໔. ສິງ຺ຄາລມາຕຸເຖຣີອປທານໍ

໘໒. ‘‘ປທຸມຸຕ຺ຕໂຣ ນາມ ຊິໂນ, ສພ຺ພຘມ຺ມານ ປາຣຄູ;

ອິໂຕ ສຕສຫສ຺ສມ຺ຫິ, ກປ຺ເປ ອຸປ຺ປຊ຺ຊິ ນາຍໂກ.

໘໓. ‘‘ຕທາຫໍ ຫໍສວຕິຍໍ, ຊາຕາມຈ຺ຈກຸເລ ອຫຸໍ;

ນານາຣຕນປຊ຺ໂຊເຕ, ອິທ຺ເຘ ຜີເຕ ມຫທ຺ຘເນ.

໘໔. ‘‘ປິຕຸນາ ສຫ ຄນ຺ຕ຺ວານ, ມຫາຊນປຸຣກ຺ຂຕາ;

ຘມ຺ມໍ ພຸທ຺ຘສ຺ສ ສຸຕ຺ວານ, ປພ຺ພຊິໍ ອນຄາຣິຍໍ.

໘໕. ‘‘ປພ຺ພຊິຕ຺ວານ ກາເຍນ, ປາປກມ຺ມໍ ວິວຊ຺ຊຍິໍ;

ວຈີທຸຈ຺ຈຣິຕໍ ຫິຕ຺ວາ, ອາຊີວໍ ປຣິໂສຘຍິໍ.

໘໖. ‘‘ພຸທ຺ເຘ ປສນ຺ນາ ຘມ຺ເມ ຈ, ສງ຺ເຆ ຈ ຕິພ຺ພຄາຣວາ;

ສທ຺ຘມ຺ມສ຺ສວເນ ຍຸຕ຺ຕາ, ພຸທ຺ຘທສ຺ສນລາລສາ [ພຸທ຺ຘທສ຺ສນສາລຍາ (ສ຺ຍາ.)].

໘໗. ‘‘ອຄ຺ຄໍ ສທ຺ຘາຘິມຸຕ຺ຕານໍ, ອສ຺ໂສສິໍ ຠິກ຺ຂຸນິໍ ຕທາ;

ຕໍ ຐານໍ ປຕ຺ຖຍິຕ຺ວານ, ຕິສ຺ໂສ ສິກ຺ຂາ ອປູຣຍິໍ.

໘໘. ‘‘ຕໂຕ ມໍ ສຸຄໂຕ ອາຫ, ກຣຸຓານຸຄຕາສໂຍ;

‘ຍສ຺ສ ສທ຺ຘາ ຕຖາຄເຕ, ອຈລາ ສຸປ຺ປຕິຏ຺ຐິຕາ;

ສີລຎ຺ຈ ຍສ຺ສ ກລ຺ຍາຓໍ, ອຣິຍກນ຺ຕໍ ປສໍສິຕໍ.

໘໙. ‘‘‘ສງ຺ເຆ ປສາໂທ ຍສ຺ສຕ຺ຖິ, ອຸຊຸຠູຕຎ຺ຈ ທສ຺ສນໍ;

ອທລິທ຺ໂທຕິ ຕໍ ອາຫຸ, ອໂມຆໍ ຕສ຺ສ ຊີວິຕໍ.

໙໐. ‘‘‘ຕສ຺ມາ ສທ຺ຘຎ຺ຈ ສີລຎ຺ຈ, ປສາທໍ ຘມ຺ມທສ຺ສນໍ;

ອນຸຍຸຎ຺ເຊຖ ເມຘາວີ, ສຣໍ ພຸທ຺ຘານ [ພຸທ຺ຘານຸສາສນໍ (ສີ.), ພຸທ຺ຘານໍ ສາສນໍ (ສ຺ຍາ.)] ສາສນໍ’.

໙໑. ‘‘ຕໍ ສຸຕ຺ວາຫໍ ປມຸທິຕາ, ອປຸຈ຺ຉິໍ ປຓິຘິໍ ມມ;

ຕທາ ອໂນໂມ ອມິໂຕ, ພ຺ຍາກຣິຕ຺ຖ ວິນາຍໂກ;

‘ພຸທ຺ເຘ ປສນ຺ນາ ກລ຺ຍາຓີ, ລຈ຺ຉເສ ຕໍ ສຸປຕ຺ຖິຕໍ.

໙໒. ‘‘‘ສຕສຫສ຺ສິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

໙໓. ‘‘‘ຕສ຺ສ ຘມ຺ເມສຸ ທາຍາທາ, ໂອຣສາ ຘມ຺ມນິມ຺ມິຕາ;

ສິງ຺ຄາລກສ຺ສ [ສິຄາລກສ຺ສ (ສີ. ປີ.)] ມາຕາຕິ, ເຫສ຺ສຕິ ສຕ຺ຖຸ ສາວິກາ’.

໙໔. ‘‘ຕໍ ສຸຕ຺ວາ ມຸທິຕາ ຫຸຕ຺ວາ, ຍາວຊີວໍ ຕທາ ຊິນໍ;

ເມຕ຺ຕຈິຕ຺ຕາ ປຣິຈຣິໍ, ປຏິປຕ຺ຕີຫິ ນາຍກໍ.

໙໕. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໙໖. ‘‘ປຈ຺ຉິເມ ຈ ຠເວ ທານິ, ຄິຣິພ຺ພຊປຸຣຸຕ຺ຕເມ;

ຊາຕາ ເສຏ຺ຐິກຸເລ ຜີເຕ, ມຫາຣຕນສຎ຺ຈເຍ.

໙໗. ‘‘ປຸຕ຺ໂຕ ສິງ຺ຄາລໂກ ນາມ, ມມາສິ ວິປເຖ ຣໂຕ;

ທິຏ຺ຐິຄຫນປກ຺ຂນ຺ໂທ, ທິສາປູຊນຕປ຺ປໂຣ.

໙໘. ‘‘ນານາທິສາ ນມສ຺ສນ຺ຕໍ [ນມສ຺ສຕິ (ສ຺ຍາ.)], ປິຓ຺ຑາຍ ນຄຣໍ ວຊໍ;

ຕໍ ທິສ຺ວາ ໂອວທີ ພຸທ຺ໂຘ, ມຄ຺ເຄ ຐຕ຺ວາ ວິນາຍໂກ.

໙໙. ‘‘ຕສ຺ສ ເທສຍໂຕ ຘມ຺ມໍ, ປນາໂທ ວິມ຺ຫໂຍ ອຫຸ;

ທ຺ເວໂກຏິນຣນາຣີນໍ, ຘມ຺ມາຠິສມໂຍ ອຫຸ.

໑໐໐. ‘‘ຕທາຫໍ ປຣິສໍ ຄນ຺ຕ຺ວາ, ສຸຕ຺ວາ ສຸຄຕຠາສິຕໍ;

ໂສຕາປຕ຺ຕິຜລໍ ປຕ຺ຕາ, ປພ຺ພຊິໍ ອນຄາຣິຍໍ.

໑໐໑. ‘‘ນ ຈິເຣເນວ ກາເລນ, ພຸທ຺ຘທສ຺ສນລາລສາ;

ອນຸສ຺ສຕິໍ ຕໍ ຠາເວຕ຺ວາ, ອຣຫຕ຺ຕມປາປຸຓິໍ.

໑໐໒. ‘‘ທສ຺ສນຕ຺ຖາຍ ພຸທ຺ຘສ຺ສ, ສພ຺ພທາ ຈ ວຊາມຫໍ;

ອຕິຕ຺ຕາເຍວ ປສ຺ສາມິ, ຣູປໍ ນຍນນນ຺ທນໍ.

໑໐໓. ‘‘ສພ຺ພປາຣມິສມ຺ຠູຕໍ, ລກ຺ຂີນິລຍນໍ ວຣໍ;

ຣູປໍ ສພ຺ພສຸຠາກິຓ຺ຓໍ, ອຕິຕ຺ຕາ ວິຫຣາມຫໍ.

໑໐໔. ‘‘ຊິໂນ ຕສ຺ມິໍ ຄຸເຓ ຕຸຏ຺ໂຐ, ເອຕທຄ຺ເຄ ຐເປສິ ມໍ;

ສິງ຺ຄາລກສ຺ສ ຍາ ມາຕາ, ອຄ຺ຄາ ສທ຺ຘາຘິມຸຕ຺ຕິກາ [ສໍຆວິມຸຕ຺ຕິກາ (ປີ.), ມມາຘິມຸຕ຺ຕິກາ (ກ.)].

໑໐໕. ‘‘ອິທ຺ຘີສຸ ຈ ວສີ ໂຫມິ, ທິພ຺ພາຍ ໂສຕຘາຕຸຍາ;

ເຈໂຕປຣິຍຎາຓສ຺ສ, ວສີ ໂຫມິ ມຫາມຸນິ.

໑໐໖. ‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ;

ສພ຺ພາສວປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໑໐໗. ‘‘ອຕ຺ຖຘມ຺ມນິຣຸຕ຺ຕີສຸ, ປຏິຠາເນ ຕເຖວ ຈ;

ຎາຓໍ ມມ ມຫາວີຣ, ອຸປ຺ປນ຺ນໍ ຕວ ສນ຺ຕິເກ.

໑໐໘. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໑໐໙. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໑໑໐. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ສິງ຺ຄາລມາຕາ ຠິກ຺ຂຸນີ ອິມາ ຄາຖາໂຍ ອຠາສິຕ຺ຖາຕິ.

ສິງ຺ຄາລມາຕຸເຖຣິຍາປທານໍ ຈຕຸຕ຺ຖໍ.