫິ ວິຊ຺ຊມາເນ, ກິໍ ຕວ ກາເມຫິ ເຍ ປຣິຬາຫາ [ສປຣິຬາຫາ (ສີ. ອຏ຺ຐ.)];

ສພ຺ພາ ຫິ ກາມຣຕິໂຍ, ຊລິຕາ ກຸຖິຕາ ກມ຺ປິຕາ ສນ຺ຕາປິຕາ.

໕໐໗. ‘‘ອສປຕ຺ຕມ຺ຫິ ສມາເນ, ກິໍ ຕວ ກາເມຫິ ເຍ ພຫຸສປຕ຺ຕາ;

ຣາຊຄ຺ຄິໂຈຣອຸທກປ຺ປິເຍຫິ, ສາຘາຣຓາ ກາມາ ພຫຸສປຕ຺ຕາ.

໕໐໘. ‘‘ໂມກ຺ຂມ຺ຫິ ວິຊ຺ຊມາເນ, ກິໍ ຕວ ກາເມຫິ ເຍສຸ ວຘພນ຺ໂຘ;

ກາເມສຸ ຫິ ອສກາມາ, ວຘພນ຺ຘທຸຂານິ ອນຸໂຠນ຺ຕິ.

໕໐໙. ‘‘ອາທີປິຕາ ຕິຓຸກ຺ກາ, ຄຓ຺ຫນ຺ຕໍ ທຫນ຺ຕິ ເນວ ມຸຎ຺ຈນ຺ຕໍ;

ອຸກ຺ໂກປມາ ຫິ ກາມາ, ທຫນ຺ຕິ ເຍ ເຕ ນ ມຸຎ຺ຈນ຺ຕິ.

໕໑໐. ‘‘ມາ ອປ຺ປກສ຺ສ ເຫຕຸ, ກາມສຸຂສ຺ສ ວິປຸລໍ ຊຫີ ສຸຂໍ;

ມາ ປຸຖຸໂລໂມວ ພຬິສໍ, ຄິລິຕ຺ວາ ປຈ຺ຉາ ວິຫຎ຺ຎສິ.

໕໑໑. ‘‘ກາມໍ ກາເມສຸ ທມສ຺ສຸ, ຕາວ ສຸນໂຂວ ສງ຺ຂລາພທ຺ໂຘ;

ກາຫິນ຺ຕິ ຂຸ ຕໍ ກາມາ, ຉາຕາ ສຸນຂໍວ ຈຓ຺ຑາລາ.

໕໑໒. ‘‘ອປຣິມິຕຎ຺ຈ ທຸກ຺ຂໍ, ພຫູນິ ຈ ຈິຕ຺ຕໂທມນສ຺ສານິ;

ອນຸໂຠຫິສິ ກາມຍຸຕ຺ໂຕ, ປຏິນິສ຺ສຊ [ປຏິນິສ຺ສຣ (ສີ.)] ອທ຺ຘຸເວ ກາເມ.

໕໑໓. ‘‘ອຊຣມ຺ຫິ ວິຊ຺ຊມາເນ, ກິໍ ຕວ ກາເມຫິ [ເຍສຸ ຊຣາຍ ຈ; ມຣຓພ຺ຍາຘິຫິ ຄຫິຕາ (?)] ເຍສຸ ຊຣາ;

ມຣຓພ຺ຍາຘິຄຫິຕາ [ເຍສຸ ຊຣາຍ ຈ; ມຣຓພ຺ຍາຘິຫິ ຄຫິຕາ (?)], ສພ຺ພາ ສພ຺ພຕ຺ຖ ຊາຕິໂຍ.

໕໑໔. ‘‘ອິທມຊຣມິທມມຣໍ [ອິທໍ ອຊຣໍ ອິທໍ ອມຣໍ (?)], ອິທມຊຣາມຣໍ ປທມໂສກໍ;

ອສປຕ຺ຕມສມ຺ພາຘໍ, ອຂລິຕມຠຍໍ ນິຣຸປຕາປໍ.

໕໑໕. ‘‘ອຘິຄຕມິທໍ ພຫູຫິ, ອມຕໍ ອຊ຺ຊາປິ ຈ ລຠນີຍມິທໍ;

ໂຍ ໂຍນິໂສ ປຍຸຎ຺ຊຕິ, ນ ຈ ສກ຺ກາ ອຆຏມາເນນ’’.

໕໑໖. ເອວໍ ຠຓຕິ ສຸເມຘາ, ສງ຺ຂາຣຄເຕ ຣຕິໍ ອລຠມານາ;

ອນຸເນນ຺ຕີ ອນິກຣຕ຺ຕໍ, ເກເສ ຈ ຉມໍ ຂິປິ ສຸເມຘາ.

໕໑໗. ອຸຏ຺ຐາຍ ອນິກຣຕ຺ໂຕ, ປຎ຺ຊລິໂກ ຍາຈິຕສ຺ສາ ປິຕຣໍ ໂສ;

‘‘ວິສ຺ສຊ຺ເຊຖ ສຸເມຘໍ, ປພ຺ພຊິຕຸໍ ວິໂມກ຺ຂສຈ຺ຈທສ຺ສາ’’.

໕໑໘. ວິສ຺ສຊ຺ຊິຕາ ມາຕາປິຕູຫິ, ປພ຺ພຊິ ໂສກຠຍຠີຕາ;

ຉ ອຠິຎ຺ຎາ ສຈ຺ຉິກຕາ, ອຄ຺ຄຜລໍ ສິກ຺ຂມານາຍ.

໕໑໙. ອຈ຺ຉຣິຍມພ຺ຠຸຕໍ ຕໍ, ນິພ຺ພານໍ ອາສິ ຣາຊກຎ຺ຎາຍ;

ປຸພ຺ເພນິວາສຈຣິຕໍ, ຍຖາ ພ຺ຍາກຣິ ປຈ຺ຉິເມ ກາເລ.

໕໒໐. ‘‘ຠຄວຕິ ໂກຓາຄມເນ, ສງ຺ຆາຣາມມ຺ຫິ ນວນິເວສມ຺ຫິ;

ສຂິໂຍ ຕິສ຺ໂສ ຊນິໂຍ, ວິຫາຣທານໍ ອທາສິມ຺ຫ.

໕໒໑. ‘‘ທສກ຺ຂຕ຺ຕຸໍ ສຕກ຺ຂຕ຺ຕຸໍ, ທສສຕກ຺ຂຕ຺ຕຸໍ ສຕານິ ຈ ສຕກ຺ຂຕ຺ຕຸໍ;

ເທເວສຸ ອຸປ຺ປຊ຺ຊິມ຺ຫ, ໂກ ປນ ວາໂທ ມນຸສ຺ເສສຸ.

໕໒໒. ‘‘ເທເວສຸ ມຫິທ຺ຘິກາ ອຫຸມ຺ຫ, ມານຸສກມ຺ຫິ ໂກ ປນ ວາໂທ;

ສຕ຺ຕຣຕນສ຺ສ ມເຫສີ, ອິຕ຺ຖິຣຕນໍ ອຫໍ ອາສິໍ.

໕໒໓. ‘‘ໂສ ເຫຕຸ ໂສ ປຠໂວ, ຕໍ ມູລໍ ສາວ ສາສເນ ຂນ຺ຕີ;

ຕໍ ປຐມສໂມຘານໍ, ຕໍ ຘມ຺ມຣຕາຍ ນິພ຺ພານໍ’’.