໒. ໂຣຫິນີເຖຣີຄາຖາ

໒໗໑. ‘‘‘ສມຓາ’ຕິ ໂຠຕິ ສຸປິ [ໂຠຕິ ຕ຺ວໍ ສຍສິ (ສີ.), ໂຠຕິ ມໍ ວິປສ຺ສິ (ສ຺ຍາ.)], ‘ສມຓາ’ຕິ ປພຸຊ຺ຌສິ [ປຏິພຸຊ຺ຌສິ (ສີ. ສ຺ຍາ.)];

ສມຓາເນວ [ສມຓານເມວ (ສີ. ສ຺ຍາ.)] ກິຕ຺ເຕສິ, ສມຓີ ນູນ [ສມຓີ ນຸ (ກ.)] ຠວິສ຺ສສິ.

໒໗໒. ‘‘ວິປຸລໍ ອນ຺ນຎ຺ຈ ປານຎ຺ຈ, ສມຓານໍ ປເວຈ຺ຈສິ [ປຍຈ຺ຉສິ (ສີ.)];

ໂຣຫິນີ ທານິ ປຸຈ຺ຉາມິ, ເກນ ເຕ ສມຓາ ປິຍາ.

໒໗໓. ‘‘ອກມ຺ມກາມາ ອລສາ, ປຣທຕ຺ຕູປຊີວິໂນ;

ອາສໍສຸກາ ສາທຸກາມາ, ເກນ ເຕ ສມຓາ ປິຍາ’’.

໒໗໔. ‘‘ຈິຣສ຺ສໍ ວຕ ມໍ ຕາຕ, ສມຓານໍ ປຣິປຸຈ຺ຉສິ;

ເຕສໍ ເຕ ກິຕ຺ຕຍິສ຺ສາມິ, ປຎ຺ຎາສີລປຣກ຺ກມໍ.

໒໗໕. ‘‘ກມ຺ມກາມາ ອນລສາ, ກມ຺ມເສຏ຺ຐສ຺ສ ກາຣກາ;

ຣາຄໍ ໂທສໍ ປຊຫນ຺ຕິ, ເຕນ ເມ ສມຓາ ປິຍາ.

໒໗໖. ‘‘ຕີຓິ ປາປສ຺ສ ມູລານິ, ຘຸນນ຺ຕິ ສຸຈິກາຣິໂນ;

ສພ຺ພໍ ປາປໍ ປຫີເນສໍ, ເຕນ ເມ ສມຓາ ປິຍາ.

໒໗໗. ‘‘ກາຍກມ຺ມໍ ສຸຈິ ເນສໍ, ວຈີກມ຺ມຎ຺ຈ ຕາທິສໍ;

ມໂນກມ຺ມໍ ສຸຈິ ເນສໍ, ເຕນ ເມ ສມຓາ ປິຍາ.

໒໗໘. ‘‘ວິມລາ ສງ຺ຂມຸຕ຺ຕາວ, ສຸທ຺ຘາ ສນ຺ຕຣພາຫິຣາ;

ປຸຓ຺ຓາ ສຸກ຺ການ ຘມ຺ມານໍ [ສຸກ຺ເກຫິ ຘມ຺ເມຫິ (ສີ. ສ຺ຍາ. ອຏ຺ຐ.)], ເຕນ ເມ ສມຓາ ປິຍາ.

໒໗໙. ‘‘ພຫຸສ຺ສຸຕາ ຘມ຺ມຘຣາ, ອຣິຍາ ຘມ຺ມຊີວິໂນ;

ອຕ຺ຖໍ ຘມ຺ມຎ຺ຈ ເທເສນ຺ຕິ, ເຕນ ເມ ສມຓາ ປິຍາ.

໒໘໐. ‘‘ພຫຸສ຺ສຸຕາ ຘມ຺ມຘຣາ, ອຣິຍາ ຘມ຺ມຊີວິໂນ;

ເອກຄ຺ຄຈິຕ຺ຕາ ສຕິມນ຺ໂຕ, ເຕນ ເມ ສມຓາ ປິຍາ.

໒໘໑. ‘‘ທູຣງ຺ຄມາ ສຕິມນ຺ໂຕ, ມນ຺ຕຠາຓີ ອນຸທ຺ຘຕາ;

ທຸກ຺ຂສ຺ສນ຺ຕໍ ປຊານນ຺ຕິ, ເຕນ ເມ ສມຓາ ປິຍາ.

໒໘໒. ‘‘ຍສ຺ມາ ຄາມາ ປກ຺ກມນ຺ຕິ, ນ ວິໂລເກນ຺ຕິ ກິຎ຺ຈນໍ;

ອນເປກ຺ຂາວ ຄຈ຺ຉນ຺ຕິ, ເຕນ ເມ ສມຓາ ປິຍາ.

໒໘໓. ‘‘ນ ເຕສໍ ໂກຏ຺ເຐ ໂອເປນ຺ຕິ, ນ ກຸມ຺ຠິໍ ນ ຂໂຬປິຍໍ;

ປຣິນິຏ຺ຐິຕເມສານາ, ເຕນ ເມ ສມຓາ ປິຍາ.

໒໘໔. ‘‘ນ ເຕ ຫິຣຎ຺ຎໍ ຄຓ຺ຫນ຺ຕິ, ນ ສຸວຓ຺ຓໍ ນ ຣູປິຍໍ;

ປຈ຺ຈຸປ຺ປນ຺ເນນ ຍາເປນ຺ຕິ, ເຕນ ເມ ສມຓາ ປິຍາ.

໒໘໕. ‘‘ນານາກຸລາ ປພ຺ພຊິຕາ, ນານາຊນປເທຫິ ຈ;

ອຎ຺ຎມຎ຺ຎໍ ປິຍາຍນ຺ຕິ [ປິຫຍນ຺ຕິ (ກ.)], ເຕນ ເມ ສມຓາ ປິຍາ’’.

໒໘໖. ‘‘ອຕ຺ຖາຍ ວຕ ໂນ ໂຠຕິ, ກຸເລ ຊາຕາສິ ໂຣຫິນີ;

ສທ຺ຘາ ພຸທ຺ເຘ ຈ ຘມ຺ເມ ຈ, ສງ຺ເຆ ຈ ຕິພ຺ພຄາຣວາ.

໒໘໗. ‘‘ຕຸວໍ ເຫຕໍ ປຊານາສິ, ປຸຎ຺ຎກ຺ເຂຕ຺ຕໍ ອນຸຕ຺ຕຣໍ;

ອມ຺ຫມ຺ປິ ເອເຕ ສມຓາ, ປຏິຄຓ຺ຫນ຺ຕິ ທກ຺ຂິຓໍ’’.

໒໘໘. ‘‘ປຕິຏ຺ຐິໂຕ ເຫຕ຺ຖ ຍຎ຺ໂຎ, ວິປຸໂລ ໂນ ຠວິສ຺ສຕິ;

ສເຈ ຠາຍສິ ທຸກ຺ຂສ຺ສ, ສເຈ ເຕ ທຸກ຺ຂມປ຺ປິຍໍ.

໒໘໙. ‘‘ອຸເປຫິ ສຣຓໍ ພຸທ຺ຘໍ, ຘມ຺ມໍ ສງ຺ຆຎ຺ຈ ຕາທິນໍ;

ສມາທິຍາຫິ ສີລານິ, ຕໍ ເຕ ອຕ຺ຖາຍ ເຫຫິຕິ’’.

໒໙໐. ‘‘ອຸເປມິ ສຣຓໍ ພຸທ຺ຘໍ, ຘມ຺ມໍ ສງ຺ຆຎ຺ຈ ຕາທິນໍ;

ສມາທິຍາມິ ສີລານິ, ຕໍ ເມ ອຕ຺ຖາຍ ເຫຫິຕິ.

໒໙໑. ‘‘ພ຺ຣຫ຺ມພນ຺ຘຸ ປຸເຣ ອາສິໍ, ໂສ ອິທານິມ຺ຫິ ພ຺ຣາຫ຺ມໂຓ;

ເຕວິຊ຺ໂຊ ໂສຕ຺ຕິໂຍ ຈມ຺ຫິ, ເວທຄູ ຈມ຺ຫິ ນ຺ຫາຕໂກ’’.

… ໂຣຫິນີ ເຖຣີ….