໙. ອມ຺ພປາລິເຖຣີອປທານໍ

໒໐໔. ‘‘ໂຍ ຣໍສິຜຸສິຕາເວໂຬ, ຜຸສ຺ໂສ ນາມ ມຫາມຸນິ;

ຕສ຺ສາຫໍ ຠຄິນີ ອາສິໍ, ອຊາຍິໍ ຂຕ຺ຕິເຍ ກຸເລ.

໒໐໕. ‘‘ຕສ຺ສ ຘມ຺ມໍ ສຸຓິຕ຺ວາຫໍ, ວິປ຺ປສນ຺ເນນ ເຈຕສາ;

ມຫາທານໍ ທທິຕ຺ວານ, ປຕ຺ຖຍິໍ ຣູປສມ຺ປທໍ.

໒໐໖. ‘‘ເອກຕິໍເສ ອິໂຕ ກປ຺ເປ, ສິຂີ ໂລກຄ຺ຄນາຍໂກ;

ອຸປ຺ປນ຺ໂນ ໂລກປຊ຺ໂຊໂຕ, ຕິໂລກສຣໂຓ ຊິໂນ.

໒໐໗. ‘‘ຕທາຣຸຓປຸເຣ ຣມ຺ເມ, ພ຺ຣາຫ຺ມຎ຺ຎກຸລສມ຺ຠວາ;

ວິມຸຕ຺ຕຈິຕ຺ຕໍ ກຸປິຕາ, ຠິກ຺ຂຸນິໍ ອຠິສາປຍິໍ.

໒໐໘. ‘‘ເວສິກາວ ອນາຈາຣາ, ຊິນສາສນທູສິກາ;

ເອວໍ ອກ຺ໂກສຍິຕ຺ວານ, ເຕນ ປາເປນ ກມ຺ມຸນາ.

໒໐໙. ‘‘ທາຣຸຓໍ ນິຣຍໍ ຄນ຺ຕ຺ວາ, ມຫາທຸກ຺ຂສມປ຺ປິຕາ;

ຕໂຕ ຈຸຕາ ມນຸສ຺ເສສຸ, ອຸປປນ຺ນາ ຕປສ຺ສິນີ.

໒໑໐. ‘‘ທສຊາຕິສຫສ຺ສານິ, ຄຓິກຕ຺ຕມກາຣຍິໍ;

ຕມ຺ຫາ ປາປາ ນ ມຸຈ຺ຈິສ຺ສໍ, ຠຸຕ຺ວາ ທຸຏ຺ຐວິສໍ ຍຖາ.

໒໑໑. ‘‘ພ຺ຣຫ຺ມຈຣິຍມເສວິສ຺ສໍ [ພ຺ຣຫ຺ມເວສມເສວິສ຺ສໍ (ສ຺ຍາ.), ພ຺ຣຫ຺ມເຈຣມເສວິສ຺ສໍ (ປີ.)], ກສ຺ສເປ ຊິນສາສເນ;

ເຕນ ກມ຺ມວິປາເກນ, ອຊາຍິໍ ຕິທເສ ປຸເຣ.

໒໑໒. ‘‘ປຈ຺ຉິເມ ຠເວ ສມ຺ປຕ຺ເຕ, ອໂຫສິໍ ໂອປປາຕິກາ;

ອມ຺ພສາຂນ຺ຕເຣ ຊາຕາ, ອມ຺ພປາລີຕິ ເຕນຫໍ.

໒໑໓. ‘‘ປຣິວຸຕາ ປາຓໂກຏີຫິ, ປພ຺ພຊິໍ ຊິນສາສເນ;

ປຕ຺ຕາຫໍ ອຈລໍ ຐານໍ, ຘີຕາ ພຸທ຺ຘສ຺ສ ໂອຣສາ.

໒໑໔. ‘‘ອິທ຺ຘີສຸ ຈ ວສີ ໂຫມິ, ໂສຕຘາຕຸວິສຸທ຺ຘິຍາ;

ເຈໂຕປຣິຍຎາຓສ຺ສ, ວສີ ໂຫມິ ມຫາມຸເນ.

໒໑໕. ‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ;

ສພ຺ພາສວປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໒໑໖. ‘‘ອຕ຺ຖຘມ຺ມນິຣຸຕ຺ຕີສຸ, ປຏິຠາເນ ຕເຖວ ຈ;

ຎາຓໍ ເມ ວິມລໍ ສຸທ຺ຘໍ, ພຸທ຺ຘເສຏ຺ຐສ຺ສ ວາຫສາ.

໒໑໗. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໒໑໘. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໒໑໙. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອມ຺ພປາລິ ຠິກ຺ຂຸນີ ອິມາ ຄາຖາໂຍ

ອຠາສິຕ຺ຖາຕິ.

ອມ຺ພປາລິເຖຣິຍາປທານໍ ນວມໍ.