໑. ອິສິທາສີເຖຣີຄາຖາ

໔໐໒. ນຄຣມ຺ຫິ ກຸສຸມນາເມ, ປາຏລິປຸຕ຺ຕມ຺ຫິ ປຖວິຍາ ມຓ຺ເຑ;

ສກ຺ຍກຸລກຸລີນາໂຍ, ທ຺ເວ ຠິກ຺ຂຸນິໂຍ ຫິ ຄຸຓວຕິໂຍ.

໔໐໓. ອິສິທາສີ ຕຕ຺ຖ ເອກາ, ທຸຕິຍາ ໂພຘີຕິ ສີລສມ຺ປນ຺ນາ ຈ;

ຌານຊ຺ຌາຍນຣຕາໂຍ, ພຫຸສ຺ສຸຕາໂຍ ຘຸຕກິເລສາໂຍ.

໔໐໔. ຕາ ປິຓ຺ຑາຍ ຈຣິຕ຺ວາ, ຠຕ຺ຕຕ຺ຖໍ [ຠຕ຺ຕຕ຺ຕໍ (ສີ.)] ກຣິຍ ໂຘຕປຕ຺ຕາໂຍ;

ຣຫິຕມ຺ຫິ ສຸຂນິສິນ຺ນາ, ອິມາ ຄິຣາ ອພ຺ຠຸທີເຣສຸໍ.

໔໐໕. ‘‘ປາສາທິກາສິ ອຍ຺ເຍ, ອິສິທາສິ ວໂຍປິ ເຕ ອປຣິຫີໂນ;

ກິໍ ທິສ຺ວານ ພ຺ຍາລິກໍ, ອຖາສິ ເນກ຺ຂມ຺ມມນຸຍຸຕ຺ຕາ’’.

໔໐໖. ເອວມນຸຍຸຎ຺ຊິຍມານາ ສາ, ຣຫິເຕ ຘມ຺ມເທສນາກຸສລາ;

ອິສິທາສີ ວຈນມພ຺ຣວິ, ‘‘ສຸຓ ໂພຘິ ຍຖາມ຺ຫິ ປພ຺ພຊິຕາ.

໔໐໗. ‘‘ອຸຊ຺ເຊນິຍາ ປຸຣວເຣ, ມຍ຺ຫໍ ປິຕາ ສີລສໍວຸໂຕ ເສຏ຺ຐິ;

ຕສ຺ສມ຺ຫິ ເອກຘີຕາ, ປິຍາ ມນາປາ ຈ ທຍິຕາ ຈ.

໔໐໘. ‘‘ອຖ ເມ ສາເກຕໂຕ ວຣກາ, ອາຄຈ຺ຉຸມຸຕ຺ຕມກຸລີນາ;

ເສຏ຺ຐີ ປຫູຕຣຕໂນ, ຕສ຺ສ ມມໍ ສຸຓ຺ຫມທາສິ ຕາໂຕ.

໔໐໙. ‘‘ສສ຺ສຸຍາ ສສ຺ສຸຣສ຺ສ ຈ, ສາຍໍ ປາຕໍ ປຓາມມຸປຄມ຺ມ;

ສິຣສາ ກໂຣມິ ປາເທ, ວນ຺ທາມິ ຍຖາມ຺ຫິ ອນຸສິຏ຺ຐາ.

໔໑໐. ‘‘ຍາ ມຍ຺ຫໍ ສາມິກສ຺ສ, ຠຄິນິໂຍ ຠາຕຸໂນ ປຣິຊໂນ ວາ;

ຕເມກວຣກມ຺ປິ ທິສ຺ວາ, ອຸພ຺ພິຄ຺ຄາ ອາສນໍ ເທມິ.

໔໑໑. ‘‘ອນ຺ເນນ ຈ ປາເນນ ຈ, ຂຊ຺ເຊນ ຈ ຍຎ຺ຈ ຕຕ຺ຖ ສນ຺ນິຫິຕໍ;

ຉາເທມິ ອຸປນຍາມິ ຈ, ເທມິ ຈ ຍໍ ຍສ຺ສ ປຕິຣູປໍ.

໔໑໒. ‘‘ກາເລນ ອຸປຏ຺ຐຫິຕ຺ວາ [ອຸຏ຺ຐຫິຕ຺ວາ (ສ຺ຍາ. ກ.), ອຸປຏ຺ຐຫິຕຸໍ (?)], ຆຣໍ ສມຸປຄມາມິ ອຸມ຺ມາເຣ;

ໂຘວນ຺ຕີ ຫຕ຺ຖປາເທ, ປຎ຺ຊລິກາ ສາມິກມຸເປມິ.

໔໑໓. ‘‘ໂກຈ຺ຉໍ ປສາທໍ ອຎ຺ຊນິຎ຺ຈ, ອາທາສກຎ຺ຈ ຄຓ຺ຫິຕ຺ວາ;

ປຣິກມ຺ມກາຣິກາ ວິຍ, ສຍເມວ ປຕິໍ ວິຠູເສມິ.

໔໑໔. ‘‘ສຍເມວ ໂອທນໍ ສາຘຍາມິ, ສຍເມວ ຠາຊນໍ ໂຘວນ຺ຕີ;

ມາຕາວ ເອກປຸຕ຺ຕກໍ, ຕຖາ [ຕທາ (ສີ.)] ຠຕ຺ຕາຣໍ ປຣິຈຣາມິ.

໔໑໕. ‘‘ເອວໍ ມໍ ຠຕ຺ຕິກຕໍ, ອນຸຣຕ຺ຕໍ ກາຣິກໍ ນິຫຕມານໍ;

ອຸຏ຺ຐາຍິກໍ [ອຸຏ຺ຐາຫິກໍ (ກ.)] ອນລສໍ, ສີລວຕິໍ ທຸສ຺ສເຕ ຠຕ຺ຕາ.

໔໑໖. ‘‘ໂສ ມາຕຣຎ຺ຈ ປິຕຣຎ຺ຈ, ຠຓຕິ ‘ອາປຸຈ຺ຉຫໍ ຄມິສ຺ສາມິ;

ອິສິທາສິຍາ ນ ສຫ ວຈ຺ຉໍ, ເອກາຄາເຣຫໍ [ເອກຆເຣປ’ຫໍ (?)] ສຫ ວຕ຺ຖຸໍ’.

໔໑໗. ‘‘‘ມາ ເອວໍ ປຸຕ຺ຕ ອວຈ, ອິສິທາສີ ປຓ຺ຑິຕາ ປຣິພ຺ຍຕ຺ຕາ;

ອຸຏ຺ຐາຍິກາ ອນລສາ, ກິໍ ຕຸຍ຺ຫໍ ນ ໂຣຈເຕ ປຸຕ຺ຕ’.

໔໑໘. ‘‘‘ນ ຈ ເມ ຫິໍສຕິ ກິຎ຺ຈິ, ນ ຈຫໍ ອິສິທາສິຍາ ສຫ ວຈ຺ຉໍ;

ເທສ຺ສາວ ເມ ອລໍ ເມ, ອປຸຈ຺ຉາຫໍ [ອາປຸຈ຺ຉາຫໍ (ສ຺ຍາ.), ອາປຸຈ຺ຉຫໍ-ນາປຸຈ຺ຉຫໍ (?)] ຄມິສ຺ສາມິ’.

໔໑໙. ‘‘ຕສ຺ສ ວຈນໍ ສຸຓິຕ຺ວາ, ສສ຺ສຸ ສສຸໂຣ ຈ ມໍ ອປຸຈ຺ຉິໍສຸ;

‘ກິສ຺ສ [ກິໍສ (?)] ຕຍາ ອປຣທ຺ຘໍ, ຠຓ ວິສ຺ສຏ຺ຐາ ຍຖາຠູຕໍ’.

໔໒໐. ‘‘‘ນປິຫໍ ອປຣຊ຺ຌໍ ກິຎ຺ຈິ, ນປິ ຫິໍເສມິ ນ ຠຓາມິ ທຸພ຺ພຈນໍ;

ກິໍ ສກ຺ກາ ກາຕຸຍ຺ເຍ, ຍໍ ມໍ ວິທ຺ເທສ຺ສເຕ ຠຕ຺ຕາ’.

໔໒໑. ‘‘ເຕ ມໍ ປິຕຸຆຣໍ ປຏິນຍິໍສຸ, ວິມນາ ທຸເຂນ ອຘິຠູຕາ;

‘ປຸຕ຺ຕມນຸຣກ຺ຂມານາ, ຊິຕາມ຺ຫເສ ຣູປິນິໍ ລກ຺ຂິໍ’.

໔໒໒. ‘‘ອຖ ມໍ ອທາສິ ຕາໂຕ, ອຑ຺ຒສ຺ສ ຆຣມ຺ຫິ ທຸຕິຍກຸລິກສ຺ສ;

ຕໂຕ ອຸປຑ຺ຒສຸງ຺ເກນ, ເຍນ ມໍ ວິນ຺ທຖ ເສຏ຺ຐິ.

໔໒໓. ‘‘ຕສ຺ສປິ ຆຣມ຺ຫິ ມາສໍ, ອວສິໍ ອຖ ໂສປິ ມໍ ປຏິຈ຺ຉຣຍິ [ປຏິຈ຺ຉສິ (ສີ. ກ.), ປຏິຈ຺ຉຕິ (ສ຺ຍາ.), ປຏິຈ຺ຉຣຕິ (ກ.)];

ທາສີວ ອຸປຏ຺ຐຫນ຺ຕິໍ, ອທູສິກໍ ສີລສມ຺ປນ຺ນໍ.

໔໒໔. ‘‘ຠິກ຺ຂາຍ ຈ ວິຈຣນ຺ຕໍ, ທມກໍ ທນ຺ຕໍ ເມ ປິຕາ ຠຓຕິ;

‘ໂຫຫິສິ [ໂສຫິສິ (ສພ຺ພຕ຺ຖ)] ເມ ຊາມາຕາ, ນິກ຺ຂິປ ໂປຏ຺ຐິຎ຺ຈ [ໂປນ຺ຕິໍ (ສີ. ສ຺ຍາ.)] ຆຏິກຎ຺ຈ’.

໔໒໕. ‘‘ໂສປິ ວສິຕ຺ວາ ປກ຺ຂໍ [ປກ຺ກມຖ (ສີ.)], ອຖ ຕາຕໍ ຠຓຕິ ‘ເທຫິ ເມ ໂປຏ຺ຐິໍ;

ຆຏິກຎ຺ຈ ມລ຺ລກຎ຺ຈ, ປຸນປິ ຠິກ຺ຂໍ ຈຣິສ຺ສາມິ’.

໔໒໖. ‘‘ອຖ ນໍ ຠຓຕີ ຕາໂຕ, ອມ຺ມາ ສພ຺ໂພ ຈ ເມ ຎາຕິຄຓວຄ຺ໂຄ;

‘ກິໍ ເຕ ນ ກີຣຕິ ອິຘ, ຠຓ ຂິປ຺ປໍ ຕໍ ເຕ ກຣິຫິ’ຕິ.

໔໒໗. ‘‘ເອວໍ ຠຓິໂຕ ຠຓຕິ, ‘ຍທິ ເມ ອຕ຺ຕາ ສກ຺ໂກຕິ ອລໍ ມຍ຺ຫໍ;

ອິສິທາສິຍາ ນ ສຫ ວຈ຺ຉໍ, ເອກຆເຣຫໍ ສຫ ວຕ຺ຖຸໍ’.

໔໒໘. ‘‘ວິສ຺ສຊ຺ຊິໂຕ ຄໂຕ ໂສ, ອຫມ຺ປິ ເອກາກິນີ ວິຈິນ຺ເຕມິ;

‘ອາປຸຈ຺ຉິຕູນ ຄຈ຺ຉໍ, ມຣິຕຸເຍ [ມຣິຕາເຍ (ສີ.), ມຣິຕຸໍ (ສ຺ຍາ.)] ວາ ປພ຺ພຊິສ຺ສໍ ວາ’.

໔໒໙. ‘‘ອຖ ອຍ຺ຍາ ຊິນທຕ຺ຕາ, ອາຄຈ຺ຉີ ໂຄຈຣາຍ ຈຣມານາ;

ຕາຕກຸລໍ ວິນຍຘຣີ, ພຫຸສ຺ສຸຕາ ສີລສມ຺ປນ຺ນາ.

໔໓໐. ‘‘ຕໍ ທິສ຺ວານ ອມ຺ຫາກໍ, ອຸຏ຺ຐາຍາສນໍ ຕສ຺ສາ ປຎ຺ຎາປຍິໍ;

ນິສິນ຺ນາຍ ຈ ປາເທ, ວນ຺ທິຕ຺ວາ ໂຠຊນມທາສິໍ.

໔໓໑. ‘‘ອນ຺ເນນ ຈ ປາເນນ ຈ, ຂຊ຺ເຊນ ຈ ຍຎ຺ຈ ຕຕ຺ຖ ສນ຺ນິຫິຕໍ;

ສນ຺ຕປ຺ປຍິຕ຺ວາ ອວຈໍ, ‘ອຍ຺ເຍ ອິຈ຺ຉາມິ ປພ຺ພຊິຕຸໍ’.

໔໓໒. ‘‘ອຖ ມໍ ຠຓຕີ ຕາໂຕ, ‘ອິເຘວ ປຸຕ຺ຕກ [ປຸຕ຺ຕິເກ (ສ຺ຍາ. ກ.)] ຈຣາຫິ ຕ຺ວໍ ຘມ຺ມໍ;

ອນ຺ເນນ ຈ ປາເນນ ຈ, ຕປ຺ປຍ ສມເຓ ທ຺ວິຊາຕີ ຈ’.

໔໓໓. ‘‘ອຖຫໍ ຠຓາມິ ຕາຕໍ, ໂຣທນ຺ຕີ ອຎ຺ຊລິໍ ປຓາເມຕ຺ວາ;

‘ປາປຎ຺ຫິ ມຍາ ປກຕໍ, ກມ຺ມໍ ຕໍ ນິຊ຺ຊເຣສ຺ສາມິ’.

໔໓໔. ‘‘ອຖ ມໍ ຠຓຕີ ຕາໂຕ, ‘ປາປຸຓ ໂພຘິຎ຺ຈ ອຄ຺ຄຘມ຺ມຎ຺ຈ;

ນິພ຺ພານຎ຺ຈ ລຠສ຺ສຸ, ຍໍ ສຈ຺ຉິກຣີ ທ຺ວິປທເສຏ຺ໂຐ’.

໔໓໕. ‘‘ມາຕາປິຕູ ອຠິວາທຍິຕ຺ວາ, ສພ຺ພຎ຺ຈ ຎາຕິຄຓວຄ຺ຄໍ;

ສຕ຺ຕາຫໍ ປພ຺ພຊິຕາ, ຕິສ຺ໂສ ວິຊ຺ຊາ ອຜສ຺ສຍິໍ.

໔໓໖. ‘‘ຊານາມິ ອຕ຺ຕໂນ ສຕ຺ຕ, ຊາຕິໂຍ ຍສ຺ສຍໍ ຜລວິປາໂກ;

ຕໍ ຕວ ອາຈິກ຺ຂິສ຺ສໍ, ຕໍ ເອກມນາ ນິສາເມຫິ.

໔໓໗. ‘‘ນຄຣມ຺ຫິ ເອຣກຈ຺ເຉ [ເອຣກກຈ຺ເຉ (ສ຺ຍາ. ກ.)], ສຸວຓ຺ຓກາໂຣ ອຫໍ ປຫູຕຘໂນ;

ໂຍພ຺ພນມເທນ ມຕ຺ໂຕ ໂສ, ປຣທາຣໍ ອເສວິຫໍ.

໔໓໘. ‘‘ໂສຫໍ ຕໂຕ ຈວິຕ຺ວາ, ນິຣຍມ຺ຫິ ອປຈ຺ຈິສໍ ຈິຣໍ;

ປກ຺ໂກ ຕໂຕ ຈ ອຸຏ຺ຐຫິຕ຺ວາ, ມກ຺ກຏິຍາ ກຸຈ຺ຉິໂມກ຺ກມິໍ.

໔໓໙. ‘‘ສຕ຺ຕາຫຊາຕກໍ ມໍ, ມຫາກປິ ຍູຖໂປ ນິລ຺ລຈ຺ເຉສິ;

ຕສ຺ເສຕໍ ກມ຺ມຜລໍ, ຍຖາປິ ຄນ຺ຕ຺ວານ ປຣທາຣໍ.

໔໔໐. ‘‘ໂສຫໍ ຕໂຕ ຈວິຕ຺ວາ, ກາລໍ ກຣິຕ຺ວາ ສິນ຺ຘວາຣຎ຺ເຎ;

ກາຓາຍ ຈ ຂຎ຺ຊາຍ ຈ, ເອຬກິຍາ ກຸຈ຺ຉິໂມກ຺ກມິໍ.

໔໔໑. ‘‘ທ຺ວາທສ ວສ຺ສານິ ອຫໍ, ນິລ຺ລຈ຺ຉິໂຕ ທາຣເກ ປຣິວຫິຕ຺ວາ;

ກິມິນາວຏ຺ໂຏ ອກລ຺ໂລ, ຍຖາປິ ຄນ຺ຕ຺ວານ ປຣທາຣໍ.

໔໔໒. ‘‘ໂສຫໍ ຕໂຕ ຈວິຕ຺ວາ, ໂຄວາຓິຊກສ຺ສ ຄາວິຍາ ຊາໂຕ;

ວຈ຺ໂຉ ລາຂາຕມ຺ໂພ, ນິລ຺ລຈ຺ຉິໂຕ ທ຺ວາທເສ ມາເສ.

໔໔໓. ‘‘ໂວຒູນ [ເຕ ປຸນ (ສ຺ຍາ. ກ.), ໂວຘຸນ (ກ. ອຏ຺ຐ.)] ນງ຺ຄລມຫໍ, ສກຏຎ຺ຈ ຘາຣຍາມິ;

ອນ຺ໂຘວຏ຺ໂຏ ອກລ຺ໂລ, ຍຖາປິ ຄນ຺ຕ຺ວານ ປຣທາຣໍ.

໔໔໔. ‘‘ໂສຫໍ ຕໂຕ ຈວິຕ຺ວາ, ວີຖິຍາ ທາສິຍາ ຆເຣ ຊາໂຕ;

ເນວ ມຫິລາ ນ ປຸຣິໂສ, ຍຖາປິ ຄນ຺ຕ຺ວານ ປຣທາຣໍ.

໔໔໕. ‘‘ຕິໍສຕິວສ຺ສມ຺ຫິ ມໂຕ, ສາກຏິກກຸລມ຺ຫິ ທາຣິກາ ຊາຕາ;

ກປຓມ຺ຫິ ອປ຺ປໂຠເຄ, ຘນິກ [ອຓິກ (ອຏ຺ຐ.), ຕໍສໍວຓ຺ຓນາຍມ຺ປິ ອຕ຺ຖຍຸຕ຺ຕິ ຄເວສິຕພ຺ພາ] ປຸຣິສປາຕພຫຸລມ຺ຫິ.

໔໔໖. ‘‘ຕໍ ມໍ ຕໂຕ ສຕ຺ຖວາໂຫ, ອຸສ຺ສນ຺ນາຍ ວິປຸລາຍ ວຑ຺ຒິຍາ;

ໂອກຑ຺ຒຕິ ວິລປນ຺ຕິໍ, ອຈ຺ຉິນ຺ທິຕ຺ວາ ກຸລຆຣສ຺ມາ.

໔໔໗. ‘‘ອຖ ໂສຬສເມ ວສ຺ເສ, ທິສ຺ວາ ມໍ ປຕ຺ຕໂຍພ຺ພນໍ ກຎ຺ຎໍ;

ໂອຣຸນ຺ຘຕສ຺ສ ປຸຕ຺ໂຕ, ຄິຣິທາໂສ ນາມ ນາເມນ.

໔໔໘. ‘‘ຕສ຺ສປິ ອຎ຺ຎາ ຠຣິຍາ, ສີລວຕີ ຄຸຓວຕີ ຍສວຕີ ຈ;

ອນຸຣຕ຺ຕາ [ອນຸວຕ຺ຕາ (ກ.)] ຠຕ຺ຕາຣໍ, ຕສ຺ສາຫໍ [ຕສ຺ສ ຕໍ (?)] ວິທ຺ເທສນມກາສິໍ.

໔໔໙. ‘‘ຕສ຺ເສຕໍ ກມ຺ມຜລໍ, ຍໍ ມໍ ອປກີຣິຕູນ ຄຈ຺ຉນ຺ຕິ;

ທາສີວ ອຸປຏ຺ຐຫນ຺ຕິໍ, ຕສ຺ສປິ ອນ຺ໂຕ ກໂຕ ມຍາ’’ຕິ.

… ອິສິທາສີ ເຖຣີ….

ຈຕ຺ຕາລີສນິປາໂຕ ນິຏ຺ຐິໂຕ.