໑. ອມ຺ພປາລີເຖຣີຄາຖາ

໒໕໒. ‘‘ກາຬກາ ຠມຣວຓ຺ຓສາທິສາ, ເວລ຺ລິຕຄ຺ຄາ ມມ ມຸທ຺ຘຊາ ອຫຸໍ;

ເຕ ຊຣາຍ ສາຓວາກສາທິສາ, ສຈ຺ຈວາທິວຈນໍ ອນຎ຺ຎຖາ.

໒໕໓.

‘‘ວາສິໂຕວ ສຸຣຠີ ກຣຓ຺ຑໂກ, ປຸປ຺ຜປູຣ ມມ ອຸຕ຺ຕມງ຺ຄໂຊ [ອຸຕ຺ຕມງ຺ຄຠູໂຕ (ກ.)].

ຕໍ ຊຣາຍຖ ສໂລມຄນ຺ຘິກໍ, ສຈ຺ຈວາທິວຈນໍ ອນຎ຺ຎຖາ.

໒໕໔. ‘‘ການນໍວ ສຫິຕໍ ສຸໂຣປິຕໍ, ໂກຈ຺ຉສູຈິວິຈິຕຄ຺ຄໂສຠິຕໍ;

ຕໍ ຊຣາຍ ວິຣລໍ ຕຫິໍ ຕຫິໍ, ສຈ຺ຈວາທິວຈນໍ ອນຎ຺ຎຖາ.

໒໕໕. ‘‘ກຓ຺ຫຂນ຺ຘກສຸວຓ຺ຓມຓ຺ຑິຕໍ, ໂສຠເຕ ສຸເວຓີຫິລງ຺ກຕໍ;

ຕໍ ຊຣາຍ ຂລິຕໍ ສິຣໍ ກຕໍ, ສຈ຺ຈວາທິວຈນໍ ອນຎ຺ຎຖາ.

໒໕໖. ‘‘ຈິຕ຺ຕກາຣສຸກຕາວ ເລຂິກາ, ໂສຠເຣ ສຸ ຠມຸກາ ປຸເຣ ມມ;

ຕາ ຊຣາຍ ວລິຠິປ຺ປລມ຺ພິຕາ, ສຈ຺ຈວາທິວຈນໍ ອນຎ຺ຎຖາ.

໒໕໗. ‘‘ຠສ຺ສຣາ ສຸຣຸຈິຣາ ຍຖາ ມຓີ, ເນຕ຺ຕເຫສຸມຠິນີລມາຍຕາ;

ເຕ ຊຣາຍຠິຫຕາ ນ ໂສຠເຣ, ສຈ຺ຈວາທິວຈນໍ ອນຎ຺ຎຖາ.

໒໕໘. ‘‘ສຓ຺ຫຕຸງ຺ຄສທິສີ ຈ ນາສິກາ, ໂສຠເຕ ສຸ ອຠິໂຍພ຺ພນໍ ປຕິ;

ສາ ຊຣາຍ ອຸປກູລິຕາ ວິຍ, ສຈ຺ຈວາທິວຈນໍ ອນຎ຺ຎຖາ.

໒໕໙. ‘‘ກງ຺ກຓໍ ວ ສຸກຕໍ ສຸນິຏ຺ຐິຕໍ, ໂສຠເຣ ສຸ ມມ ກຓ຺ຓປາຬິໂຍ;

ຕາ ຊຣາຍ ວລິຠິປ຺ປລມ຺ພິຕາ, ສຈ຺ຈວາທິວຈນໍ ອນຎ຺ຎຖາ.

໒໖໐. ‘‘ປຕ຺ຕລີມກຸລວຓ຺ຓສາທິສາ, ໂສຠເຣ ສຸ ທນ຺ຕາ ປຸເຣ ມມ;

ເຕ ຊຣາຍ ຂຓ຺ຑິຕາ ຈາສິຕາ [ປີຕກາ (ສີ.)], ສຈ຺ຈວາທິວຈນໍ ອນຎ຺ຎຖາ.

໒໖໑. ‘‘ການນມ຺ຫິ ວນສຓ຺ຑຈາຣິນີ, ໂກກິລາວ ມຘຸຣໍ ນິກູຊິຫໍ;

ຕໍ ຊຣາຍ ຂລິຕໍ ຕຫິໍ ຕຫິໍ, ສຈ຺ຈວາທິວຈນໍ ອນຎ຺ຎຖາ.

໒໖໒. ‘‘ສຓ຺ຫກມ຺ພຸຣິວ ສຸປ຺ປມຊ຺ຊິຕາ, ໂສຠເຕ ສຸ ຄີວາ ປຸເຣ ມມ;

ສາ ຊຣາຍ ຠຄ຺ຄາ [ຠຎ຺ຊິຕາ (?)] ວິນາມິຕາ, ສຈ຺ຈວາທິວຈນໍ ອນຎ຺ຎຖາ.

໒໖໓. ‘‘ວຏ຺ຏປລິຆສທິໂສປມາ ອຸໂຠ, ໂສຠເຣ ສຸ ພາຫາ ປຸເຣ ມມ;

ຕາ ຊຣາຍ ຍຖ ປາຏລິພ຺ພລິຕາ [ຍຖາ ປາຏລິປ຺ປລິຕາ (ສີ. ສ຺ຍາ. ກ.)], ສຈ຺ຈວາທິວຈນໍ ອນຎ຺ຎຖາ.

໒໖໔. ‘‘ສຓ຺ຫມຸທ຺ທິກສຸວຓ຺ຓມຓ຺ຑິຕາ, ໂສຠເຣ ສຸ ຫຕ຺ຖາ ປຸເຣ ມມ;

ເຕ ຊຣາຍ ຍຖາ ມູລມູລິກາ, ສຈ຺ຈວາທິວຈນໍ ອນຎ຺ຎຖາ.

໒໖໕. ‘‘ປີນວຏ຺ຏສຫິຕຸຄ຺ຄຕາ ອຸໂຠ, ໂສຠເຣ [ໂສຠເຕ (ອຏ຺ຐ.)] ສຸ ຖນກາ ປຸເຣ ມມ;

ເຖວິກີວ ລມ຺ພນ຺ຕິ ໂນທກາ, ສຈ຺ຈວາທິວຈນໍ ອນຎ຺ຎຖາ.

໒໖໖. ‘‘ກຎ຺ຈນສ຺ສຜລກໍວ ສມ຺ມຏ຺ຐໍ, ໂສຠເຕ ສຸ ກາໂຍ ປຸເຣ ມມ;

ໂສ ວລີຫິ ສຸຂຸມາຫິ ໂອຕໂຕ, ສຈ຺ຈວາທິວຈນໍ ອນຎ຺ຎຖາ.

໒໖໗. ‘‘ນາຄໂຠຄສທິໂສປມາ ອຸໂຠ, ໂສຠເຣ ສຸ ອູຣູ ປຸເຣ ມມ;

ເຕ ຊຣາຍ ຍຖາ ເວຬຸນາຬິໂຍ, ສຈ຺ຈວາທິວຈນໍ ອນຎ຺ຎຖາ.

໒໖໘. ‘‘ສຓ຺ຫນູປຸຣສຸວຓ຺ຓມຓ຺ຑິຕາ, ໂສຠເຣ ສຸ ຊງ຺ຆາ ປຸເຣ ມມ;

ຕາ ຊຣາຍ ຕິລທຓ຺ຑກາຣິວ, ສຈ຺ຈວາທິວຈນໍ ອນຎ຺ຎຖາ.

໒໖໙. ‘‘ຕູລປຸຓ຺ຓສທິໂສປມາ ອຸໂຠ, ໂສຠເຣ ສຸ ປາທາ ປຸເຣ ມມ;

ເຕ ຊຣາຍ ຜຸຏິຕາ ວລີມຕາ, ສຈ຺ຈວາທິວຈນໍ ອນຎ຺ຎຖາ.

໒໗໐. ‘‘ເອທິໂສ ອຫຸ ອຍໍ ສມຸສ຺ສໂຍ, ຊຊ຺ຊໂຣ ພຫຸທຸກ຺ຂານມາລໂຍ;

ໂສປເລປປຕິໂຕ ຊຣາຆໂຣ, ສຈ຺ຈວາທິວຈນໍ ອນຎ຺ຎຖາ’’.

… ອມ຺ພປາລີ ເຖຣີ….