໙. ຍໂສຘຣາປມຸຂທສຠິກ຺ຂຸນີສຫສ຺ສອປທານໍ

໔໑໑. ‘‘ກປ຺ເປ ຈ ສຕສຫສ຺ເສ, ຈຕຸໂຣ ຈ ອສງ຺ຂິເຍ;

ທີປງ຺ກໂຣ ນາມ ຊິໂນ, ອຸປ຺ປຊ຺ຊິ ໂລກນາຍໂກ.

໔໑໒. ‘‘ທີປງ຺ກໂຣ ມຫາວີໂຣ, ວິຍາກາສິ ວິນາຍໂກ;

ສຸເມຘຎ຺ຈ ສຸມິຕ຺ຕຎ຺ຈ, ສມານສຸຂທຸກ຺ຂຕໍ.

໔໑໓. ‘‘ສເທວກຎ຺ຈ ປສ຺ສນ຺ໂຕ, ວິຈຣນ຺ໂຕ ສເທວກໍ;

ເຕສໍ ປກິຕ຺ຕເນ ອມ຺ເຫ, ອຸປຄມ຺ມ ສມາຄມໍ.

໔໑໔. ‘‘ອມ຺ຫໍ ສພ຺ພປຕິ ໂຫຫິ [ສພ຺ພາ ປຕີ ໂຫນ຺ຕິ (ປີ.)], ອນາຄຕສມາຄເມ;

ສພ຺ພາວ ຕຸຍ຺ຫໍ ຠຣິຍາ, ມນາປາ ປິຍວາທິກາ.

໔໑໕. ‘‘ທານໍ ສີລມຍໍ ສພ຺ພໍ, ຠາວນາ ຈ ສຸຠາວິຕາ;

ທີຆຣຕ຺ຕຎ຺ຈ ໂນ [ທີຆຣຕ຺ຕມິທໍ (ສ຺ຍາ. ກ.)] ສພ຺ພໍ, ປຣິຈ຺ຈຕ຺ຕໍ ມຫາມຸເນ.

໔໑໖. ‘‘ຄນ຺ຘໍ ວິເລປນໍ ມາລໍ, ທີປຎ຺ຈ ຣຕນາມຍໍ;

ຍໍກິຎ຺ຈິ ປຕ຺ຖິຕໍ ສພ຺ພໍ, ປຣິຈ຺ຈຕ຺ຕໍ ມຫາມຸນິ.

໔໑໗. ‘‘ອຎ຺ຎໍ ວາປິ ກຕໍ ກມ຺ມໍ, ປຣິໂຠຄຎ຺ຈ ມານຸສໍ;

ທີຆຣຕ຺ຕຎ຺ຫິ ໂນ ສພ຺ພໍ, ປຣິຈ຺ຈຕ຺ຕໍ ມຫາມຸນິ.

໔໑໘. ‘‘ອເນກຊາຕິສໍສາຣໍ, ພຫຸໍ ປຸຎ຺ຎມ຺ປິ ໂນ ກຕໍ;

ອິສ຺ສຣມນຸໂຠຕ຺ວານ, ສໍສຣິຕ຺ວາ ຠວາຠເວ.

໔໑໙. ‘‘ປຈ຺ຉິເມ ຠເວ ສມ຺ປຕ຺ເຕ, ສກ຺ຍປຸຕ຺ຕນິເວສເນ;

ນານາກຸລູປປນ຺ນາໂຍ, ອຈ຺ຉຣາ ກາມວຓ຺ຓິນີ.

໔໒໐. ‘‘ລາຠຄ຺ເຄນ ຍສໍ ປຕ຺ຕາ, ປູຊິຕາ ສພ຺ພສກ຺ກຕາ;

ລາຠິໂຍ ອນ຺ນປານານໍ, ສທາ ສມ຺ມານິຕາ ມຍໍ.

໔໒໑. ‘‘ອຄາຣໍ ປຊຫິຕ຺ວານ, ປພ຺ພຊິມ຺ຫນຄາຣິຍໍ;

ອຑ຺ຒມາເສ ອສມ຺ປຕ຺ເຕ, ສພ຺ພາ ປຕ຺ຕາມ຺ຫ ນິພ຺ພຸຕິໍ.

໔໒໒. ‘‘ລາຠິໂຍ ອນ຺ນປານານໍ, ວຕ຺ຖເສນາສນານິ ຈ;

ອຸເປນ຺ຕິ ປຈ຺ຈຍາ ສພ຺ເພ, ສທາ ສກ຺ກຕປູຊິຕາ.

໔໒໓. ‘‘ກິເລສາ ຌາປິຕາ ອມ຺ຫໍ…ເປ… ວິຫຣາມ ອນາສວາ.

໔໒໔. ‘‘ສ຺ວາຄຕໍ ວຕ ໂນ ອາສິ…ເປ… ກຕໍ ພຸທ຺ຘສ຺ສ ສາສນໍ.

໔໒໕. ‘‘ປຏິສມ຺ຠິທາ ຈຕສ຺ໂສ…ເປ… ກຕໍ ພຸທ຺ຘສ຺ສ ສາສນໍ’’.

ອິຕ຺ຖໍ ສຸທໍ ຍໂສຘຣາປມຸຂານິ ທສຠິກ຺ຂຸນີສຫສ຺ສານິ ຠຄວໂຕ ສມ຺ມຸຂາ ອິມາ ຄາຖາໂຍ ອຠາສິຕ຺ຖາຕິ.

ຍໂສຘຣາປມຸຂທສຠິກ຺ຂຸນີສຫສ຺ສາປທານໍ ນວມໍ.