໕. ສຸກ຺ກາເຖຣີອປທານໍ

໑໑໑. ‘‘ເອກນວຸຕິໂຕ ກປ຺ເປ, ວິປສ຺ສີ ນາມ ນາຍໂກ;

ອຸປ຺ປຊ຺ຊິ ຈາຣຸທສ຺ສໂນ, ສພ຺ພຘມ຺ມວິປສ຺ສໂກ.

໑໑໒. ‘‘ຕທາຫໍ ພນ຺ຘຸມຕິຍໍ, ຊາຕາ ອຎ຺ຎຕເຣ ກຸເລ;

ຘມ຺ມໍ ສຸຕ຺ວານ ມຸນິໂນ, ປພ຺ພຊິໍ ອນຄາຣິຍໍ.

໑໑໓. ‘‘ພຫຸສ຺ສຸຕາ ຘມ຺ມຘຣາ, ປຏິຠານວຕີ ຕຖາ;

ວິຈິຕ຺ຕກຖິກາ ຈາປິ, ຊິນສາສນກາຣິກາ.

໑໑໔. ‘‘ຕທາ ຘມ຺ມກຖໍ ກຕ຺ວາ, ຫິຕາຍ ຊນຕໍ ພຫຸໍ [ຊນຕາຍ ຫິຕໍ ພຫຸໍ (ສີ.) … ສທາ (ສ຺ຍາ.), ຫິຕາຍ ຊນສໍສຣິໍ (ປີ.)];

ຕໂຕ ຈຸຕາຫໍ ຕຸສິຕໍ, ອຸປປນ຺ນາ ຍສສ຺ສິນີ.

໑໑໕. ‘‘ເອກຕິໍເສ ອິໂຕ ກປ຺ເປ, ສິຂີ ວິຍ ສິຂີ ຊິໂນ;

ຕປນ຺ໂຕ ຍສສາ ໂລເກ [ໂລກໍ (ສ຺ຍາ. ປີ.)], ອຸປ຺ປຊ຺ຊິ ວທຕໍ ວໂຣ.

໑໑໖. ‘‘ຕທາປິ ປພ຺ພຊິຕ຺ວານ, ພຸທ຺ຘສາສນໂກວິທາ;

ໂຊເຕຕ຺ວາ ຊິນວາກ຺ຍານິ, ຕໂຕປິ ຕິທິວໍ ຄຕາ.

໑໑໗. ‘‘ເອກຕິໍເສວ ກປ຺ປມ຺ຫິ, ເວສ຺ສຠູ ນາມ ນາຍໂກ;

ອຸປ຺ປຊ຺ຊິຕ຺ຖ ມຫາຎາຓີ, ຕທາປິ ຈ ຕເຖວຫໍ.

໑໑໘. ‘‘ປພ຺ພຊິຕ຺ວາ ຘມ຺ມຘຣາ, ໂຊຕຍິໍ ຊິນສາສນໍ;

ຄນ຺ຕ຺ວາ ມຣຸປຸຣໍ ຣມ຺ມໍ, ອນຸໂຠສິໍ ມຫາສຸຂໍ.

໑໑໙. ‘‘ອິມມ຺ຫິ ຠທ຺ທເກ ກປ຺ເປ, ກກຸສນ຺ໂຘ ຊິນຸຕ຺ຕໂມ;

ອຸປ຺ປຊ຺ຊິ ນຣສຣໂຓ [ນຣສທ຺ທູໂລ (ສີ. ສ຺ຍາ. ປີ.)], ຕທາປິ ຈ ຕເຖວຫໍ.

໑໒໐. ‘‘ປພ຺ພຊິຕ຺ວາ ມຸນິມຕໍ, ໂຊຕຍິຕ຺ວາ ຍຖາຍຸກໍ;

ຕໂຕ ຈຸຕາຫໍ ຕິທິວໍ, ອຄໍ ສຠວນໍ ຍຖາ.

໑໒໑. ‘‘ອິມສ຺ມິໍເຍວ ກປ຺ປມ຺ຫິ, ໂກຓາຄມນນາຍໂກ;

ອຸປ຺ປຊ຺ຊິ ໂລກສຣໂຓ, ອຣໂຓ ອມຕງ຺ຄໂຕ [ວທຕໍ ວໂຣ, ສພ຺ພສຕ຺ຕານມຸຕ຺ຕໂມ (ສ຺ຍາ.)].

໑໒໒. ‘‘ຕທາປິ ປພ຺ພຊິຕ຺ວານ, ສາສເນ ຕສ຺ສ ຕາທິໂນ;

ພຫຸສ຺ສຸຕາ ຘມ຺ມຘຣາ, ໂຊຕຍິໍ ຊິນສາສນໍ.

໑໒໓. ‘‘ອິມສ຺ມິໍເຍວ ກປ຺ປມ຺ຫິ, ກສ຺ສໂປ ມຸນິມຸຕ຺ຕໂມ;

ອຸປ຺ປຊ຺ຊິ ໂລກສຣໂຓ, ອຣໂຓ ມຣຓນ຺ຕຄູ.

໑໒໔. ‘‘ຕສ຺ສາປິ ນຣວີຣສ຺ສ, ປພ຺ພຊິຕ຺ວານ ສາສເນ;

ປຣິຍາປຸຏສທ຺ຘມ຺ມາ, ປຣິປຸຈ຺ຉາວິສາຣທາ.

໑໒໕. ‘‘ສຸສີລາ ລຊ຺ຊິນີ ເຈວ, ຕີສຸ ສິກ຺ຂາສຸ ໂກວິທາ;

ພຫຸໍ ຘມ຺ມກຖໍ ກຕ຺ວາ, ຍາວຊີວໍ ມຫາມຸເນ.

໑໒໖. ‘‘ເຕນ ກມ຺ມວິປາເກນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໑໒໗. ‘‘ປຈ຺ຉິເມ ຈ ຠເວ ທານິ, ຄິຣິພ຺ພຊປຸຣຸຕ຺ຕເມ;

ຊາຕາ ເສຏ຺ຐິກຸເລ ຜີເຕ, ມຫາຣຕນສຎ຺ຈເຍ.

໑໒໘. ‘‘ຍທາ ຠິກ຺ຂຸສຫສ຺ເສນ, ປຣິວຸໂຕ ໂລກນາຍໂກ;

ອຸປາຄມິ ຣາຊຄຫໍ, ສຫສ຺ສກ຺ເຂນ ວຓ຺ຓິໂຕ.

໑໒໙. ‘‘‘ທນ຺ໂຕ ທນ຺ເຕຫິ ສຫ ປຸຣາຓຊຏິເລຫິ, ວິປ຺ປມຸຕ຺ໂຕ ວິປ຺ປມຸຕ຺ເຕຫິ;

ສິງ຺ຄີນິກ຺ຂສວຓ຺ໂຓ, ຣາຊຄຫໍ ປາວິສິ ຠຄວາ’.

໑໓໐. ‘‘ທິສ຺ວາ ພຸທ຺ຘານຸຠາວໍ ຕໍ, ສຸຕ຺ວາວ ຄຸຓສຎ຺ຈຍໍ;

ພຸທ຺ເຘ ຈິຕ຺ຕໍ ປສາເທຕ຺ວາ, ປູຊຍິໍ ຕໍ ຍຖາພລໍ.

໑໓໑. ‘‘ອປເຣນ ຈ ກາເລນ, ຘມ຺ມທິນ຺ນາຍ ສນ຺ຕິເກ;

ອຄາຣາ ນິກ຺ຂມິຕ຺ວານ, ປພ຺ພຊິໍ ອນຄາຣິຍໍ.

໑໓໒. ‘‘ເກເສສຸ ຉິຊ຺ຊມາເນສຸ, ກິເລເສ ຌາປຍິໍ ອຫໍ;

ອຸຄ຺ຄຫິໍ ສາສນໍ ສພ຺ພໍ, ປພ຺ພຊິຕ຺ວາຈິເຣນຫໍ.

໑໓໓. ‘‘ຕໂຕ ຘມ຺ມມເທເສສິໍ, ມຫາຊນສມາຄເມ;

ຘມ຺ເມ ເທສິຍມານມ຺ຫິ, ຘມ຺ມາຠິສມໂຍ ອຫຸ.

໑໓໔. ‘‘ເນກປາຓສຫສ຺ສານໍ, ຕໍ ວິທິຕ຺ວາຕິວິມ຺ຫິໂຕ;

ອຠິປ຺ປສນ຺ໂນ ເມ ຍກ຺ໂຂ, ຠມິຕ຺ວານ ຄິຣິພ຺ພຊໍ.

໑໓໕. ‘‘ກິໍ ເມ ກຕາ ຣາຊຄເຫ ມນຸສ຺ສາ, ມຘຸໍ ປີຕາວ ອຈ຺ຉເຣ;

ເຍ ສຸກ຺ກໍ ນ ອຸປາສນ຺ຕິ, ເທເສນ຺ຕິໍ ອມຕໍ ປທໍ.

໑໓໖. ‘‘ຕຎ຺ຈ ອປ຺ປຏິວານີຍໍ, ອເສຈນກໂມຊວໍ;

ປິວນ຺ຕິ ມຎ຺ເຎ ສປ຺ປຎ຺ຎາ, ວລາຫກມິວທ຺ຘຄູ.

໑໓໗. ‘‘ອິທ຺ຘີສຸ ຈ ວສີ ໂຫມິ, ທິພ຺ພາຍ ໂສຕຘາຕຸຍາ;

ເຈໂຕປຣິຍຎາຓສ຺ສ, ວສີ ໂຫມິ ມຫາມຸເນ.

໑໓໘. ‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ;

ສພ຺ພາສວປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໑໓໙. ‘‘ອຕ຺ຖຘມ຺ມນິຣຸຕ຺ຕີສຸ, ປຏິຠາເນ ຕເຖວ ຈ;

ຎາຓໍ ມມ ມຫາວີຣ, ອຸປ຺ປນ຺ນໍ ຕວ ສນ຺ຕິເກ.

໑໔໐. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໑໔໑. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໔໒. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ສຸກ຺ກາ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ສຸກ຺ກາເຖຣິຍາປທານໍ ປຎ຺ຈມໍ.

ປຎ຺ຈມໍ ຠາຓວາຣໍ.