໖. ອຠິຣູປນນ຺ທາເຖຣີອປທານໍ

໑໔໓. ‘‘ເອກນວຸຕິໂຕ ກປ຺ເປ, ວິປສ຺ສີ ນາມ ນາຍໂກ;

ອຸປ຺ປຊ຺ຊິ ຈາຣຸທສ຺ສໂນ, ສພ຺ພຘມ຺ເມສຸ ຈກ຺ຂຸມາ.

໑໔໔. ‘‘ຕທາຫໍ ພນ຺ຘຸມຕິຍໍ, ອິທ຺ເຘ ຜີເຕ ມຫາກຸເລ;

ຊາຕາ ສຸຣູປາ ທຍິຕາ, ປູຊນີຍາ ຊນສ຺ສ ຈ.

໑໔໕. ‘‘ອຸປຄນ຺ຕ຺ວາ ມຫາວີຣໍ, ວິປສ຺ສິໍ ໂລກນາຍກໍ;

ຘມ຺ມໍ ສຸຓິຕ຺ວາ ສຣຓໍ, ອຸເປສິໍ ນຣນາຍກໍ.

໑໔໖. ‘‘ສີເລສຸ ສໍວຸຕາ ຫຸຕ຺ວາ, ນິພ຺ພຸເຕ ຈ ນຣຸຕ຺ຕເມ;

ຘາຕຸຖູປສ຺ສ ອຸປຣິ, ໂສຓ຺ຓຈ຺ຉຕ຺ຕມປູຊຍິໍ.

໑໔໗. ‘‘ມຸຕ຺ຕຈາຄາ ສີລວຕີ, ຍາວຊີວໍ ຕໂຕ ຈຸຕາ;

ຊຫິຕ຺ວາ ມານຸສໍ ເທຫໍ, ຕາວຕິໍສູປຄາ ອຫໍ.

໑໔໘. ‘‘ຕທາ ທສຫິ ຐາເນຫິ, ອຘິໂຠຕ຺ວານ ເສສເກ [ອຘິໂຠຕ຺ວາ ອເສສໂຕ (ສ຺ຍາ.)];

ຣູປສທ຺ເທຫິ ຄນ຺ເຘຫິ, ຣເສຫິ ຜຸສເນຫິ ຈ.

໑໔໙. ‘‘ອາຍຸນາປິ ຈ ວຓ຺ເຓນ, ສຸເຂນ ຍສສາປິ ຈ;

ຕເຖວາຘິປເຕຍ຺ເຍນ, ອຘິຄຍ຺ຫ ວິໂຣຈຫໍ.

໑໕໐. ‘‘ປຈ຺ຉິເມ ຈ ຠເວ ທານິ, ຊາຕາຫໍ ກປິລວ຺ຫເຍ;

ຘີຕາ ເຂມກສກ຺ກສ຺ສ, ນນ຺ທາ ນາມາຕິ ວິສ຺ສຸຕາ.

໑໕໑. ‘‘ອຠິຣູປສມ຺ປທມ຺ປິ [ອຠິຣຸປໍ ອຸປປທໍ (ສີ.), ອຠິຣຸປໍ ອຸປ຺ປາທໍ (ປີ.)], ອຫຸ ເມ ກນ຺ຕິສູຈກໍ;

ຍທາຫໍ ໂຍພ຺ພນປ຺ປຕ຺ຕາ, ຣູປລາວຎ຺ຎຠູສິຕາ.

໑໕໒. ‘‘ຕທາ [ຕທາ ມມຕ຺ຖໍ (ສີ.), ອິຘ ມມຕ຺ເຕ (ສ຺ຍາ. ກ.)] ມຕ຺ເຖ ສກ຺ຍານໍ, ວິວາໂທ ສຸມຫາ ອຫຸ;

ປພ຺ພາເຊສິ ຕໂຕ ຕາໂຕ, ມາ ສກ຺ຍາ ວິນສ຺ສິໍສຸຕິ.

໑໕໓. ‘‘ປພ຺ພຊິຕ຺ວາ ຕຖາຄຕໍ, ຣູປເທສ຺ສິໍ ນຣຸຕ຺ຕມໍ;

ສຸຕ຺ວານ ໂນປຄຈ຺ຉາມິ, ມມ ຣູເປນ ຄພ຺ພິຕາ.

໑໕໔. ‘‘ໂອວາທມ຺ປິ ນ ຄຈ຺ຉາມິ, ພຸທ຺ຘທສ຺ສນຠີຣຸຕາ;

ຕທາ ຊິໂນ ອຸປາເຍນ, ອຸປເນຕ຺ວາ ສສນ຺ຕິກໍ.

໑໕໕. ‘‘ຕິສ຺ສິຕ຺ຖິໂຍ [ຕິສ຺ໂສ ຖີໂຍ (ສີ. ປີ.)] ນິທສ຺ເສສິ, ອິທ຺ຘິຍາ ມຄ຺ຄໂກວິໂທ;

ອຈ຺ຉຣາຣູປສທິສໍ, ຕຣຸຓິໍ ຊຣິຕໍ [ຊຣິກໍ (ສ຺ຍາ. ກ.)] ມຕໍ.

໑໕໖. ‘‘ຕາໂຍ ທິສ຺ວາ ສຸສໍວິຄ຺ຄາ, ວິຣຕ຺ຕາເສ ກເຬວເຣ;

ອຏ຺ຐາສິໍ ຠວນິພ຺ພິນ຺ທາ, ຕທາ ມໍ ອາຫ ນາຍໂກ.

໑໕໗. ‘‘‘ອາຕຸຣໍ ອສຸຈິໍ ປູຕິໍ, ປສ຺ສ ນນ຺ເທ ສມຸສ຺ສຍໍ;

ອຸຄ຺ຆຣນ຺ຕໍ ປຄ຺ຆຣນ຺ຕໍ, ພາລານໍ ອຠິນນ຺ທິຕໍ.

໑໕໘. ‘‘‘ອສຸຠາຍ ຈິຕ຺ຕໍ ຠາເວຫິ, ເອກຄ຺ຄໍ ສຸສມາຫິຕໍ;

ຍຖາ ອິທໍ ຕຖາ ເອຕໍ, ຍຖາ ເອຕໍ ຕຖາ ອິທໍ.

໑໕໙. ‘‘‘ເອວເມຕໍ ອເວກ຺ຂນ຺ຕີ, ຣຕ຺ຕິນ຺ທິວມຕນ຺ທິຕາ;

ຕໂຕ ສກາຍ ປຎ຺ຎາຍ, ອຠິນິພ຺ພິຊ຺ຌ ວຈ຺ຉສິ’.

໑໖໐. ‘‘ຕສ຺ສາ ເມ ອປ຺ປມຕ຺ຕາຍ, ວິຈຣນ຺ຕິຍາ [ວິຈຣນ຺ຕ຺ວາຘ (ສີ.), ວິຈິນນ຺ຕີຘ (ສ຺ຍາ. ປີ.)] ໂຍນິໂສ;

ຍຖາຠູຕໍ ອຍໍ ກາໂຍ, ທິຏ຺ໂຐ ສນ຺ຕຣພາຫິໂຣ.

໑໖໑. ‘‘ອຖ ນິພ຺ພິນ຺ທຫໍ ກາເຍ, ອຊ຺ຌຕ຺ຕຎ຺ຈ ວິຣຊ຺ຊຫໍ;

ອປ຺ປມຕ຺ຕາ ວິສໍຍຸຕ຺ຕາ, ອຸປສນ຺ຕາມ຺ຫິ ນິພ຺ພຸຕາ.

໑໖໒. ‘‘ອິທ຺ຘີສຸ ຈ ວສີ ໂຫມິ, ທິພ຺ພາຍ ໂສຕຘາຕຸຍາ;

ເຈໂຕປຣິຍຎາຓສ຺ສ, ວສີ ໂຫມິ ມຫາມຸເນ.

໑໖໓. ‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ;

ສພ຺ພາສວປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໑໖໔. ‘‘ອຕ຺ຖຘມ຺ມນິຣຸຕ຺ຕີສຸ, ປຏິຠາເນ ຕເຖວ ຈ;

ຎາຓໍ ມມ ມຫາວີຣ, ອຸປ຺ປນ຺ນໍ ຕວ ສນ຺ຕິເກ.

໑໖໕. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໑໖໖. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໖໗. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອຠິຣູປນນ຺ທາ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ອຠິຣູປນນ຺ທາເຖຣິຍາປທານໍ ຉຏ຺ຐໍ.