໘. ປຸຓ຺ຓິກາເຖຣີອປທານໍ

໑໘໔. ‘‘ວິປສ຺ສິໂນ ຠຄວໂຕ, ສິຂິໂນ ເວສ຺ສຠຸສ຺ສ ຈ;

ກກຸສນ຺ຘສ຺ສ ມຸນິໂນ, ໂກຓາຄມນຕາທິໂນ.

໑໘໕. ‘‘ກສ຺ສປສ຺ສ ຈ ພຸທ຺ຘສ຺ສ, ປພ຺ພຊິຕ຺ວານ ສາສເນ;

ຠິກ຺ຂຸນີ ສີລສມ຺ປນ຺ນາ, ນິປກາ ສໍວຸຕິນ຺ທ຺ຣິຍາ.

໑໘໖. ‘‘ພຫຸສ຺ສຸຕາ ຘມ຺ມຘຣາ, ຘມ຺ມຕ຺ຖປຏິປຸຈ຺ຉິກາ;

ອຸຄ຺ຄເຫຕາ ຈ ຘມ຺ມານໍ, ໂສຕາ ປຍິຣຸປາສິຕາ.

໑໘໗. ‘‘ເທເສນ຺ຕີ ຊນມຊ຺ເຌຫໍ, ອໂຫສິໍ ຊິນສາສເນ;

ພາຫຸສຈ຺ເຈນ ເຕນາຫໍ, ເປສລາ ອຕິມຎ຺ຎິສໍ.

໑໘໘. ‘‘ປຈ຺ຉິເມ ຈ ຠເວ ທານິ, ສາວຕ຺ຖິຍໍ ປຸຣຸຕ຺ຕເມ;

ອນາຖປິຓ຺ຑິໂນ ເຄເຫ, ຊາຕາຫໍ ກຸມ຺ຠທາສິຍາ.

໑໘໙. ‘‘ຄຕາ ອຸທກຫາຣິຍໍ, ໂສຕ຺ຖິຍໍ ທິຊມທ຺ທສໍ;

ສີຕຏ຺ຏໍ ໂຕຍມຊ຺ຌມ຺ຫິ, ຕໍ ທິສ຺ວາ ອິທມພ຺ຣວິໍ.

໑໙໐. ‘‘‘ອຸທຫາຣີ ອຫໍ ສີເຕ, ສທາ ອຸທກໂມຕຣິໍ;

ອຍ຺ຍານໍ ທຓ຺ຑຠຍຠີຕາ, ວາຈາໂທສຠຍຏ຺ຏິຕາ [ວາຈາໂຣສຠຍຏ຺ຏິຕາ (ສ຺ຍາ.)].

໑໙໑. ‘‘‘ກສ຺ສ ພ຺ຣາຫ຺ມຓ ຕ຺ວໍ ຠີໂຕ, ສທາ ອຸທກໂມຕຣິ;

ເວຘມາເນຫິ ຄຕ຺ເຕຫິ, ສີຕໍ ເວທຍເສ ຠຸສໍ’.

໑໙໒. ‘‘‘ຊານນ຺ຕີ ວຕ ມໍ ໂຠຕິ, ປຸຓ຺ຓິເກ ປຣິປຸຈ຺ຉສິ;

ກໂຣນ຺ຕໍ ກຸສລໍ ກມ຺ມໍ, ຣຸນ຺ຘນ຺ຕໍ [ນິທ຺ຘນ຺ຕໍ (ສີ. ປີ.), ນຸທນ຺ຕໍ (ສ຺ຍາ.)] ກຕປາປກໍ.

໑໙໓. ‘‘‘ໂຍ ເຈ ວຸຑ຺ໂຒ ທຫໂຣ ວາ, ປາປກມ຺ມໍ ປກຸພ຺ພຕິ;

ທກາຠິສິຎ຺ຈນາ ໂສປິ [ໂຠຕິ (ສີ. ກ.) ເຖຣີຄາ. ໒໓໙], ປາປກມ຺ມາ ປມຸຈ຺ຈຕິ’.

໑໙໔. ‘‘ອຸຕ຺ຕຣນ຺ຕສ຺ສ ອກ຺ຂາສິໍ, ຘມ຺ມຕ຺ຖສໍຫິຕໍ ປທໍ;

ຕຎ຺ຈ ສຸຕ຺ວາ ສ ສໍວິຄ຺ໂຄ [ສຸສໍວິຄ຺ໂຄ (ສ຺ຍາ.)], ປພ຺ພຊິຕ຺ວາຣຫາ ອຫຸ.

໑໙໕. ‘‘ປູເຣນ຺ຕີ ອູນກສຕໍ, ຊາຕາ ທາສິກຸເລ ຍໂຕ;

ຕໂຕ ປຸຓ຺ຓາຕິ ນາມໍ ເມ, ຠຸຊິສ຺ສໍ ມໍ ອກໍສຸ ເຕ.

໑໙໖. ‘‘ເສຏ຺ຐິໍ ຕໂຕນຸຊາເນຕ຺ວາ [ຕໂຕ ອນຸໂມເທຕ຺ວາ (ສີ. ສ຺ຍາ.), ຕໂຕ ອນຸມາເນຕ຺ວາ (ປີ.)], ປພ຺ພຊິໍ ອນຄາຣິຍໍ;

ນ ຈິເຣເນວ ກາເລນ, ອຣຫຕ຺ຕມປາປຸຓິໍ.

໑໙໗. ‘‘ອິທ຺ຘີສຸ ຈ ວສີ ໂຫມິ, ທິພ຺ພາຍ ໂສຕຘາຕຸຍາ;

ເຈໂຕປຣິຍຎາຓສ຺ສ, ວສີ ໂຫມິ ມຫາມຸເນ.

໑໙໘. ‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ;

ສພ຺ພາສວປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໑໙໙. ‘‘ອຕ຺ຖຘມ຺ມນິຣຸຕ຺ຕີສຸ, ປຏິຠາເນ ຕເຖວ ຈ;

ຎາຓໍ ເມ ວິມລໍ ສຸທ຺ຘໍ, ພຸທ຺ຘເສຏ຺ຐສ຺ສ ວາຫສາ.

໒໐໐. ‘‘ຠາວນາຍ ມຫາປຎ຺ຎາ, ສຸເຕເນວ ສຸຕາວິນີ;

ມາເນນ ນີຈກຸລຊາ, ນ ຫິ ກມ຺ມໍ ວິນສ຺ສຕິ [ປນສ຺ສຕິ (ສ຺ຍາ.)].

໒໐໑. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໒໐໒. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໒໐໓. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ປຸຓ຺ຓິກາ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ປຸຓ຺ຓິກາເຖຣິຍາປທານໍ ອຏ຺ຐມໍ.