໓. ອຸປ຺ປລທາຍິກາເຖຣີອປທານໍ

໕໗. ‘‘ນຄເຣ ອຣຸຓວຕິຍາ, ອຣຸໂຓ ນາມ ຂຕ຺ຕິໂຍ;

ຕສ຺ສ ຣຎ຺ໂຎ ອຫຸໍ ຠຣິຍາ, ເອກຊ຺ຌໍ ຈາຣຍາມຫໍ.

໕໘. ‘‘ຣໂຫຄຕາ ນິສີທິຕ຺ວາ, ເອວໍ ຈິນ຺ເຕສຫໍ ຕທາ;

‘ກຸສລໍ ເມ ກຕໍ ນຕ຺ຖິ, ອາທາຍ ຄມິຍໍ ມມ.

໕໙. ‘‘‘ມຫາຠິຕາປໍ ກຏຸກໍ, ໂຆຣຣູປໍ ສຸທາຣຸຓໍ;

ນິຣຍໍ ນູນ ຄຈ຺ຉາມິ, ເອຕ຺ຖ ເມ ນຕ຺ຖິ ສໍສໂຍ’.

໖໐. ‘‘ເອວາຫໍ ຈິນ຺ຕຍິຕ຺ວານ, ປຫໍເສຕ຺ວານ ມານສໍ;

ຣາຊານໍ ອຸປຄນ຺ຕ຺ວານ, ອິທໍ ວຈນມພ຺ຣວິໍ.

໖໑. ‘‘‘ອິຕ຺ຖີ ນາມ ມຍໍ ເທວ, ປຸຣິສານິຕ຺ຕຣາ ອຫຸ [ປຸຣິສານຸຄຕາ ສທາ (ສີ.), ປຸຣິສາ ນ ຠວາມ ໂນ (ສ຺ຍາ.), ປຸຣິສານໍ ຠຣາ ມຍໍ (ປີ.)];

ເອກໍ ເມ ສມຓໍ ເທຫິ, ໂຠຊຍິສ຺ສາມິ ຂຕ຺ຕິຍ’.

໖໒. ‘‘ອທາສິ ເມ ຕທາ ຣາຊາ, ສມຓໍ ຠາວິຕິນ຺ທ຺ຣິຍໍ;

ຕສ຺ສ ປຕ຺ຕໍ ຄເຫຕ຺ວານ, ປຣມນ຺ເນນ ປູຣຍິໍ.

໖໓. ‘‘ປູເຣຕ຺ວາ ປຣມໍ ອນ຺ນໍ, ສຫ ສຸຄນ຺ຘເລປນໍ;

ມຫາເຈເລນ ຉາທິຕ຺ວາ, ອທາສິໍ ຕຸຏ຺ຐມານສາ.

໖໔. ‘‘ເຕນ ກມ຺ເມນ ສຸກເຕນ, ເຈຕນາປຓິຘີຫິ ຈ;

ຊຫິຕ຺ວາ ມານຸສໍ ເທຫໍ, ຕາວຕິໍສມຄຈ຺ຉຫໍ.

໖໕. ‘‘ສຫສ຺ສເທວຣາຊູນໍ, ມເຫສິຕ຺ຕມກາຣຍິໍ;

ສຫສ຺ສຈກ຺ກວຕ຺ຕີນໍ, ມເຫສິຕ຺ຕມກາຣຍິໍ.

໖໖. ‘‘ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ;

ນານາວິຘໍ ພຫຸໍ ອຎ຺ຎໍ, ຕສ຺ສ ກມ຺ມຜລໍ ຕໂຕ.

໖໗. ‘‘ອຸປ຺ປລສ຺ເສວ ເມ ວຓ຺ໂຓ, ອຠິຣູປາ ສຸທສ຺ສນາ;

ອິຕ຺ຖິສພ຺ພງ຺ຄສມ຺ປນ຺ນາ, ອຠິຊາຕາ ຊຸຕິນ຺ຘຣາ.

໖໘. ‘‘ປຈ຺ຉິເມ ຠເວ ສມ຺ປຕ຺ເຕ, ອຊາຍິໍ ສາກິເຍ ກຸເລ;

ນາຣີສຫສ຺ສປາໂມກ຺ຂາ, ສຸທ຺ໂຘທນສຸຕສ຺ສຫໍ.

໖໙. ‘‘ນິພ຺ພິນ຺ທິຕ຺ວາ ອຄາເຣຫໍ, ປພ຺ພຊິໍ ອນຄາຣິຍໍ;

ສຕ຺ຕມີຣຕ຺ຕິສມ຺ປຕ຺ຕາ [ສຕ຺ຕມິໍຣຕ຺ຕິມປຕ຺ຕາ (ສີ. ສ຺ຍາ. ປີ.)], ຈຕຸສຈ຺ຈມປາປຸຓິໍ.

໗໐. ‘‘ຈີວຣໍ ປິຓ຺ຑປາຕຎ຺ຈ, ປຈ຺ຈຍໍ ສຍນາສນໍ;

ປຣິເມຕຸໍ ນ ສກ຺ໂກມິ, ປິຓ຺ຑປາຕສ຺ສິທໍ ຜລໍ.

໗໑. ‘‘ຍໍ ມຍ຺ຫໍ ປູຣິຕໍ ກມ຺ມໍ, ກຸສລໍ ສຣເສ ມຸນິ;

ຕຸຍ຺ຫຕ຺ຖາຍ ມຫາວີຣ, ປຣິຈຕ຺ຕໍ ພຫຸໍ ມຍາ.

໗໒. ‘‘ເອກຕ຺ຕິໍເສ ອິໂຕ ກປ຺ເປ, ຍໍ ທານມທທິໍ ຕທາ;

ທຸຄ຺ຄຕິໍ ນາຠິຊານາມິ, ປິຓ຺ຑປາຕສ຺ສິທໍ ຜລໍ.

໗໓. ‘‘ທ຺ເວ ຄຕິໂຍ ປຊານາມິ, ເທວຕ຺ຕໍ ອຖ ມານຸສໍ;

ອຎ຺ຎໍ ຄຕິໍ ນ ຊານາມິ, ປິຓ຺ຑປາຕສ຺ສິທໍ ຜລໍ.

໗໔. ‘‘ອຸຈ຺ເຈ ກຸເລ ປຊາຍາມິ, ມຫາສາເລ [ຕໂຍ ສາລ (ກ.)] ມຫທ຺ຘເນ;

ອຎ຺ເຎ ກຸເລ ນ ຊາຍາມິ, ປິຓ຺ຑປາຕສ຺ສິທໍ ຜລໍ.

໗໕. ‘‘ຠວາຠເວ ສໍສຣິຕ຺ວາ, ສຸກ຺ກມູເລນ ໂຈທິຕາ;

ອມນາປໍ ນ ປສ຺ສາມິ, ໂສມນສ຺ສກຕໍ ຜລໍ.

໗໖. ‘‘ອິທ຺ຘີສຸ ຈ ວສີ ໂຫມິ, ທິພ຺ພາຍ ໂສຕຘາຕຸຍາ;

ເຈໂຕປຣິຍຎາຓສ຺ສ, ວສີ ໂຫມິ ມຫາມຸເນ.

໗໗. ‘‘ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ;

ສພ຺ພາສວປຣິກ຺ຂີຓາ, ນຕ຺ຖິ ທານິ ປຸນພ຺ຠໂວ.

໗໘. ‘‘ອຕ຺ຖຘມ຺ມນິຣຸຕ຺ຕີສຸ, ປຏິຠາເນ ຕເຖວ ຈ;

ຎາຓໍ ມມ ມຫາວີຣ, ອຸປ຺ປນ຺ນໍ ຕວ ສນ຺ຕິເກ.

໗໙. ‘‘ກິເລສາ ຌາປິຕາ ມຍ຺ຫໍ…ເປ… ວິຫຣາມິ ອນາສວາ.

໘໐. ‘‘ສ຺ວາຄຕໍ ວຕ ເມ ອາສິ…ເປ… ກຕໍ ພຸທ຺ຘສ຺ສ ສາສນໍ.

໘໑. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ອຸປ຺ປລທາຍິກາ ຠິກ຺ຂຸນີ ຠຄວໂຕ ສມ຺ມຸຂາ ອິມາ ຄາຖາໂຍ ອຠາສິຕ຺ຖາຕິ.

ອຸປ຺ປລທາຍິກາເຖຣິຍາປທານໍ ຕຕິຍໍ.